ទីក្រុងបាងកក៖ ប្រទេសថៃកំពុងប្រឈមមុខនឹងសម្ពាធកាន់តែខ្លាំងជុំវិញវិបត្តិអាកាសធាតុដែលកំពុងកើនឡើង នាំមកនូវគ្រោះធម្មជាតិធ្ងន់ធ្ងរដែលកំពុងបន្តរំខានដល់ជីវិតប្រចាំថ្ងៃរបស់ពលរដ្ឋ និងគំរាមកំហែងដល់ទស្សនវិស័យរយៈពេលវែង ដោយបង្កើនការព្រួយបារម្ភយ៉ាងខ្លាំងអំពីស្ថិរភាពសេដ្ឋកិច្ចនាពេលអនាគត។

យោងតាមការចេញផ្សាយដោយសារព័ត៌មាន The Nation នាថ្ងៃចន្ទ ទី១ ខែធ្នូ ឆ្នាំ២០២៥ បានបង្ហាញថា ទឹកជំនន់ដ៏ធ្ងន់ធ្ងរនៅក្នុងស្រុកហាតយ៉ៃ ខេត្តសុងក្លា កាលពីថ្មីៗនេះ បានបណ្តាលឱ្យខូចខាតទ្រព្យសម្បត្តិ និងការបាត់បង់ជីវិតយ៉ាងច្រើន។ ក្រៅពីគ្រោះទឹកជំនន់នេះ ប្រទេសថៃក៏បានជួបប្រទះនឹងគ្រោះរាំងស្ងួត និងសីតុណ្ហភាពកើនឡើងខ្ពស់ ដែលបណ្ដាលឲ្យប៉ះពាល់ដល់គ្រប់វិស័យ ចាប់ពីកសិកម្មរហូតដល់ទេសចរណ៍។

គួរបញ្ជាក់ថា ទឹកជំនន់ដ៏កា.ចសា.ហាវនៅក្នុងខេត្តភាគខាងត្បូងរបស់ប្រទេសថៃ បានបំផ្លាញហេដ្ឋារចនាសម្ព័ន្ធ ពលរដ្ឋបាត់បង់ជីវិត ផ្ទះសម្បែង ដីស្រែចម្ការ និងខ្លះប្រឈមនឹងភាពគ្មានការងារធ្វើ ជាងនេះទៅទៀតសកម្មភាពអាជីវកម្មជាច្រើនត្រូវបានផ្អាកដំណើរការ រីឯខ្លះទៀតត្រូវបិទចោលទាំងស្រុងតែម្ដង។

ទន្ទឹមនឹងនេះ ស្ថានភាពភ្លៀងធ្លាក់ដែលមិនអាចទាយទុកជាមុនបាន និងលក្ខខណ្ឌធាតុអាកាសក្ដៅខ្លាំងពេក បានប៉ះពាល់យ៉ាងខ្លាំងដល់វិស័យកសិកកម្ម កាត់បន្ថយទិន្នផលដំណាំ និងជំរុញឱ្យថ្លៃដើមផលិតកម្មកើនឡើងខ្ពស់ ជាហេតុនាំឲ្យកសិករជំពាក់បំណុលវ័ណ្ឌករ។ ការរំខានទាក់ទងនឹងអាកាសធាតុទាំងនេះ ក៏កំពុងតែដាក់សម្ពាធលើសេដ្ឋកិច្ចរបស់ប្រទេសថៃ ដែលពឹងផ្អែកយ៉ាងខ្លាំងទៅលើកសិកម្ម និងផលិតកម្មផងដែរ។

ជាមួយគ្នានេះ អ្នកជំនាញព្រមានថា បើរដ្ឋាភិបាលនៅតែគ្មានយុទ្ធសាស្ត្រសម្របខ្លួន និងកាត់បន្ថយផលប៉ះពាល់ដ៏រឹងមាំមួយទេ ប្រទេសនេះអាចប្រឈមមុខនឹងហានិភ័យហិរញ្ញវត្ថុកាន់តែធ្ងន់ធ្ងរ។ ការខូចខាតដល់ដីស្រែចម្ការ ប្រព័ន្ធដឹកជញ្ជូន និងតំបន់ឆ្នេរសមុទ្រអាចកាន់តែរីកធំឡើង ខណៈដែលឧស្សាហកម្មសំខាន់ៗក៏កំពុងរងការខាតបង់រយៈពេលវែង។

ទន្ទឹមនឹងនេះ វិស័យទេសចរណ៍ដែលផ្ដល់នូវចំណូលដ៏សំខានសម្រាប់សេដ្ឋកិច្ចជាតិ ក៏កំពុងរងការគំរាមកំហែងគួរឲ្យកត់សម្គាល់ផងដែរ ដែលនោះបណ្ដាលមកពីភាពមិនប្រាកដប្រជាក្នុងការដឹកនាំប្រទេស រួមទាំងលក្ខខណ្ឌអាកាសធាតុមិនអំណោយផល នាំឲ្យភ្ញៀវទេសចរបរទេសមកពីតាមបណ្ដារប្រទេសមួយចំនួនលុបចោលដំណើរកម្សាន្តរបស់ពួកគេមកកាន់ប្រទេសថៃ។

អាស្រ័យហេតុនេះហើយ ទើបបានជារដ្ឋាភិបាលថៃ ខិតខំរួមសហការជាមួយក្រសួងស្ថាប័នពាក់ព័ន្ធនានា ក្នុងស្ដារស្ថានភាពសេដ្ឋកិច្ចដែលកំពុងមានការដាំក្បាលចុះនេះឲ្យងើបឡើងមកវិញ ដោយមានទាំងការប្រើប្រាស់វិធានការដោះស្រាយសម្រាប់រយៈពេលខ្លី និងរយៈពេលវែង៕

ប្រទេសវៀតណាម៖ ក្រសួងអប់រំ និងបណ្តុះបណ្តាលរបស់វៀតណាម នឹងសាកល្បងលាយបញ្ចូលបច្ចេកវិទ្យាបញ្ញាសិប្បនិម្មិត (AI) ចូលទៅក្នុងកម្មវិធីសិក្សាអប់រំទូទៅចាប់ពីកម្រិតបឋមរហូតដល់វិទ្យាល័យ (ថ្នាក់ទី ១-១២) ដោយចាប់ផ្ដើមអនុវត្តពីខែធ្នូ ឆ្នាំ២០២៥ នេះតទៅ។ នេះបើតាមការចុះផ្សាយរបស់ទីភ្នាក់ងារព័ត៌មាន VNExpress។

យោងតាមសេចក្តីព្រាងគោលការណ៍ណែនាំ ដែលចេញផ្សាយកាលពីសប្តាហ៍មុន ការសាកល្បងនេះនឹងដំណើរការរហូតដល់ខែឧសភា ឆ្នាំ ២០២៦ នៅតាមសាលារៀនដែលបានជ្រើសរើស ដោយព័ត៌មានលម្អិតជាក់លាក់មិនទាន់ត្រូវបានប្រកាសនៅឡើយទេ។ យ៉ាងណាក៏ដោយ បន្ទាប់ពីការសាកល្បងនេះ ក្រសួងអប់រំវៀតណាមនឹងសម្រេចលើក្របខ័ណ្ឌចុងក្រោយសម្រាប់ការអនុវត្តឱ្យកាន់តែទូលំទូលាយនៅឆ្នាំសិក្សានាពេលអនាគត។

តាមប្រភពដដែល ការអប់រំ AI ត្រូវបានរៀបចំឡើងជុំវិញវិស័យចំណេះដឹងសំខាន់ៗចំនួនបួន រួមមាន ការគិតដែលផ្តោតលើមនុស្សជាគោល, ក្រមសីលធម៌ AI, បច្ចេកទេសនិងការអនុវត្ត AI, និងការរចនាប្រព័ន្ធ AI។ ខ្លឹមសារនឹងត្រូវតម្រូវទៅតាមអាយុ និងការអភិវឌ្ឍនៃការយល់ដឹងរបស់សិស្សតាមរយៈពីរដំណាក់កាល រួមមាន ការអប់រំកម្រិតមូលដ្ឋានសម្រាប់បឋមសិក្សា និងអនុវិទ្យាល័យ (ថ្នាក់ទី ៦-៩) និងការតម្រង់ទិសអាជីព (វិទ្យាល័យ)។

ដោយឡែក នៅកម្រិតមូលដ្ឋាន សិស្សនឹងត្រូវបានណែនាំឱ្យស្គាល់ AI តាមរយៈកម្មវិធីដែលមានរូបភាព និងសំឡេង ដោយបណ្តុះការយល់ដឹងជាបណ្តើរៗអំពីការការពារទិន្នន័យផ្ទាល់ខ្លួន។ សិស្សនៅកម្រិតអនុវិទ្យាល័យនឹងរៀនពីគំនិតមូលដ្ឋានដូចជា ទិន្នន័យ និងក្បួនដោះស្រាយ (algorithms) ការអនុវត្តការប្រើប្រាស់ AI ដើម្បីគាំទ្រកិច្ចការសិក្សា និងការកំណត់ហានិភ័យ និងភាពលំអៀងដែលអាចកើតមាន។

បន្ទាប់មកនៅកម្រិតវិទ្យាល័យ សិស្សនឹងរៀនរចនាប្រព័ន្ធ AI ធម្មតា អភិវឌ្ឍជំនាញដោះស្រាយបញ្ហាកម្រិតខ្ពស់ និងស្វែងយល់ពីផ្លូវអាជីពក្នុងវិស័យបច្ចេកវិទ្យា។ បើតាមអ្នកជំនាញ ការណែនាំ AI នៅកម្រិតបឋមសិក្សាគឺជារឿងចាំបាច់ ប៉ុន្តែត្រូវតែអនុវត្តតាមផែនទីបង្ហាញផ្លូវប្រកបដោយការប្រុងប្រយ័ត្ន សុវត្ថិភាព និងសមស្របតាមអាយុ។

ក្រសួងអប់រំវៀតណាមបានសង្កត់ធ្ងន់ថា ការដាក់បញ្ចូល AI នឹងមិនធ្វើឱ្យកម្មវិធីសិក្សាបច្ចុប្បន្នលើសកម្រិតនោះទេ។ ផ្ទុយទៅវិញ សាលារៀនត្រូវបានលើកទឹកចិត្តឱ្យតម្រឹមខ្លឹមសារ AI ជាមួយនឹងលទ្ធផលសិក្សាដែលមានស្រាប់ ដោយរួមបញ្ចូលវាតាមរយៈមេរៀនតាមប្រធានបទ ការរៀនសូត្រផ្អែកលើគម្រោង ឬក្លឹបក្រៅកម្មវិធីសិក្សា ដើម្បីជំរុញឲ្យវិស័យបច្ចេកវិទ្យាដើរដោយបញ្ញាសិប្បនិម្មិតនៅក្នុងប្រទេសវៀតណាមកាន់តែមានភាពរីកចម្រើន៕

ប្រទេសឥណ្ឌូណេស៊ី ៖ ស្របពេលទឹកជំនន់វាយប្រ.ហារយ៉ាងធ្ងន់ធ្ងរនៅបណ្តាប្រទេសក្នុងតំបន់អាស៊ាន រួមមាន ៖ ថៃ វៀតណាម និងម៉ាឡេស៊ី បណ្តាលឱ្យខូចខាតផ្ទះសម្បែង អគារ ស្ពាន ផ្លូវ សាលារៀន មន្ទីរពេទ្យ និងផ្ទៃដីកសិកម្ម ដែលជាការខាតបង់សេដ្ឋកិច្ចយ៉ាងច្រើនមហាសាល នៅឥណ្ឌូណេស៊ីក៏រងផលប៉ះពាល់ធ្ងន់ធ្ងរដែរ រហូតធ្វើឱ្យពលរដ្ឋឥណ្ឌូណេស៊ីស្លា.ប់ដោយសារទឹកជំនន់កើនឡើងរហូតដល់៤៤២នាក់ រងរបួសជាង៦៤០នាក់ និងបាត់ខ្លួនប្រមាណ៤០០នាក់ ។

កាលពីថ្ងៃទី៣០ ខែវិច្ឆិកា ឆ្នាំ២០២៥ សារព័ត៌មានបរទេសរាយការណ៍ថា ទឹកជំនន់យ៉ាងខ្លាំងក្លា និងបាក់ដីនៅកោះស៊ូម៉ាត្រា ប្រទេសឥណ្ឌូណេស៊ី បណ្តាលឱ្យពលរដ្ឋស្លាប់កើនឡើងយ៉ាងឆាប់រហ័សរហូតដល់៤៤២នាក់ រងរបួសជាង៦៤០នាក់ និងបាត់ខ្លួនប្រមាណ៤០០នាក់ គិតត្រឹមថ្ងៃទី៣០ ខែវិច្ឆិកា ខណៈរដ្ឋាភិបាលឥណ្ឌូណេស៊ីព្យាយាមជួយសង្គ្រោះពលរដ្ឋរងគ្រោះ ។ ភ្នាក់ងារសង្គ្រោះនៅតែបន្តជួយពលរដ្ឋយ៉ាងលំបាកដោយសារផ្លូវធ្វើដំណើរត្រូវបានទឹកហូរកាត់ផ្តាច់ រីឯការតភ្ជាប់សេវាអ៊ីនធើរណេត និងអគ្គិសនីធ្វើឡើងក្នុងតំបន់មួយចំនួនប៉ុណ្ណោះ ។

ភ្នាក់ងារជាតិគ្រប់គ្រងគ្រោះមហន្តរាយឥណ្ឌូណេស៊ីបានបង្ហាញពីចំនួនមនុស្សស្លាប់ រងរបួស និងបាត់ខ្លួនយ៉ាងច្រើនដោយសារទឹកជំនន់នៅខេត្តចំនួន៣ រួមមាន ៖ ខេត្តសុម៉ាត្រាខាងជើង, សុម៉ាត្រាខាងលិច និងខេត្តអាជេស ។ ទឹកជំនន់ធ្វើឱ្យពលរដ្ឋជិត៥ម៉ឺននាក់គ្រួសារជម្លៀសចេញពីផ្ទះសម្បែង ហើយរដ្ឋាភិបាលឥណ្ឌូណេស៊ីបានបញ្ជូននាវាចម្បាំង២គ្រឿងពីទីក្រុងហ្សាកាតា មកជួយសង្គ្រោះមនុស្សរងគ្រោះនៅបណ្តាខេត្តទាំងនេះ ។

ទឹកជំនន់ និងការបាក់ដីយ៉ាងខ្លាំងក្លានៅកោះស៊ូម៉ាត្រា គឺបន្ទាប់ពីមានខ្យល់ព្យុះស៊ីក្លូន ដែលបណ្តាលឱ្យផ្ទះជាច្រើនខ្នងត្រូវបានខ្យល់បក់ខ្ទេចខ្ទី ខណៈអគាររាប់ពាន់កន្លែងលិចទឹក ។ ភ្នាក់ងារជាតិគ្រប់គ្រងគ្រោះមហន្តរាយបញ្ជាក់ថា អាកាសធាតុដ៏អាក្រក់ជាឧបសគ្គរបស់ភ្នាក់ងារសង្គ្រោះ បើទោះជាមនុស្សរាប់ម៉ឺននាក់បានជម្លៀសចេញពីតំបន់គ្រោះថ្នាក់ ប៉ុន្តែនៅមានមនុស្សរាប់រយនាក់ទៀតជាប់ក្នុងផ្ទះ ឬអគារ ។

ទីក្រុងតាប៉ានូលី រងផលប៉ះពាល់ធ្ងន់ធ្ងរបំផុត បើតាមសេចក្តីរាយការណ៍ គឺពលរដ្ឋក្នុងទីក្រុងនេះបានសម្រុកចូលលួចចំណីអាហារក្នុងហាងទំនិញយកមកបរិភោគកុំឱ្យស្លាប់ ។ អាជ្ញាធរឥណ្ឌូណេស៊ីប្រកាសកោះស៊ូម៉ាត្រាជាតំបន់មានគ្រោះថ្នាក់ខ្លាំង ដែលចាំបាច់ត្រូវដោះស្រាយបញ្ហាទឹកជំនន់ជាបន្ទាន់ និងបង្កើនទំនាក់ទំនងជាមួយស្ថាប័នពាក់ព័ន្ធដើម្បីសង្គ្រោះពលរដ្ឋ ។

ឥណ្ឌូណេស៊ីមិនធ្លាប់មានទឹកជំនន់ខ្លាំងពីមុនទេ ដែលស្ថានការណ៍នេះធ្វើឱ្យពលរដ្ឋឥណ្ឌូណេស៊ីមានបញ្ហាផ្លូវចិត្តកាន់តែខ្លាំង ដោយសារពួកគេធ្លាប់បាត់បង់ទ្រព្យសម្បត្តិក្នុងហេតុការណ៍រលកយក្សស៊ូណាមិកាលពីឆ្នាំ២០០៤ ហើយទឹកជំនន់នេះមិនខុសគ្នាពីរលកយក្សស៊ូណាមិទេ ។ អ្នកជំនាញថា ទឹកជំនន់ធ្ងន់ធ្ងរបង្ហាញពីបម្រែបម្រួលអាកាសធាតុ ខាងឧតុនិយមពិបាកព្យាករណ៍ ។

គួរបញ្ជាក់ថា សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជាបានផ្ញើសារលិខិតចូលរួមរំលែកទុក្ខដ៏ក្រៀមក្រំ និងក្តីអាណិតអាសូរទៅកាន់លោកជំទាវ ពាន់ ម៉ាហារ៉ានី (Puan Maharani) ប្រធានរដ្ឋសភាឥណ្ឌូណេស៊ី និងទៅកាន់ក្រុមគ្រួសារនៃសពដែលបានបាត់បង់សមាជិកក្រុមគ្រួសារជាទីស្រឡាញ់ ក៏ដូចជាក្រុមគ្រួសាររងគ្រោះមហន្តរាយធម្មជាតិនៃទឹកជំនន់ និងការបាក់ស្រុតដីដ៏ធ្ងន់ធ្ងរនៅកោះស៊ូម៉ាត្រា ដែលបណ្តាលឱ្យពលរដ្ឋឥណ្ឌូណេស៊ីបាត់បង់ជីវិត រងរបួស បាត់ខ្លួន និងពលរដ្ឋជាច្រើនពាន់គ្រួសារទៀតត្រូវជម្លៀសចេញពីលំនៅឋាន ព្រមទាំងត្រូវបំផ្លិ.ចបំផ្លា.ញទ្រព្យសម្បត្តិយ៉ាងច្រើនសន្ធឹកសន្ធាប់ ៕

ចាប់តាំងពីការចេញផ្សាយកាលពីថ្ងៃទី៦ ខែវិច្ឆិកា ខ្សែភាពយន្ត «Dear X» បានទទួលការចាប់អារម្មណ៍ពីទស្សនិកជនដោយសារតែគ្រោងឆ្អឹងដ៏ខ្មៅងងឹតរបស់តួឯកស្រី Kim Yoo Jung និងការសម្ដែងដ៏គួរឱ្យចាប់អារម្មណ៍របស់នាង។ ទស្សនិកជនភាគច្រើនលើកឡើងថា តារាស្រីរូបនេះបានប្រែខ្លួនទាំងស្រុងពេលដើរតួជា Baek Ah Jin ពីរូបរាងរហូតដល់សមត្ថភាពក្លាយជាតួឯក។ សូម្បីតែក្នុងឈុតដែល Ah Jin តស៊ូជាមួយឪពុកនាង Kim Yoo Jung ស្ទើរតែហត់នឿយ និងទ្រាំលែងបាន ព្រោះឈុតនេះចំណាយពេល ៣-៤ ថ្ងៃដើម្បីថត។

ដោយសារតែភាពល្បីល្បាញនៃការងារនេះ Kim Yoo Jung បានឡើងដល់កំពូលនៃបញ្ជីតារាដែលមានប្រជាប្រិយភាពបំផុតប្រចាំសប្តាហ៍ នេះបើយោងតាមក្រុមហ៊ុន Good Data Corporation ។ ទន្ទឹមនឹងនេះ វេទិកាទូរទស្សន៍បាននិយាយថា «Dear X» ជាប់ចំណាត់ថ្នាក់លេខ ១ ក្នុងចំនួនអ្នកជាវថ្មី ៣ សប្តាហ៍ជាប់ៗគ្នាចាប់តាំងពីការចេញផ្សាយរបស់វា ដែលបង្ហាញពីប្រជាប្រិយភាពរបស់រឿងនេះ។

ចែករំលែកអំពីភាពជោគជ័យនៃខ្សែភាពយន្តនេះ Kim Yoo Jung បានរំជួលចិត្តយ៉ាងខ្លាំងថា «ខ្ញុំបានខិតខំប្រឹងប្រែងយ៉ាងខ្លាំងក្នុងគម្រោងនេះ ដូច្នេះវាពិតជាល្អណាស់ដែលឃើញមនុស្សឆ្លើយតបជាវិជ្ជមាន។ មិត្តភ័ក្តិរបស់ខ្ញុំនិយាយលេងថា ពួកគេខ្លាចពេលខ្ញុំមើលពួកគេ។ នេះបានធ្វើឱ្យខ្ញុំសើច ព្រោះវាមានន័យថាខ្ញុំលេង Ah Jin បានល្អ»។
យោងទៅតាមតារាស្រីរូបនេះ ដោយសារតែរឿង «Dear X» ត្រូវបានកែសម្រួលពីគេហទំព័រដ៏ពេញនិយមមួយ នាងមានការព្រួយបារម្ភពីដំបូងថានាងនឹងធ្វើឱ្យអ្នកគាំទ្រខកចិត្ត។ សម្រាប់នាង ការប្រឈមដ៏ធំបំផុតរបស់នាងគឺការបង្ហាញពីអារម្មណ៍ច្របូកច្របល់របស់តួអង្គ។

Kim Yoo Jung បាននិយាយថា «ក្នុងនាមជាតួសម្តែង អារម្មណ៍តែងតែហូរចូលតាមធម្មជាតិ ប៉ុន្តែតួ Ah Jin ដែលខ្ញុំសម្តែងមិនចង់បង្ហាញទេ ហើយការលាក់អារម្មណ៍ទាំងនោះគឺជារឿងពិបាកបំផុត។ ពេលសម្តែង ខ្ញុំព្យាយាមបញ្ចេញនូវអារម្មណ៍ និងអារម្មណ៍របស់ខ្ញុំ ដើម្បីសង្ឃឹមថាអ្នកទស្សនានឹងមានអារម្មណ៍អសន្តិសុខដូចពេលអាន webtoon ដែរ។ ប៉ុន្តែក្នុងឈុតខ្លះ ខ្ញុំហាត់ធ្វើភ្នែកឱ្យច្បាស់ជាងនេះទៅទៀត»។ ខ្សែភាពយន្ត «Dear X» ត្រូវបានគេរំពឹងថានឹងបញ្ចប់នៅថ្ងៃទី ៤ ខែធ្នូ។ រឿងនេះនិយាយពី Baek Ah Jin ដែលជាតារាសម្តែងដ៏ល្បីល្បាញដែលទទួលបានជោគជ័យដោយការទាញយកប្រយោជន៍ពីអ្នកដទៃ ធ្វើឱ្យតួប្រុសជាច្រើនរងគ្រោះដោយសារតែនាង៕

ប្រទេសថៃ ៖ សារព័ត៌មានថៃរាយការណ៍ថា កាលពីថ្ងៃទី៣០ ខែវិច្ឆិកា ឆ្នាំ២០២៥ ទីក្រុងបាងកក ប្រទេសថៃ មានធូលីកខ្វក់ PM 2.5 កាន់តែខ្លាំងស្ថិតក្នុងកម្រិតពណ៌ទឹកក្រូច ចាប់ផ្តើមប៉ះពាល់សុខភាពពលរដ្ឋរស់នៅតំបន់ចំនួន៤៩ និង១២តំបន់មានធូលីកខ្វក់ខ្លាំងជាងគេ ជាពិសេស តំបន់សាថន ណងខេម និងឡាតក្រាបាំង ។ បើតាមការសន្និដ្ឋាន គឺបណ្តាលមកពីកត្តាអាកាសធាតុ ទើបទីក្រុងបាងកកមានធូលីកខ្វក់ខ្លាំង ។

បរិមាណធូលីកខ្វក់នៅទីក្រុងបាងកកបាននិងកំពុងកើនឡើងចាប់ពីថ្ងៃទី៣០ ខែវិច្ឆិកា រហូតដល់ថ្ងៃទី២ ខែធ្នូ ហើយនៅថ្ងៃទី៧ ខែធ្នូ ធូលីនឹងកខ្វក់បំផុត ដែលបណ្តាលមកពីការបម្លាស់ទីខ្យល់ស្ថិតក្នុងកម្រិតទាប ឬខ្យល់បម្លាស់ទីមិនល្អ ។ បើតាមការសន្និដ្ឋាន គឺកំហាប់ និងភាគល្អិតរបស់ធូលីកខ្វក់ នឹងកើនឡើងខ្លាំងបន្ថែមទៀត ។

អាជ្ញាធរក្រុងបាងកកបញ្ជាក់ថា បរិមាណធូលីកខ្វក់ PM 2.5 កាលពីថ្ងៃទី៣០ ខែវិច្ឆិកា កើនឡើងខ្ពស់ជាងពេលកន្លងមក គឺស្មើរហូតដល់៤២.៦មីក្រូក្រាមក្នុង១ម៉ែត្រគូបនៃខ្យល់ ដែលកើនឡើងខ្ពស់ជាងកម្រិតស្តង់ដារត្រឹមតែ៣៧.៥មីក្រូក្រាមក្នុង១ម៉ែត្រគូបនៃខ្យល់ ទើបធ្វើឱ្យវាស្ថិតក្នុងកម្រិតពណ៌ទឹកក្រូច ចាប់ផ្តើមប៉ះពាល់សុខភាពពលរដ្ឋ ។ កំណើនធូលីកខ្វក់ដោយសារឥទ្ធិពលសម្ពាធខ្ពស់ពីប្រទេសចិន ទើបធ្វើឱ្យទីក្រុងបាងកកមានអាកាសធាតុចុះត្រជាក់ និងខ្យល់បម្លាស់ទីមិនល្អ ។

អាជ្ញាធរក្រុងបាងកកណែនាំឱ្យពលរដ្ឋថែទាំសុខភាពដោយពាក់ម៉ាស់ការពារធូលីកខ្វក់ PM 2.5 ជានិច្ចពេលចេញពីផ្ទះ, កាត់បន្ថយសកម្មភាពក្រោមកំដៅថ្ងៃខ្លាំង និងសង្កេតអាការៈក្អក ពិបាកដកដង្ហើម ឬឈឺភ្នែក ។ រីឯពលរដ្ឋដែលប្រឈមនឹងផលប៉ះពាល់សុខភាព គួរតែផ្អាកសកម្មភាពកណ្តាលថ្ងៃ, អនុវត្តតាមការណែនាំរបស់គ្រូពេទ្យ និងទៅជួបគ្រូពេទ្យជាបន្ទាន់ ប្រសិនបើអាការៈខុសប្រក្រតី ។

កន្លងមក មន្ត្រីសុខាភិបាលថៃបានណែនាំឱ្យពលរដ្ឋទីក្រុងបាងកកកាត់បន្ថយសកម្មភាពនៅក្រៅផ្ទះ និងពាក់ម៉ាស់ការពារធូលីកខ្វក់ពេលចញទៅខាងក្រៅ ខណៈមន្ទីរពេទ្យនានាចេញសេចក្តីប្រកាសដាស់តឿនដល់អ្នកជំងឺហឺត បញ្ហាបេះដូង និងជំងឺពាក់ព័ន្ធនឹងផ្លូវដង្ហើមបង្កើនការប្រុងប្រយ័ត្នបន្ថែម ពីព្រោះភាគល្អិតរបស់ធូលីកខ្វក់អាចជ្រាបចូលក្នុងសួត និងចរន្តឈាម ។

គួរបញ្ជាក់ថា ស្របពេលទីក្រុងបាងកកប្រឈមនឹងធូលីកខ្វក់ខ្លាំងលើបរិយាកាស ខេត្តនានារបស់ថៃបាននិងកំពុងលិចទឹកជំនន់យ៉ាងធ្ងន់ធ្ងរមិនធ្លាប់មានក្នុងប្រវត្តិសាស្ត្រ ដែលគ្រោះធម្មជាតិនេះបានបំផ្លិ.ចបំផ្លា.ញហេដ្ឋារចនាសម្ព័ន្ធ និងទ្រព្យសម្បត្តិយ៉ាងច្រើនមហាសាល ខណៈពលរដ្ឋថៃជិត២លាននាក់ស្រេកឃ្លានខ្លាំងស្រែកដង្ហើយរកជំនួយ ។ នេះជាបញ្ហាដែលរដ្ឋាភិបាលថៃពិបាកដោះស្រាយ និងអំពាវនាវសុំជំនួយពីអន្តរជាតិ ។

ទោះជាទឹកជំនន់ដ៏អាក្រក់នៅស្រុកហាតយៃ ខេត្តសុងក្លា បានស្រកចុះពិតមែន ប៉ុន្តែបណ្តាខេត្តផ្សេងៗរបស់ថៃនៅតែលិចទឹកធ្ងន់ធ្ងរ ដូចជា ៖ ខេត្តអយុធ្យាបានលិចទឹកជាង៥ខែហើយ បើគិតត្រឹមថ្ងៃទី១ ខែធ្នូ ឆ្នាំ២០២៥ បណ្តាលឱ្យប៉ះពាល់ដល់ពលរដ្ឋចំនួន៤ម៉ឺន៤ពាន់គ្រួសារ ។ ទឹកជំនន់នៅអយុធ្យាមិនស្រកចុះ ខណៈនៅទីក្រុងធំៗបែរជារាំងស្ងួត រហូតធ្វើឱ្យពលរដ្ឋរិះគន់ពីការគ្រប់គ្រងទឹកជំនន់បរាជ័យរបស់រដ្ឋាភិបាល បន្ទាប់ពីខូចខាតផ្ទះ ដំណាំ បាត់បង់ការងារ និងប្រាក់ចំណូល ៕

រាជធានីភ្នំពេញ៖ ក្រសួងការពារជាតិកម្ពុជា បានធ្វើការបញ្ជាក់អំពីករណីជនជាតិចិនម្នាក់ ដែលត្រូវបានថៃអះអាងថាបានជាន់មីនផ្ទុះនៅតាមព្រំដែន នៅខណៈពេលដែលគេព្យាយាមលួ.ចឆ្លងពីកម្ពុជាចូលទឹកដីថៃនោះថា មិនមានឈ្មោះនៅក្នុងប្រព័ន្ធទិន្នន័យកត់ត្រាអ្នកដំណើរចេញ-ចូលប្រទេសកម្ពុជារបស់អគ្គនាយកដ្ឋានអន្តោប្រវេសន៍នោះឡើយ។

យោងតាមសេចក្តីរាយការណ៍ពីយោធភូមិភាគទី៥ នៃកងយោធពលខេមរភូមិន្ទ បានឱ្យដឹងថា កាលពីវេលាម៉ោង ៣:២០នាទីទៀបភ្លឺ ថ្ងៃទី២៩ ខែវិច្ឆិកា ឆ្នាំ២០២៥ កងការពារព្រំដែនលេខ៥០៣របស់កម្ពុជា ដែលឈរជើងនៅក្នុងភូមិសាស្រ្តភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានឮសូរសំឡេងផ្ទុះគ្រាប់មីនចំនួន ០១គ្រាប់ ហើយបើតាមការពិនិត្យទីតាំងឧបទ្ទវហេតុនេះបានកើតឡើងនៅក្នុងតំបន់ចម្ការមីនរបស់កម្ពុជា ដែលមានគ្រាប់មីនចាស់មិនទាន់ផ្ទុះដែលជាសំណល់ពីសម័យសង្គ្រាមជាយូរឆ្នាំមកហើយ។

ចំពោះជនជាតិចិនឈ្មោះ SHI JINGUI កាន់លិខិតឆ្លងដែនលេខ 2356975263 ដែលអាជ្ញាធរថៃបានផ្សាយថាជាជនរងគ្រោះក្នុងឧបទ្ទវហេតុជាន់មីននោះត្រូវបានក្រសួងមហាផ្ទៃ នៃព្រះរាជាណាចក្រកម្ពុជា បញ្ជាក់ថាឈ្មោះរបស់គេពុំមាននៅក្នុងប្រព័ន្ធទិន្នន័យកត់ត្រាអ្នកដំណើរចេញ-ចូលប្រទេសកម្ពុជារបស់អគ្គនាយកដ្ឋានអន្តោប្រវេសន៍នោះទេ។

ក្រសួងការពារជាតិកម្ពុជា បានបដិសេធនូវការចោទប្រកាន់ទាំងឡាយរបស់ភាគីថៃ។ ក្រសួងការពារជាតិបានគូសបញ្ជាក់ថា ប្រទេសកម្ពុជាគោរពអនុវត្តច្បាប់អន្តរជាតិ និងមិនដែលដាក់មីនថ្មីនោះទេ។ លើសពីនេះ ប្រទេសកម្ពុជាមិនត្រឹមតែបានខិតខំប្រឹងប្រែងបោសសម្អាតមីនដែលនៅសេសសល់ពីសង្គ្រាម ដើម្បីការពារអាយុជីវិត និងសុវត្ថិភាពរបស់ប្រជាពលរដ្ឋ ព្រមទាំងលើកកម្ពស់សេដ្ឋកិច្ចសង្គមប៉ុណ្ណោះទេ ប៉ុន្តែថែមទាំងបានចូលរួមយ៉ាងសកម្មនៅក្នុងការងារដោះមីននៅក្រោមឆ័ត្ររបស់អង្គការសហប្រជាជាតិផងដែរ។

ពាក់ព័ន្ធនឹងការងារដោះមីនមនុស្សធម៌តាមព្រំដែនកម្ពុជា-ថៃ ក្រុមការងាររបស់អង្គភាព CMAC និង TMAC, ក្នុងនាមជាសេនាធិការឱ្យក្រុមការងារ JCTF, បានចុះទៅសិក្សាវាយតម្លៃ និងបន្តប្រជុំពិភាក្សាលើទីតាំងសាកល្បងនៅក្នុងតំបន់អាទិភាពនៅព្រំដែន ដោយទទួលបានលទ្ធផលវិជ្ជមានជាបន្តបន្ទាប់។
ក្នុងន័យនេះ ភាគីកម្ពុជាជំរុញឱ្យភាគីថៃអនុវត្តឱ្យបានម៉ឺងម៉ាត់នូវកិច្ចព្រមព្រៀងដែលភាគីទាំងពីរបានឯកភាពគ្នារួចមកហើយ ដោយការងារដោះមីនមនុស្សធម៌នៅតាមព្រំដែន ត្រូវធ្វើឡើងតាមរយៈក្រុមការងារ JCTF និងស្របតាម SOP ដែលបានឯកភាពគ្នា។

ក្រសួងការពារជាតិកម្ពុជា នឹងបន្តប្តេជ្ញាចិត្តក្នុងការលើកកម្ពស់សន្តិភាព ស្ថិរភាព និងភាពជាអ្នកជិតខាងល្អជាមួយថៃ និងដោះស្រាយជម្លោះដោយសន្តិវិធី ស្របតាមច្បាប់អន្តរជាតិ ព្រមទាំងគោរពយ៉ាងខ្ជាប់ខ្ជួននូវសេចក្តីថ្លែងការណ៍រួមស្តីពីសន្តិភាពរវាងកម្ពុជានិងថៃ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥៕