ប្រទេសឥណ្ឌា ៖ គេសង្កេតឃើញមានពពុះទឹកពណ៌សជាច្រើនបានអណ្តែតពាសពេញក្នុងទន្លេយ៉ាក់មុណា ស្ថិតនៅទីក្រុងញូវដែលី ប្រទេសឥណ្ឌា ។ ពពុះទឹកទាំងនេះបានកើតឡើងដោយសារការបង្ហូរទឹកស្អុយចូលក្នុងទន្លេ និងពុំបានឆ្លងកាត់ការចម្រោះឱ្យបានត្រឹមត្រូវ ។ ប៉ុន្តែវាមិនមែនជាឧបសគ្គសម្រាប់ពលរដ្ឋឥណ្ឌាទេ ហើយពួកគេនៅតែធ្វើពិធីបុណ្យជ្រមុជទឹកទន្លេ បើទោះជាវាសម្បូរទៅដោយពពុះកខ្វក់អណ្តែតត្រៀបត្រាក្តី ។

ក្នុងអំឡុងពេលប្រារព្ធពិធីបុណ្យ «ឆាតប៊ូឆា» ពលរដ្ឋឥណ្ឌាជាច្រើននាក់បាននាំគ្នាជ្រមុជក្នុងទឹកទន្លេ ដែលពោរពេញទៅដោយពពុះកខ្វក់អណ្តែតនៅលើផ្ទៃទឹក ។ ចំណែកអាជ្ញាធរប្រចាំទីក្រុងញូវដែលីបានបង្កើនការបាញ់ថ្នាំគីមីដែលពុំប៉ះពាល់ដល់សុខភាព ដើម្បីកម្ចាត់ពពុះទឹកទាំងនេះចេញពីទន្លេ ។

ក្នុង១ថ្ងៃៗ ពលរដ្ឋឥណ្ឌារស់នៅទីក្រុងញូវដែលីបានបង្ហូរទឹកស្អុយជាច្រើនចូលក្នុងទន្លេយ៉ាក់មុណា ។ ការគ្រប់គ្រងទឹកស្អុយគ្មានប្រសិទ្ធភាព បានធ្វើឱ្យអាជ្ញាធរឥណ្ឌាអាចបំបាត់ទឹកស្អុយក្នុងបរិមាណតិចជាងពាក់កណ្តាលនៃចំនួនទឹកស្អុយទាំងអស់ក្នុងទីក្រុង ។ ចំណែកទឹកស្អុយនៅសេសសល់ត្រូវបានគេបង្ហូរចូលក្នុងទន្លេយ៉ាក់មុណា ។

មុននេះ ទីក្រុងញូវដែលីបានប្រឈមនឹងបរិយាកាសកខ្វក់ និងមានធូលីពាសពាសអាកាសទាំងអស់នៅរដូវរងា ដែលជាអំឡុងពេលមានខ្យល់បក់ខ្លាំង ។ ខ្យល់ត្រជាក់បានប្រមូលផ្តុំនូវជាតិពុលដែលចេញពីការបើកបរយានជំនិះនៅតាមដងផ្លូវ, រោងចក្រឧស្សាហកម្ម និងការដុតកាកសំណល់ផ្នែកកសិកម្ម ៕

ថ្មីៗនេះ សមាជិកក្រុម BLACKPINK បានបង្ហាញពីកិត្យានុភាព និងឥទ្ធិពលរបស់ពួកគេជាមួយនឹងសមិទ្ធផលដ៏ពិសេសបន្ទាប់ពីបានចូលរួមក្នុងពិធីជប់លៀងពិសេសមួយដែលធ្វើឡើងដោយព្រះមហាក្សត្រអង់គ្លេស។ នៅថ្ងៃទី២២ វិច្ឆិកា គណនីប្រព័ន្ធផ្សព្វផ្សាយសង្គមរបស់ Royal Family បានបង្ហាញឱ្យឃើញថា សមាជិកក្រុម BLACKPINK បានទទួលមេដាយកិត្តិយសMBE(Member of the Order of the British Empire) ក្នុងការទទួលស្គាល់តួនាទីរបស់ពួកគេជាអ្នកតស៊ូមតិសម្រាប់កិច្ចប្រជុំកំពូល COP26 នៅទីក្រុង Glasgow ។ នេះជាលើកដំបូងហើយដែលមានសិល្បករមិនមែនជាជនជាតិអង់គ្លេសដែលមានសមិទ្ធផលបែបនេះ។

មេដាយ MBE ត្រូវបានផ្តល់ឱ្យមនុស្សសម្រាប់ការរួមចំណែកជារង្វាន់របស់ពួកគេចំពោះសិល្បៈ និងវិទ្យាសាស្ត្រ ធ្វើការជាមួយអង្គការសប្បុរសធម៌ និងសុខុមាលភាព និងសេវាសាធារណៈនៅខាងក្រៅសេវាស៊ីវិល។ វីដេអូបង្ហាញពីមេដាយប្រាក់ដែលអ្នកដែលទទួលបាន មេដាយប្រភេទនេះត្រូវបានគេចាត់ទុកថាមានកិត្យានុភាពខ្លាំង។

សមាជិកទាំង៤របស់ BLACKPINKរួមមាន Rosé Lisa Jennie និង Jisooបានស្លៀកពាក់យ៉ាងស្រស់ស្អាតនិងសមរម្យ។ បន្ទាប់មកស្តេច Charles III ប្រទាលមេដាយកិត្តិយស MBE ទៅកាន់ពួកគេដោយទ្រង់ផ្តល់កិត្តិសចាប់ដៃនិងមានព្រះបណ្តូលមួយចំនួនទៅកាន់ BLACKPINK ផងដែរ។
បន្ទាប់ពីទទួលបានមេដាយកិត្តិយស MBE សមាជិកទាំង៤បានថតរូបមួយចំនួនដោយអារម្មណ៍សប្បាយចិត្ត ហើយត្រូវបានអ្នកគាំទ្រចែករំលែកពេញប្រព័ន្ធផ្សព្វផ្សាយសង្គមពោរពេញដោយសារអបអរសាទរយ៉ាងកក់ក្តៅសម្រាប់ក្រុមចម្រៀងនារីនេះដែលបានបង្កើតប្រវត្តិសាស្ត្រជាតារា K-Pop ដំបូងដែលទទួលបានតំណែងដ៏មានកិត្យានុភាពដែលជាសិល្បករ មិនមែនជាជនជាតិអង់គ្លេសដំបូងគេ ដែលបានទទួលមេដាយដោយរាជវង្សានុវង្សចូលរួមជាមួយសិល្បករជនជាតិអង់គ្លេសក្រុម The Beatles និង Adele៕

មកទស្សនាការប្រណាំងរថយន្តជាមួយមិត្តប្រុសនៅទីក្រុង Las Vegas កាលពីថ្ងៃទី២១ ខែវិច្ឆិកា Rihanna បានធ្វើឱ្យមានការចាប់អារម្មណ៍យ៉ាងខ្លាំងបន្ទាប់ពីតារាចម្រៀងរូបនេះយកនាឡិកាដៃពេជ្រតម្លៃ៤០ម៉ឺនដុល្លារទៅពាក់នៅកជើងរបស់នាង។

Rihanna បានស្លៀកសំលៀកបំពាក់ពណ៌ខ្មៅ រួមជាមួយនឹងស្បែកជើងកែងខ្ពស់ក្នុងតម្លៃ ៤ ៥៥០ ដុល្លារ។ អ្វីដែលកាន់ តែពិសេសនោះគឺនៅក្នុងនាឡិកាម៉ាក Jacob & Co. ធ្វើពីមាសពណ៌ស 18K ស្រោបដោយត្បូងពេជ្រសរុប ៧០ ការ៉ាត់ តម្លៃ៤០ម៉ឺនដុល្លារឃើញនៅលើកជើង។

នេះមិនមែនជាលើកទីមួយទេដែលម្ចាស់បទ «diamond»រូបនេះយកវត្ថុមានតម្លៃទៅប្រើខុសប្លែកពីគេ។ កាលពិខែមិថុនា Rihanna បានយកក្បាលនាឡិកាទៅធ្វើជាបណ្តោងខ្សែក ស្រោមមាសពណ៌ស 18K ដែលស្រោបដោយត្បូងពេជ្រចំនួន ៣៣៩គ្រាប់ មានទម្ងន់ជាង ៣០ ការ៉ាត់ មានតម្លៃ ៧០០,០០ ដុល្លារ ហើយមានតែ១៨ គ្រឿងប៉ុណ្ណោះនៅទូទាំងពិភពលោក។ កាលពីមួយខែមុនតារាចម្រៀងរូបនេះក៏បានពាក់ចិញ្ចៀនពេជ្រតម្លៃ ៦០០,០០០ ដុល្លារនៅលើម្រាមជើងរបស់នាងផងដែរ។

Rihanna បច្ចុប្បន្នមានអាយុ ៣៥ ឆ្នាំគឺជាតារាចម្រៀងដែលរកចំណូលបានច្រើនជាងគេបំផុតក្នុងពិភពលោកជាមួយប្រាក់ចំណូល ២៥០ លាន។ តារាចម្រៀង រូបនេះបានឈ្នះពានរង្វាន់ Grammy ចំនួន៩ ពានរង្វាន់តន្ត្រីអាម៉េរិកចំនួន១៣ ពានរង្វាន់ Billboard Music Awards ចំនួន ១២ និងទទួលបានកំណត់ត្រាហ្គីណេសចំនួន ៦ ។ បទចម្រៀងល្បីៗរបស់នាងរួមមាន Umbrella , Diamonds , Only Girl , Bitch Better Have My Money … ។

Rihanna មានកូនពីរនាក់ជាមួយនិងមិត្តប្រុស A$AP Rocky ។ យោងតាម ទស្សនាវដ្តី Forbes តារាចម្រៀងរូបនេះគឺជាមហាសេដ្ឋី ក្មេងជាងគេនៅសហរដ្ឋអាម៉េរិកជាមួយទ្រព្យសម្បត្តិសុទ្ធត្រូវបានប៉ាន់ប្រមាណថាមានចំនួន ១.៤ ពាន់លានដុល្លារក្នុងឆ្នាំ២០២៣។ ទ្រព្យសម្បត្តិជាច្រើនរបស់ Rihanna ត្រូវបានសន្មតថាមកពីក្រុមហ៊ុនគ្រឿងសម្អាងដ៏ជោគជ័យរបស់នាងគឺ Fenty Beauty ៕

ប្រទេសបារាំង ៖ គេសង្កេតឃើញផ្លូវជាច្រើនកន្លែងនៅទីក្រុងប៉ារីស ប្រទេសបារាំង បានតុបតែងលម្អទៅដោយភ្លើងចម្រុះពណ៌លើដើមឈើនានានៅតាមដងផ្លូវ «ឆង់សេលិសេ» ដើម្បីស្វាគមន៍ពិធីបុណ្យណូអែល និងបុណ្យចូលឆ្នាំសកល ។ ការតុបតែងលម្អនេះបានទាក់ទាញភ្ញៀវទេសចររាប់ពាន់នាក់មកចូលរួមកម្សាន្ត និងទស្សនាភ្លើងនៅតាមដងផ្លូវដោយក្តីរីករាយ ។

លោកស្រី Anne Hidalgo អភិបាលក្រុងប៉ារីស និងអ្នកសម្តែងជនជាតិបារាំង ឈ្មោះ Gilles Lelouch បានរួមគ្នារាប់ថយក្រោយមុនពេលចាប់ផ្តើមកម្មវិធីបង្ហាញភ្លើងពណ៌នៅឆ្នាំ២០២៣ ។ លើសពីនេះ គេក៏បានឮសូរសំឡេងគាំទ្ររបស់អ្នកចូលរួមកម្មវិធីបុណ្យផងដែរ ។

អ្នកស្រី Laura Robles ជាភ្ញៀវទេសចរមកពីទីក្រុងបាសេឡូណា និយាយថា ៖ «វាពិតជាពិសេសខ្លាំងណាស់ ដែលខ្ញុំបានឃើញភ្លើងបុណ្យណូអែលដ៏ស្រស់ស្អាតទាំងអស់ ។ ពេលនេះ យើងបានឃើញវានៅគ្រប់ទីកន្លែង ហើយនៅតាមដងផ្លូវឆង់សេលិសេ ពិតជាស្រស់ស្អាតខ្លាំងណាស់សម្រាប់ពួកយើង» ។

រីឯលោក Marcello Zuba ជាភ្ញៀវទេសចរជនជាតិប្រេស៊ីល និយាយថា ៖ «ប៉ារីស គឺជាទីក្រុងមួយរំលេចទៅដោយពន្លឺភ្លើងពណ៌គ្រប់ទីកន្លែង ហើយពេលនេះ មានការរៀបចំតុបតែងលម្អភ្លើងនៅតាមផ្លូវឆង់សេលិសេ យ៉ាងស្រស់ស្អាត និងជាការទាក់ទាញភ្ញៀវទេសចរ ។ ខ្ញុំមានអារម្មណ៍ថា សប្បាយរីករាយខ្លាំងណាស់ដែលបានមកទីនេះ ព្រមទាំងភរិយារបស់ខ្ញុំ ។ ពួកយើងមានក្តីសុខ និងរំភើបជាមួយការបង្ហាញភ្លើងពណ៌សម្រាប់បុណ្យណូអែលលើកនេះ» ។

សម្រាប់អ្នកចាប់អារម្មណ៍ចង់ទៅដើរកម្សាន្តក្នុងពិធីបុណ្យណូអែល ដែលប្រកបទៅដោយការតុបតែងលម្អភ្លើងលើដើមឈើនៅតាមដងផ្លូវឆង់សេលិសេ ប្រទេសបារាំង ពួកគេអាចទៅចូលរួមកម្សាន្តក្នុងពិធីបុណ្យនេះ ដែលរៀបចំឡើងចាប់ពីថ្ងៃទី២២ ខែវិច្ឆិកា ឆ្នាំ២០២៣ រហូតដល់ថ្ងៃទី៧ ខែមករា ឆ្នាំ២០២៤ ៕

កម្មវិធីទូរទស្សន៍កូរ៉េ Channel A របស់ My Golden Kids គឺជាកម្មវិធីពិតរបស់កូរ៉េដែលនិយាយអំពីឪពុកម្តាយដែលកំពុងស្វែងរកការប្រឹក្សាខណៈភាគទី ១៦៩ បានផ្ទុះកក្រើកយ៉ាងខ្លាំងពេញបណ្តាញអ៊ីនធឺណិត ដោយសារតែវីដេអូឃ្លីបដ៏គួរឱ្យអាណិតរបស់ក្មេងប្រុសតូចម្នាក់ទើបតែមានអាយុ៤ឆ្នាំបានយំដោយសារខ្វះភាពកក់ក្តៅពីឪពុកម្តាយ។

នៅក្នុងវីដេអូឃ្លីបនេះ ក្មេងប្រុសអាយុ ៤ឆ្នាំមានឈ្មោះ Geum Ji Eun ត្រូវបានសម្ភាសន៍ទាក់ទងនឹងទំនាក់ទំនងរបស់គេជាមួយឪពុកម្តាយ។ ក្មេងប្រុសរូបនេះត្រូវបានគេសួរថាតើឪពុកម្តាយមួយណាដែលគេចូលចិត្តជាង។ កុមារា Geum Ji Eun បានឆ្លើយដោយស្មោះត្រង់ថា “ខ្ញុំមិនដឹងទេ” ដោយសារភាពថាគេតែងតែត្រូវបានទុកចោលតែម្នាក់ឯង។ ចម្លើយដ៏ស្មោះត្រង់នេះធ្វើឱ្យម្ដាយរបស់គេដែលកំពុងមើលវីដេអូនោះស្រក់ទឹកភ្នែកតែម្តង។

កុមារារូបនេះក៏ត្រូវបានគេបង្ហាញថាកំពុងលេងជាមួយឧបករណ៍ក្មេងលេងផងដែរ ដោយកម្មវិធីបានសួរ Geum Ji Eun ពីឪពុករបស់គេដូចគ្នា ខណៈក្មេងប្រុសរូបនេះបាននិយាយថាឪពុករបស់ខ្លួនគឺ “គួរឱ្យខ្លាចពេលខឹង ដោយសង្ឃឹមថាឪពុកនឹងគេហៅខ្លួនជាមួយពាក្យសម្តីពីរោះៗ។ ក្រោយពីបានស្តាប់ចម្លើយរបស់កូនហើយឪពុកម្តាយ Geum Ji Eun ស្រក់ទឹកភ្នែក។ អ្វីដេលកាន់តែធ្វើឱ្យមហាជនរំជួលចិត្តអាណិតក្មេងប្រុសរូបនេះកាន់តែខ្លាំងនោះ កុមារGeum Ji Eun បាននិយាយថា ខ្លួនជឿថាម្តាយរបស់គេមិនចូលចិត្តគេទេ ដោយកុមារារូបនេះ។ ចាប់ផ្ដើមយំ ហើយគេក៏ឈប់និយាយបន្ត។
វីដេអូក្មេងប្រុសនេះទទួលបានការចាប់អារម្មណ៍យ៉ាងខ្លាំងនៅគ្រប់បណ្តាញសង្គមដែលមានការចែករំលែកនិងបញ្ចេញមតិយ៉ាងច្រើនរួមទាំងអាណិតអាសូរក្មេងប្រុសនេះយ៉ាងខ្លាំងដ្បិតតែនៅតូចប៉ុន្តែរូបគេដឹងដូចជាមនុស្សធំ។

ឃ្លីបមួយទៀតបង្ហាញថាម្តាយកុមារារូបនេះបានប្រើពាក្យសម្តីបំបាក់ទឹកចិត្តរូបគេយ៉ាងខ្លាំងព្រោះតែគេស្រលាញ់សិល្បៈផ្នែកគំនូរផាត់ពណ៌ តែម្តាយឱ្យគេផ្តោតលើការសិក្សាទាំងដែលរូបគេទើបតែមានវ័យ៤ឆ្នាំប៉ុណ្ណោះ ដែលធ្វើឱ្យអ្នកលេងបណ្តាញសង្គមខឹងសម្បារយ៉ាងខ្លាំង។
អ្នកនិយមលេងអ៊ីនធឺណេតបានសម្តែងការខឹងសម្បារចំពោះឪពុកម្តាយដែលមានកូនដោយមិនទទួលខុសត្រូវ ហើយមិនមើលថែកូននោះបានត្រឹមតែយំពេលត្រូវបានលាតត្រដាងថាធ្វើបាបកូនប្រុស។
ផ្អែកលើឃ្លីបផ្សេងទៀតពីវគ្គនេះ ឪពុកម្តាយមិនបានដឹងថាសកម្មភាពរបស់ពួកគេបានប៉ះពាល់ដល់អារម្មណ៍កូនប្រុសរបស់ពួកគេយ៉ាងណានោះទេ។ ដូច្នេះនៅចុងបញ្ចប់ការ ការដោះស្រាយរបស់ពួកគេបញ្ចប់ដោយភាពរីករាយដោយម្តាយរបស់កុមារ Geum Ji Eun ផ្តល់ពេលវេលាឱ្យកូនប្រុសកាន់តែច្រើន ប្រលែងលេងជាមួយកូន រួមទាំងសកម្មភាពផ្សេងទៀត។
គួរបញ្ជាក់ថា កម្មវិធីខាងលើនេះជាកម្មវិធីកម្សាន្តចម្រុះដំណោះស្រាយសម្រាប់មាតាបិតាតាមតម្រូវការ ដែលអ្នកជំនាញការឪពុកម្តាយជើងចាស់ប្រមូលផ្តុំគ្នាដើម្បីឆ្លុះបញ្ចាំងពីនិន្នាការនៃការចិញ្ចឹមកូនបច្ចុប្បន្នចំពោះឪពុកម្តាយ និងជួយឪពុកម្តាយដែលមិនដឹងថាត្រូវធ្វើអ្វីជាមួយកូនរបស់ពួកគេ៕