បរទេស៖ សត្វអណ្តើក Jonathan មានដើមកំណើតនៅលើកោះ Saint Helena ក្នុងមហាសមុទ្រអាត្លង់ទិកសហរដ្ឋអាមេរិក ជាមួយនឹងអាយុ ១៩១ឆ្នាំ ដោយបច្ចុប្បន្នវាមានសុខភាពល្អខ្លាំងណាស់។

យោងតាមគេហទំព័រ Live Science ដែលបានរាយការណ៍កាលពីថ្ងៃទី៦ ខែធ្នូថា អណ្តើកយក្សដែលចំណាស់ជាងគេបំផុតលើពិភពលោកនេះបានឈានដល់អាយុ ១៩១ ឆ្នាំហើយ ដោយវាបានបន្តងារជាសត្វដែលរស់នៅលើគោកបានយូរបំផុតរបស់ផែនដី។ សត្វអណ្តើកយក្សពូជ Seychelles មានឈ្មោះថា Jonathan បានរស់នៅលើកោះ Saint Helena ក្នុងមហាសមុទ្រអាត្លង់ទិក ចាប់តាំងពីឆ្នាំ ១៨៨២ មកម្លេះ។ បន្ទាប់មកអណ្តើកនេះត្រូវបានគេចាប់វាប្រគល់ឱ្យអភិបាលនាសម័យនោះដើម្បីចិញ្ចឹម។

តាមការស្រាវជ្រាវបានឱ្យដឹងថា អណ្តើក Jonathan បានកើតនៅក្នុងឆ្នាំ ១៨៣២ មានន័យថាពេលវាបានមកដល់កោះ Saint Helena អណ្តើកយក្សនេះគឺមានអាយុ ៥០ឆ្នាំហើយ។ អាយុប៉ាន់ស្មានរបស់វាត្រូវបានបញ្ជាក់ដោយរូបថតចាស់ៗដែលថតបានប្រហែលឆ្នាំ ១៨៨២ – ១៨៨៦ ដែលរូបថតនោះបង្ហាញពីអណ្តើកយក្ស Jonathan ស៊ីស្មៅនៅក្នុងសួនច្បារនៃវិមានរបស់លោក William Grey-Wilson អភិបាលនៃកោះ Saint Helena ។ យោងតាម Guardian បានឱ្យដឹងទៀតថា អណ្តើកនេះត្រូវបានផ្តល់ខួបកំណើតជាផ្លូវការនៅថ្ងៃទី ៤ ខែធ្នូឆ្នាំ ១៨៣២។

បច្ចុប្បន្នអណ្តើក Jonathan ទទួលបានកំណត់ត្រាពិភពលោក Guinness World Records (GWR) ចំនួនពីរសម្រាប់សត្វលើគោកដែលរស់នៅបានយូរបំផុត និងជាអណ្តើកយក្សដែលចំណាស់ជាងគេបំផុតលើផែនដី។ វាក៏ទទួលបានងារជាថនិកសត្វដែលរស់នៅបានយូរជាងគេបំផុតលើពិភពលោកក្នុងឆ្នាំ ២០២១ រហូតមកដល់បច្ចុប្បន្ន៕

ប្រទេសថៃ ៖ កាលពីថ្ងៃទី៧ ខែធ្នូ ឆ្នាំ២០២៣ សារព័ត៌មានជាច្រើននៅប្រទេសថៃបានបង្ហោះវីដេអូស្ត្រីម្នាក់កំពុងច្រកទឹកចូលដប ហើយសរសេរថា «សង្ឃឹមថា នាងនឹងមិនច្រកទឹកនេះទៅលក់ឱ្យគេផឹក ។ ក្រសួងសុខាភិបាលនៅឯណា សូមជួយត្រួតពិនិត្យផង» ។ នៅក្នុងវីដេអូនេះ គេបានឃើញស្ត្រីម្នាក់កំពុងច្រកទឹកដាក់ដប បន្ទាប់មកក៏បិទគំរបដប ហើយពេលខ្លះ នាងបានបើកក្បាលរ៉ូប៊ីណេបង្ហូរទឹកម៉ាស៊ីនច្រកចូលដបតែម្តង ។

ចំណែកដៃរបស់នាងវិញទទឹកជោគ ហើយនាងពុំបានពាក់ស្រោមដៃឱ្យបានត្រឹមត្រូវទេ ។ ក្រោយពីនាងបង្ហូរទឹកពីក្បាលរ៉ូប៊ីណេចូលដបរួចរាល់ហើយ នាងក៏បោះដបទាំងនេះទុកមួយគំនរ ។ បើតាមវីដេអូបង្ហាញថា ហេតុការណ៍នេះបានកើតឡើងនៅប្រទេសថៃ ពីព្រោះក្នុងស្លាកនៅលើជញ្ជាំងមានសរសេរជាអក្សរថៃទៀតផង ។

វីដេអូនេះត្រូវបានអ្នកលេងបណ្តាញសង្គមថៃចែកចាយ (Share) ជាច្រើននាក់ ហើយពួកគេបានលើកឡើងពីបញ្ហាអនាម័យ និងសួរថា តើទឹកដែលនាងច្រកដាក់ដបនេះត្រៀមយកទៅលក់នៅតាមផ្សារនានាមែនទេ? ខណៈមនុស្សខ្លះទៀត ក្រោយពីបានមើលវីដេអូនេះហើយនិយាយថា ៖ «ផឹកទឹកសុទ្ធហើយមានអារម្មណ៍ស្រស់ថ្លា ត្រជាក់ចិត្តមែន ព្រោះក្រុមហ៊ុនទឹកសុទ្ធភ្លេចគិតពីបញ្ហាអនាម័យ និងបណ្តោយឱ្យបុគ្គលិកបើកក្បាលរ៉ូប៊ីណេបង្ហូរទឹកម៉ាស៊ីនច្រកដប» ។ ចុងក្រោយ អ្នកលេងបណ្តាញសង្គមថៃបានអំពាវនាវឱ្យមន្ត្រីពាក់ព័ន្ធជួយត្រួតពិនិត្យករណីនេះ ។

លោក Narong Aphikulwanich ជាមន្ត្រីការិយាល័យត្រួតពិនិត្យចំណីអាហារ និងឱសថប្រទេសថៃបានជ្រាបពីករណីនេះហើយ ហើយលោកបានផ្ញើវីដេអូដែលល្បីល្បាញក្នុងបណ្តាញសង្គមទៅឱ្យក្រុមការងារធ្វើការត្រួតពិនិត្យ ដើម្បីស្វែងរកទីតាំងពិតប្រាកដនៅក្នុងវីដេអូ ។ បន្ទាប់មក លោកនឹងបញ្ជូនកម្លាំងជំនាញទៅត្រួតពិនិត្យដល់ទីកន្លែងតែម្តង ៕ ប្រភព ៖ 3Plus News

ប្រទេសចិន ៖ កាលពីថ្ងៃទី៦ ខែធ្នូ ឆ្នាំ២០២៣ សារព័ត៌មានចិន Yangzhi Evening News រាយការណ៍ថា មានហេតុការណ៍ដ៏រន្ធត់មួយបានកើតឡើងចំពោះបុរសម្នាក់នៅទីក្រុង Xiamen ខេត្ត Fujian ដោយសារចានបង្គន់អនាម័យដែលគាត់កំពុងបន្ទោរបង់មានភ្លើងឆេះយ៉ាងខ្លាំង ។ ចំពោះមូលហេតុបណ្តាលឱ្យភ្លើងឆេះនេះ ដោយសារបណ្តាលមកពីការឆ្លងចរន្តអគ្គិសនី ។

ហេតុការណ៍គួរឱ្យភ្ញាក់ផ្អើលនេះ បានកើតឡើងកាលពីថ្ងៃទី១០ ខែវិច្ឆិកា ឆ្នាំ២០២៣ នៅពេលបុរសរូបនេះកំពុងអង្គុយដោះទុក្ខសត្វក្នុងបន្ទប់ទឹកនៅផ្ទះរបស់ខ្លួន ។ គាត់បានប្រើប្រាស់ចានបង្គន់ទំនើប (Smart Toilet) ដែលមានមុខងារបញ្ជាផ្សេងៗដើម្បីផ្តល់ងាយស្រួលពេលប្រើប្រាស់ ។

ពេលដំបូង គាត់បានធុំក្លិនឈ្ងៀមយ៉ាងខ្លាំង បន្ទាប់មក ស្រាប់តែមានភ្លើងពណ៌សហុយទ្រលោមចេញពីចានបង្គន់ ។ ភ្លាមៗនោះ គាត់ក៏បានក្រោកឈរឡើង ស្រាប់តែមានភ្លើងឆេះពេញបង្គន់ទាំងអស់ ។ បើតាមរូបភាពបង្ហាញថា អ្នកថតរូបភាពភ្លើងឆេះនេះ គ្មានពេលវេលាស្លៀកខោឱ្យស្រួលបួលទេ ។

ចំពោះមូលហេតុពិតប្រាកដដែលបណ្តាលឱ្យភ្លើងឆាបឆេះបង្គន់នេះ គេមិនអាចបញ្ជាក់ឱ្យបានច្បាស់លាស់ទេ ។ ប៉ុន្តែគេគិតថា អាចបណ្តាលមកពីការឆ្លងចរន្តអគ្គិសនី រួចហើយក៏បង្កទៅជាផ្កាភ្លើង និងរាលដាលកាន់តែខ្លាំងឡើង ។

កាលពីខែសីហា ឆ្នាំ២០២២ ក៏មានហេតុការណ៍ស្រដៀងគ្នានេះដែរនៅខេត្ត Zhejiang គឺមានបុរសម្នាក់ភ្ញាក់ឡើងមក ដោយសារតែធុំក្លិនឈ្ងៀមខ្លាំងពេក ។ ក្រោយមក ក៏ប្រទះឃើញមានភ្លើងឆេះចានបង្គន់ទំនើបក្នុងបន្ទប់ទឹកនៅផ្ទះរបស់គាត់ ។

លើសពីនេះ នៅខែ-ឆ្នាំដដែល មានបុរសម្នាក់ទៀតនៅខេត្ត Guizhou ក៏បានជួបហេតុការណ៍គួរឱ្យភ្ញាក់ផ្អើលដូចគ្នាដែរ គឺនៅសុខៗ ស្រាប់តែបង្គន់ទំនើបក្នុងផ្ទះរបស់គាត់មានភ្លើងឆេះដោយគ្មានមូលហេតុ ។

បច្ចុប្បន្ន ពលរដ្ឋចិនជាច្រើននាក់និយមប្រើប្រាស់ចានបង្គន់ទំនើប ដោយសារវាផ្តល់ភាពងាយស្រួលជាច្រើន ដូចជា ៖ ប្រព័ន្ធទឹកលាងជម្រះដោយស្វ័យប្រវត្តិ, វាអាចសម្អាតខ្លួនវាដោយស្វ័យប្រវត្តិ និងប្រព័ន្ធបង្កើនកំដៅកៅអីអង្គុយសម្រាប់អាកាសធាតុត្រជាក់ ជាដើម ។ ហេតុនេះ ធ្វើឱ្យក្រុមហ៊ុនចិនផលិតទំនិញប្រភេទនេះជាច្រើន ព្រោះពួកគេសម្លឹងឃើញឱកាសក្នុងទីផ្សារ ៕ ប្រភព ៖ daily news

បរទេស៖ អាជ្ញាធររដ្ឋ New South Wales របស់ប្រទេសអូស្ត្រាលីគ្រោងនឹងបាញ់សម្លាប់សេះព្រៃចំនួន ១៤,០០០ ក្បាលពីឧទ្ធម្ភាគចក្រ ដើម្បីជួយសង្គ្រោះប្រព័ន្ធអេកូឡូស៊ី និងការពារធម្មជាតិ។

យោងតាមប្រភពព័ត៌មាន Business Insider ដែលបានចុះផ្សាយនៅថ្ងៃទី៧ ខែធ្នូថ្មីៗនេះថា បច្ចុប្បន្នសេះព្រៃមានប្រមាណ ១៧,០០០ ក្បាលនៅក្នុងឧទ្យានជាតិ Kosciuszko ដោយរដ្ឋាភិបាលគ្រោងនឹងកាត់បន្ថយចំនួនសេះព្រៃមកត្រឹម ៣,០០០ ក្បាលនៅឆ្នាំ ២០២៧ ក្នុងគោលបំណងស្តារប្រព័ន្ធអេកូឡូស៊ីឡើងវិញ និងការពារធម្មជាតិ។

សេះព្រៃត្រូវបានគេចាត់ទុកថាជាប្រភេទសត្វរាតត្បាតក្នុងប្រទេសអូស្ត្រាលីដែលវាតែងតែគំរាមកំហែងដល់ប្រព័ន្ធអេកូឡូស៊ីក្នុងតំបន់ដោយការស៊ីស្មៅ និងជាន់ឈ្លីដី ក៏ដូចជាបំផ្លាញរុក្ខជាតិដើម ជាពិសេសនៅតំបន់ភ្នំអាល់អូស្ត្រាលី នេះបើយោងតាមក្រុមប្រឹក្សាប្រភេទ Invasive Species ដែលជាអង្គការឧទ្ទិសដល់ការការពារធម្មជាតិពីសត្វ ស្មៅដែលបង្កគ្រោះថ្នាក់ និងជំងឺ។
កន្លងមកវិធានការដែលត្រូវបានប្រើដើម្បីកាត់បន្ថយចំនួនសេះមានដូចជា ការដាក់អន្ទាក់ ការផ្លាស់ប្តូរទីតាំង និងការបាញ់លើដី ប៉ុន្តែមិនទទួលបានជោគជ័យក្នុងការធ្វើឱ្យចំនួនសេះធ្លាក់ចុះនោះទេ។ ទោះជាយ៉ាងណាក៏ដោយ រដ្ឋាភិបាលរបស់រដ្ឋ New South Wales សង្ឃឹមថា ការបាញ់ចេញពីឧទ្ធម្ភាគចក្រនឹងជួយកាត់បន្ថយចំនួនសេះព្រៃដ៏ច្រើនសន្ធឹកសន្ធាប់នេះ។

នៅក្នុងកម្មវិធីបាញ់ប្រហារពីលើអាកាស អាជ្ញាធរបានចល័តឧទ្ធម្ភាគចក្រពីរគ្រឿង ដោយនីមួយៗមានពេទ្យសត្វម្នាក់។ យោងតាមការប្រកាសរបស់រដ្ឋាភិបាល បានឱ្យដឹងទៀតថា នៅទូទាំងប្រទេសអូស្ត្រាលីមានចំនួនសេះព្រៃរហូតទៅដល់ ៤០០,០០០ ក្បាលឯណោះ។ ក្រុមពេទ្យសត្វបាននិយាយថា “គ្មាននរណាម្នាក់ចង់ឃើញសត្វត្រូវបានគេសម្លាប់នោះទេ” ប៉ុន្តែយើងត្រូវជ្រើសរើសរវាងការកាត់បន្ថយចំនួនសេះព្រៃជាបន្ទាន់ ឬទទួលយកការបំផ្លិចបំផ្លាញប្រព័ន្ធអេកូឡូស៊ី និងជម្រកនៅតំបន់ខ្ពង់រាបដែលងាយរងគ្រោះ ធ្វើឱ្យសត្វផ្សេងៗធ្លាក់ចុះ និងផុតពូជ។

ទោះជាយ៉ាងណា លោក Jack Gough នាយកនៅ Invasive Species Society បានចែករំលែកថា ការធ្វើបែបនេះគឺជាមធ្យោបាយដែលអាចសម្រេចបានតែមួយគត់ដើម្បីកាត់បន្ថយចំនួនសេះ និងជួយសង្គ្រោះឧទ្យានជាតិ ក៏ដូចជាជួយសង្គ្រោះសត្វផ្សេងៗទៀតដែលរស់នៅទីនោះ៕

ប្រទេសថៃ ៖ នៅថ្ងៃទី៧ ខែធ្នូ ឆ្នាំ២០២៣ សារព័ត៌មានថៃឈ្មោះ Khaosod រាយការណ៍ថា ប៉ូលិសបានចាប់ខ្លួនព្រះចៅអធិការវត្តល្បីមួយកន្លែងនៅខេត្តឈៀងម៉ៃ ពីបទបំពានលើលោកនេន និងក្មេងវត្តអស់រយៈពេលជាច្រើនឆ្នាំ ។ ប៉ូលិសបានបញ្ជូនព្រះចៅអធិការវត្តអង្គនេះទៅផ្សឹកត្រៀមស៊ើបអង្កេតបន្ថែមទៀត ហើយមានមនុស្សចំនួន៨នាក់ដែលបានរងគ្រោះ ។

កាលពីថ្ងៃទី៦ ខែធ្នូ ឆ្នាំ២០២៣ ប្រព័ន្ធផ្សព្វផ្សាយរាយការណ៍ថា មានលោកនេនចំនួន៣អង្គ ព្រមទាំងក្មេងវត្តម្នាក់ទៀត ដែលស្នាក់នៅក្នុងវត្តមួយកន្លែងនៅឃុំបានកាត ស្រុកម៉ែវ៉ាង ខេត្តឈៀងម៉ៃ ប្រទេសថៃ ប្តឹងថា ត្រូវបានព្រះចៅអធិការវត្តបានប្រព្រឹត្តទង្វើអនាចា.រ ។ ខ្លះទៀតត្រូវបានចៅអធិការវត្តរំលោ.ភបំពានអស់ជាច្រើនឆ្នាំ រហូតពួកគេទ្រាំលែងបាន ក៏ប្រាប់ទៅអាណាព្យាបាលឱ្យទំនាក់ទំនងទៅខាងសារព័ត៌មាន និងភ្នាក់ងារពាក់ព័ន្ធជួយសង្គ្រោះ ។

ជនរងគ្រោះម្នាក់បានចូលមកប្តឹងនៅស្ថានីយប៉ូលិសប្រចាំស្រុកម៉ែវ៉ាង នៅថ្ងៃទី៧ ខែធ្នូ ដើម្បីឱ្យប៉ូលិសស៊ើបអង្កេត និងចាប់ខ្លួនព្រះចៅអធិការវត្ត ។ នៅព្រឹកថ្ងៃទី៧ ខែធ្នូ ប៉ូលិសក៏បានមកចាប់ខ្លួនចៅអធិការវត្តរូបនេះក្នុងវត្ត និងអញ្ជើញព្រះអង្គឱ្យសឹក ។ ជំហានដំបូង ប៉ូលិសបានចោទប្រកាន់ពីបទបានប្រព្រឹត្តអំពីអនាចា.រ ហើយបន្តឃុំខ្លួនចៅអធិការវត្ត ដើម្បីសាកសួរបន្ថែមទៀត ។

លោកវរសេនីយ៍ទោ សាខន សុខភូមិផុង លើកឡើងថា ការចាប់ខ្លួនចៅអធិការវត្ត គឺជាការអនុវត្តតាមដីកាចាប់ខ្លួន ដោយចោទប្រកាន់ពីបទប្រព្រឹត្តអំពើអនាចា.រ ដោយសារជនរងគ្រោះបានមកដាក់ពាក្យបណ្តឹងនៅថ្ងៃទី៦ ខែធ្នូ កន្លងមក ។ ហេតុនេះ ក៏មានការចេញដីកាចាប់ខ្លួន និងអញ្ជើញចៅអធិការវត្តឱ្យសឹកដើម្បីចាត់វិធានការតាមផ្លូវច្បាប់ ។

លោកវរសេនីយ៍ទោ សាខន សុខភូមិផុង បន្តថា នៅថ្ងៃទី៧ ខែធ្នូ ដដែលនេះ លោកបានសាកសួរលោកនេនចំនួន៣អង្គ និងក្មេងវត្តម្នាក់ទៀត ដែលស្នាក់នៅក្នុងវត្តមកផ្តល់ព័ត៌មានបន្ថែមឱ្យប៉ូលិស ។ សរុប មានជនរងគ្រោះចំនួន៨នាក់ ហើយបច្ចុប្បន្ន ពួកគេទទួលបានការថែទាំពីភ្នាក់ងារអភិវឌ្ឍន៍សង្គម និងសន្តិសុខរបស់មនុស្ស ។ ចំណែកការចោទប្រកាន់បន្ថែមលើចៅអធិការវត្តនេះឬអត់នោះ គឺអាស្រ័យលើសាក្សី និងភស្តុតាងនានា ។ ដូច្នេះ ករណីនេះកំពុងស្ថិតក្នុងដំណាក់កាលស៊ើបអង្កេត ៕ ប្រភព ៖ khaosod

នៅក្នុងភាគទី១០ ពីកម្មវិធី Squid Game: The Challenge អ្នកប្រកួតមានលេខ 287 ឈ្មោះថា Mai Whelan អាយុ៥៥ឆ្នាំបានយកឈ្នះ អ្នកប្រកួតលេខ 016 និងអ្នកប្រកួតលេខ 451 ដើម្បីយករង្វាន់ខ្ពស់បំផុតដល់ទៅផ្ទះវិញជាមួយប្រាក់រង្វាន់៤.៥៦ លានដុល្លារពីការប្រកួតនេះខណៈអ្នកប្រកួតរូបនេះបញ្ជាក់ប្រាប់ថាខ្លួនមានដើមកំណើតមកពីប្រទេសវៀតណាម។នៅចុងបញ្ចប់នៃកម្មវិធីខាងលើនេះអ្នកប្រកួតឈ្មោះ Mai បាននិយាយថា «ព្រឹត្តិការណ៍នេះបញ្ជាក់ថា អ្វីៗអាចកើតឡើង។ នៅពេលដែលអ្នកមានអារម្មណ៍ខកចិត្ត និងភ័យខ្លាច អ្នកត្រូវតែជ្រើសរើសខ្លួនឯងឱ្យក្លាយជាមនុស្សដែលរឹងមាំ និងផ្តោតអារម្មណ៍។ ទោះបីជាអ្នកខ្លាចអ្វីក៏ដោយ ចូរតស៊ូជាមួយនឹងអ្វីដែលអ្នកមាន ហើយអ្នកអាចសម្រេចបានអ្វីទាំងអស់»។
តាមប្រភពព័ត៌មានបានបញ្ជាក់ថា Mai បានឈ្នះដោយសារសមត្ថភាពរបស់ខ្លួនក្នុងការសង្កេតដោយប្រុងប្រយ័ត្ននូវភាសាកាយវិការរបស់គូប្រជែងខណៈអ្នកប្រកួតមានលេខ 278 បានសរសើរថា “Mai ឆ្លាតណាស់” ហើយបាននិយាយថាការរីកចំរើនរបស់ Mai គឺជា “ការដាស់តឿនសម្រាប់អ្នករាល់គ្នា”។
នៅក្នុងវគ្គដំបូង Mai មិនសូវលេចធ្លោទេ ប៉ុន្តែបន្តិចម្ដងៗអ្នកប្រកួតលេខ287 បន្តបង្ហាញពីភាពប៉ិនប្រសប់របស់ខ្លួនតាមរយៈជុំដែលទាមទារការអត់ធ្មត់ និងការវិនិច្ឆ័យត្រឹមត្រូវ។ ក្នុងវគ្គមួយ Mai បាននិយាយថា ខ្លួននឹងទិញផ្ទះល្វែងមួយប្រសិនបើនាងឈ្នះ។
វគ្គចុងក្រោយចែកចេញជាពីរផ្នែក ភាគច្រើនអាស្រ័យលើសំណាងរបស់អ្នកប្រកួត ខណៈពេលដែលអ្នកប្រកួតលេខ 016 និងអ្នកប្រកួតលេខ 451 ជាមិត្តជិតស្និទ្ធនឹងគ្នា រួបរួមគ្នាដើម្បីឆ្ពោះទៅមុខដោយ Mai ជឿជាក់ថាខ្លួនត្រូវតែយកឈ្នះខ្លួនឯងជាមួយនឹងបំណងប្រាថ្នាចង់ឈ្នះ។ បន្ទាប់ពីឆ្លងកាត់ការប្រកួតជាច្រើនជុំ ទីបំផុត Mai បានទទួលជ័យជម្នះដោយទទួលបានកាតឥណទានដែលមានតម្លៃ ៤.៥៦ លានដុល្លារ។

យោងតាមខ្លឹមសារក្នុងវគ្គចុងក្រោយនៅលើ Netflix ម្ចាស់ជ័យលាភីរូបនេះបាននិយាយថានាងកើតនៅប្រទេសវៀតណាម មកអាម៉េរិកតាំងពីអាយុ ៨ ឆ្នាំ ហើយបច្ចុប្បន្នរស់នៅរដ្ឋ Virginia ។ នៅពេលនាងបានបញ្ចប់វិទ្យាល័យនៅអាយុ ១៨ឆ្នាំ Mai បានចូលបម្រើការងារក្នុងកងទ័ពជើងទឹកសហរដ្ឋអាម៉េរិក ដោយសារតែចង់គេចពីការការពារដ៏តឹងរ៉ឹងរបស់ឪពុកម្តាយខ្លួន។ ប៉ុន្តែក្រោយមក Mai បានពពោះកូនដំបូងក្នុងអាយុ ១៩ ឆ្នាំ ដោយសារតែរឿងនេះ គ្រួសាររបស់ Mai បានបដិសេធហើយនាងត្រូវមើលថែទារកនោះដោយខ្លួនឯង។ ចាប់ពីពេលនោះមក Mai ត្រូវធ្វើការគ្រប់យ៉ាងដើម្បីចិញ្ចឹមជីវិត។

គូសបញ្ជាក់ថាកម្មវិធី Squid Game: The Challenge មានទាំងអស់ចំនួន ១០ភាគ ឮ ដែលធ្វើត្រាប់តាមស៊េរីរឿងដ៏ល្បីដែលនាំឱ្យមានការចាប់អារម្មណ៍ទូទាំងពិភពលោក នៅឆ្នាំ២០២១។ កម្មវិធីនេះត្រូវបានថតនៅក្នុងទីក្រុងឡុងដ៍ ដោយមានការចូលរួមពីអ្នកប្រកួតចំនួន ៤៥៦ នាក់៕

បរទេស៖ អ្នកសារព័ត៌មានរបស់ BBC ម្នាក់បានលើកម្រាមដៃកណ្តាលនៅមុខកាមេរ៉ា ខណៈពេលដែលកំពុងផ្សាយផ្ទាល់ ធ្វើឱ្យវាក្លាយជាប្រធានបទដ៏ក្តៅគគុកនៅលើប្រព័ន្ធផ្សព្វផ្សាយសង្គម។

យោងតាមប្រភពព័ត៌មាន Daily Mail ដែលបានចេញផ្សាយនៅថ្ងៃទី៧ ខែធ្នូថ្មីៗនេះថា អ្នកស្រី Poof Mariam Moshiri ដែលជាអ្នកអានព័ត៌មាននៅស្ថាប័នដ៏ធំរបស់ចក្រភពអង់គ្លេស BBC បានលើកម្រាមដៃកណ្តាលរបស់គាត់ទៅកាន់កាមេរ៉ា នៅពេលដែលការផ្សាយផ្ទាល់នោះជិតបានបញ្ចប់។ វីដេអូនេះកំពុងផ្ទុះខ្លាំងនៅលើប្រព័ន្ធផ្សព្វផ្សាយសង្គមរបស់អន្តរជាតិ ដែលការផ្សាយផ្ទាល់នេះបានធ្វើឡើងប្រហែលម៉ោង ១២:០០ ថ្ងៃត្រង់។

នៅក្នុងវីដេអូនៃការផ្សាយផ្ទាល់នេះ បានធ្វើឱ្យអ្នកនិយមលេងអ៊ីនធីណិតបរទេសជាច្រើនមានការមិនពេញចិត្ត ក៏ដូចជាបានរិះគន់ថា អ្នកសារព័ត៌មាននេះគ្មានវិជ្ជាជីវៈសោះ ដោយអ្នកខ្លះទៀតក៏បានបញ្ចេញមតិទៀតថា ប្រហែលគាត់កំពុងធុញថប់នឹងការងារដែលគាត់កំពុងធ្វើហើយ។

ទោះជាយ៉ាងណាក៏ដោយ នេះមិនមែនជាលើកទីមួយទេដែលអ្នកសារព័ត៌មានរបស់ចក្រភពអង់គ្លេស BBC បានលើកម្រាមដៃកណ្តាលរបស់គាត់នៅចំពោះមុខកាមេរ៉ា។ ប្រសិនបើយើងក្រឡេកទៅមើលឆ្នាំ ២០១០ វិញភ្នាក់ងារព័ត៌មានអាកាសធាតុរបស់ BBC ក៏បានលើកម្រាមដៃកណ្តាលចំអកទៅកាន់អ្នកមើលផងដែរ។ ក្រោយមកអ្នកសារព័ត៌មាននោះក៏បានសុំទោសជាសារធារណៈបន្ទាប់ពីធ្វើកាយវិការមិនសមរម្យ។

គួរបញ្ជាក់ដែរថា បច្ចុប្បន្នអ្នកសារព័ត៌មានម្នាក់របស់ BCC ថ្មីៗនេះនៅមិនទាន់ចេញមុខបកស្រាយនៅឡើយទេ ខណៈដែលសារព័ត៌មាន Daily Mail បានទាក់ទងទៅ BBC ប៉ុន្តែមិនទាន់មានការឆ្លើយតបនោះទេ៕