អន្តរជាតិ៖ រដ្ឋមន្ត្រីការពារជាតិអ៊ុយក្រែន លោក អូលិកស៊ី រ៉េនស្នីកូវ (Oleksii Reznikov) បាននិយាយថា ភស្តុតាងកំពុងកើនឡើងថា រុស្ស៊ី ដែលបានរងការខាតបង់ជាបន្តបន្ទាប់នៃសមរភូមិ គ្រោងនឹងបើកការវាយលុកថ្មីមួយនៅឆ្នាំ២០២៣។ លោកបានប៉ាន់ស្មានថា ការវាយលុយលើដីគោកអ៊ុយក្រែន អាចកើតឡើងនៅក្នុងខែកុម្ភៈ នៅពេលដែលពាក់កណ្តាលនៃកងទ័ព ៣០០,០០០នាក់ ដែលរុស្ស៊ីបានបញ្ចូលក្នុងខែតុលា ដើម្បីគាំទ្រសង្រ្គាមអ៊ុយក្រែន នឹងបញ្ចប់ការហ្វឹកហ្វឺនរបស់ពួកគេ។ បញ្ចប់ការហ្វឹកហាត់ នោះពួកទាហានរុស្ស៊ីថ្មីៗទាំងនោះ នឹងត្រូវបញ្ជូនទៅកាន់សមរភូមិប្រយុទ្ធ ដែលបើតាមមន្រ្តីជាន់ខ្ពស់អ៊ុយក្រែនបាននិយាយថា ការវាយលុកអាចកើតឡើងនៅតំបន់ ដន់បាស (Donbas) ភាគខាងកើត និងភាគខាងត្បូងប្រទេសអ៊ុយក្រែន ឬសូម្បីតែទីក្រុងគៀវផងដែរ។

ការព្រមានរបស់អ៊ុយក្រែនពីការលុកលុយរបស់រុស្ស៊ី ធ្វើឡើងក្រោយក្រុងមូស្គូបានច្រានចោលបទឈប់បាញ់ ក្នុងឱកាសបុណ្យណូអែលនៅចុងខែធ្នូនេះ និងគំរាមអ៊ុយក្រែនឱ្យយល់ព្រមចុះចាញ់ ដោយប្រគល់ដែនដីដែលបាត់បង់មកឱ្យរុស្ស៊ីតាមសម្រួល មុនមានវឌ្ឍនៈភាពកាន់តែខ្លាំងនៅពេលខាងមុខ។ ជាការពិត បច្ចុប្បន្នសកម្មភាពប្រយុទ្ធនៅលើដីអ៊ុយក្រែនបានថយចុះ ដោយរុស្ស៊ីបន្តជាមួយនឹងការវាយប្រហារតាមអាកាស កាត់ផ្តាត់ហេដ្ឋារចនាសម្ព័ន្ធថាមពលអ៊ុយក្រែន ចំពេលរដូវរងារឈានចូលមកដល់។ គ្មានថាមពល គឺមិនអាចប្រើប្រាស់ម៉ាស៊ីនកម្តៅបាន ដែលបង្កការលំបាកយ៉ាងខ្លាំងដល់ពលរដ្ឋស៊ីវិលអ៊ុយក្រែន។

រដ្ឋមន្ត្រីការពារជាតិអ៊ុយក្រែនបានថ្លែងថា ការកេណ្ឌទ័ពទ្រង់ទ្រាយធំដំណាក់កាលទី២ រុស្ស៊ីត្រូវប្រើពេលយ៉ាងហោចណាស់ប្រហែល៣ខែដើម្បីរៀបចំវា។ នោះមានន័យថា រុស្ស៊ីកំពុងព្យាយាមចាប់ផ្តើមការវាយលុក ប្រហែលជានៅក្នុងខែកុម្ភៈឆ្នាំ២០២៣ គម្រប់ខួប១ឆ្នាំនៃសង្រ្គាមឈ្លានពានលើអ៊ុយក្រែនដែលបានចាប់ផ្តើមនៅថ្ងៃទី២៤ខែកុម្ភៈឆ្នាំ២០២២។

ប្រធានាធិបតីអ៊ុយក្រែនលោក​ (វ៉ូឡូឌីមៀ ហ្សេលេនស្គី) Volodymyr Zelensky និងមន្ត្រីជាន់ខ្ពស់បានព្រមានថា ទីក្រុងគៀវ និងសម្ព័ន្ធមិត្តត្រូវតែការពារប្រឆាំងនឹងរុស្ស៊ី។ អ៊ុយក្រែនបានធ្វើឱ្យប្រសើរឡើងយ៉ាងខ្លាំង នូវការការពារដែនអាកាសរបស់ខ្លួនប្រឆាំងនឹងមីស៊ីលរុស្ស៊ី ដោយមានការគាំទ្រពីលោកខាងលិច ប៉ុន្តែកំពុងអំពាវនាវឱ្យមានអាវុធទំនើបបន្ថែមទៀត។ កាលពីថ្ងៃព្រហស្បតិ៍ សម្ព័ន្ធមិត្តលោកខាងលិចបានបង្កើនការគាំទ្រដោយមានការផ្តល់ថវិកាបន្ថែម ប្រមាណ១៩ពាន់លានដុល្លារអាមេរិកដល់អ៊ុយក្រែននៅឆ្នាំ២០២៣ និងការហ្វឹកហ្វឺនយោធា។ យោធាអាមេរិកបានប្រកាសថា ខ្លួននឹងពង្រីកការហ្វឹកហ្វឺនបុគ្គលិកយោធាអ៊ុយក្រែននៅក្នុងប្រទេសអាល្លឺម៉ង់។ ពោល ចាប់ផ្តើមពីខែមករា ទាហាន ៥០០ នាក់ក្នុងមួយខែ នឹងត្រូវបានបណ្តុះបណ្តាល។ គិតចាប់តាំងពីខែមេសាមក កងទ័ពអ៊ុយក្រែនជាង ១៥,០០០ នាក់ បានទទួលការបណ្តុះបណ្តាល ដោយសហរដ្ឋអាមេរិកនិងសម្ព័ន្ធមិត្ត។

នៅថ្ងៃព្រហស្បតិ៍ មេដឹកនាំសហភាពអឺរ៉ុប បានបញ្ចប់កិច្ចប្រជុំកំពូលចុងក្រោយរបស់ពួកគេនៃឆ្នាំ ២០២២ ដោយសម្រេចដាក់សម្ពាធបន្ថែមទៀតលើរុស្ស៊ី ដោយនៅក្នុងនោះប្លុកដែលមាន២៧ប្រទេសនេះ បានព្រមព្រៀងគ្នាទម្លាក់ទណ្ឌកម្មទី៩លើក្រុងមូស្គូ។ កិច្ចព្រមព្រៀងជុំវិញកញ្ចប់ទណ្ឌកម្មថ្មីប្រឆាំងនឹងរុស្ស៊ី ត្រូវបញ្ជាក់ជាលាយលក្ខណ៍អក្សរនៅថ្ងៃសុក្រសប្តាហ៍នេះ។ ព័ត៌មានលម្អិតមិនត្រូវបានបង្ហាញឱ្យដឹងនោះទេ ប៉ុន្តែទណ្ឌកម្មនេះត្រូវបានគេរំពឹងថា នឹងរួមបញ្ចូលការហាមឃាត់ការធ្វើដំណើរ និងការបង្កកទ្រព្យសម្បត្តិរបស់មន្ត្រី និងមន្ត្រីយោធារុស្ស៊ីជិត ២០០ នាក់ទៀត ដូចដែលបានស្នើឡើងដោយគណៈកម្មការអឺរ៉ុបកាលពីសប្តាហ៍មុន។ មេដឹកនាំសហភាពអឺរ៉ុប ក៏ទំនងជាហាមឃាត់ការបញ្ជូនម៉ាស៊ីនយន្តហោះដ្រូន (drones) គ្មានមនុស្សបើកទៅឱ្យទាំងរុស្ស៊ី និងអ៊ីរ៉ង់ ដែលត្រូវបានចោទប្រកាន់ថា បានផ្តល់ យន្តហោះ កាមីកាសេ ដ្រូន (kamikaze drones) សម្រាប់ដាក់ពង្រាយប្រឆាំងនឹងគោលដៅជនស៊ីវិលអ៊ុយក្រែន៕

បរទេស៖ អគ្គីភ័យបានឆាបឆេះអគារដែលជាផ្ទះល្វែងកម្ពស់ ៧ ជាន់ក្នុងទីក្រុង Vaux-en-Velain នៅជិត Lyon ភាគអាគ្នេយ៍នៃប្រទេសបារាំងបណ្តាលឱ្យមនុស្សចំនួន១០ នាក់បានស្លាប់ ដែលក្នុងនោះមាន ៥ នាក់ជាកុមារ។

កាលពីពេលថ្មីៗនេះមន្រ្តីនៃតំបន់ Auvergne-Rhône-Alpes ក្នុងទីក្រុង Vaux-en-Velain នៃប្រទេសបារាំងបាននិយាយថា មានអគ្គិភ័យបានឆាកឆេះនៅម៉ោង ៣:១២ នាទីទៀបភ្លឺកាលពីថ្ងៃសុក្រ ១៦ ខែធ្នូ។

ក្នុងនោះបន្ទាប់ពីហេតុការកើតឡើងអ្នកពន្លត់អគ្គីភ័យប្រហែល ១៧០ នាក់និងរថយន្តពន្លត់អគ្គីភ័យ ៦៥ គ្រឿងបានមកដល់កន្លែងកើតហេតុភ្លាម។

ទោះជាយ៉ាងណាការឆាបឆេះនេះបានបណ្ដាលឱ្យមានអ្នកស្លាប់បាត់បង់ជីវិតចំនួន១០នាក់ បន្ថែមពីលើការស្លាប់ទាំង ១០ នាក់ខាងលើមានមនុស្សចំនួន ៤ នាក់ផ្សេងទៀតបានរងរបួសធ្ងន់ និង ១០ នាក់ផ្សេងទៀតស្ថិតក្នុងស្ថានភាពធ្ងន់ធ្ងរជាងនេះ។

ទោះជាយ៉ាងណាមន្ត្រីជំនាញនៅមិនទាន់អាចកំណត់បានពីមូលហេតុនៃការឆេះនេះនៅឡើយទេ ប៉ុន្តែរដ្ឋមន្ត្រីក្រសួងមហាផ្ទៃបារាំងលោក Gerald Darmanin បាននិយាយថា លោកបានរាយការណ៍អំពីបញ្ហានេះទៅប្រធានាធិបតី Emmanuel Macron ហើយបានសន្យាថា ការស៊ើបអង្កេតនឹងត្រូវបានធ្វើឡើងដើម្បីកំណត់ពីមូលហេតុនៃការឆេះនេះ៕ ប្រភព៖ Sanook

អន្តរជាតិ៖ ប្រទេសកូរ៉េខាងត្បូងបានចេញការតវ៉ាយ៉ាងខ្លាំងប្រឆាំង នឹងការទាមទារទឹកដីរបស់ប្រទេសជប៉ុន ដែលបានធ្វើឡើងនៅក្នុងយុទ្ធសាស្ត្រសន្តិសុខជាតិ ដែលបានចេញផ្សាយនៅថ្ងៃសុក្រនេះ ចំពោះកោះជម្លោះដែលគេស្គាល់ថា ដុកដូ (Dokdo) ជាភាសាកូរ៉េ និង តាគេស៊ីមា (Takeshima) ជាភាសាជប៉ុន។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃសុក្រ ទី១៦ ខែធ្នូ ឆ្នាំ២០២២។

ក្រសួងការបរទេសកូរ៉េខាងត្បូងបានទាមទារ ឱ្យដកចេញភ្លាមៗនូវការអះអាងពីឯកសារយុទ្ធសាស្ត្រជាតិរបស់ប្រទេសជប៉ុន ដោយនិយាយនៅក្នុងសេចក្តីថ្លែងការណ៍ថា វិធានការណ៍នេះមិនបានជួយ «ការកសាងទំនាក់ទំនងតម្រង់ទិសអនាគត» រវាងប្រទេសទាំងពីរនោះទេ។

នៅក្នុងសេចក្តីថ្លែងការណ៍ដាច់ដោយឡែកមួយ ក្រសួងការបរទេសបាននិយាយទៀតថា ខ្លួនសង្ឃឹមថាការអនុវត្តគោលនយោបាយសន្តិសុខថ្មីរបស់ជប៉ុន នឹងមានតម្លាភាព និងរួមចំណែកដល់សន្តិភាព និងស្ថិរភាពក្នុងតំបន់ ខណៈពេលដែលបន្តរក្សាស្មារតីនៃរដ្ឋធម្មនុញ្ញសន្តិភាព។

គួរបញ្ជាក់ថា ប្រធានាធិបតីកូរ៉េខាងត្បូង លោក យូន ស៊ុក-យោល (Yoon Suk-yeol) ដែលចូលកាន់តំណែងកាលពីខែឧសភា បានព្យាយាមធ្វើឱ្យប្រសើរឡើងនូវទំនាក់ទំនងជាមួយទីក្រុងតូក្យូ ដែលត្រូវបានបំផ្លាញដោយជម្លោះទឹកដីលើកោះ និងជម្លោះជាប្រវត្តិសាស្ត្រ ដែលកើតចេញពីការកាន់កាប់របស់ប្រទេសជប៉ុន ពីឆ្នាំ ១៩១០-១៩៤៥ លើប្រទេសកូរ៉េ ៕