ប្រទេសថៃ ៖ បើតាមនាយករដ្ឋមន្ត្រីថៃចាំផ្ទះ លោក Anutin Charnvirakul និយាយនៅថ្ងៃទី២៧ ខែធ្នូ ឆ្នាំ២០២៥ ថា រដ្ឋមន្ត្រីក្រសួងការបរទេសថៃ លោក Sihasak Phuangketkeow នឹងធ្វើដំណើរទៅប្រទេសចិន នៅថ្ងៃទី២៨ ខែធ្នូ ដើម្បីជួបលោក Wang Yi រដ្ឋមន្ត្រីក្រសួងការបរទេសចិន ជជែកពីបញ្ហាព្រំដែនកម្ពុជា-ថៃ ។ ក្រៅពីនេះ លោក Anutin បានបញ្ជាក់ពីទំនាក់ទំនងការទូតមិនពាក់ព័ន្ធនឹងកងទ័ពទេ ។

នាវេលាម៉ោង១០ព្រឹក ថ្ងៃទី២៧ ខែធ្នូ នៅខេត្តអយុធ្យា នាយករដ្ឋមន្ត្រីចាំផ្ទះ លោក Anutin បានផ្តល់សម្ភាសន៍ជាមួយសារព័ត៌មានអំពីកិច្ចប្រជុំក្រុមប្រឹក្សាសន្តិសុខជាតិនៅថ្ងៃទី២៥ ខែធ្នូ កន្លងមកថា ពលរដ្ឋថៃមិនគាំទ្រការចុះកិច្ចព្រមព្រៀងសន្តិភាពទីក្រុងគូឡាឡាំពួរដោយសារមិនទុកចិត្តកម្ពុជា ប៉ុន្តែកិច្ចប្រជុំក្រុមប្រឹក្សាសន្តិសុខជាតិបានអនុវត្តតាមនីតិវិធីជាច្រើន ។ រីឯកងទ័ពមាននីតិវិធីរបស់ខ្លួន រដ្ឋាភិបាលថៃគាំទ្រកងទ័ពយ៉ាងពេញទំហឹង ។

ពេលនេះ កងទ័ពថៃបានធ្វើប្រតិបត្តិការតាមផែនការគ្រោងទុក រីឯទំនាក់ទំនងការទូត គឺជាតួនាទីរបស់ក្រសួងការបរទេស និងកិច្ចប្រជុំ GBC ដែលបានព្រមព្រៀងគ្នាក្នុងកិច្ចប្រជុំរដ្ឋមន្ត្រីការបរទេសអាស៊ានកន្លងមក ។ រដ្ឋមន្ត្រីក្រសួងការបរទេសចិន លោក Wang Yi បានអញ្ជើញរដ្ឋមន្ត្រីក្រសួងការបរទេសថៃ លោក Sihasak ទៅពិភាក្សានៅទីក្រុងគុនមីង ប្រទេសចិន ដើម្បីជជែកពីស្ថានការណ៍ព្រំដែនកម្ពុជា-ថៃបច្ចុប្បន្ន ។

លោក Anutin និយាយដោយឥតអៀនខ្មាស់ថា កងទ័ពថៃបើកការវាយប្រហារកម្ពុជាលើកនេះដើម្បីការពារអធិបតេយ្យរបស់ខ្លួន និងគ្មានបំណងឈ្លានពានកម្ពុជាទេ ថៃត្រូវតែការពារអធិបតេយ្យមិនឱ្យប្រទេសជិតខាងល្មើសដាច់ខាត សូម្បីតែ១ចំអាមក៏មិនឱ្យបាត់បង់ ។ រដ្ឋាភិបាលថៃប្រកាន់គោលជំហរការពារទឹកដីមិនឱ្យបរទេសល្មើសអធិបតេយ្យ ហេតុនេះ សូមពលរដ្ឋយល់ពីរដ្ឋាភិបាល ។ ស្ថានការណ៍ព្រំដែនកម្ពុជា-ថៃបច្ចុប្បន្ននឹងមិនប៉ះពាល់ដល់ការបោះឆ្នោតនៅប្រទេសថៃទេ ខណៈគណៈកម្មការរៀបចំការបោះឆ្នោតមាននីតិវិធី និងប្រកាសច្បាស់លាស់ ។

រដ្ឋមន្ត្រីក្រសួងការបរទេសថៃ លោក Sihasak នឹងធ្វើដំណើរទៅចិន គឺបន្ទាប់ពីបញ្ចប់កិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅកម្ពុជា-ថៃ (GBC) ដែលបានប្រព្រឹត្តទៅនាព្រឹកថ្ងៃទី២៧ ខែធ្នូ និងបញ្ចប់នាវេលាម៉ោង១០និង២០នាទី នៅច្រកអន្តរជាតិព្រំ-ផាកកាត ខេត្តប៉ៃលិន ប្រទេសកម្ពុជា ទល់នឹងខេត្តចន្ទបុរី ប្រទេសថៃ ក្រោមការសង្កេតការណ៍ពីក្រុមអ្នកសង្កេតការណ៍អាស៊ាន (AOT) ប្រចាំកម្ពុជា និងថៃ ដែលដឹកនាំដោយឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា លោក Natthaphon Narkphanit រដ្ឋមន្ត្រីក្រសួងការពារជាតិថៃ ។

កម្ពុជា និងថៃ បានឯកភាពគ្នាលើបទឈប់បាញ់ ដោយអនុវត្តចាប់ពីម៉ោង១២និង០០នាទីថ្ងៃត្រង់ ថ្ងៃទី២៧ ខែធ្នូ ឆ្នាំ២០២៥ និងរក្សាការឈរជើងនៅទីតាំងបច្ចុប្បន្ន ។ មេដឹកនាំថៃ និងកងទ័ពថៃថា កិច្ចប្រជុំ GBC បានសម្រេចឱ្យភាគីទាំងពីរឈប់បាញ់រយៈពេល៧២ម៉ោង បន្ទាប់មក ថៃនឹងដោះលែងវីរៈកងទ័ពកម្ពុជាទាំង១៨រូប ប៉ុន្តែប្រសិនបើកម្ពុជាមិនស្មោះត្រង់ កងទ័ពថៃនឹងបន្តប្រតិបត្តិការយ៉ាងចាស់ដៃ ។

គួរបញ្ជាក់ថា នារសៀលថ្ងៃទី២៧ ខែធ្នូ នេះ ឯកឧត្តម ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា បានអញ្ជើញដឹកនាំគណៈប្រតិភូ ចូលរួមកិច្ចប្រជុំត្រីភាគីរវាងកម្ពុជា-ថៃ-ចិន ដើម្បីពិភាក្សាអំពីស្ថានភាពវិវត្តបច្ចុប្បន្នរវាងកម្ពុជា-ថៃ ដែលនឹងប្រព្រឹត្តទៅចាប់ពីថ្ងៃទី២៨ ដល់ថ្ងៃទី២៩ ខែធ្នូ ឆ្នាំ២០២៥ នៅខេត្តយូណាន ប្រទេសចិន ៕

នៅខណៈពេលដែលប្រទេសខ្លួនកំពុងត្រូវបានថ្កោលទោ.សដោយមនុស្សរាប់ពាន់លាននាក់ដែលកាន់សាសនាហិណ្ឌូនៅជុំវិញពិភពលោកថាជាពូ.ជទមិឡអត់សាសនាបំផ្លា.ញរូបសំណាកព្រះវិស្ណុ ឥឡូវនេះសារព័ត៌មានក្នុងស្រុករបស់ថៃ រួមទាំងប្រជាពលរដ្ឋថៃមួយចំនួន បានចាប់ផ្ដើមទៅស្វែងរករូបភាពនិងវីដេអូពីព័ត៌មានចាស់ៗ ដើម្បីយកមកវា.យប្រហារប្រទេសនិងប្រជាជនឥណ្ឌាវិញម្ដង។

តាមការចុះផ្សាយរបស់សារព័ត៌មាន MGR Online របស់ថៃ ពួកគេបានបង្ហាញអំពីសកម្មភាពការរុះរើរូបសំណាកព្រះយេស៊ូនៅក្នុងប្រទេសឥណ្ឌា ដែលទង្វើនេះត្រូវបានគេមើលឃើញយ៉ាងទូលំទូលាយថាជាយុទ្ធសាស្ត្រ «បង្វែរដាន» ដើម្បីកាត់បន្ថយការខឹងសម្បារពីអន្តរជាតិជុំវិញការវាយកម្ទេចរូបសំណាកព្រះវិស្ណុរបស់ហិណ្ឌូនៅតាមព្រំដែនកម្ពុជា កាលពីពេលថ្មីៗនេះ។

នៅលើ TikTok និងបណ្តាញសង្គមផ្លូវការរបស់ខ្លួន MGR Online បានចែករំលែកវីដេអូនៃអាជ្ញាធរឥណ្ឌាកំពុងដកចេញនូវរូបសំណាកព្រះយេស៊ូកម្ពស់២០ហ្វីត (ប្រហែល៦ម៉ែត្រ)។ ចំណងជើងនៃវីដេអូនោះបានលើកឡើងដោយផ្ទាល់នូវជម្លោះការទូតដែលកំពុងកើតឡើងថា៖
«ពាក់ព័ន្ធនឹងករណីដែលឥណ្ឌាតវ៉ាចំពោះអាជ្ញាធរថៃ ដែលបានបំផ្លាញរូបសំណាកព្រះហិណ្ឌូដែលសាងសង់ដោយកម្ពុជា… ប្រសិនបើយើងក្រឡេកទៅមើលកាលពីឆ្នាំ២០២២ វិញ អាជ្ញាធរឥណ្ឌាខ្លួនឯងក៏បានបំផ្លាញរូបសំណាកព្រះយេស៊ូកម្ពស់២០ហ្វីត នៅក្នុងភូមិ Gokunte រដ្ឋ Karnataka ដែលបានតាំងនៅទីនោះអស់រយៈពេលជាង១៨ឆ្នាំមកហើយដែរ»។

ការបង្ហោះនោះបានបន្តអះអាងថា ប្រទេសឥណ្ឌា «បំផ្លាញជាបន្តបន្ទាប់» នូវព្រះវិហារគ្រិស្តសាសនា និងវិហារឥស្លាម ក្រោមលេសនៃការទន្ទ្រានដីសាធារណៈ ដោយចង់បញ្ជាក់ថា ការរិះគន់របស់ឥណ្ឌាមកលើថៃ គឺជាទង្វើ «លាក់ពុត»។

ការបង្ហោះនេះបានរីករាលដាលយ៉ាងឆាប់រហ័ស ប៉ុន្តែទទួលបានប្រតិកម្មអវិជ្ជមានច្រើនលើសលប់ ដែលបង្កឲ្យមានវិវាទថ្មីមួយទៀតសម្រាប់ស្ថាប័នព័ត៌មានថៃមួយនេះ។ អ្នកលេងបណ្តាញសង្គមថៃជាច្រើនបានរិះគន់ស្ថាប័ននេះថា បាន«ចាក់សាំងលើភ្លើង» ក្នុងអំឡុងពេលវិបត្តិយោធា និងការទូតដ៏រសើប។ មតិដែលទទួលបានការគាំទ្រច្រើនមួយបានលើកឡើងថា «ជំនួសឲ្យការបកស្រាយពីជំហររបស់យើង បែរជាយើងទៅវាយប្រហារសាសនារបស់គេទៅវិញ? រឿងនេះធ្វើឲ្យប្រទេសថៃមើលទៅកាន់តែអាក្រក់»។

អ្នករិះគន់ផ្សេងទៀតយល់ថា ការយកការអនុវត្តច្បាប់ក្នុងតំបន់កាលពីច្រើនឆ្នាំមុន មកប្រៀបធៀបនឹងការប្រើកម្លាំងយោធាវាយកម្ទេចរូបសំណាកអាទិទេពក្នុងតំបន់សង្គ្រាមឆ្នាំ២០២៥ គឺជារឿងដែលមិនអាចទទួលយកបានទេ។ ការផ្សព្វផ្សាយបែបនេះអាចធ្វើឲ្យទំនាក់ទំនងជាមួយឥណ្ឌាកាន់តែអាក្រក់ទៅៗ ខណៈដែលថៃកំពុងរងសម្ពាធការទូតពីកម្ពុជា និងឥណ្ឌារួចទៅហើយ។
រហូតមកដល់ពេលនេះ MGR Online នៅមិនទាន់លុបការបង្ហោះនោះចេញនៅឡើយទេ បើទោះបីជាមានការរិះគន់រាប់ពាន់ពីសំណាក់អ្នកកាន់សាសនាគ្រិស្ត ហិណ្ឌូ និងជនជាតិថៃខ្លួនឯង ដែលអំពាវនាវឲ្យមានក្រមសីលធម៌សារព័ត៌មានវិជ្ជាជីវៈបន្ថែមទៀតចំពោះវិបត្តិនេះក៏ដោយ។

សូមជម្រាបជាថ្មី ទង្វើរបស់ថៃដែលបំផ្លាញរូបសំណាកព្រះវិស្ណុ ក្នុងទឹកដីកម្ពុជា បានបណ្តាលឲ្យផ្ទុះប្រតិកម្មនិងរិះគន់ ពេញពិភពលោក។ ទាំងសារព័ត៌មានឥណ្ឌានិងសារព័ត៌មានអន្តរជាតិជាច្រើន បានចុះផ្សាយជាមួយនឹងចំណងជើងធំៗ ដែលដាក់ការស្តីបន្ទោសថៃចំៗថា បានប្រព្រឹត្តទង្វើគ្មានការគោរព និងឲ្យតម្លៃដល់សាសនា៕