ប្រទេសថៃ ៖ អាជ្ញាធរទេសចរណ៍ថៃលើកឡើងថា ចាប់តាំងពីដើមឆ្នាំ២០២៣ រហូតដល់ខែវិច្ឆិកា ឆ្នាំ២០២៣ ប្រទេសថៃទទួលបានភ្ញៀវទេសចរសរុបជាង២៣លាននាក់ ប៉ុន្តែវាតិចជាងគោលដៅដែលរដ្ឋាភិបាលថៃបានកំណត់ទុកថា នឹងមានភ្ញៀវទេសចរមកកាន់ប្រទេសថៃ រហូតដល់២៨លាននាក់ ។ ហេតុនេះ វាបណ្តាលមកពីចំនួនភ្ញៀវទសចរចិនធ្លាក់ចុះ ដែលជាក្រុមទេសចរចម្បងរបស់ថៃ ។

អាជ្ញាធរទេសចរណ៍ថៃបន្តថា ប្រទេសថៃរំពឹងថា នឹងមានភ្ញៀវទេសចរចិនមកកម្សាន្តនៅប្រទេសថៃ ចាប់ពី៣លាន៤សែននាក់ រហូតដល់៣លាន៥សែននាក់នៅឆ្នាំ២០២៣ ។ នេះចាត់ទុកថា វាទាបជាងគោលដៅដែលកំណត់ទុក បើទោះជារដ្ឋាភិបាលថៃបានចេញវិធានការលើកលែងទិដ្ឋាការដើម្បីទាក់ទាញភ្ញៀវទេសចរចិនក៏ដោយ ។

រហូតមកដល់បច្ចុប្បន្ននេះ មានភ្ញៀវទេសចរចិនបានធ្វើដំណើរមកកាន់ប្រទេសថៃរួចហើយប្រមាណ៣លាននាក់ ។ ដូច្នេះ ប្រទេសចិន គឺជាទីផ្សារទេសចរណ៍ដ៏សំខាន់សម្រាប់វិស័យទេសចរណ៍របស់ថៃ ។ គួរបញ្ជាក់ថា ប្រទេសថៃទទួលបានភ្ញៀវទេសចរចិនចំនួន១១លាននាក់ក្នុងអំឡុងពេលមុនជំងឺកូវីដ-១៩ ឆ្លងរាតត្បាត ឬនៅឆ្នាំ២០១៩ ហើយចំនួននេះស្មើនឹង១ ក្នុងចំណោម៤ នៃចំនួនភ្ញៀវទេសចរទាំងអស់ដែលមកកាន់ប្រទេសថៃកាលពីឆ្នាំ២០១៩ ។

លោក Chatthan Kunchorn មន្ត្រីទទួលបន្ទុកផ្នែកទីផ្សារអន្តរជាតិប្រចាំតំបន់អាស៊ី និងប៉ាស៊ីហ្វិកខាងត្បូងរបស់អាជ្ញាធរទេសចរណ៍ថៃលើកឡើងថា ៖ «សេដ្ឋកិច្ចចិនកំពុងតែធ្លាក់ចុះ ទើបធ្វើឱ្យពលរដ្ឋចិនភាគច្រើនព្រួយបារម្ភអំពីការចំណាយប្រាក់សម្រាប់ដំណើរកម្សាន្ត ។ ម្យ៉ាងទៀត មានហេតុការណ៍បា.ញ់ប្រហា.រនៅផ្សារទំនើបក្នុងទីក្រុងបាងកកកាលពីពេលថ្មីៗនេះ ទើបធ្វើឱ្យប៉ះពាល់ដល់ទំនុកចិត្តរបស់ភ្ញៀវទេសចរបរទេស» ។

លោក Chatthan Kunchorn បន្តថា គិតចាប់ពីដើមឆ្នាំ២០២៣ រហូតដល់ខែវិច្ឆិកា ឆ្នាំ២០២៣ ចំនួនភ្ញៀវទេសចរសរុបដែលបានធ្វើដំណើរមកកាន់ប្រទេសថៃ ស្មើនឹងជាង២៣លាននាក់ ប៉ុន្តែរដ្ឋាភិបាលថៃបានកំណត់គោលដៅទទួលបានភ្ញៀវទេសចរបរទេសរហូតដល់២៨លាននាក់ ។ ហេតុនេះ បើប្រៀបធៀបនឹងទិន្នន័យមុនពេលជំងឺកូវីដ-១៩ ឆ្លងរាតត្បាតនៅប្រទេសថៃ ឬទិន្នន័យនៅឆ្នាំ២០១៩ ចាត់ទុកថា ថៃបាត់បង់ចំនួនភ្ញៀវទេសចរច្រើនគួរសមដែរ ពីព្រោះនៅឆ្នាំ២០១៩ មានភ្ញៀវទេសចរបរទេសធ្វើដំណើរមកប្រទេសថៃ ជិតស្មើ៤០លាននាក់ឯណោះ ៕

គូឡាឡាំពួ៖ សមាជិកសភាលោក Tuan Ibrahim Tuan Man បានស្នើឱ្យបុរសមូស្លីមរៀបការជាមួយប្រពន្ធលើសពីមួយ ដើម្បីដោះស្រាយបញ្ហាស្ត្រីជាច្រើនរៀបការយឺត។យោងតាមប្រភពព័ត៌មាន The Star ដែលបានចុះផ្សាយកាលពីថ្ងៃទី២២ ខែវិច្ឆិកាថា បច្ចុប្បន្នប្រទេសម៉ាឡេស៊ីមានស្ត្រីនៅលីវជាង ៨.៤ លាននាក់ ដូច្នេះយោងតាមលោក Tuan Ibrahim បាននិយាយថា ការដែលឱ្យបុរសរៀបការប្រពន្ធច្រើននឹងជួយដោះស្រាយបញ្ហាស្ត្រីរៀបការយឺត។ លោក Tuan Ibrahim បានបន្តទៀតថា “ខ្ញុំដឹងថានេះមិនមែនជាដំណោះស្រាយចុងក្រោយទេ ប៉ុន្តែវាអាចដោះស្រាយបញ្ហានៃការរៀបការយឺត ហើយប្រាកដណាស់សមាជិកសភាបក្សប្រឆាំងមួយចំនួនក៏គាំទ្រវាផងដែរ” ។

ទោះជាយ៉ាងណាក៏ដោយ សំណើរបស់លោក Tuan Ibrahim ត្រូវបានមហាជនជាច្រើនបានធ្វើការរិះគន់យ៉ាងខ្លាំង។ លោកមេធាវី Siti Kasim បានធ្វើអត្ថាធិប្បាយថា មានបញ្ហាជាតិសំខាន់ៗជាច្រើន ដែលត្រូវលើកមកពិភាក្សានៅចំពោះមុខរដ្ឋសភា មិនមែនជាបញ្ហានៃការរៀបការយឺតយ៉ាវនោះទេ។ លោក Siti ជឿជាក់ថា លោក Tuan Ibrahim គួរតែសុំទោសស្ត្រី និងបុរសទាំងអស់ ព្រោះគាត់គិតថា ពួកគេមានគំនិតដូចគាត់។

ក្នុងនោះដែរ អង្គការជំនួយស្ត្រី (WAO) បានបញ្ជាក់ថា មុននឹងលើកកម្ពស់ពហុពន្ធភាព ចាំបាច់ត្រូវធានាថា បុរសយល់ច្បាស់អំពីទំនួលខុសត្រូវរបស់ពួកគេចំពោះភរិយាក្នុងការរស់នៅជាមួយគ្នា និងការចិញ្ចឹមកូន។
WAO បានបន្ថែមទៀតថា “នៅក្នុងគ្រួសារ ឬបញ្ហាអាពាហ៍ពិពាហ៍ណាមួយ វាមានសារៈសំខាន់ណាស់ក្នុងការធានានូវតម្រូវការខាងរាងកាយ និងខាងវិញ្ញាណរបស់គ្រួសារ ជាពិសេសសម្រាប់ស្ត្រី និងកុមារ ក្រុមដែលងាយរងគ្រោះ” ។

គួរបញ្ជាក់ដែរថា ច្បាប់ឥស្លាមរបស់ប្រទេសម៉ាឡេស៊ីអនុញ្ញាតឱ្យបុរសអាចរៀបការជាមួយប្រពន្ធបានរហូតដល់ ៤ នាក់ ប៉ុន្តែទាមទារការយល់ព្រមពីតុលាការឥស្លាមរបស់រដ្ឋនីមួយៗសម្រាប់អាពាហ៍ពិពាហ៍នីមួយៗបន្ទាប់ពីអាពាហ៍ពិពាហ៍លើកដំបូង។ សម្រាប់អ្នកមិនមែនជាមូស្លីម ពហុពន្ធភាពត្រូវបានហាមឃាត់នៅក្រោមច្បាប់អាពាហ៍ពិពាហ៍សហព័ន្ធម៉ាឡេស៊ីឆ្នាំ ១៩៧៦៕

ជាការពិតណាស់ ជាងពាក់កណ្តាលនៃសក់ពាក់ឬសក់ក្លែងក្លាយទាំងអស់នៅជុំវិញពិភពលោក គឺត្រូវបានផលិតនៅទីក្រុងមួយនាប្រទេសចិន ខណៈតាមរយៈការធ្វើឧស្សាហកម្មសក់នេះក៏កំពុងតែកាក់កបយ៉ាងខ្លាំងនៅឯប្រទេសវៀតណាម។ តម្រូវការសក់របស់មនុស្សនៅទូទាំងពិភពលោកបានជំរុញកំណើតសេដ្ឋកិច្ច ក៏ដូចជាជួយសម្រួលដល់ជីវភាពរស់នៅរបស់ប្រជាជនតំបន់អាស៊ីមួយផ្នែកធំ។ ខណៈមានតម្រូវការសក់ពាក់កើនឡើង ក៏មានសំណួរជាច្រើនបានលើកឡើងថា ហេតុអ្វីបានជាសក់ប្រភេទមួយចំនួនមានតម្លៃថ្លៃម្លេះនៅលើទីផ្សារ?

បើនិយាយពីតួនាទីរបស់ចិននៅលើទីផ្សារពិភពលោកវិញ គឺប្រទេសនេះពិតជាមានភាពលេចធ្លោយ៉ាងខ្លាំងនៃដំណើរការផលិតសក់ពាក់ (សក់ក្លែងក្លាយ) ឲ្យស្របទៅនឹងតម្រូវការរបស់មនុស្សនាពេលបច្ចុប្បន្ននេះ។ ទីក្រុង Xichang គឺជាក្រុងមួយនៃប្រទេសចិន ដែលបានផលិតសក់ពាក់ ប្រមាណពី៦៦% នៅលើសកលលោកជារៀងរាល់ឆ្នាំ។ តាមរយៈការប្រមូលទិញសក់នៅប្រទេសចិនផ្តោតសំខាន់ទៅលើចំណុច៣សំខាន់គឺ ប្រវែង ភាពរលោង និងគុណភាព ហើយតម្លៃជាមធ្យមក្នុងមួយគីឡូក្រាមនៃសក់គឺមានតម្លៃ ៤១០ដល់ ៦៨០ដុល្លារ ដូច្នេះ រាល់សក់ដែលកាត់ម្តងៗ អ្នកលក់សក់នឹងទទួលបានប្រាក់ចន្លោះពី២៧ទៅ៨២ដុល្លារតាមទម្ងន់ជាក់ស្តែង។ ពួកគេក៏បាននិយាយដែរថា គេពិតជាសប្បាយចិត្តណាស់ និងមិននឹកស្មានថាទទួលបានកម្រៃច្រើនបែបនេះទេ។ រោងចក្រផលិតសក់ដ៏ធំមួយនៅប្រទេសចិននេះក៏មានកម្មកររាប់ម៉ឺននាក់ ព្រមទាំងបានពង្រីករោងចក្រនៅក្រៅប្រទេស ក្នុងនោះក៏មានកម្ពុជាផងដែរ។ លើសពីនេះ ចិនក៏ជាអ្នកនាំចេញសក់ពាក់ដ៏ធំមួយទៅកាន់ទិផ្សារសហរដ្ឋអាមរិកផងដែរ។ តាមរយៈការធ្វើពាណិជ្ជកម្មសក់ មិនត្រឹមតែធ្វើឲ្យចិនរីកចម្រើនយ៉ាងខ្លាំងទៅលើវិស័យមួយនេះនោះទេ ថែមទាំងជាប្រភពប្រាក់ចំណូលសម្រាប់ប្រជាជនខ្លូនរាប់លាននាក់ទៀតផង។ តាមស្ថិតិបានឲ្យដឹងថាមនុស្សម្នាក់ក្នុងចំណោម៦នាក់មានការជ្រុះសក់ឬរហូតទំពែក។ ដូច្នេះហើយការពាក់សក់គឺពិតជាពេញនិយមបំផុត និងជួយសម្រួលដល់មនុស្សជាច្រើនក្នុងបង្កើតទំនុកចិត្តនិងលើកសម្រស់ខ្លួនឯងឡើងវិញ។

រីឯនៅប្រទេសវៀតណាមវិញ រយៈពេល១០ឆ្នាំចុងក្រោយនេះបានរីកចម្រើនយ៉ាងខ្លាំងទៅលើការអភិវឌ្ឍឧស្សាហកម្មសក់។ បន្ថែមពីលើការរីកចម្រើននេះ វាក៏ជួយជំរុញស្ថានភាពហិរញ្ញវត្ថុក៏ដូចជាបង្កើនប្រាក់ចំណូលជាច្រើនទៅកាន់ប្រជាពលរដ្ឋរបស់ពួកគេ រាប់ចាប់តាំងពីការកាត់សក់ ការធ្វើសេវាកម្មសក់ផ្សេងៗ ក៏ដូចជាការលាបពណ៌ ការអ៊ុតសក់ជាដើម។ ប្រទេសវៀតណាមគឺពេញនិយម សក់ទង់ដែង ឬហៅថា «សក់ Black Gold» ហើយវាពិតជាបានដើរតួនាទីយ៉ាងសំខាន់នៅក្នុងវិស័យសេដ្ឋកិច្ចវៀតណាម ទាំងក្នុងប្រទេសនិងការនាំចេញទៅកាន់ទីផ្សារអន្តរជាតិ។ ការនាំចេញសក់ពាក់របស់វៀតណាមបានធ្វើឡើងតាមរយៈប្រព័ន្ធអនឡាញទៅកាន់ទីផ្សារក្រៅប្រទេសដូចជា ប្រទេសអាហ្រ្វិក សហភាពអ៊ឺរ៉ុប និងសហរដ្ឋអាមេរិកជាដើម។ ចំណុចសំខាន់របស់សក់វៀតណាមក្នុងការប្រកួតប្រជែងនៅលើទីផ្សារអន្តរជាតិ ជាពិសេសជាមួយនឹងប្រទេសចិនគឺផ្តោតសំខាន់ទៅលើគុណភាព ជាជាងបរិមាណ។ ជាក់ស្តែង សក់វៀតណាមគឺផ្តោតសំខាន់ទៅលើភាពត្រង់ ទន់ ភ្លឺរលោង រឹងមាំ និងមានសុខភាពល្អ។ ម៉្យាងវិញទៀត ការប្រមូលសក់មួយសរសៃរៗគឺបានយកមកពីកន្លែងផ្សេងៗគ្នាដូចជាប្រមូលទិញពីកម្ពុជា មីយ៉ាន់ម៉ា ឡាវជាដើម។ ជាធម្មតា សក់ ១០០ក្រាមមានតម្លៃប្រមាណ៣០ដុល្លារ ប៉ុន្តែបន្ទាប់ពីយកសក់នោះទៅធ្វើតាមដំណើរការនៃការផលិតរួចហើយ ក៏បានដាក់លក់នៅលើទីផ្សារ តម្លៃសក់គឺទទួលបានរហូតដល់៣០០ទៅ៨០០ដុល្លារ រីឯសក់ដែលថ្លៃជាងគេអាចមានតម្លៃរហូតដល់ ១០ ០០០ដុល្លារឯណ្ណោះ។ ម៉្យាងវិញទៀត នៅក្នុងថ្ងៃបុណ្យគ្រីសម៉ាកខាងមុខវៀតណាមកំពុងតែបន្ថែមការផលិតសក់ជាច្រើនទៀត ដើម្បីនាំចេញទៅកាន់សហរដ្ឋអាមេរិក។

យ៉ាងណាមិញ ក៏មានសំណួរជាច្រើនបានលើកឡើងថា ហេតុអ្វីបានជាសក់ប្រភេទមួយចំនួនមានតម្លៃថ្លៃម្លេះនៅលើទីផ្សារ? ជាការពិតណាស់ វាក៏ត្រូវបានលាតត្រដាងពីកត្តាជាច្រើនដែលធ្វើឲ្យតម្លៃរបស់ខ្លះកើនឡើង និងថ្លៃកប់ពពកបែបនេះ គឺមកពីគុណភាពសក់ល្អ និងសង្វាក់ផលិតកម្មដ៏ស្មុកស្មាញ និងប្រណិតភាពដើម្បីទទួលបានសក់នីមួយៗផងដែរ៕

តុលាការនៅក្នុងរដ្ឋធានីប៉េកាំងរបស់ប្រទេសចិននៅថ្ងៃទី២៤ ខែវិច្ឆិកា បានច្រានចោលបណ្តឹងឧទ្ធរណ៍របស់តារាចម្រៀងនិងសម្តែង Kris Wu ដែលត្រូវបានកាត់ទោសឱ្យជាប់ពន្ធនាគារ១៣ឆ្នាំពីបទរំលោភសេពសន្ថវៈជាក្រុម។ បន្ទាប់ពីបញ្ចប់ការជាប់ពន្ធនាគារ Kris Wu នឹងត្រូវនិរទេសពីប្រទេសចិន។ នេះបើយោងយាមការចុះផ្សាយរបស់ រ៉យទ័រ។

ចៅក្រមបាននិយាយថា អាជ្ញាធរមានភស្តុតាងគ្រប់គ្រាន់ដើម្បីផ្ដន្ទាទោស Kris Wu ។ អតីតារាចម្រៀងរូបនេះបានលួងលោមនារីរងគ្រោះក្នុងស្ថានភាពស្រវឹង ដែលតុលាការចាត់ទុកថាជាទង្វើនៃការរំលោភ។ ក្នុងបទល្មើសពេស្យាចារជាក្រុមនោះ Kris Wu ជាអ្នកដឹកនាំ រៀបចំផែនការ និងណែនាំអ្នកដទៃឱ្យធ្វើសកម្មភាពទាំងនេះទើបបទល្មើសកាន់តែធ្ងន់ធ្ងរ។

Kris Wu ត្រូវបានចាប់ខ្លួននៅខែកក្កដា ឆ្នាំ២០២១ បន្ទាប់ពីនិស្សិតជនជាតិចិនអាយុ ១៨ ឆ្នាំម្នាក់បានចោទប្រកាន់គេជាសាធារណៈពីបទញុះញង់នាង និងក្មេងស្រីផ្សេងទៀត ដែលខ្លះមានអាយុក្រោម ១៨ឆ្នាំ រួមភេទជាមួយខ្លួន។ មុនពេលត្រូវបានចាប់ខ្លួន នៅលើបណ្តាញសង្គមផ្ទាល់របស់ Kris Wu បានបដិសេធការចោទប្រកាន់របស់នារីនោះដោយនិយាយថានាង «បានប្រឌិត និងបង្កាច់បង្ខូចកេរ្តិ៍ឈ្មោះ» ខណៈអ្នកគ្រប់គ្រងរបស់តារាប្រុសរូបនេះជឿជាក់ថានារីរូបនោះបានញុះញង់មតិសាធារណៈដើម្បីទារប្រាក់យ៉ាងច្រើនពី Kris Wu។

Kris Wu កើតនៅប្រទេសចិន មានវ័យ៣៣ឆ្នាំ ជាអតីតសមាជិកក្រុម EXO ។ បន្ទាប់ពីបញ្ចប់កិច្ចសន្យាជាមួយផលិតកម្ម SM Entertainment រូបគេបានត្រឡប់ទៅប្រទេសចិនក្នុងឆ្នាំ ២០១៤ ដើម្បីបន្តសកម្មភាពទោលលើអាជីពសិល្បៈនៅទីនោះវិញ។ ប្រឡូកអាជីពសិល្បៈនៅប្រទេសចិន Kris Wu បានលេចមុខតាមរយៈខ្សែភាពយន្តជាច្រើនហើយតារាសម្តែងរូបនេះក៏បានបង្ហាញខ្លួននៅក្នុងខ្សែភាពយន្តហូលីវូដទៀតផង៕

យោងតាមទិន្នន័យផ្លូវការដែលចែករំលែកដោយរដ្ឋាភិបាលនៃប្រទេស El Salvador ប្រទេសនេះបានទាក់ទាញភ្ញៀវទេសចរចំនួន ៦៥,០០០នាក់ក្នុងអំឡុងពេលព្រឹត្តិការណ៍ Miss Universe លើកទី៧២ ដែលបានបង្កើតប្រាក់ចំណូលសរុបចំនួន ១៧៧ លានដុល្លារ។

ប្រភពដដែលបានបង្ហាញថា មានកំណត់ត្រាជាមធ្យមរយៈពេលពីរសប្តាហ៍នៃចំនួនភ្ញៀវទេសចរសំខាន់ៗភាគច្រើនមានដូចជាសហរដ្ឋអាម៉េរិក វេណេស៊ុយអេឡា ម៉ិកស៊ិក នីការ៉ាហ្គា ហុងឌូរ៉ាស និងហ្គាតេម៉ាឡា។

រដ្ឋាភិបាលនៃប្រទេស El Salvador ក៏បានរាយការណ៍ផងដែរថា សណ្ឋាគារនៅ San Salvador មានការស្នាក់នៅពេញ១០០% ក្នុងអំឡុងពេលព្រឹត្តិការណ៍នេះ។ លើសពីនេះ ប្រភពបានគូសបញ្ជាក់ថា អត្រាមានអ្នកទស្សនាកម្មវិធីនេះមានចំនួនរហូតដល់១២២លាននាក់នៅទូទាំងពិភពលោក។

នៅក្នុងសារដែលបានចែករំលែកនៅលើប្រព័ន្ធផ្សព្វផ្សាយសង្គម រដ្ឋាភិបាលបានសម្តែងថាព្រឹត្តិការណ៍នេះបានព្យាករលើប្រទេស El Salvador ទូទាំងពិភពលោក និងពង្រឹងប្រទេសជាគោលដៅទាក់ទាញមិនគួរឱ្យជឿដែលគេស្គាល់សម្រាប់សមត្ថភាពរៀបចំរបស់ខ្លួន។ព្រឹត្តិការណ៍បវរកញ្ញាចក្រវាលឆ្នាំ ២០២៣ក៏បានធ្វើឱ្យមានចំណងជើងសម្រាប់ការផ្លាស់ប្តូរច្បាប់ជាមូលដ្ឋានរបស់ខ្លួន ដែលអនុញ្ញាតឱ្យស្រ្តីរៀបការ មានផ្ទៃពោះ លែងលះគ្នា ឬស្ត្រីមានកូន ស្ត្រីកែភេទពីរនាក់ និងស្ត្រីដែលមានមាឌធំចូលរួមប្រកួតប្រជែងផងដែរ។

ប្រធានាធិបតីនៃប្រទេស El Salvador លោក Nayib Bukele បានប្រកាសកាលពីខែមករា ថា ប្រទេសនេះនឹងធ្វើជាម្ចាស់ផ្ទះរៀបចំកម្មវិធីប្រកួតបវរកញ្ញាចក្រវាលលើកទី៧២ ដែលនេះជាលើកទី២ហើយ ដែលប្រទេសអាម៉េរិកកណ្តាលបានរៀបចំព្រឹត្តិការណ៍នេះ។ ភាពជោគជ័យនៃព្រឹត្តិការណ៍នេះ និងឥទ្ធិពលវិជ្ជមានដែលវាមានលើវិស័យទេសចរណ៍ និងសេដ្ឋកិច្ចរបស់ប្រទេស El Salvador បានកំណត់ប្រទេសនេះថាជាគោលដៅគួរឱ្យកត់សម្គាល់សម្រាប់ព្រឹត្តិការណ៍អន្តរជាតិនាពេលអនាគត។

គួរបញ្ជាក់ផងដែរថា ម្ចាស់មកុដឆ្នាំនេះបានទៅលើបវកញ្ញាមកពី នីការ៉ាហ្គា ថៃលំដាប់រងទី១ និងអូស្រ្តាលីលំដាប់ទី២ ខណៈបវរកញ្ញាចូលរួមទាំងអស់មានចំនួន៨៤នាក់៕