ប្រទេសកូឡុំប៊ី ៖ នៅថ្ងៃទី២៥ ខែវិច្ឆិកា ឆ្នាំ២០២៣ សារព័ត៌មានបរទេសរាយការណ៍ថា មានតុក្កតាជាង២.០០០ ត្រូវបានគេយកមកតម្រៀបគ្នានៅទីក្រុងបូហ្គោតា ប្រទេសកូឡុំប៊ី កាលពីថ្ងៃទី២៣ ខែវិច្ឆិកា កន្លងមក ដើម្បីបង្ហាញពីការតវ៉ាទៅកាន់រដ្ឋាភិបាលកូឡុំប៊ី ចំពោះករណីរំលោ.ភបំពា.នលើកុមារកាន់តែកើនឡើងនៅក្នុងប្រទេសនេះ ។

ការតវ៉ាបានរៀបចំឡើងដោយអង្គការ Aldeas Infantiles ជារៀងរាល់ឆ្នាំជាប់ៗគ្នា ហើយនៅឆ្នាំ២០២៣ គឺជាការតវ៉ាលើកទី៧ ក្នុងគោលបំណងទប់ស្កាត់ និងការពារការរំលោ.ភបំពា.នផ្លូ.វភេ.ទលើកុមារ រួមទាំងជំរុញឱ្យមានការស៊ើបអង្កេតរឿងក្តីទាំងនេះផងដែរ ។ ម្យ៉ាងទៀត ការតវ៉ាក៏មានគោលបំណងឱ្យរដ្ឋាភិបាលបង្កើតគម្រោងថែទាំ និងជួយសង្គ្រោះដល់កុមារទាំងអស់ ។

អង្គការ Aldeas Infantiles បានបញ្ជាក់នៅក្នុងបណ្តាញសង្គម Instagram ថា ៖ «ការរៀបចំនេះដើម្បីបញ្ជូនសំឡេងរបស់ពួកយើងទៅកាន់រដ្ឋាភិបាល ជំនួសឱ្យក្មេងប្រុស និងក្មេងស្រីទាំងអស់ដែលបានក្លាយជាជនរងគ្រោះក្នុងការរំលោ.ភបំពា.នផ្លូវភេ.ទនៅប្រទេសកូឡុំប៊ី» ។

យោងតាមទិន្នន័យរបស់អង្គការនេះបង្ហាញថា ជារៀងរាល់ថ្ងៃ មានកុមារ និងយុវវ័យនៅប្រទេសកូឡុំប៊ី រហូតដល់៥៧នាក់ត្រូវបានគេបំពា.នផ្លូវភេ.ទ ហើយកុមារភាគច្រើនមិនទទួលបានការថែទាំផ្លូវចិត្តទេ ។ ហេតុនេះ អង្គការបានប្រមូលផ្តុំនូវរូបគំនូរពីកុមាររងគ្រោះទាំងអស់មកបង្ហាញដើម្បីឱ្យមនុស្សទូទៅឃើញថា ពួកគេឈឺចា.ប់កម្រិតណា ក្រោយពីឆ្លងកាត់ហេតុការណ៍អាក្រក់ៗកន្លងមក ។

ជាមួយគ្នានេះ អង្គការ Aldeas Infantiles ក៏បានអំពាវនាវឱ្យរដ្ឋាភិបាលកូឡុំប៊ីចាត់វិធានការការពារកុមារបន្ថែមទៀត និងផ្តល់ការព្យាបាលផ្លូវចិត្តដល់ពួកគេដោយសារការរំលោ.ភបំពា.នឱ្យបានសមស្រប និងទាន់ពេលវេលា ៕

បរទេស៖ គូស្នេហ៍ដ៏ល្បីល្បាញគឺលោក Justin និង Hailey Bieber បានចាប់ដៃគ្នារៀបការតាំងពីឆ្នាំ ២០១៨ ដែលគិតមកដល់បច្ចុប្បន្នគឺ ៥ឆ្នាំហើយ ដោយពួកគេក៏បានប្រារព្ធខួបអាពាហ៍ពិពាហ៍ជាលើកទី ៥ របស់ពួកគេកាលពីខែកញ្ញាកន្លងទៅផងដែរ។

ថ្មីៗនេះ មានអ្នកគាំទ្រជាច្រើនបានចោតសួរ Hailey ដែលជាភរិយារបស់ Justin Bieber ថាហេតុអ្វីបានជានាងរៀបការយូរហើយមិនទាន់មានកូនអញ្ចឹង? ឬមួយនាងមិនចង់មានកូនជាមួយ Justin? ភ្លាមៗនោះ Hailey Bieber ក៏បាននិយាយបកស្រាយចម្ងល់របស់មនុស្សជាច្រើនដែលបានចោតសួរនាងផងដែរថា “តាមពិតទៅនាងពិតជាចង់មានកូនខ្លាំងណាស់ ប៉ុន្តែនាងខ្លាចការមានកូន ព្រោះខ្លាចកូនរងគ្រោះ ដោយសារឪពុកម្តាយជាមនុស្សល្បី”។

Hailey ក៏បានបន្តទៀតថា នាងនិងស្វាមីរបស់នាងតែងតែទទួលរងនូវការរិះគន់យ៉ាងធ្ងន់ធ្ងរជារៀងរាល់ថ្ងៃពីមនុស្សនៅលើបណ្តាញសង្គម ដូច្នេះនាងមិនអាចដោះស្រាយមតិរិះគន់ទាំងអស់នោះទេនៅពេលដែលនាងមានកូន ហើយនាងក៏មិនចង់ឱ្យកូនរបស់នាងរងគ្រោះដោយសារពួកគេទេ។ តារាម៉ូដែលវ័យ ២៧ ឆ្នាំរូបនេះក៏បានបន្ថែមទៀតថា “នាងនៅតែចង់មានកូន ប្រហែលជានៅ ៥ ឆ្នាំខាងមុខទៀតបើអាច” ហើយប្រសិនបើពេលវេលានោះមកដល់ ក្នុងនាមជាម្ដាយ នាងនឹងព្យាយាមធ្វើឱ្យអស់ពីសមត្ថភាព ដើម្បីចិញ្ចឹមនិងការពារកូនៗរបស់នាងឱ្យមានអារម្មណ៍សុវត្ថិភាពពីគ្រួសាររបស់ពួកគេ។

គួរបញ្ជាក់ដែរថា ចាប់តាំងពីតារាម៉ូដែលរូបនេះ និង Justin Bieber បានទាក់ទងគ្នាក៏ដូចជាចាប់ដៃគ្នារៀបការនៅខែតុលា ឆ្នាំ ២០១៨ ទំនាក់ទំនងរបស់ពួកគេបានប្រឈមមុខនឹងការរិះគន់យ៉ាងខ្លាំងពីសំណាកមនុស្សជាច្រើននៅក្នុងបណ្តាញសង្គម។ មូលហេតុដែលមនុស្សជាច្រើនមិនពេញចិត្ត Hailey គឺដោយសារកាលពីដើមឆ្នាំ ២០២៣ នេះ Hailey និងមិត្តរបស់នាង Kylie Jenner មានជម្លោះជាមួយ Selena Gomez ដែលជាតារាចម្រៀងពិភពលោក ហើយក៏ជាអតីតសង្សាចាស់របស់ Justin Bieber ផងដែរ។ ហេតុនេះហើយ ទើបធ្វើឱ្យអ្នកគាំទ្រជាច្រើនរបស់ Selena Gomez មានការមិនពេញចិត្ត ក៏ដូចជាធ្វើការរិះគន់យ៉ាងធ្ងន់ធ្ងរ និងគម្រាមកំហែងទៅលើ Hailey Bieber ជារៀងរាល់ថ្ងៃ។ ប៉ុន្តែទោះជាយ៉ាងណាក៏ដោយ បច្ចុប្បន្នស្ថានភាពរបស់ពួកគេមានភាពល្អប្រសើរជាមួយគ្នាវិញហើយ៕

ប្រទេសថៃ ៖ កាលពីថ្ងៃទី២៤ ខែវិច្ឆិកា ឆ្នាំ២០២៣ សារព័ត៌មានថៃរាយការណ៍ថា ការកុម្ម៉ង់ទិញដើមចេក និងស្លឹកចេកក្នុងអំឡុងពិធីបុណ្យបណ្តែតប្រទីបនៅប្រទេសថៃបានកើនឡើងជាបន្តបន្ទាប់ ហើយធ្វើឱ្យកសិករជួយគ្នាកាប់ដើមចេក និងរៀបចំបញ្ជូនឱ្យអតិថិជនដើម្បីយកទៅធ្វើប្រទីប ។ បច្ចុប្បន្ន ពលរដ្ឋថៃជាច្រើននាក់ចាប់អារម្មណ៍ធ្វើប្រទីបពីវត្ថុធាតុដើមធម្មជាតិ ច្រើនជាងទិញប្រទីបធ្វើពីវត្ថុធាតុដើមផ្សេងទៀត ។

លោក ថុងឆ័យ ថុងជីត មានតួនាទីជាជំនួយការមេភូមិ និងមានទីលំនៅក្នុងភូមិ២ ឃុំអ៊ុនថនប្រាមូន ស្រុកពោធិ៍ថង ខេត្តអាងថង ប្រទេសថៃ ព្រមទាំងក្រុមគ្រួសារបានជួយគ្នាជញ្ជូនដើមចេកពីចម្ការមកកាត់ជាកង់ៗ រួចយកទៅត្រាំទឹកក្នុងចានដែកដែលផ្សំជាមួយទឹកក្រូច ដើម្បីឱ្យដើមចេកទាំងនេះមានពណ៌ស និងគ្មានស្នាមជាំខ្មៅ ។ បន្ទាប់មក លោករៀបចំដើមចេកទាំងនេះដាក់តាមទំហំរបស់វា ដូចជា ៖ ទំហំតូច, កណ្តាល និងធំ ហើយយកវាមកច្រកក្នុងថង់ផ្លាស្ទិកត្រៀមបញ្ជូនឱ្យអតិថិជន និងអាជីវករដែលបានកក់ទុកសម្រាប់យកទៅលក់នៅផ្សារបន្តទៀត ។

លោក ថុងឆ័យ និយាយថា នៅឆ្នាំ២០២៣ មានការកក់ដើមចេក និងស្លឹកចេកជាច្រើន ហើយចាត់ទុកថា ឆ្នាំនេះ ប្រសើរជាងរយៈពេលជាច្រើនឆ្នាំកន្លងមក ។ ដើមចេក និងស្លឹកចេក កំពុងតែទទួលបានការពេញនិយមពីអ្នកយកទៅធ្វើប្រទីប ដោយសារបច្ចុប្បន្ន ពលរដ្ឋថៃនិយមធ្វើប្រទីបពីវត្ថុធាតុដើមធម្មជាតិ ព្រោះវាមិនប៉ះពាល់ដល់បរិស្ថាន និងមានភាពស្រស់ស្អាតទៀតផង ។ លើសពីនេះ គេក៏បានធ្វើប្រទីបពីវត្ថុធាតុដើមធម្មជាតិផ្សេងទៀត ដូចជា ប្រទីបធ្វើពីនំប៉័ង និងប្រទីបធ្វើពីចំណីត្រី ។ ប៉ុន្តែប្រទីបធ្វើពីដើមចេក និងស្លឹកចេក គឺជាប្រទីបដែលមន្ត្រីរាជការ និងពលរដ្ឋនិយមប្រើប្រាស់ជាងគេ ។

ហេតុនេះ ទើបមានការកុម្ម៉ង់ទិញដើមចេក និងស្លឹកចេកជាបន្តបន្ទាប់ រួមទាំងមានអាជីវករមកទទួលទិញដល់កន្លែងផងដែរដើម្បីយកទៅលក់នៅផ្សារ ទើបធ្វើឱ្យតម្លៃដើមចេកកើនឡើង ខណៈពេលមុន គ្មានអ្នកចាប់អារម្មណ៍ទេ ។ ប៉ុន្តែក្នុងអំឡុងពេលបុណ្យបណ្តែតប្រទីបនៅឆ្នាំ២០២៣ ដើមចេក និងស្លឹកចេកមានហាងឆេងល្អ ។

លោក ថុងឆ័យ បន្ថែមថា ចំណែកតម្លៃវិញ គឺដើមចេក១កង់ មានតម្លៃចាប់ពី៧បាត ទៅ១០បាត ហើយវាអាស្រ័យទៅលើទំហំផងដែរ ។ ដូច្នេះ ដើមចេក១ដើម លោកអាចកាត់បានប្រមាណជា២០កង់ ហើយលោកទទួលបានប្រាក់ចំនួន២០០បាត ។ រីឯតម្លៃស្លឹកចេកវិញ ក៏បានកើនឡើងដូចគ្នាដែរ គឺមានតម្លៃចាប់ពី១៣បាត ទៅ២០បាតក្នុង១គីឡូក្រាម ហើយវាអាស្រ័យលើស្លឹកចេកនេះស្អាត, ស្លឹកចាស់ ឬស្លឹកខ្ចី ៕

ប្រទេសចិន ៖ មន្ត្រីក្រុមប្រឹក្សាជំរុញពាណិជ្ជកម្មអន្តរជាតិប្រចាំប្រទេសចិន ឈ្មោះ Wang Xia បានលើកឡើងក្នុងកម្មវិធីពិព័រណ៍រថយន្តអន្តរជាតិនៅទីក្រុងក្វាងចូវ លើកទី២១ ថា ចិននឹងក្លាយជាប្រទេសនាំចេញរថយន្តច្រើនជាងគេលើពិភពលោកនៅឆ្នាំ២០២៣ យ៉ាងពិតប្រាកដ ។ ជាក់ស្តែង បរិមាណការនាំចេញរថយន្តរបស់ចិនទៅក្រៅប្រទេស ក្នុងរយៈពេល១០ខែដំបូងនៃឆ្នាំ២០២៣ គឺស្មើនឹង៣លាន៩សែនគ្រឿង ។

មន្ត្រីក្រុមប្រឹក្សាជំរុញពាណិជ្ជកម្មអន្តរជាតិរូបនេះបន្តថា បច្ចុប្បន្ន ឧស្សាហកម្មរថយន្តរបស់ប្រទេសចិនកំពុងតែឈានឆ្ពោះទៅរកលំដាប់ពិភពលោកយ៉ាងរឹងមាំ បើទោះជាបរិយាកាសជុំវិញមានភាពស្មុគស្មាញក៏ដោយ ។

នៅត្រីមាសទី១ នៃឆ្នាំ២០២៣ ប្រទេសចិនបាននាំចេញរថយន្តសរុបទៅក្រៅប្រទេស ស្មើជាង១លានគ្រឿង និងបានវ៉ាដាច់ប្រទេសជប៉ុនជាលើកដំបូង ហើយចិនបានក្លាយជាប្រទេសនាំចេញរថយន្តដ៏ច្រើនបំផុតនៅលើពិភពលោក ។ រីឯបរិមាណការនាំចេញរថយន្តក្នុងរយៈពេល១០ខែនៃឆ្នាំ២០២៣ បានកើនឡើង៥៩,៧% បើធៀបពី១ឆ្នាំទៅ១ឆ្នាំ គឺស្មើនឹង៣លាន៩សែន២ម៉ឺនគ្រឿង ។

ចំណែកតម្លៃការនាំចេញសម្រាប់រថយន្ត១គ្រឿងក្នុងរយៈពេល៣ត្រីមាសដំបូងនៃឆ្នាំ២០២៣ បានកើនឡើងរហូតដល់១៣ម៉ឺន៧ពាន់យាន់ (ឬស្មើប្រមាណ១៩.១០០ដុល្លារអាមេរិក) ពីតម្លៃ៨៥.០០០យាន់ (ឬស្មើប្រមាណ១១.៨៤០ដុល្លារអាមេរិក) នៅឆ្នាំ២០១៤ ។ ទីផ្សាររថយន្តរបស់ចិននឹងទទួលយកកំណើនថ្មីៗបន្ថែមទៀត ដោយសារប្រទេសចិនបានកំណត់វិធានការជាច្រើនដើម្បីរក្សាស្ថេរភាពសេដ្ឋកិច្ច និងលើកកម្ពស់ការប្រើប្រាស់ ក៏ដូចជាអ្នកប្រើប្រាស់ចាប់ផ្តើមមានទំនុកចិត្តឡើងវិញផងដែរ ៕

ស្ថាប័នបវរកញ្ញាចក្រវាល(Miss Universe) បានប្រកាសកាលពីថ្ងៃសុក្រទី២៤ ខែវិច្ឆិកាថា បវរកញ្ញាចក្រវាលឆ្នាំ២០២៣របស់ប្រទេសហ្វីលីពីនកញ្ញា Michelle Dee បានគ្រងតំណែងជាឈុតតំណាងជាតិល្អបំផុតនៅក្នុងកម្មវិធីប្រកួតជាមួយឈុតតំណាងជាតិបក្សីស្លាបដែក។ ការឈ្នះនេះក្រោយពីបេក្ខភាពហ្វីលីពីនទទួលបានការបោះឆ្នោតគាំទ្រច្រើនជាងគេក្នុងកម្មវិធី Miss Universe ផ្លូវការក្នុងប្រភេទឈុតតំណាងជាតិ។

Michelle Dee បានបង្ហាញឈុតតំណាងជាតិលើឆាកបវរកញ្ញាចក្រវាល កាលពីថ្ងៃទី១៧ ខែវិច្ឆិកា ដោយឈុតតំណាងជាតិរបស់នាងគឺជាការសរសើរដល់តួនាទីរបស់ខ្លួនជាអ្នកការពារទ័ពអាកាស និងដើម្បីលើកកម្ពស់វិស័យទេសចរណ៍របស់ប្រទេសហ្វីលីពីន។ បេក្ខភាពហ្វីលីពីនរូបនេះពាក់ស្លាបដូចយន្តហោះដែលបានផ្លាស់ប្តូរដើម្បីបង្ហាញផ្ទាំងគំនូរដ៏ល្អិតល្អន់បង្ហាញទិដ្ឋភាពខុសគ្នានៃវប្បធម៌ហ្វីលីពីន។ នៅចំកណ្តាលផ្ទាំងគំនូរមានពាក្យស្លោករបស់នាយកដ្ឋានទេសចរណ៍ “ស្រឡាញ់ប្រទេសហ្វីលីពីន” ។ Michelle Dee បានស្លៀកសម្លៀកបំពាក់ដោយមានស្រោមដៃ មួកប្រធានក្រុម និងឈុត ដែលសុទ្ធតែត្រូវបានត្បាញតាមលំនាំសូលីហ៊ីយ៉ា ជាការរចនាដែលគេឃើញជាទូទៅនៅតំបន់ត្រូពិចរបស់ប្រទេស។

ឈុតតំណាងជាតិរបស់ហ្វីលីពីនបានទាក់ទាញប្រតិកម្មចម្រុះពីអ្នកនិយមលេងអ៊ីនធឺណិត រហូតយកឈ្នះឈុតតំណាងជាតិបវរកញ្ញាប្រទេសផ្សេងទៀតបាន។

គួរបញ្ជាក់ផងដែរថា ក្រៅពីពានរង្វាន់ Best National Costume កញ្ញា Michelle Dee បានឈ្នះរង្វាន់ពិសេសជាច្រើនទៀតដូចជា ពានរង្វាន់ Voice for Change សម្រាប់ការតស៊ូមតិរបស់នាងលើការទទួលយកជំងឺអូទីស្សឹម ការដាក់បញ្ចូល និងការផ្តល់សិទ្ធិអំណាច ពានរង្វាន់ Spirit of Carnival និងការបោះឆ្នោតពីអ្នកគាំទ្របវរកញ្ញាចក្រវាល ហើយនាងបានជាប់ Top 10ក្នុង កម្មវិធី Miss Universe ដែលធ្វើឡើងនៅលើទឹកដី El Savador។

យ៉ាងណាមិញកាលពីបញ្ចប់កម្មវិធីថ្មីៗ អ្នកគាំទ្រវិស័យបវរកញ្ញាហ្វីលីពីន បានបញ្ចេញប្រតិកម្មយ៉ាងខ្លាំងបន្ទាប់ពីបេក្ខភាព Michelle Dee មិនបានចូល TOP5 ក្នុងកម្មវិធីនាំមានមតិរិះគន់យ៉ាងច្រើនពីអ្នកលេងបណ្តាញសង្គមហ្វីលីពីន៕

បរទេស៖ អត្រាពលករវៀតណាមដែលរស់នៅដោយខុសច្បាប់ក្នុងប្រទេសកូរ៉េខាងត្បូងបានកើនឡើងយ៉ាងខ្លាំងរហូតដល់ ៣៤,៥% បន្ទាប់ពីស្ងប់ស្ងាត់មួយរយៈដោយសារជំងឺរាតត្បាត។

កាលពីថ្ងៃទី ២៤ ខែវិច្ឆិកា យោងតាមរបាយការណ៍របស់មជ្ឈមណ្ឌលការងារនៅបរទេសក្នុងសិក្ខាសាលាស្តីពីការលើកកម្ពស់ការងារទៅធ្វើការក្រោមកម្មវិធីមិនស្វែងរកប្រាក់ចំណេញបានបង្ហាញថា ក្នុងរយៈពេល ៩ ខែនៃឆ្នាំ ២០២៣ នេះចំនួនអ្នករស់នៅខុសច្បាប់មានរហូតដល់ ៣៤,៥% ខណៈដែលនៅឆ្នាំ ២០២០ ដោយសារឥទ្ធិពលនៃជំងឺរាតត្បាត អត្រានេះបានថយចុះមកត្រឹម ២០% ហើយនៅឆ្នាំ ២០២២ វាកើនឡើងដល់ ២៨%។

លោក Nguyen Gia Liem នាយករងគ្រប់គ្រងការងារនៅបរទេសនៃក្រសួងការងារ យុទ្ធជនពិការ និងសង្គមកិច្ច បានពន្យល់ថា ការថយចុះក្នុងអំឡុងពេលនៃការរីករាលដាល គឺដោយសារតម្រូវការផលិតកម្ម និងការជ្រើសរើសរបស់រោងចក្រមានកម្រិតទាប។ ប៉ុន្តែនៅឆ្នាំ ២០២៣ វិញចំនួនមនុស្សទៅធ្វើការនៅបរទេសកើនឡើង ផលិតកម្មវិលមករកភាពប្រក្រតីវិញ ហើយអាជីវកម្មមានតម្រូវការ ដូច្នេះអត្រានៃការស្នាក់នៅខុសច្បាប់ក៏នឹងកើនឡើងផងដែរ។

ទោះជាយ៉ាងណាក៏ដោយ បច្ចុប្បន្នភាគីទាំងពីរបានដាក់ចេញនូវវិធានការ “ប្រឆាំងការគេចវេស” ជាច្រើនដូចជា នៅពេលដែលពលករវៀតណាមទៅកូរ៉េត្រឹមរយៈពេល ៣ឆ្នាំ ប៉ុន្តែពួកគេរស់នៅលើសពី ៣ ឆ្នាំ ភាគីវៀតណាមនឹងផាកពិន័យកម្មករខុសច្បាប់ជាទឹកប្រាក់ចំនួន ១០០ លានដុង (ប្រមាណជាង ៤,១០០ ដុល្លារអាមេរិក) និងមិនឱ្យធ្វើការនៅបរទេស ២-៥ ឆ្នាំ។ ចំណែកភាគីកូរ៉េវិញ នឹងត្រូវកំណត់ក្នុងការជ្រើសរើសរយៈពេល ៣ ឆ្នាំប៉ុណ្ណោះ ដូច្នេះអ្នកបំពានអាចជាប់គុក ឬពិន័យជាប្រាក់ ៣០ លានវ៉ុន (ប្រមាណ ២,៣០០ ដុល្លារ)។

ប្រទេសកូរ៉េខាងត្បូងក៏បានពិចារណាឡើងវិញផងដែរនូវកូតាជ្រើសរើសបុគ្គលិកនៅឆ្នាំក្រោយសម្រាប់ប្រទេសដែលមានកម្មករជាច្រើនបានភៀសខ្លួនទៅធ្វើការ ខណៈដែលប្រទេសវៀតណាមកំពុងកាត់បន្ថយជាបណ្តើរៗនូវបញ្ជីស្រុកដែលត្រូវបានផ្អាកជាបណ្តោះអាសន្នពីការបញ្ជូនពលករទៅធ្វើការនៅបរទេស។

គួរបញ្ជាក់ដែរថា វៀតណាម និងកូរ៉េខាងត្បូងមានកិច្ចសហប្រតិបត្តិការជាង ៣០ ឆ្នាំក្នុងការផ្គត់ផ្គង់ និងប្រើប្រាស់កម្លាំងពលកម្ម។ កម្មករភាគច្រើនអនុវត្តតាមកម្មវិធី EPS ធ្វើការក្នុងវិស័យផលិតកម្ម សំណង់ កសិកម្ម នេសាទ និងការសាងសង់កប៉ាល់។ ដូច្នេះកម្មករនិយោជិតត្រូវឆ្លងកាត់ការធ្វើតេស្តជំនាញ និងជំនាញភាសាកូរ៉េចំនួនពីរជុំ ដែលចាប់ដំណើរការក្នុងឆ្នាំ ២០០៤ រហូតមកដល់បច្ចុប្បន្ន ដោយកម្មវិធីនេះបាននាំពលករជាង ១២៧,០០០ នាក់ទៅធ្វើការនៅប្រទេសកូរ៉េ៕