ខេត្តកោះកុងជាខេត្តមួយដែលមានសក្តានុពលយ៉ាងខ្លាំងដើម្បីទាក់ទាញភ្ញៀវទេសចរឱ្យមកកាន់តំបន់ឆ្នេរ ក្រៅពីដែនកោះដែលមានភាពទាក់ទាញនោះ ខេត្តកោះកុង ក៏មានឆ្នេរខ្សាច់ជាច្រើនទៀតគួរជាទីចាប់អារម្មណ៍ ។ក្នុងចំណោមឆ្នេរល្បីៗទាំងនោះ មានឆ្នេរប៉ាក់ខ្លង ជាតំបន់ឆ្នេរ មួយដែលទើបតែមានឈ្មោះបោះសំឡេងនាពេលថ្មីៗនេះប៉ុណ្ណោះ។
ឆ្នេរប៉ាក់ខ្លង ដែលមានចម្ងាយប្រហែល៧គីឡូម៉ែត្រភាគខាងជើងក្រុងខេមរភូមិន្ទ ខេត្តកោះកុង៕ ឆ្នេរនេះគេអាចហៅឈ្មោះបានពីរគឺ ឆេ្នរកោះយ៉ ឬឆេ្នរប៉ាក់ខ្លង។ឆ្នេរនេះមានទេសភាពដ៏ស្រស់ត្រកាល និងមានឆ្នេរខ្សាច់ល្អស្រស់ស្អាត ស្ថិតនៅលើផ្ទៃទឹកសមុទ្រដ៏ធំល្វឹងល្វើយ ដែលមានព៌ណខៀវស្រងាត់។
នៅពេលរសៀល ភ្ញៀវទេសចរក៏អាចគយគន់ព្រះអាទិត្យរៀបអស្ដង្គត ជាមួយជំនោរនឹងទឹកសមុទ្រ ហាក់បីដូចជាយើងនៅពិភពមួយផ្សេងទៀតអញ្ចឹង។ ក្រៅពីនេះភ្ញៀវទេសចរក៏អាចសម្រាកបោះតង់ សម្រាកកម្សាន្តជាមួយមនុស្សជាទីស្រលាញ់ផងដែរ៕
