អន្តរជាតិ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានស្នើឱ្យសភាអនុម័តច្បាប់មួយ ដើម្បីដកប្រទេសរុស្ស៊ីចេញពីកិច្ចព្រមព្រៀងចំនួន២១ ទាក់ទងនឹងក្រុមប្រឹក្សាអឺរ៉ុប ក្នុងពេលដែលមានភាពតានតឹងខ្លាំងចំពោះសង្រ្គាមនៅអ៊ុយក្រែន។ នេះបើយោងតាមការចុះផ្សាយរបស់សារព័ត៌មាន Vnexpress ។

ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃទី១៧ ខែមករា ឆ្នាំ២០២៣​ បានប្រគល់ជូនប្រធានសភាតំណាងរាស្រ្ត លោក វីយ៉ាឆេស្លាវ វ៉ូឡូឌីន (Vyacheslav Volodin) នូវសេចក្តីព្រាងច្បាប់មួយ ដើម្បីបញ្ចប់ការចូលរួមរបស់រុស្ស៊ីនៅក្នុងសន្ធិសញ្ញាក្រុមប្រឹក្សាអឺរ៉ុប (CoE) ដោយផ្អែកលើបទប្បញ្ញត្តិនៃច្បាប់សហព័ន្ធឆ្នាំ១៩៩៥ ។

យោងតាមច្បាប់នេះ សន្ធិសញ្ញាចំនួន២១ នឹងលែងអនុវត្តចំពោះប្រទេសរុស្ស៊ីចាប់ពីថ្ងៃទី១៦ ខែមីនា រួមទាំងអនុសញ្ញាស្តីពីការការពារសិទ្ធិមនុស្ស និងសេរីភាពជាមូលដ្ឋាន និងអនុសញ្ញាអឺរ៉ុបស្តីពីការបង្ក្រាបអំពើភេរវកម្ម។

គួរបញ្ជាក់ដែរថា កាលពីខែកុម្ភៈ ឆ្នាំ២០២២ សមាជិក៤២ ក្នុងចំណោម៤៧ CoE បានបោះឆ្នោតព្យួរសមាជិកភាពរបស់រុស្ស៊ីដោយសារតែជម្លោះនៅអ៊ុយក្រែន។ រុស្ស៊ី​បាន​ថ្កោលទោស​ទង្វើ​នេះ ហើយ​បាន​ប្រកាស​ដក​ខ្លួន​ចេញ​ពី CoE នៅ​ថ្ងៃ​ទី ១៥ ខែ​មីនា ឆ្នាំ ២០២២។

សភាអ៊ឺរ៉ុបកាលពីចុងឆ្នាំមុនបានប្រកាសថារុស្ស៊ីជា “រដ្ឋឧបត្ថម្ភភេរវកម្ម” ដោយចោទប្រកាន់កងកម្លាំងរបស់ខ្លួនថា “ប្រព្រឹត្តអំពើឃោរឃៅ” នៅអ៊ុយក្រែន។ ដំណោះស្រាយនេះត្រូវបានអនុម័តដោយសំឡេងគាំទ្រ ៤៩៤ និង ៥៨ប្រឆាំង។

ទំនាក់ទំនង​រវាង​រុស្ស៊ី និង​បណ្តា​ប្រទេស​នៅ​អឺរ៉ុប​បាន​កើនឡើង​បន្ទាប់ពី​ជម្លោះ​នៅ​អ៊ុយក្រែន។ អឺរ៉ុប និងសហរដ្ឋអាមេរិក បានដាក់ទណ្ឌកម្មជាបន្តបន្ទាប់លើរុស្ស៊ី និងបានជួយអ៊ុយក្រែនយ៉ាងសកម្មជាមួយនឹងការផ្ដល់អាវុធ ទោះបីជាមានការព្រមានពីទីក្រុងមូស្គូថា វានឹងធ្វើឱ្យជម្លោះកាន់តែកើនឡើងយ៉ាងណាក៏ដោយ ៕

ប្រទេសវៀតណាម៖ លោក Nguyen Xuan Phuc សម្រេចលាលែងពីតំណែងជាប្រធានាធិបតីវៀតណាម ចំពេលមានការស៊ើបអង្កេតផ្នែកវិន័យផ្ទៃក្នុងកាន់តែខ្លាំង នៃបក្សកុម្មុយនិស្ត ដែលពាក់ព័ន្ធនឹងរដ្ឋមន្ត្រីមួយចំនួន។

កាលពីថ្ងៃទី ១៧ ខែមករា ឆ្នាំ២០២៣ ទីភ្នាក់ងារសារព័ត៌មានបរទេសរាយការណ៍ពីទីក្រុងហាណូយប្រទេសវៀតណាម ថាគណៈកម្មាធិការមជ្ឈិមបក្សកុម្មុយនិស្តវៀតណាម បានចេញសេចក្តីថ្លែងការណ៍ នៅថ្ងៃអង្គាម្សិលមិញនេះ អំពីកិច្ចប្រជុំថាខ្លួនបានសម្រេច “ព្យួរ” លោក Nguyen Xuan Phuc  អាយុ ៦៨ឆ្នាំ ពីមុខតំណែងនយោបាយទាំងអស់ រួមទាំងប្រធាន សមាជិកនៃគណៈកម្មាធិការមជ្ឈិម  សមាជិកអចិន្ត្រៃយ៍នៃការិយាល័យនយោបាយ ព្រមទាំងជាប្រធានក្រុមប្រឹក្សាការពារជាតិ និងសន្តិសុខផងដែរ។

យ៉ាងណាក៏ដោយ ពាក់ព័ន្ធនឹងការសម្រេចនេះ សេចក្តីថ្លែងការណ៍បាននិយាយបន្ថែមថា លោក Nguyen Xuan Phuc “ត្រូវតែទទួលខុសត្រូវក្នុងនាមជាមេដឹកនាំនយោបាយ” សម្រាប់មន្ត្រីរដ្ឋាភិបាលជាន់ខ្ពស់មួយចំនួន រួមមានទាំងរដ្ឋមន្ត្រីបច្ចុប្បន្ន និងអតីតកាល ដោយក្នុងនោះគេដឹងថាមានឧបនាយករដ្ឋមន្ត្រីពីររូប និង គណៈរដ្ឋមន្ត្រី បី រូប ដែលទើបតែត្រូវបានបណ្តេញចេញពីដំណែងកាលពីពេលថ្មីៗនេះ ក្រោមការផ្ដន្ទាទោសចំពោះការបំពានវិន័យគណបក្ស។

ជាមួយគ្នានោះ បន្ទាប់ពីគណៈកម្មាធិការ មជ្ឈិមបក្សកុម្មុយនិស្តវៀតណាមបានចេញសេចក្តីថ្លែងការណ៍”ព្យួរ” លោក Nguyen Xuan Phuc ពីមុខតំណែងរួចមក ស្រាប់តែមានសេចក្តីរាយការណ៍មកថា លោក Phuc ដែលបានកាន់តំណែងជានាយករដ្ឋមន្ត្រីចន្លោះឆ្នាំ ២០១៦ ដល់ឆ្នាំ ២០២១ ក៏បានធ្វើការដាក់ពាក្យលាលែងពីតំណែងទាំងអស់ ខណៈដែលលេខាធិការដ្ឋានបក្សកុម្មុយនិស្តវៀតណាមមិនមានប្រតិកម្ម និងចំណាត់ការណាមួយតាមផ្លូវការបន្ថែមទៀតនោះទេ។

ពិតណាស់ការលាលែងពីដំណែងមួយនេះបានធ្វើឱ្យមានការភ្ញាក់ផ្អើល និងមនុស្សជាច្រើនមានចម្ងល់ថាតើនរណានឹងត្រូវតែងតាំងឲ្យកាន់តំណែងទាំងអស់ជំនួសលោក Nguyen Xuan Phuc វិញ?

គួររំលឹកផងដែរថា គណៈកម្មាធិការត្រួតពិនិត្យវិន័យមជ្ឈិមនៃបក្សកុម្មុយនិស្តវៀតណាម បានដាក់លិខិតទៅគណៈកម្មាធិការអចិន្ត្រៃយ៍ ឈរនៅការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តវៀតណាម និងលេខាធិការដ្ឋានបក្សកុម្មុយនិស្តវៀតណាម នៅចុងខែធ្នូ អំពីការស៊ើបអង្កេតវិន័យដែលត្រូវបានស្នើឡើង ដល់មន្ត្រីជាន់ខ្ពស់នៃក្រសួងការបរទេស ទាំងអតីតកាលនិងបច្ចុប្បន្ន ពីករណីទទួលសំណូក រៀបចំជើងហោះហើរជម្លៀសខ្លួនក្នុងអំឡុងពេលជំងឺរាតត្បាតកូវីដ-១៩ខ្លាំង។

ជាលទ្ធផលមន្ត្រីរដ្ឋាភិបាល និងពាណិជ្ជកររាប់រយនាក់ត្រូវបានចាប់ខ្លួន និងកាត់ទោស រួមមានទាំងនាយករដ្ឋមន្ត្រីពីររូប គឺលោក Vu Duc Dam និង Pham Binh Minh ត្រូវបានដកពីដំណែង បន្ទាប់ពីមានការរៀបចំនួនសមាជិកក្រុមប្រឹក្សាដើម្បីបោះឆ្នោតគាំទ្រការដកដំណែងនេះ ក្រោមបទល្មើសពាក់ព័ន្ធនឹងអំពើពុករលួយ៕ ប្រភព៖ Dailynewshttps

រដ្ឋធានីហាណូយ៖ ការប្រកាសលាលែងពីតំណែងរបស់ប្រធានាធិបតីវៀតណាម ង្វៀន សួនហ៊្វុក (Nguyen Xuan Phuc) នឹងធ្វើឲ្យប្រទេសអាស៊ានមួយនេះ មានការផ្លាស់ប្ដូរអំណាចកំពូលដ៏កម្របំផុតមួយ នៅក្នុងចំណោមមេដឹកនាំគ្រប់គ្រងអំណាចតាមលទ្ធិកុម្មុយនិស្ដ ជាមួយនឹងការលេចឮ អំពីពាក្យចចាមអារ៉ាម នៃការប្រព្រឹត្ដអំពើពុករលួយ។

សារព័ត៌មានរបស់ចក្រភពអង់គ្លេស BBC បានចេញផ្សាយ កាលពីព្រឹក ថ្ងៃពុធ ទី១៨ ខែមករា ថា លោក ង្វៀន សួន ហ៊្វុក (Nguyen Xuan Phuc) ប្រធានាធិបតីវៀតណាម បានប្រកាស ថា គាត់ នឹងចុះចេញពីតំណែងកំពូលនេះ។ ការប្រកាសរបស់គាត់ កំពុងតែធ្វើឲ្យមានការផ្លាស់ប្ដូរអំណាចដ៏ធំ នៅក្នុងចំណោមមេដឹកនាំប្រទេស គ្រប់គ្រងតាមបែបលទ្ធិកុម្មុយនិស្ដ។

ការចាកចេញពីតំណែងរបស់លោកប្រធានាធិបតី បានលេចចេញ ជាពាក្យចចាមអារ៉ាមរាលដាលយ៉ាងខ្លាំង ក្រោយពេលឧបនាយករដ្ឋមន្រ្ដីចំនួន២រូប ស្ថិតក្រោមអំណាចរបស់គាត់ បានបណ្ដេញចេញពីតំណែង។ ព័ត៌មាន ស្ដីអំពីការលាលែងតំណែងរបស់លោក ង្វៀន សួនហ៊្វុក បានកើតឡើង នៅក្នុងអំឡុងពេល មានយុទ្ធនាការប្រឆាំងនឹងអំពើពុករលួយ ដឹកនាំដោយក្រុមមេដឹកនាំប្រកាន់ភាពរឹងរូសខ្លាំង។ ជាមួយគ្នានេះដែរ សមាជិកបក្សកុម្មុយនិស្ដ មានចំនួនរាប់រយនាក់ កំពុងតែស្ថិតក្រោមការស៊ើបអង្កេត។

ដោយឡែក ការលាលែងពីតំណែងរបស់ប្រធានាធិបតីវៀតណាម លោក ង្វៀន សួនហ៊្វុក ក៏តម្រូវឲ្យមានការយល់ព្រម ពីសភាជាតិរបស់ប្រទេសកុម្មុនិស្ដអាស៊ានមួយនេះផងដែរ។ រដ្ឋសភាជាតិវៀតណាម នឹងរៀបចំការបោះឆ្នោតវិសាមញ្ញ នៅថ្ងៃពុធ ហើយគេរំពឹង ថា ការសម្រេចចិត្តចាកចេញពីអំណាចរបស់លោកប្រធានាធិបតី នឹងក្លាយជាផ្លូវការ។

ទីភ្នាក់ងារសារព័ត៌មានផ្លូវវការរបស់វៀតណាម បានអះអាង ថា លោកប្រធានាធិបតី ង្វៀន សួនហ៊្វុក នឹងលាលែងពីតំណែង ក្រោយពេលមានការរំពឹងទុក អស់រយៈពេលជាច្រើនសប្តាហ៍កន្លងមកហើយ ថា គាត់នឹងចាកចេញពីមុខតំណែងកំពូល នៅក្នុងប្រទេសវៀតណាម។

គណៈកម្មាធិការមជ្ឈិម នៃបក្សកុម្មុយនិស្តវៀតណាម បានសម្រេចយល់ព្រមអនុញ្ញាតឱ្យប្រធានាធិបតី លោក ង្វៀន សួនហ៊្វុក (Nguyen Xuan Phuc) លាលែងពីតំណែងរបស់គាត់ទាំងអស់ រួមទាំងសមាជិក នៃការិយាល័យនយោបាយ ក៏ដូចជា តំណែងនៅក្នុងគណៈកម្មាធិការមជ្ឈិមបក្ស ស្របតាមសំណើផ្ទាល់ខ្លួនរបស់គាត់។

ស្របគ្នានេះ គណៈកម្មាធិការមជ្ឈិមបក្សកុម្មុយនិស្តវៀតណាម បានចេញសេចក្តីថ្លែងការណ៍មួយ ក្រោយការកោះប្រជុំវិសាមញ្ញ ថា នៅក្នុងឋានៈជាប្រធានាធិបតី លោក ង្វៀន សួនហ៊្វុក បានបណ្ដែតបណ្តោយ ដល់ក្រុមមន្រ្តីរដ្ឋាភិបាលមួយចំនួន ដោយរួមទាំងឧបនាយករដ្ឋមន្រ្តី ចំនួន២នាក់ និង រដ្ឋមន្រ្តី ចំនួន២រូប ប្រព្រឹត្តទង្វើខុសឆ្គងជាច្រើន នាំឲ្យមានផលប៉ះពាល់យ៉ាងធ្ងន់ធ្ងរ។

សេចក្តីថ្លែងការណ៍ដដែលនោះ បានបន្ថែម ថា វៀតណាម បានបណ្ដេញឧបនាយករដ្ឋមន្រ្តី ចំនួន២នាក់ ចេញពីតំណែង ហើយរដ្ឋមន្រ្តី ចំនួន២នាក់ និង ក្រុមមន្រ្តីមួយចំនួនទៀត កំពុងតែប្រឈមនឹងការចោទប្រកាន់ តាមផ្លូវច្បាប់។ ដោយសារតែសកម្មភាពរបស់ក្រុមមន្រ្ដីក្រោមឱវាទរបស់ខ្លួនប្រព្រឹត្ដខុសឆ្គង ទើបជំរុញឲ្យលោក ង្វៀន សួនហ៊្វុក ដឹងច្បាស់ អំពីការទទួលខុសត្រូវរបស់ខ្លួន ហើយបានសម្រេចចិត្ត ដាក់ពាក្យលាលែង ពីតំណែងទាំងអស់ ដើម្បីចូលនិវត្ដន៍ បញ្ចប់ជីវិតនយោបាយ។

លោក ង្វៀន សួនហ៊្វុក វ័យ៦៩ឆ្នាំ ធ្លាប់ធ្វើជាសមាជិក គណៈកម្មាធិការមជ្ឈិមបក្សកុម្មុយនិស្ត សមាជិកការិយាល័យនយោបាយ និង សមាជិករដ្ឋសភាជាច្រើនអាណត្តិ។ ចន្លោះពីឆ្នាំ១៩៩៧ ដល់ឆ្នាំ២០០៦ គាត់ បានធ្វើជាប្រធានគណៈកម្មាធិការប្រជាជន ប្រចាំខេត្តក្វាងណាំ (Quang Nam)។ លុះមកដល់ឆ្នាំ២០០៦ វៀតណាម បានតែងតាំងលោក ង្វៀន សួនហ៊្វុក ធ្វើជាប្រធានការិយាល័យរដ្ឋាភិបាល ហើយបានក្លាយជាឧបនាយករដ្ឋមន្រ្តី នៅក្នុងឆ្នាំ២០១១ មុនពេលគាត់បានក្លាយជានាយករដ្ឋមន្រ្តី នៅឆ្នាំ២០១៦ ហើយបានបន្ដឡើងកាន់តំណែងកំពូលជាចុងក្រោយរបស់គាត់ ក្រោយការជាប់ឆ្នោត ក្លាយជាប្រធានាធិបតីវៀតណាម នៅក្នុងអំឡុងខែមេសា ឆ្នាំ២០២១៕

បរទេស៖ ក្លាយជាបុគ្គលដែលក្មេងជាងគេ ដែលមានអាយុទើបតែ ៥ ឆ្នាំបានយកឈ្នះការឡើងកំពូលភ្នំខ្ពស់ៗចំនួន ៣ ក្នុងប្រទេសស្កុតឡែន ត្រឹមរយៈពេលតិចជាង ៤៨ ម៉ោង។

កាលពីថ្ងៃទី ១៧ ខែមករា ឆ្នាំ២០២៣ ទីភ្នាក់ងារសារព័ត៌មាន The Sun បានរាយការណ៍អំពី រឿងដ៏អស្ចារ្យមួយរបស់ក្មេងស្រីជនជាតិវែល Serene Isla Price  នាងមានអាយុទើបតែ ៥ ឆ្នាំ ប៉ុន្តែបានក្លាយជាអ្នកឡើងភ្នំដ៏ក្មេងបំផុតដើម្បីយកឈ្នះកំពូលភ្នំទាំង ៣ នៅ ចក្រភពអង់គ្លេស ក្នុងរយៈពេលតិចជាង ៤៨ ម៉ោង ហើយថែមទាំងជាអ្នកស្ម័គ្រចិត្តជួយអ្នកឡើងភ្នំ ដែលរងការប៉ះទង្គិចផ្សេងៗ

ការទទួលបានភាពជោគជ័យនេះត្រូវបានទទួលការកោតសរសើរចំពោះភាពក្លាហាន និងជំនាញមិនគួរឱ្យជឿរបស់ក្មេងស្រីដ៏តូចម្នាក់នេះ។

ជាមួយគ្នានោះរបាយការណ៍បញ្ជាក់ថា Serene Isla Price  រួមជាមួយនឹងឪពុករបស់នាងគឺលោក Glyn បានឡើងដល់កម្ពស់នៃកំពូលទាំងបីនៃភ្នំ Mount Ben Nevis ដែលជាភ្នំខ្ពស់បំផុតរបស់ប្រទេសស្កុតឡែន ក្នុងកម្ពស់រហូតទៅដល់ ១,៣៤៥ ម៉ែត្រ, ភ្នំ Snowdon ដែលខ្ពស់បំផុតនៅ Wales ក្នុងកម្ពស់ ១,០៨៥ ម៉ែត្រ, និងភ្នំ Scafell Pike កម្ពស់ ៩៧៨ ម៉ែត្រ ដោយគ្រាន់តែចំណាយពេលតិចជាង ៤៨ ម៉ោងដើម្បីឡើងលើដល់កំពូលភ្នំទាំងបីនេះ។

យ៉ាងណាមិញឪពុករបស់នាង បានលាតត្រដាងថា Seren Isla Price នាងបានចាប់ផ្ដើមឡើងភ្នំតាំងតែនាងនៅអាយុ ៣ ឆ្នាំជាមួយលោក ហើយអ្វីដែលសំខាន់ជាងនេះនោះគឺ ក្មេងស្រីនេះក៏កំពុងទទួលយកការបរិច្ចាគក្នុងសកម្មភាពឡើងភ្នំមួយនេះ ដើម្បីជួយដល់មន្ទីរពេទ្យកុមារក្នុងទីក្រុង Birmingham ដែលរូប Serene ក៏ធ្លាប់ជាទារកនៅ ដែលត្រូវបានទទួលការព្យាបាលពីទីនេះរហូតដល់នាងជាសះស្បើយពីជំងឺ និងមានសុខភាពល្អខ្លាំងរហូតមកដល់នាពេលបច្ចុប្បន្ននេះផងដែរ៕ ប្រភព៖ Khaosod