បរទេស៖ ទឹកជំនន់ភ្លាមៗបង្កឱ្យមានការរអិលបាក់ដីបណ្ដាលឱ្យមនុស្សយ៉ាងហោចណាស់ ១២០ នាក់បានបាត់បង់ជីវិតភ្លាមៗនៅ Kinshasa សាធារណរដ្ឋប្រជាធិបតេយ្យនៃប្រទេសកុងហ្គោ។

ទីភ្នាក់ងារសារព័ត៌មានបរទេសរាយការណ៍ពីទីក្រុង Kinshasa  សាធារណរដ្ឋប្រជាធិបតេយ្យកុងហ្គោ នាថ្ងៃទី១៤ ខែធ្នូ ឆ្នាំ២០២២នេះថា ការិយាល័យគ្រប់គ្រងគ្រោះមហន្តរាយនៃសាធារណៈរដ្ឋប្រជាធិបតេយ្យកុងហ្គោ បានរាយការណ៍ពីទឹកជំនន់ភ្លាមៗ និងការរអិលបាក់ដីបណ្ដាលឱ្យមានភ្លៀងធ្លាក់ខ្លាំងក្នុងសប្តាហ៍នេះ។

ដែលជាលទ្ធផលវាបានបង្កបញ្ហាដល់តំបន់ជាច្រើននៅ Kinshasa ហើយបានបណ្តាលឲ្យមានអ្នកស្លាប់យ៉ាងហោចណាស់ ១២០ នាក់ ប៉ុន្តែគេជឿថាមានចំនួនអ្ន​កស្លាប់ខ្ពស់ជាងនេះទៅទៀត ព្រោះថាចំនួនជនរងគ្រោះនឹងកើនឡើងដោយមានអ្នកដែលបានបាត់ខ្លួន។

បញ្ហាខាងលើបណ្ដាលមកពីការអភិវឌ្ឍន៍យ៉ាងឆាប់រហ័សនៃតំបន់ទីក្រុង ប៉ុន្តែការប្រឆាំងនឹងផែនការទីក្រុង ដែលមិនមានប្រសិទ្ធភាព ជាលទ្ធផលទីក្រុង Kinshasa ប្រឈមមុខនឹងការកើនឡើងយ៉ាងខ្លាំងនៃហានិភ័យ ជាមួយនឹងទឹកជំនន់ភ្លាមៗ និងការបាក់ដី។

គួរបញ្ជាក់ថាកាលពី ឆ្នាំ ២០១៩ ពេលមានភ្លៀងធ្លាក់ខ្លាំង មនុស្សយ៉ាងហោចណាស់ ៣៩ នាក់បានស្លាប់ដោយសារទឹកជំនន់ភ្លាមៗ នៅ Kinshasaនេះដូចគ្នា៕ ប្រភព៖ Dailynews

បរទេស៖ ​ផ្ទុះការចាប់អារម្មណ៍ខ្លាំង ក្រោយពីលេចវត្តមាន ម៉ៃ ឃឺ ចាក សិន (Michael Jackson) ទីពីរដែលលោកទទួលបានការគាំទ្រយ៉ាងពេញទំហឹងពីសំណាក់ប្រជាជននៅសហរដ្ឋអាមេរិក ជាពិសេសក្នុងទ្វីបអឺរ៉ុប ​រហូតពួកគេទទួចឱ្យបុរសរូបនេះទៅសម្ដែងក្នុងប្រទេស ដោយប្រាក់ចំណូលដែលទទួលបានពីការសម្ដែងជាលើកដំបូងរបស់លោកនៅទីនោះរហូតទៅដល់៥០ម៉ឺនដុល្លារ។

ពិតណាស់កំពូលតារាចម្រៀងប៉ុប ម៉ៃ ឃឺ ចាក សិន (Michael Jackson) បានក្លាយជាបុគ្គលដ៏មានឥទ្ធិពលនៅទូទាំងពិភលោកជាមួយនឹងទឹកដមសម្លែងដ៏ពិរោះ ​និងស្ទាយរាំ ក៏ដូចជាស្ទាយស្លៀកពាក់យ៉ាងទាក់ទាញដែលមិនមានអ្នកណាអាចធ្វើបានដូច ព្រមបានការគាំទ្រយ៉ាងខ្លាំងក្នុងអំឡុងទតវត្សទី២០ ។

ទោះជាយ៉ាងណាតារាចម្រៀង ម៉ៃ ឃឺ ចាក សិន (Michael Jackson) បានទទួលមរណៈភាព ក្នុងឆ្នាំ ២០០៩ ដែលធ្វើឱ្យមហាជនមានការសោកស្ដាយជាខ្លាំងជាមួយនឹងការបាត់បង់តារាចម្រៀងដ៏ឆ្នើមរូបនេះ រហូតមានមនុស្សជាច្រើនបានព្យាយាមចំលងស្ទាយ នៃការច្រៀង រាំ ស្លៀកពាក់ រហូតមានអ្នកខ្លះបានទៅវះកាត់មុខមាត់ឱ្យដូចទៅនឹងលោកផងដែរ ប៉ុន្តែនៅតែមិនទទួលបានភាពល្បីល្បាញដូចម្ចាស់ដើម។

តែអ្វីដែលគួរឱ្យចាប់អារម្មណ៍ និងភ្ញាក់ផ្អើលជាខ្លាំង ក្រោយពីបាត់បងតារាចម្រៀងដើមជាច្រើនឆ្នាំ ស្រាប់តែកន្លងមកថ្មីៗនេះ បានលេចវត្តមានរបស់​បុរសម្នាក់ដែលមានមុខមាត់ រូបរាង និងទេពកោសល្យដូចទៅនឹងតារាចម្រៀងលោក ម៉ៃ ឃឺ ចាក សិន (Michael Jackson)ស្ទើរគ្មានចន្លោះ។

ជាមួយគ្នានោះការលេចវត្តមាន ម៉ៃ ឃឺ ចាក សិន (Michael Jackso) ថ្មីមួយនេះត្រូវបានគេឱ្យដឹងថា លោកគឺជាជនជាតិចិន មានឈ្មោះដើម អាន ឡាន (An Lan) ទោះជាយ៉ាងណាការមានវត្តមាននៅក្នុងប្រទេសចិន លោកមិនសូវទទួលបានការគាំទ្រខ្លាំងនោះឡើយ។

ប៉ុន្តែបើឈានចូលក្នុងទឹកដីអាមេរិកអាន ឡាន គឺ ជាបុគ្គលដ៏ល្បីមួយរូប រហូតនាពេលបច្ចុប្ប​ន្ននេះ ទទួលបានការគាំទ្រយ៉ាងភ្លូកទឹកភ្លូកដីនៅអាមេរិក ជាពិសេសក្នុងតំបន់នៃទី្វបអឺរ៉ុប ដោយហ្វេនៗអ្នកធ្លាប់គាំទ្រលោក ម៉ៃ ឃឺ ចាក សិន (Michael Jackson) ពួកគេតែងតែទទូចឱ្យលោកទៅសម្ដែងនៅទីនោះយ៉ាងខ្លាំង ហើយបន្ទាប់ពីបានជួបលោកដោយផ្ទាល់ ក៏មានអ្នកគាំទ្រមួយចំនួនខ្លះបានសម្រក់ទឹកភ្លែក និងបង្ហាញពីក្ដីស្រលាញ់ទៅកាន់លោកជាខ្លាំង។

ក្នុងនោះផងដែរការទៅសម្ដែងជាលើកដំបូងរបស់ អាន ឡាន ទទួលបាន ៥០ ម៉ឺនដុល្លារពីអ្នកឧបត្ថម និងអ្នកគាំទ្រដែលវាជាចំនួនដ៏ច្រើនមួយក្នុងការសម្ដែងនេះ ហើយជាបន្តបន្ទាប់មកលោកក៏បានទទួលការអញ្ជើញទៅសម្ដែងនៅអឺរ៉ុបជាច្រើនលើកច្រើនសារជាមន្តបន្ទាប់។

ពិតណាស់ដំបូងឡើយ អាន ឡាន គឺជាអ្នកក្រីក្រម្នាក់ ប៉ុន្តែបន្ទាប់ពីផ្ទុះភាពល្បីល្បាញលោកក៏ក្លាយជាមហាសេដ្ឋីមានទាំងយន្តហោះផ្ទាល់ខ្លួន មានឡានទំណើបៗ ព្រមទាំងមានអ្នកការពារឈ្វេងស្ដាំផងដែរ៕

អន្តរជាតិ៖ មេដឹកនាំប្រទេសមានសេដ្ឋកិច្ចជឿនលឿនទាំង៧​(G7) នៅថ្ងៃទី១២ ខែធ្នូ ឯកភាពបង្កើតប្រព័ន្ធហិរញ្ញវត្ថុមួយដើម្បីចាក់បញ្ចូលលុយជំនួយទាំងរយៈពេលវែង និងរយៈពេលខ្លីដល់អ៊ុយក្រែន។ ទន្ទឹមនេះនឹងអរគុណមេដឹកនាំG7 ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី អរគុណក្រុមប្រទេស G7 ចំពោះកាយវិការនេះ តែក៏ឆ្លៀតសុំជំនួយយោធាភ្លាមៗជាមុនសិនដើម្បីយកទៅតតាំងនឹងរុស្ស៊ី។

នាជំនួបតាមប្រព័ន្ធអនឡាញជាមួយប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី នៅថ្ងៃទី១២ ខែធ្នូមេដឹកនាំប្រទេសមានសេដ្ឋកិច្ចជឿនលឿនទាំង៧ (G7) ប្តេជ្ញាគាំទ្រអ៊ុយក្រែនប្រឆាំងនឹងការវាយប្រហាររបស់រុស្ស៊ីទាល់តែដល់ទីបញ្ចប់ ហើយនៅខែក្រោយគ្រោងនឹងរៀបចំកិច្ចប្រជុំស្តីពីគោលនយោបាយសម្របសម្រួលដល់ម្ចាស់ជំនួយសម្រាប់អ៊ុយក្រែន។

បើតាមអធិការបតីអាល្លឺម៉ង់ អូឡាហ្វ ស្ហូល ដែលបច្ចុប្បន្នជាប្រធាន G7 បញ្ជាក់ថា ផែនការនេះមានបំណងជួយអ៊ុយក្រែនទទួលបានហិរញ្ញវត្ថុដើម្បីបន្តដង្ហើម និងកិច្ចប្រឹងប្រែងនៅប៉ុន្មានឆ្នាំខាងមុខក្នុងការកសាងប្រទេសឡើងវិញពីការបំផ្លិចបំផ្លាញដោយសារការឈ្លានពានរបស់រុស្ស៊ី។

«គោលបំណងឥឡូវនេះគឺ បង្កើតគោលនយោបាយនេះឱ្យបានឆាប់រហ័សជាមួយការចូលរួមពីអ៊ុយក្រែន ស្ថាប័នហិរញ្ញវត្ថុអន្តរជាតិ និងដៃគូផ្សេងទៀត»។ លោក ស្ហូល លើកឡើងបែបក្នុងសន្និសីទកាសែតក្រោយកិច្ចប្រជុំ ហើយបន្តថាការកសាងអ៊ុយក្រែនឡើងវិញនឹងជាកិច្ចការរបស់មនុស្សស្រដៀងទៅនឹងផែនការ Marshall Plan ដែលជាគម្រោងជំនួយហិរញ្ញវត្ថុរបស់អាម៉េរិកជួយអឺរ៉ុបស្តារសេដ្ឋកិច្ចឡើងវិញក្រោយត្រូវបំផ្លិចបំផ្លាញដោយសារសង្រ្គាមលោកលើកទី២។

មេដឹកនាំ G7 អះអាងនឹងបង្កើតលេខាធិការដ្ឋានសម្រាប់គោលនយោបាយខាងលើ ហើយប្រទេសសមាជិកនីមួយៗនឹងត្រូវចាត់តាំងអ្នកតំណាងដែលជារដ្ឋាភិបាលជាន់ខ្ពស់ម្នាក់មើលការខុសត្រូវលើការបង្កើតគោលនយោបាយនេះ និងកិច្ចប្រឹងប្រែងសម្របសម្រួលជាបន្ត។ បើតាមមេដឹកនាំ G7 អ្នកតំណាងទាំងនោះគួរតែជួបប្រជុំឱ្យបានលឿនតាមដែលអាចធ្វើទៅបានក្នុងខែមករា ឆ្នាំ២០២៣។

ស្របគ្នានេះ មេដឹកនាំ G7 ក៏បានអំពាវនាវឱ្យបណ្តារដ្ឋមន្រ្តីហិរញ្ញវត្ថុនៃក្រុមប្រទេសមានសេដ្ឋកិច្ចជឿនលឿននេះជួបប្រជុំនាពេលខ្លីខាងមុខនេះជាមួយមូលនិធិរូបិយវត្ថុអន្តរជាតិដើម្បីសម្របសម្រួលការផ្គត់ផ្គង់ថវិកាដល់អ៊ុយក្រែនសម្រាប់ឆ្នាំ២០២៣។

ថ្លែងក្នុងសុន្ទរកថាទៅកាន់មេដឹកនាំ G7 ប្រធានាធិបតីអរគុណយ៉ាងខ្លាំងសម្រាប់ការគាំទ្រជាបន្តបន្ទាប់របស់ប្រទេសទាំងនេះ។ ប៉ុន្តែក្នុងចំណោមសំណើទាំងអស់ លោកក៏ទាមទារឱ្យផ្តល់អាវុធជាមុនសិនដើម្បីប្រយុទ្ធតទល់នឹងរុស្ស៊ី ខណៈការស្តារសេដ្ឋកិច្ច និងសង្គមជាតម្រូវការធំទីពីរ។

«ជាអកុសល រុស្ស៊ីនៅតែមានប្រៀបលើកាំភ្លើងធំ និងមីស៊ីល» លោក ហ្សេលេនស្គី ថ្លែងបែបនេះដោយស្នើសុំកាំភ្លើងធំ និងរថក្រោះទំនើបបន្ថែមដែលជាយុទ្ធោបករណ៍អ៊ុយក្រេនស្នើសុំម្តងហើយម្តងទៀតជាមួយយន្តហោះចម្បាំង និងមីស៊ីលចម្ងាយឆ្ងាយ។

ទន្ទឹមនេះ មេដឹកនាំអ៊ុយក្រែនរូបនេះក៏បានស្នើសុំហ្គាសពីម្ចាស់ជំនួយលោកខាងលិចផងដែរ ខណៈប្រទេសហែកហួរដោយសារសង្រ្គាមមួយនេះប្រឈមនឹងកង្វះខាតអគ្គិសនីដោយសារតែការវាយប្រហារជាបន្តបន្ទាប់របស់រុស្ស៊ីលើ់ហេដ្ឋារចនាសម្ព័ន្ធថាមពលដែលបណ្តាលឱ្យប្រជាជនអ៊ុយក្រែនជាច្រើននាក់ស្ថិតក្នុងភាពត្រជាក់ ហើយគ្មានអគ្គិសនីប្រើប្រាស់គ្រប់គ្រាន់​ ៕

អន្តរជាតិ៖ កាលពីថ្ងៃចន្ទកងទ័ពអាកាសសហរដ្ឋអាមេរិក បានប្រកាសថាខ្លួនទើបទទួលជោគជ័យ ក្នុងការធ្វើតេស្តថ្មីមួយទៀត ទៅលើមីស៉ីលល្បឿនលឿនជាងសំឡេងហាយផើសូនិក មីស៊ីល (hypersonic missile) ជាប្រភេទអាវុធយុទ្ធសាស្រ្តដ៏ទំនើប ដែលកំពុងស្ថិតនៅក្រោមការ​អភិវឌ្ឍដូចគ្នា ដោយចិននិងរុស្ស៉ី។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ​ ទី១៣ ខែធ្នូ ឆ្នាំ២០២២។

កងទ័ពអាកាសអាមេរិកបានបញ្ជាក់នៅក្នុងសេចក្តីថ្លែងការណ៍ថា មីស៉ីលល្បឿនលឿនជាងសំឡេង AGM-183A នៃកម្មវិធី ARRW ត្រូវបានបាញ់ចេញពីយន្តហោះទម្លាក់គ្រាប់បែក B-52H កាលពីសប្តាហ៍កន្លងទៅ នៅក្បែរឆ្នេររដ្ឋកាលីហ្វ័រញ៉ា ហើយវាឈានដល់​ល្បឿនហៃភើសូនិច គឺលឿនជាងល្បឿនសំឡេងលើសពី៥ដង ហើយបញ្ចប់គន្លងហោះហើររបស់វា រួចបំផ្ទុះខ្លួនដោយជោគជ័យ នៅគោលដៅដែលបានកំណត់ទុក។

យោធាអាមេរិកបានបន្តថា ខាងលើគឺជាការធ្វើតេស្តបាញ់ជាលើកដំបូងបំផុត នៃប្រព័ន្ធមីស៉ីលសាកល្បង ដែលអាចធ្វើប្រតិបត្តិការ​បានពេញលេញ។ សហរដ្ឋអាមេរិក មានកម្មវិធីអភិវឌ្ឍមីស៉ីលល្បឿនលឿនជាងសំឡេងមួយចំនួនផ្សេងគ្នា ខណៈកាលពីពេលកន្លងទៅក្នុងឆ្នាំ២០២២នេះ ទីភ្នាក់ងារស្រាវជ្រាវបច្ចេកវិទ្យាសព្វាវុធ ដាផា DARPA របស់ក្រសួងការពារជាតិអាមេរិក ក៏បានធ្វើតេស្តមីស៉ីលហៃភើសូនិចមួយប្រភេទទៀតផងដែរ។

គួរបញ្ជាក់ថា មីស៉ីលដ៏ទំនើបនេះមានសមត្ថភាពហោះហើរបត់បែត ដើម្បីពាំក្បាលគ្រាប់នុយក្លេអ៊ែរឱ្យទៅដល់គោលដៅ ក្នុងកម្រិត​ត្រឹមត្រូវខ្ពស់បំផុត ហើយនៅក្នុងល្បឿនដ៏លឿនដែលពិបាកក្នុងការបាញ់ស្កាត់។ កាលពីឆ្នាំមុន ចិនធ្លាប់បានធ្វើតេស្តទៅលើមីស៉ីល​ហៃភើសូនិចមួយរបស់ខ្លួន ហើយរុស្ស៉ីបានប្រើប្រាស់មីស៉ីលល្បឿនជាងសំឡេងនេះ កំលុងសង្រ្គាមឈ្លានពាននៅអ៊ុយក្រែន។ ចំណែកឯ កូរ៉េខាងជើងក៏បានអះអាងថា ធ្លាប់ធ្វើតេស្តហោះហើរមីស៉ីលហៃភើសូនិចផងដែរ​ ៕

អន្តរជាតិ៖ សមាជិកសភាអឺរ៉ុបបានបោះឆ្នោតគាំទ្រយ៉ាងលើសលប់ក្នុងការដកលោកស្រី Eva Kaili ចេញពីតំណែងជាអនុប្រធានសភាអឺរ៉ុប បន្ទាប់ពីលោកស្រីជាប់ពាក់ព័ន្ធក្នុងរឿងអាស្រូវពុករលួយ ដែលបានធ្វើឱ្យស្ថាប័នសហភាពអឺរ៉ុបមានភាពរកាំរកូស និងខូចមុខមាត់។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអង្គារ ទី១៣ ខែធ្នូ ឆ្នាំ២០២២។

ចលនានេះត្រូវបានគាំទ្រ ដោយសមាជិកសភាសហភាពអឺរ៉ុបចំនួន ៦២៥នាក់ ទល់នឹងម្នាក់។ ប្រធានសភាអឺរ៉ុប លោកស្រី Roberta Metsola បានសរសេរនៅលើ Twitter បន្ទាប់ពីការបោះឆ្នោតកាលពីថ្ងៃអង្គារថា «ការសម្រេចចិត្តនេះមានប្រសិទ្ធភាពភ្លាមៗ»។

លោក​ស្រី​បាន​សរសេរទៀត​ថា​ «​យើង​នឹង​បន្ត​សហការ​យ៉ាង​ពេញលេញ​ជាមួយ​នឹង​ស្ថាប័ន​អនុវត្ត​ច្បាប់​ជាតិ​ដែល​ពាក់ព័ន្ធ​ ក៏ដូចជា​អាជ្ញាធរ​តុលាការ​ជាដើម»។

ប្រធានក្រុមនយោបាយទាំងអស់ នៅមុននេះបានចាប់ផ្តើមនីតិវិធីនៅទីក្រុង Strasbourg ប្រទេសបារាំង ដើម្បីបណ្តេញ លោកស្រី Kaili ដែលមានអាយុ ៤៤ឆ្នាំចេញពីមុខតំណែងជាន់ខ្ពស់ បន្ទាប់ពីនាងនិងអ្នកផ្សេងទៀតប្រឈមមុខនឹងការចោទប្រកាន់ថា ម្ចាស់ផ្ទះ World Cup ប្រទេសកាតា បានខ្ជះខ្ជាយលុយនិងអំណោយជាច្រើនដល់ពួកគេដើម្បីជះឥទ្ធិពលដល់ការសម្រេចចិត្ត ដែលជាការចោទប្រកាន់ដែលរូបលោកស្រីបានបដិសេធ។

គួរបញ្ជាក់ា លោកស្រី Kaili ជាអ្នកនយោបាយក្រិក និងជាអនុប្រធានម្នាក់ក្នុងចំណោម ១៤នាក់នៅក្នុងសភាអឺរ៉ុប ស្ថិតក្នុងចំណោមមនុស្ស ៤នាក់ដែលត្រូវបានចាប់ខ្លួន នៅក្នុងប្រទេសបែលហ្សិកកាលពីចុងសប្តាហ៍ ជុំវិញរឿងអាស្រូវដែលបានបង្កឱ្យមានកំហឹងនៅទីក្រុងប្រ៊ុចសែល និងហានិភ័យធ្វើឱ្យខូចមុខមាត់សហភាពអឺរ៉ុបទាំងក្នុង និងក្រៅប្រទេស​ ៕