ជាការពិតណាស់ សម្រាប់អ្នកស្រលាញ់ការផ្សងព្រេងប្រាកដជាមានបានកត់សម្គាល់នូវកោះដ៏ស្រស់ស្អាតបំផុតនៅលើពិភពលោក ដែលពួកគេចង់ទៅទស្សនានៅថ្ងៃណាមួយមិនខាន។ ប៉ុន្តែនៅពីក្រោយទេសភាពដ៏ស្រស់ស្អាត និងបរិស្ថានដ៏ស្ងប់ស្ងាត់ទាំងនោះ ក៏មាននូវគ្រោះថ្នាក់ជាច្រើនអាចបង្កប់នៅជាមួយ ខណៈជាកន្លែងដែលសត្វពស់សាហាវៗរស់នៅ ឧស្ម័នពុលនៅលើអាកាស ជំងឺឆ្លងរាតត្បាត ការហាយប្រហារដោយក្រពើដ៏ព្រៃផ្សៃ និងភាពរន្ធត់ព្រឺព្រួចផ្សេងៗនៃធម្មជាតិ ដែលនាំឲ្យអ្នកប្រាកដជាមិនចង់ត្រូវបានទឹកនាំទៅច្រាំង ឬជាប់គាំងនៅលើកោះដ៏គ្រោះថ្នាក់ទាំងនេះទេ។ ដូច្នេះហើយខាងក្រោមនេះ គឺជាកោះលស់ព្រលឹងទាំង៨លើសកលលោក ទោះឲ្យ១លានដុល្លារក៏មិនព្រមទៅដែរ៖

១ កោះពស់ នៃប្រទេសប្រេស៊ីល៖ កោះ Ilha fa Queimada គឺគេស្គាល់ថាជាកោះពស់ ព្រោះនៅទីនោះមានប្រមូលផ្តុំពស់ពិសរាប់ម៉ឺនប្រភេទនៅទីនោះ។ ម៉្យាងវិញទៀត អ្នកត្រូវបានពស់ដែលនៅលើកោះនោះចឹក អាចស្លាប់ភ្លាមៗនៅក្នុងរយៈពេលត្រឹមតែ១ម៉ោង និងអាចធ្វើឲ្យសាច់មនុស្សរលាយភ្លាមៗនៅក្នុងរយៈពេលដ៏ខ្លី។ ដោយសារតែកោះមួយនេះ វាគ្រោះថ្នាក់ខ្លាំងដូច្នេះហើយបានជា វាត្រូវបានគេបិទចោលមិនឲ្យសាធារណៈជនចូលទៅលេងជាដាច់ខាត។

២ កោះខ្មោច Poveglia ៖ ស្ថិតនៅភាគខាងជើងនៃប្រទេសអ៊ីតាលី វាត្រូវបានគេស្គាល់ថាជា កោះខ្មោចលងសាហាវជាងគេបំផុតលើសកលលោក។ ដោយមានរឿងដំណាលថា កាលពីដើមឡើយ គេបានយកកោះនេះធ្វើជាកន្លែងដាច់ដោយឡែកសម្រាប់ផ្ទុកអ្នកជំងឺដែលមានជំងឺប៉េស្តជ្រូក ខណៈមនុស្សជាច្រើននាក់បានស្លាប់នៅទីនោះ។ ម៉្យាងវិញ កោះនេះក៏ធ្លាប់ធ្វើជាមន្ទីរពេទ្យសម្រាប់ដាក់អ្នកជំងឺផ្លូវចិត្តផងដែរ ហើយក៏មានរឿងអាក្រក់ៗកើតទៅលើគ្រូពេទ្យនៅទីនោះផងដែរ។ បន្ទាប់មកទៀតក៏មានបិទមន្ទីរពេទ្យនេះចោល រហូតធ្វើឲ្យកោះនេះទំនេររហូតមកដល់បច្ចុប្បន្ននេះ។

៣ កោះ Andaman នៃប្រទេសឥណ្ឌា៖ គឺជាកោះជនជាតិដើមភាគតិចរបស់ឥណ្ឌា ដែលមិនព្រមបើកទទួលយកនរណាម្នាក់ដែលរស់កន្លែងផ្សេង ក្រៅពីក្រុមខ្លួនសោះឡើយក្នុងរយៈពេល ៦០ ០០០ឆ្នាំចុងក្រោយមកនេះ។ កាលពីឆ្នាំ២០០៦ ក៏ធ្លាប់អ្នកនេសាទ២នាក់វង្វេងទៅដល់ទីនោះផងដែរ ប៉ុន្តែមិនអាចយកជីវិតត្រឡប់មកវិញបានទេ ព្រោះជនជាតិភាគតិចនៅទីនោះការពារភូមិរបស់គេណាស់ និងមិនឲ្យនរណាចូលបានទេ ព្រមទាំងអនុវត្តច្បាប់ព្រៃរបស់ពួកគេ ។ ទីបំផុតបុរសនេសាទក៏ត្រូវបានសម្លាប់ដោយលំពែង និងធ្នូរបស់ក្រុមជនជាតិនោះផងដែរ។

៤ កោះ Ramree ប្រទេសមីយ៉ាន់ម៉ា៖ កោះនេះជាជម្រករបស់សត្វក្រពា ឬហៅថាក្រពើទឹកប្រៃ ដែលមានចំនួនច្រើនជាងគេបំផុតលើសកលលោក។ យោងទៅតាមកំណត់ត្រាហ្គឺណេសបានកត់ត្រាពីមហន្តរាយដ៏ធំពីសត្វក្រពើលើកោះនេះបានឲ្យដឹងថា ក្នុងប្រវត្តិសាស្រ្តបន្ទាប់ពីសង្គ្រាមលោកលើកទី២ត្រូវបានបញ្ចប់ មានទាហានជប៉ុនរាប់រយនាក់បានរស់រានមានជីវិតបន្ទាប់ពីសមរភូមិ តែជាអកុសលក៏បានឡើងមកលើកោះនេះ ត្រូវបានក្រពើស៊ីស្លាប់យ៉ាងអណោចអធមទាំងអស់គ្មានសល់។

៥ កោះ Marshall ៖ ជាកោះស្ថិតនៅក្នុងមហាសមុទ្រប៉ាស៊ីហ្វិក ក៏ដូចជាបានចុះបញ្ជីបេតិកភណ្ឌពិភពលោករួចរាល់ហើយដែរ។ ប៉ុន្តែនៅចន្លោះឆ្នាំ១៩៤៦ ដល់១៩៥៨ គឺបានមានការសាកល្បងបាញ់បង្ហោះនុយក្លេអ៊ែរកម្រិតធ្ងន់របស់សហរដ្ឋអាមេរិករហូតដល់២៣ដង។ ឥទ្ធិពលរបស់នុយក្លេអ៊ែរបានបំផ្លាញបរិស្ថាននៅកោះនោះយ៉ាងធ្ងន់ធ្ងរបំផុត ខណៈវាបានបំភាយវិទ្យុសកម្ម ធ្វើឲ្យប្រជាពលនៅតំបន់នោះឆ្លងជំងឺរាតត្បាតពេញផ្ទៃកោះ។ មិនត្រឹមតែប៉ុណ្ណោះ វាក៏ប៉ះពាល់ដល់ដំណាំកសិកម្ម និងសត្វពាហនៈគ្រប់ប្រភេទ ងាប់យ៉ាងរណូករនាលគ្មានសល់។ លើសពីនេះទៅទៀត កោះនេះក៏ជាជម្រករបស់ត្រីឆ្លាតដ៏គ្រោះថ្នាក់ផងដែរ។

៦ កោះ Saba នៃប្រទេសហូឡង់៖ កោះដ៏តូចមួយនេះត្រូវបានគេស្គាល់ថា ជាកោះរបស់«ម្ចាស់ក្សត្រីគ្មានការរើសអើង»។ អ្នកដែលបានទៅទស្សនានៅទីនោះ ប្រាកដជាបានឃើញភាពស្រស់ស្អាតនៃប្រព័ន្ធអេកូឡូស៊ីចម្រុះ ក៏ដូចជាការមុចទឹក និងឡើងភ្នំជាដើម។ ប៉ុន្តែយ៉ាងណាមិញ កោះនេះគឺជាកោះគ្រោះថ្នាក់បំផុត និងកើតមានខ្យល់ព្យុះសង្ឃរាជាញឹកញយ ជាងកោះណាៗទាំងអស់លើសកលលោក។

៧ កោះ Miyaka Jima ប្រទេសជប៉ុន៖ ជាកោះដែលសម្បូរទៅដោយបន្ទុះភ្នំភ្លើងលើសកលលោក។ សម្រស់ធម្មជាតិនេះតែងតែត្រូវបានគំរាមកំហែងពីកំអែរភ្នំភ្លើងដ៏ក្តៅគគុក។ ម៉្យាងវិញទៀត ការដែលផ្ទុះភ្នំភ្លើងជាប់ៗគ្នាច្រើនដងពេក បានបង្កើតឲ្យមានចំហាយស្ពាន់ធ័រពុលនៅលើកោះ ដែលបណ្តាលឲ្យខ្យល់នៅកោះនោះពុលតាមដែរ។ ដូច្នេះ ប្រសិនបើអ្នកទៅលេងនៅកោះនោះ អ្នកត្រូវធ្វើការពាក់របាំងឧស្ម័នគ្រប់ពេលវេលាដើម្បីការពារ។

៨ កោះ Reunion ៖ ស្ថិតនៅមហាសមុទ្រឥណ្ឌាភាគខាងកើត ជាកន្លែងនៃធម្មជាតិចម្រុះដ៏ស្រស់ស្អាតអស្ចារ្យ។ កោះនេះជាជម្រកសត្វស្លាបគ្រប់ប្រភេទ ព្រមទាំងសត្វសមុទ្រយ៉ាងសម្បូរបែប។ ទោះជាយ៉ាងណាក៏ដោយ ក៏ត្រូវបានគេស្គាល់ថាជាកោះដែលគ្រោះថ្នាក់ព្រោះវាជាជម្រកត្រីបាឡែន ត្រីឆ្លាមយក្សគ្រប់ប្រភេទ។ នៅចន្លោះឆ្នាំ២០១០និង២០១៧ ដោយសារមានការវាយប្រហាររបស់ត្រីឆ្លាមមកលើច្រាំងបានសម្លាប់អ្នកទេសចរណ៍អស់ចំនួន៩នាក់ផងដែរ៕

សារព័ត៌មានបរទេសបានចុះផ្សាយកាលពីថ្ងៃទី២០ ខែវិច្ឆិកា ឆ្នាំ២០២៣ ថា ស្ករមានសារសំខាន់សម្រាប់មនុស្សភាគច្រើននៅលើពិភពលោក ប៉ុន្តែបច្ចុប្បន្ន តម្លៃស្ករបានកើនឡើងខ្ពស់នៅគ្រប់ប្រទេស ក្រោយពីបម្រែបម្រួលអាកាសធាតុដោយសារបាតុភូតអេលនីណូនៅតំបន់អាស៊ី ។ វាបានធ្វើឱ្យផលដំណាំផ្សេងៗរបស់កសិករខូចខាតទាំងស្រុង ហើយក្នុងចំណោមដំណាំទាំងនោះ ក៏មានដំណាំសម្រាប់ផលិតស្ករផងដែរ ។

តម្លៃស្ករកើនឡើងបានធ្វើឱ្យមនុស្សមួយចំនួនជួបការលំបាក ដូចជា នៅប្រទេសនីហ្សេរីយ៉ា ជាដើម ។ ស្ករជាអាហារដ៏សំខាន់សម្រាប់ពលរដ្ឋនីហ្សេរីយ៉ាទាំងអស់ ព្រោះគេបានយកស្ករធ្វើជាគ្រឿងផ្សំសម្រាប់ធ្វើនំប៉័ង ហើយវាមានតម្លៃថោកផងដែរ ប៉ុន្តែនៅពេលស្ករឡើងថ្លៃបែបនេះ បានធ្វើឱ្យអ្នកធ្វើនំប៉័ងសម្រេចចិត្តកាត់បន្ថយចំនួននំអស់ពាក់កណ្តាល ។

យោងតាមរបាយការណ៍បញ្ជាក់ថា នៅឆ្នាំ២០២៣ ស្ករនៅលើពិភពលោកបានឡើងថ្លៃខ្ពស់បំផុត បើគិតចាប់តាំងពីឆ្នាំ២០១១ មក ។ មូលហេតុចម្បងដែលបណ្តាលឱ្យតម្លៃស្ករកើនឡើង ដោយសារការផ្គត់ផ្គង់នៅទូទាំងពិភពលោកធ្លាក់ចុះ ដែលបណ្តាលមកពីគ្រោះរាំងស្ងួតបំផ្លាញផលដំណាំ ជាពិសេស ការផ្គត់ផ្គង់ស្ករនៅប្រទេសឥណ្ឌា និងថៃ ដែលប្រទេសទាំងពីរបាននាំចេញស្ករច្រើនស្ថិតក្នុងលំដាប់ទី២ និងទី៣ របស់ពិភពលោក ។

អង្គការស្បៀងអាហារ និងកសិកម្មនៃអង្គការសហប្រជាជាតិប៉ាន់ស្មានថា ការផលិតស្ករនៅទូទាំងពិភពលោកនឹងធ្លាក់ចុះ២% ចាប់ពីឆ្នាំ២០២៣ ដល់ឆ្នាំ២០២៤ បើធៀបនឹងឆ្នាំ២០២២ ។ ហេតុនេះ វានឹងបណ្តាលឱ្យការផលិតស្ករធ្លាក់ចុះរហូតដល់៣.៥០០លានតោន ។

ទោះយ៉ាងណា នាយកដ្ឋានពាណិជ្ជកម្មផ្ទៃក្នុងប្រទេសថៃបានលើកឡើងនាពេលកន្លងមកថា បច្ចុប្បន្ននេះ ស្ករនៅប្រទេសថៃមិនខ្វះខាតទេ ហើយថៃមានស្ករសម្រាប់បរិភោគគ្រប់គ្រាន់នៅក្នុងប្រទេស ។ ចំណែកនៅតាមបណ្តាហាងលក់ទំនិញនានា បើពួកគេឆ្លៀតឱកាសស្តុកទុកផលិតផល ហើយនាំគ្នាដំឡើងថ្លៃផលិតផលដោយខ្លួនឯងនោះ ពួកគេនឹងត្រូវមានទោស ៕ ប្រភព ៖ beartai BRIEF

នៅរដូវរងា មនុស្សភាគច្រើននិយមផឹកស្រា និងផឹកភេសជ្ជៈមានជាតិអាល់កុលផ្សេងៗដើម្បីកុំឱ្យរងាខ្លាំងពេក ពីព្រោះពួកគេជឿថា ស្រានឹងធ្វើឱ្យរាងកាយឡើងកំដៅ ។ ប៉ុន្តែគ្រូពេទ្យបម្រើការនៅមន្ទីរពេទ្យខេត្តជ័យណាត ប្រទេសថៃ បានបង្ហាញការបារម្ភអំពីបញ្ហានេះ ។ គ្រូពេទ្យលើកឡើងថា នេះជាការយល់ខុសមួយ ព្រោះការផឹកស្រាដើម្បីបំបាត់រងាអាចបណ្តាលឱ្យកើតគ្រោះថ្នាក់រហូតដល់ស្លា.ប់ ។

គ្រូពេទ្យថៃលើកឡើងថា យើងមានអារម្មណ៍ថា រាងកាយកក់ក្តៅជាងមុន ដោយសារពេលស្រាចូលក្នុងខ្លួនដំបូង វាបានធ្វើឱ្យសរសៃឈាមនៅក្រោមស្បែកពង្រីកមាឌ ទើបបណ្តាលឱ្យយើងមានអារម្មណ៍ថាក្តៅ ។ ប៉ុន្តែរាងកាយនឹងបញ្ចេញកំដៅកាន់តែច្រើនថែមទៀត ហើយធ្វើឱ្យសីតុណ្ហភាពរាងកាយធ្លាក់ចុះ ។ ហេតុនេះ ខ្លួនប្រាណយើងនឹងត្រជាក់ខ្លាំង (ឬហៅថា អាការៈ Hypothermia) ហើយវាបណ្តាលឱ្យខូចខាតដល់សរីរាង្គនៅក្នុងខ្លួន ។

គ្រូពេទ្យថៃបន្តថា ខ្លួនប្រាណត្រជាក់ខ្លាំងពេក មានន័យថា រាងកាយមានសីតុណ្ហភាពធ្លាក់ចុះខ្លាំង រហូតធ្វើឱ្យសរីរាង្គផ្សេងៗ ជាពិសេស បេះដូង និងខួរក្បាលរងផលប៉ះពាល់ធ្ងន់ធ្ងរ ហើយវាមិនអាចដំណើរការដូចពេលធម្មតាទេ ។ ករណីនេះ មនុស្សមួយចំនួនបានប៉ះពាល់ខ្លាំង រហូតបណ្តាលឱ្យស្លា.ប់បាន ។ ម្យ៉ាងទៀត បើយើងផឹកស្រាក្នុងបរិមាណច្រើនពេក វានឹងបង្អាក់ដំណើរការប្រព័ន្ធសរសៃប្រសាទកណ្តាល ហើយបណ្តាលឱ្យយើងងងុយដេកពេលអាកាសធាតុត្រជាក់ ហើយយើងអាចស្លា.ប់តែម្តង ដោយសារគ្មានភួយគ្រប់គ្រាន់ដណ្តប់ឱ្យកក់ក្តៅ ។

លើសពីនេះ នៅពេលរាងកាយប៉ះពាល់នឹងអាកាសធាតុត្រជាក់រយៈពេលយូរ វានឹងបណ្តាលឱ្យឈាមក្នុងខ្លួនកាន់តែខាប់ ហើយប៉ះពាល់ដល់ចលនាឈាមរត់ទៅកាន់ផ្នែកផ្សេងៗខ្វះខាតអុកស៊ីហ្សែន ។ ដូចនេះ បេះដូងនឹងធ្វើការធ្ងន់ដើម្បីបញ្ជូនឈាមទៅចិញ្ចឹមផ្នែកផ្សេងៗរបស់រាងកាយ ពេលនោះ មនុស្សភាគច្រើនបានស្លា.ប់ភ្លាមៗ ។

ចុងក្រោយ គ្រូពេទ្យបានផ្តាំផ្ញើថា សូមអ្នកទាំងអស់គ្នាឈប់ជឿនូវអ្វីខុសៗថា ការផឹកស្រាអាចជួយឱ្យរាងកាយកក់ក្តៅនៅខែរងា ប៉ុន្តែគួរតែពាក់ខោអាវរងាឱ្យជិតខ្លួន និងបរិភោគម្ហូបអាហារត្រឹមត្រូវ ៕ ប្រភព ៖ work point news