អន្តរជាតិ៖ កាលពីថ្ងៃអាទិត្យកន្លងទៅនេះ ក្រសួងសុខាភិបាលចិនបានប្រកាសថា ប្រទេសចិននឹងលែងចេញផ្សាយតួលេខប្រចាំថ្ងៃ សម្រាប់ករណីឆ្លងនិងស្លាប់នៃជំងឺកូវីដ១៩ តទៀតហើយ ប​ន្ទាប់ពីទម្លាប់នៃការចេញផ្សាយនេះ បានចាប់ផ្តើមដំបូងនិងបន្តជាប់រហូត​មក តាំងតែពីដើមឆ្នាំ២០២០។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី២៦ ខែធ្នូ ឆ្នាំ២០២២។

យ៉ាងណាក្តី ក្រសួងសុខាភិបាលចិន មិនបានផ្តល់ការបកស្រាយលម្អិត សម្រាប់ការសម្រេចចិត្តរបស់ខ្លួន ក្នុងការឈប់ចេញផ្សាយ​ទិន្នន័យកូវីដ១៩ប្រចាំថ្ងៃបែបនេះឡើយ ប៉ុន្តែវាកើតឡើងចំគ្រាដែល ស្ថានការណ៍ឆ្លងរាលដាលនៅក្នុងប្រទេសចិន ហាក់មានការ​កើនឡើងខ្លាំង ក្រោយការបិទបញ្ចប់យុទ្ធសាស្រ្តសូន្យកូវីដរបស់ខ្លួន។

គួរបញ្ជាក់ថា ទោះជាបែបនេះក៏ដោយ បើតាមក្រសួងសុខាភិបាលចិន មជ្ឈមណ្ឌលគ្រប់គ្រងនិងបង្ការជំងឺ CDC របស់ចិន នឹងធ្វើការ​ចេញផ្សាយព័ត៌មាន អំពីការឆ្លងរាតត្បាតកូវីដ១៩ សម្រាប់គោលដៅបម្រើជាប្រភពព័ត៌មានយោង ក៏ដូចជាការសិក្សាស្រាវជ្រាវ​ ប៉ុន្តែ​មិនបានប្រាប់ឱ្យជាក់លាក់ អំពីប្រភេទឬក៏ភាពញឹកញាប់ នៃព័ត៌មានដែលត្រូវចេញផ្សាយនោះឡើយ​ ៕

ប្រទេសថៃ៖ អ្នកនាំពាក្យរដ្ឋាភិបាល បង្ហាញពីចំនួនទេសចរណ៍បរទេសក្នុងប្រទេសថៃ ដែលបានបញ្ជាក់ថាមានប្រទេសចំនួន៥ដែលជាកំពូលប្រទេសបានចូលមកកម្សាន្តក្នុងប្រទេសនាឆ្នាំ២០២២ បានកើនឡើងដល់ ១១លាននាក់ ដែលក្នុងចំណោមនោះក៏មានប្រទេសកម្ពុជាយើងមួយផងដែរ។

នាថ្ងៃទី ២៦ ខែធ្នូ ឆ្នាំ២០២២ លោក អានុឆា បូនផាចៃស៊ី(Anucha Burapachaisri)អគ្គលេខាធិការរងនៃនាយករដ្ឋមន្ត្រីទទួលបន្ទុកកិច្ចការនយោបាយ ធ្វើជាអ្នកនាំពាក្យទីស្តីការនាយករដ្ឋមន្ត្រី បានធ្វើការលាតត្រដាងព័ត៌មានចុងក្រោយ ពីការិយាល័យអន្តោប្រវេសន៍ បង្ហាញពីចំនួនភ្ញៀវទេសចរចូលមកកម្សាន្តក្នុងប្រទេសថៃ ដែលមានអត្រាកំណើនជាបន្តបន្ទាប់ចាប់ពីថ្ងៃទី ១ ខែមករា ដល់ថ្ងៃទី ២២ ខែធ្នូ ឆ្នាំ ២០២២ នេះ ដោយមានចំនួនរហូតដល់ ១១,០៤៩,៧៦៩ នាក់។

ក្នុងនោះគេបានបង្ហាញពីបញ្ជីនៃចំនួនភ្ញៀវទេសចរចូលច្រើនជាងគេទាំង ៥ ប្រទេសដែលចាប់ទុកថាជាកំពូលប្រទេសបានធ្វើដំណើរកម្សាន្តមកកាន់ប្រទេសថៃច្រើនបំផុតក្នុងឆ្នាំ២០២២រួមមាន៖

១. ប្រទេសម៉ាឡេស៊ី ១,៨១២,២៥០ នាក់

២. ប្រទេសឥណ្ឌា ៩២៣,៧៨៦ នាក់

៣. ប្រទេសឡាវ ៧៩៦,២២០ នាក់

៤. ប្រទេសសិង្ហបុរី ៥៦៣.៥៩៤ នាក់

៥.ប្រទេសកម្ពុជាយើងដែលមានចំនួន ៥៦២.០៦០ នាក់

ជាមួយគ្នានោះ អាជ្ញាធរទេសចរណ៍ថៃ (TAT) ក៏បានធ្វើការបង្ហាញថា ចាប់តាំងពីប្រទេសថៃបើក ប្រទេសទទួលភ្ញៀវទេសចរបន្ទាប់ពីការបិទប្រទេសដោយសារតែជំងឺកូវីដរួចមក មានចំនួនភ្ញៀវ ទេសចរចូលមកកាន់ប្រទេសថៃជាមធ្យមក្នុងមួយថ្ងៃ ៦០,០០០ទៅ ៧០,០០០ នាក់ ដោយភាគច្រើនមកពីម៉ាឡេស៊ី និង ឥណ្ឌា។

ដែលការសន្ទុះនេះបាននឹងកំពុងតែជំរុញ និងជួយធ្វើឱ្យប្រទេសថៃក្លាយជាប្រទេសមួយក្នុងចំណោមប្រទេស ដែលមានការស្ទុះងើបឡើងវិញលឿនបំផុតក្នុងពិភពលោកសម្រាប់វិស័យទេសចរណ៍។

ទោះជាយ៉ាងគេរំពឹងថាសម្រាប់គោលដៅនៃឧស្សាហកម្មទេសចរណ៍ថៃនៅឆ្នាំ ២០២៣  ចំនួនភ្ញៀវទេសចរបរទេសសរុបនឹងកើនឡើងដល់២០លាននាក់ ជាមួយនឹងការពង្រឹង និងការរៀបចំសកម្មភាព គាំទ្រ ព្រមទាំងការលើកទឹកចិត្តភ្ញៀវទេសចរទៅថ្ងៃអនាគត ក៏ដូចជាផែនការកែលម្អតំបន់ទេសចរណ៍ឱ្យកាន់តែមានភាពប្រសើទ្វេដង៕ប្រភព៖ PPTVHD36

កម្មវិធី”ទិដ្ឋាការផ្ទះទីពីរ”របស់ប្រទេសឥណ្ឌូនេស៊ី ដែលអាចឱ្យជនបរទេសស្នាក់នៅក្នុងប្រទេសបានរហូតដល់ ១០ឆ្នាំបានចូលជាធរមានហើយ ខណៈដែលសេដ្ឋកិច្ចដ៏ធំបំផុតរបស់អាស៊ីអាគ្នេយ៍ស្វែងរកការទាក់ទាញភ្ញៀវទេសចរកាន់តែច្រើន។

ទិដ្ឋាការ Second Home តម្រូវឱ្យមានពាក្យសុំតែមួយប៉ុណ្ណោះ ដែលមានន័យថា ជនបរទេសត្រូវតែសុំទិដ្ឋាការតែម្ដង លិខិតអនុញ្ញាតស្នាក់នៅមានកំណត់ និងលិខិតអនុញ្ញាតចូលម្ដងទៀត។ លោក Yasonna Laoly រដ្ឋមន្ត្រីក្រសួងច្បាប់ និងសិទ្ធិ មនុស្សបានប្រកាសគម្រោងនេះក្នុង សប្តាហ៍មុន។

គេហទំព័រព័ត៌មានឥណ្ឌូនេស៊ី Expat បានរាយការណ៍ថា ដើម្បីមានសិទ្ធិទទួលបានកម្មវិធីនេះ ជនបរទេសត្រូវបង្ហាញភស្តុតាងនៃមូលនិធិចំនួន ២ ពាន់លានរូពី (១២៨,០០០ដុល្លារ) ឬកម្មសិទ្ធិអចលនទ្រព្យនៅក្នុងប្រទេសឥណ្ឌូនេស៊ី៕ ប្រភព៖ VN Express

រដ្ឋធានីមូស្គូ៖ សង្គ្រាមរបស់ក្រុងមូស្គូ បានអូសបន្លាយពេលវេលាជាង៣០០ថ្ងៃកន្លងមកហើយ ខណៈការវាយប្រយុទ្ធគ្នា កំពុងតែបន្ដ រកថ្ងៃមិនបញ្ចប់មិនទាន់ឃើញ ប៉ុន្ដែឥឡូវ ពិភពលោក បានដឹងអំពីមហិច្ឆតាយ៉ាងពិតប្រាកដរបស់ប្រធានាធិបតី លោក វ៉្លាឌីមៀ ពូទីន គ្មានអ្វីក្រៅតែ អំពីការស្រមើស្រមៃរបស់គាត់ ចង់បង្រួបបង្រួមប្រវត្ដិសាស្រ្ដរបស់រុស្ស៊ី ដែលធ្លាប់លេបត្របាក់យកទឹកដីរបស់ប្រទេសដទៃតែប៉ុណ្ណោះនោះឡើយ។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃចន្ទ ទី២៦ ខែធ្នូ ថា លោក វ៉្លាឌីមៀ ពូទីន (Vladimir Putin) ប្រធានាធិបតីរុស្ស៊ី បានអះអាង ថា ការវាយប្រយុទ្ធរបស់រុស្ស៊ី នៅក្នុងប្រទេសអ៊ុយក្រែន កំពុងតែអនុវត្ដនូវការបង្រួបបង្រួមប្រជាជនរុស្ស៊ី។

មេដឹកនាំវិមានក្រឹមឡាំងរូបនេះ បានប្រើប្រាស់គំនិត «រុស្ស៊ីជាប្រវត្តិសាស្ត្រ» ដើម្បីជជែកវែកញែក នៅក្នុងបទសម្ភាសន៍មួយ ត្រូវបានចាក់ផ្សាយ តាមកញ្ចក់ទូរទស្សន៍រុស្ស៊ី កាលពីថ្ងៃអាទិត្យ ថា អ៊ុយក្រែន និងរុស្ស៊ី ជាមនុស្សតែមួយ។ លោក ពូទីន បានព្យាយាម បង្ហាញអំពីភាពត្រឹមត្រូវ នៃការវាយលុកលុយរបស់ក្រុងមូស្គូ នៅក្នុងប្រទេសអ៊ុយក្រែន អស់រយៈពេល១០ខែមកនេះ។

លោក ពូទីន បានថ្លែង នៅក្នុងការដកស្រង់សម្ដី ចេញពីការផ្សាយ សម្រាប់ទូរទស្សន៍ជាតិ Rossiya 1 (រ៉ូសស៊ីយ៉ា វ៉ាន់) ថា «គូប្រជែងភូមិសាស្ត្រនយោបាយរបស់រុស្ស៊ី មានគោលបំណង ចង់បំបែកប្រទេសរុស្ស៊ី ឲ្យឃ្លាតចេញពីប្រវត្តិសាស្ត្ររបស់រុស្ស៊ី។ ប៉ុន្ដែការបែងចែក និង ការយកឈ្នះនោះ ជាអ្វីដែលពួកគេតែងតែស្វែងរក ដើម្បីសម្រេចបានមហិច្ឆតារបស់ពួកគេ តាមមធ្យោបាយដែលពួកគេមាន។ ប៉ុន្ដែគោលបំណងរបស់យើង គឺផ្សេង ត្រូវតែបង្រួបបង្រួមប្រជាជនរុស្ស៊ី»។

ប្រធានាធិបតីរុស្ស៊ី បានបញ្ជាក់ជាដដែល ថា ក្រុងមូស្គូ បានត្រៀមខ្លួនរួចជាស្រេច សម្រាប់ការចរចា។ ប៉ុន្ដែអ៊ុយក្រែន និង សម្ពន្ធមិត្តលោកខាងលិចរបស់ក្រុងកៀវ បានបដិសេធនូវការចរចានេះ។

បើគិតតាមប្រវត្ដិសាស្រ្ដរបស់រុស្ស៊ី នោះ គឺរុស្ស៊ី ធ្លាប់វាយប្រយុទ្ធ ឈ្លានពាន និង កាន់កាប់ទឹកដីរបស់ប្រទេសជាច្រើន រួមមាន ប៉ូឡូញ ហ្វាំងឡង់ដ៍ ន័រវ៉ែស អាល្លឺម៉ង់ អ៊ីរ៉ង់ ជប៉ុន…ជាដើម៕