នៅពេលដែលឆ្នាំថ្មីចូលមកដល់ ប្រជាជននៃប្រទេសមួយចំនួនដូចខាងក្រោមនេះនឹងទទួលទានអាហារផ្សេងៗគ្នានៅថ្ងៃដំបូងនៃឆ្នាំថ្មី ដោយពួកគេជឿថា ការបរិភោគអាហារទាំងនេះនឹងនាំមកនូវសំណាងល្អ ក៏ដូចជាភាពរុងរឿងចូលមកក្នុងគ្រួសារ។ ដូច្នេះអាហារល្បីៗដែលគេជឿថានឹងនាំលាភ សំណាងចូលក្នុងផ្ទះនៅឆ្នាំថ្មីនោះមានដូចជា៖

១.ទំពាំងបាយជូ៖ ប្រជាជនអេស្ប៉ាញនឹងទទួលទានទំពាំងបាយជូរចំនួន ១២ ផ្លែនៅដើមឆ្នាំថ្មីនេះ ដោយជឿថានឹងសុភមង្គល មាស ប្រាក់ចូលក្នុងផ្ទះ។ ទំនៀមទម្លាប់នេះបានចាប់ផ្តើមនៅក្នុងសតវត្សទី ២០ មកម្លេះនៅពេលដែលមនុស្សជំនាន់មុនដាំទំពាំងបាយជូរហើយការប្រមូលផលគឺល្អ។ ចាប់តាំងពីពេលនោះមក ប្រពៃណីនេះបានរីករាលដាលពាសពេញប្រទេសអេស្ប៉ាញតែម្តង។

២. Tamales៖ តាម៉ាឡេសគឺជាមុខម្ហូបដ៏ល្បីមួយនៅក្នុងប្រទេសម៉ិកស៊ិក ដោយម្ហូបនេះធ្វើពីម្សៅពោតដាក់ជាមួយសាច់ ឈីស និងគ្រឿងផ្សំផ្សេងទៀត រុំដោយស្លឹកចេក ឬអង្កាម។ ការទទួលទាន tamales ជុំគ្រួសារ ឬមិត្តភក្តិ នៅថ្ងៃចូលឆ្នាំសកលនឹងទទួលបានសំណាងល្អ ក៏ដូចជាភាពរុងរឿងពេញមួឆ្នាំ។

៣.គុយទាវសូបា៖ ប្រជាជនជប៉ុនតែងនិយមទទួលទានគុយទាវសូបា ឬតូស៊ីកូស៊ីសូបា នៅថ្ងៃចូលឆ្នាំសកល ដើម្បីស្វាគមន៍ឆ្នាំថ្មី ព្រោះគេជឿថាមុខម្ហូបនេះគឺជានិមិត្តរូបនៃភាពជាប់បានយូរ និងភាពរុងរឿង។

៤.Herring៖ មុខម្ហូមនេះគឺមានច្រើននៅក្នុងប្រទេសប៉ូឡូញ និងបណ្តាប្រទេស Scandinavian មួយចំនួន ដោយសារពួកវាមានពណ៌ប្រាក់ ហើយមនុស្សជាច្រើនចូលចិត្តញ៉ាំវានៅពាក់កណ្តាលអធ្រាត្រ ដើម្បីបួងសួងសុំសេចក្តីសុខ និងបរិបូរណ៍ក្នុងឆ្នាំថ្មី។

៥.Kransekage៖ Kransekage គឺជានំខេកកម្រងផ្កាដែលត្រូវបានបង្កើតឡើងសម្រាប់ថ្ងៃចូលឆ្នាំសកល ក៏ដូចជាឱកាសពិសេសផ្សេងទៀតនៅក្នុងប្រទេសដាណឺម៉ាក និងន័រវែស។

៦.Cotechino con lenticchie៖ ប្រជាជនអ៊ីតាលីតែងតែទទួលទានមុខម្ហូបនេះនៅពេលចូលឆ្នាំសកល ដោយពួកគេជឿថានឹងនាំសំណាងល្អ បរិបូរណ៍ដោយមាសប្រាក់ជាដើម។

៧.Marzipanschwein៖ Marzipanschwein គឺជានំដ៏ពិសេសមួយប្រចាំប្រទេសអូទ្រីស និងអាឡឺម៉ង់ ដោយប្រជាជននៃប្រទេសទាំងពីរនេះជឿថា ការញ៉ាំនំ Marzipanschwein នៅដើមឆ្នាំនឹងនាំមកនូវសំណាងល្អ ក៏ដូចជាអំណោយជាច្រើនពេញមួយឆ្នាំផងដែរ។

៨.Oliebollen៖ នំចៀនមូល Oliebollen ត្រូវបានលក់នៅលើរទេះតាមដងផ្លូវរបស់ប្រទេសហូឡង់។ ពួកវាជាម្ហូបប្រពៃណីនៅថ្ងៃចូលឆ្នាំសកល និងនៅក្នុងពិព័រណ៍ ឬព្រឹត្តិការណ៍ពិសេសៗជាដើម។

៩.Hoppin’ John៖ Hoppin ‘John គឺជាម្ហូបប្រពៃណីសម្រាប់ឆ្នាំថ្មីនៅភាគខាងត្បូងសហរដ្ឋអាមេរិក ដែលមានសណ្តែកសៀង ឬសណ្ដែកស និងអង្ករ បម្រើជាមួយបន្លែបៃតង ឬនំប៉័ងពោត។ សណ្តែករាងមូលតំណាងឱ្យកាក់ បន្លែពណ៌បៃតងតំណាងឱ្យលុយដុល្លារ។ ម្ហូបនេះត្រូវបានគេនិយាយថានាំសំណាងក៏ដូចជាទ្រព្យសម្បត្តិនៅក្នុងឆ្នាំថ្មី។

១០.King cake៖ ជនជាតិក្រិច និងជនជាតិបារាំង រួមទាំង ជនជាតិប៊ុលហ្គារីតែងតែបរិភោគនំខេកនេះនៅថ្ងៃចូលឆ្នាំសកល ដោយពួកគេជឿថា នឹងនាំមកនូវលាភសំណាងក្នុងឆ្នាំថ្មីនេះ៕

ប្រទេសកូរ៉េខាងត្បូង ៖ នៅតាមបណ្តាទីក្រុងនានាលើពិភពលោក បានប្រឈមមុខនឹងបញ្ហាស្ទះចរាចរណ៍ ហើយទីក្រុងទាំងនេះបានព្យាយាមដោះស្រាយបញ្ហាជាបន្តបន្ទាប់ ដើម្បីសម្រួលដល់ការធ្វើដំណើររបស់ពលរដ្ឋរស់នៅក្នុងទីក្រុង ។ នៅឆ្នាំ២០២៤ ទីក្រុងសេអ៊ូល ប្រទេសកូរ៉េខាងត្បូង នឹងប្រើប្រាស់ដ្រូនដើម្បីត្រួតពិនិត្យការធ្វើចរាចរនៅតាមដងផ្លូវ ហើយវានឹងធ្វើការជាមួយបច្ចេកវិទ្យា AI ដើម្បីព្យាករការស្ទះចរាចរណ៍ផងដែរ ។

នៅឆ្នាំ២០២៤ រដ្ឋាភិបាលកូរ៉េខាងត្បូងនឹងយកដ្រូនមកជួយត្រួតពិនិត្យការធ្វើចរាចរនានា ដើម្បីប្រមូលផ្តុំទិន្នន័យ, ពិនិត្យមើលការធ្វើចរាចរក្នុងម៉ោងនីមួយៗ ហើយប្រមូលទិន្នន័យទាំងនេះមកធ្វើការជាមួយបច្ចេកវិទ្យា AI ដើម្បីព្យាករថា តើនឹងស្ទះចរាចរណ៍នៅលើផ្លូវណាខ្លះ ហើយវាស្ទះនៅម៉ោងប៉ុន្មាន ។ លើសពីនេះ វានឹងណែនាំផ្លូវដែលអ្នកដំណើរពុំគួរបើកបរ ដើម្បីកាត់បន្ថយការស្ទះចរាចរឱ្យបានច្រើនបំផុត ។

អាជ្ញាធរក្រុងសេអ៊ូលនឹងបង្ហោះដ្រូនក្នុងកម្ពស់២០០ម៉ែត្រ ដើម្បីឱ្យវាអាចប្រមូលទិន្នន័យបានគ្រប់ទីកន្លែងក្នុងទីក្រុងសេអ៊ូល ហើយអាចប្រមូលទិន្នន័យនៅតំបន់ដែលគ្មានកាមេរ៉ាសុវត្ថិភាពផងដែរ ។ អាជ្ញាធរបានចាប់ផ្តើមប្រមូលព័ត៌មានរួចហើយតាមរយៈដ្រូន កាលពីខែកញ្ញា ដល់ខែតុលា ឆ្នាំ២០២៣ ដើម្បីវាយតម្លៃអំពីស្ថានភាពចរាចរណ៍ក្នុងអំឡុងពេលចូលឆ្នាំសកល ។

ហេតុនេះ គោលដៅនៃការប្រើប្រាស់ដ្រូនត្រួតពិនិត្យការធ្វើចរាចរនៅតាមដងផ្លូវមុនពេលស្ទះចរាចរណ៍ គឺដើម្បីការពារការស្ទះចរាចរណ៍ ។ ម្យ៉ាងទៀត ការប្រើប្រាស់ដ្រូនមានលក្ខណៈខុសប្លែកគ្នាពីការពិនិត្យមើលស្ថានការណ៍ចរាចរណ៍នាពេលបច្ចុប្បន្ន ដែលត្រូវរង់ចាំឱ្យស្ទះចរាចរណ៍ជាមុនសិន ទើបរកវិធីឱ្យរថយន្តនានាបើកបរទៅផ្លូវផ្សេង ។

ក្រៅពីដ្រូនអាចប្រមូលទិន្នន័យពីការធ្វើចរាចរនៅតាមដងផ្លូវហើយ ទីក្រុងសេអ៊ូលក៏អាចប្រើប្រាស់ដ្រូនឱ្យត្រួតពិនិត្យមើលតំបន់ផ្សេងៗថា តើតំបន់ទាំងនោះមានសំណង់ណាខ្លះខុសច្បាប់ ឬរំលោភលើទីធ្លាសាធារណៈ ៕

រដ្ឋមន្ត្រីការបរទេសអាស៊ានបានចេញសេចក្តីថ្លែងការណ៍មួយ ដោយសម្តែងការព្រួយបារម្ភអំពីស្ថានភាពនៅសមុទ្រខាងកើត ក៏ដូចជាអំពាវនាវឱ្យរក្សា និងលើកកម្ពស់ស្ថិរភាពដែនសមុទ្រនៅអាស៊ីអាគ្នេយ៍។

យោងតាមសេចក្តីថ្លែងការណ៍របស់រដ្ឋមន្ត្រីការបរទេសអាស៊ានដែលបានប្រកាសកាលពីថ្ងៃទី ៣០ ខែធ្នូថា “យើងកំពុងមានការព្រួយបារម្ភអំពីការវិវត្តន៍ថ្មីៗនៅសមុទ្រខាងកើត” ។ ដូច្នេះនៅក្នុងសេចក្តីថ្លែងការណ៍នោះ រដ្ឋមន្ត្រីការបរទេសក៏បានអំពាវនាវដល់ភាគីនានា ជៀសវាងសកម្មភាពដែលអាចធ្វើឱ្យស្ថានការណ៍កាន់តែស្មុគស្មាញ ហើយត្រូវដោះស្រាយជម្លោះដោយសន្តិវិធី នឹងឈរលើមូលដ្ឋាននៃការអនុលោមតាមគោលការណ៍ច្បាប់អន្តរជាតិដែលត្រូវបានទទួលស្គាល់យ៉ាងទូលំទូលាយ រួមទាំងអនុសញ្ញាអង្គការសហប្រជាជាតិស្តីពីច្បាប់សមុទ្រ ( UNCLOS) ឆ្នាំ ១៩៨២ ផងដែរ។

រដ្ឋមន្ត្រីការបរទេសនៃបណ្តាប្រទេសអាស៊ានក៏បានសង្កត់ធ្ងន់លើសារៈសំខាន់នៃការអនុវត្តទាំងស្រុងនូវសេចក្តីថ្លែងការណ៍ស្តីពីការប្រតិបត្តិរបស់ភាគីនានានៅសមុទ្រខាងកើត (DOC) និងប្តេជ្ញាធ្វើការយ៉ាងជិតស្និទ្ធដើម្បីសម្រេចបាននូវក្រមប្រតិបត្តិនៅសមុទ្រខាងកើត (COC) នាពេលឆាប់ៗខាងមុខប្រកបដោយប្រសិទ្ធភាពយ៉ាងសំខាន់ និងស្របតាមច្បាប់អន្តរជាតិ។

អាស៊ានក៏សង្ឃឹមដែរថាកិច្ចសន្ទនាបែបនេះនឹងជំរុញកិច្ចខិតខំប្រឹងប្រែងដើម្បីបង្កើនស្ថិរភាព និងកិច្ចសហប្រតិបត្តិការនៅលំហសមុទ្រក្នុងតំបន់។ នេះជាលើកទី ៥ ហើយដែលអាស៊ានបានចេញសេចក្តីថ្លែងការណ៍ដាច់ដោយឡែកអំពីបញ្ហាដែនសមុទ្រចាប់តាំងពីឆ្នាំ ១៩៩៥ និងជាលើកចុងក្រោយដែលអាស៊ានបានចេញសេចក្តីថ្លែងការណ៍ដាច់ដោយឡែកអំពីសមុទ្រខាងកើតគឺក្នុងឆ្នាំ ២០១៤៕

ប្រទេសឈីលី ៖ ស្ត្រីម្នាក់រស់នៅប្រទេសឈីលីបានសម្រាលកូនប្រុសម្នាក់ ឬគេហៅថា «ទារកយក្ស» ដែលមានទម្ងន់រហូតដល់៧,១គីឡូក្រាម និងកម្ពស់៥៧សង់ទីម៉ែត្រ ។ គេចាត់ទុកថា ទារកនេះជាទារកដំបូងគេដែលមានទម្ងន់ធ្ងន់បំផុតនៅឈីលី ជាប្រទេសមួយស្ថិតនៅអាមេរិកខាងត្បូង ។ ប៉ុន្តែគ្រូពេទ្យឱ្យដឹងថា ទារកអាចប្រឈមមុខនឹងជំងឺមួយចំនួន ។

ក្រុមគ្រួសារស្ត្រីខាងលើសប្បាយចិត្តខ្លាំងណាស់ ដោយសារទាំងម្តាយ និងកូនមានសុវត្ថិភាព ហើយគ្រូពេទ្យបានបញ្ជូនទារកទៅកាន់បន្ទប់សង្គ្រោះបន្ទាន់ (ICU) ។ រីឯស្ត្រីជាម្តាយកំពុងព្យាបាលខ្លួននៅក្នុងមន្ទីរពេទ្យ ។

អ្នកគ្រូពេទ្យឈ្មោះ ម៉ាសៀ វេណេកាស់ សូទីនរីផែត និយាយថា នេះអាចជាទារកមានមាឌធំដំបូងគេ ដែលនាងធ្លាប់បានឃើញប្រទេសឈីលី កត់ត្រា ។ កន្លងមក ប្រទេសឈីលីបានកត់ត្រាទារកមានទម្ងន់ធ្ងន់បំផុត គឺស្មើនឹង៦,៧គីឡូក្រាម ។ ប៉ុន្តែទារកនេះមានទម្ងន់រហូតដល់៧,១គីឡូក្រាមឯណោះ ។

ចំណែកលោក ឡុយ កនតេរ៉ាស់ ជាឪពុករបស់ទារកយក្ស ប្រាប់ថា ៖ «ទារកគួរតែមានមាឌតូចជាងនេះ ទើបត្រូវខ្នាតក្រណាត់ ឬសម្លៀកបំពាក់ទារកទើបនឹងកើត ។ ប៉ុន្តែសាច់ញាតិរបស់ខ្ញុំប្រាប់ថា មើលទៅកូនខ្ញុំវិញ គឺដូចក្មេងដែលមានអាយុ១ខួបអីចឹង» ។

ទារកយក្សនេះបានប្រសូត្រនៅថ្ងៃទី២៨ ខែធ្នូ ឆ្នាំ២០២៣ ក្នុងមន្ទីរពេទ្យមួយកន្លែងនៅទីក្រុងគូរ៉ានិឡាហ៊ូ ហើយត្រូវបានគ្រូពេទ្យបញ្ជូនទៅកាន់មន្ទីរពេទ្យមួយទៀតនៅទីក្រុងកនសេបស៊ីអន ដោយសារនៅទីនោះមានឧបករណ៍ពេទ្យគ្រប់គ្រាន់ ។ រីឯស្ត្រីជាម្តាយបានទទួលបានការព្យាបាលនៅមន្ទីរពេទ្យក្នុងទីក្រុងគូរ៉ានិឡាហ៊ូ ហើយនាងត្រៀមខ្លួនចេញពីមន្ទីរពេទ្យដើម្បីជួបមុខកូន ។

មន្ទីរពេទ្យបានចេញសេចក្តីថ្លែងការណ៍មួយថា ទារកនេះស្ថិតនៅក្រោមការថែទាំរបស់គ្រូពេទ្យក្នុងបន្ទប់សង្គ្រោះបន្ទាន់ ហើយទារកមានបញ្ហាសុខភាពបន្តិចបន្តួច ។ អ្នកគ្រូពេទ្យ ម៉ាសៀ វេណេកាស់ និយាយថា ទារកទើបនឹងកើតនេះមានខ្លួនធំណាស់ ហើយគេអាចប្រឈមនឹងជំងឺមានជាតិស្ករក្នុងសរសៃឈាម និងជំងឺផ្សេងទៀត ៕

នាព្រឹកថ្ងៃទី២ ខែមករា ឆ្នាំ២០២៤ មេដឹកនាំគណបក្សប្រជាធិបតេយ្យប្រឆាំងរបស់កូរ៉េខាងត្បូង លោក Lee Jae-myung ត្រូវបានគេចាក់ចំកញ្ចឹងក អំឡុងពេលទស្សនកិច្ចទៅកាន់ទីក្រុងកំពង់ផែ Busan។

បុរសជាជនសង្ស័យ ដែលបានវាយប្រហារទៅលើលោក Lee Jae-Myung មានវ័យចន្លោះពី៥០-៦០ឆ្នាំ ជាមនុស្សប្រុស ត្រូវបានឃាត់ខ្លួនភ្លាមៗនៅកន្លែងកើតហេតុ។បើតាមសក្សីបានឃើញហេតុការណ៍ បានឱ្យដឹងថា៖” បុរសជាជនសង្ស័យបើដើរមកបញ្ជ្រៀតចូល ដើម្បីសុំចូលទៅឈរនៅជិតលោក Lee Jae-Myung រួចក៏បានទារយកកាំបិតពីក្នុងហោប៉ៅ ធ្វើការចាក់ទៅលើលោក Lee Jae-Myung មួយកាំបិតចំក តែម្តង”។

ជុំវិញករណីនេះ អត្តសញ្ញាណជនសង្ស័យមិនត្រូវបានបង្ហាញឱ្យដឹងនោះ ហើយស្ថានភាពរបស់លោក Lee Jae-Myung ក៏មិនទាន់ដឹងច្បាស់ តើថាវាអាចប៉ះពាល់ដល់អាយុជីវិតឬក៏អត់នោះដែរ៕

បរទេស៖ ប្រទេសរុស្ស៊ី កូរ៉េខាងត្បូង និងកូរ៉េខាងជើង បានចេញសេចក្តីប្រកាសអាសន្នអំពីរលកយក្សស៊ូណាមិ បន្ទាប់ពីមានការរញ្ជួយដីនៅក្នុងប្រទេសជប៉ុន ដែលមានកម្រិត ៧.៥ រ៉ិចទ័រ ដោយស្នើឱ្យប្រជាជនរបស់ខ្លួនដែលនៅក្បែរតំបន់ព្រំដែនជប៉ុនជម្លៀសទៅកាន់កន្លែងមានសុវត្ថិភាព។

យោងតាមគេហទំព័រអន្តរជាតិ TRT World ដែលបានរាយការណ៍នៅថ្ងៃទី១ ខែមករាថា អាជ្ញាធររុស្ស៊ីនៅទីក្រុង Vladivostok បានប្រកាសអាសន្ន និងបានបញ្ជាឱ្យអ្នកនេសាទ «នៅឱ្យឆ្ងាយពីឆ្នេរសមុទ្រជាបន្ទាន់»។ ជាមួយគ្នានេះដែរ កូរ៉េខាងជើងក៏បានចេញការប្រកាសអាសន្នអំពីការកើនឡើងកម្ពស់ទឹកនៅឆ្នេរសមុទ្រភាគខាងកើតរបស់ខ្លួន ដោយនិយាយថា រលកយក្សស៊ូណាមិនឹងឡើងដល់កម្ពស់ ២.០៨ ម៉ែត្រ ដែលអាចបោកបក់ពាសពេញឆ្នេរសមុទ្ររបស់ប្រទេស។

រីឯប្រទេសកូរ៉េខាងត្បូងវិញ ក៏បានស្នើឱ្យប្រជាជនរបស់ខ្លួនជម្លៀសទៅកាន់កន្លែងដែលមានសុវត្ថិភាពយ៉ាងឆាប់រហ័ស ដោយសាររលកយក្សស៊ូណាមិអាចនឹងទៅកាន់ឆ្នេរសមុទ្រភាគខាងកើតរបស់កូរ៉េខាងត្បូង។
គួររំលឹកដែរថា កាលពីម្សិលមិញ “រលកយក្សស៊ូណាមិបានប៉ះពាល់ដល់តំបន់ជាច្រើននៅតាមបណ្តោយឆ្នេរសមុទ្រភាគខាងលិចនៃកោះ Sakhalin ដោយរលកខ្ពស់បំផុតអាចឈានដល់ ១.២ ម៉ែត្រ។ ចលនានេះត្រូវបានធ្វើឡើងបន្ទាប់ពីការរញ្ជួយដីកម្រិត ៧.៦ រ៉ិចទ័រ បានកើតឡើងនៅក្នុងតំបន់ Noto នៃខេត្ត Ishikawa របស់ប្រទេសជប៉ុន នៅម៉ោងប្រហែល ៤:១០ នាទីរសៀល។

ទោះជាយ៉ាងណាក៏ដោយ ថ្មីៗនេះទីភ្នាក់ងារឧតុនិយមជប៉ុន (JMA) បច្ចុប្បន្នក៏បានចេញការប្រកាសអាសន្នអំពីរលកយក្សស៊ូណាមិនៅក្នុងខេត្ត Ishikawa, Niigata, Toyama, Yamagata, Ishikawa, Fukui និងខេត្ត Hyogo ដោយជំរុញឱ្យប្រជាជនចាកចេញពីតំបន់ឆ្នេរឱ្យបានលឿន ដោយប្រមើលមើលថា រលកនេះអាចមានកម្ពស់ពី ៣-៥ ម៉ែត្រដែលនឹងធ្លាក់មកលើតំបន់ទាំងនេះ៕

ប្រទេសជប៉ុន ៖ កាលពីថ្ងៃទី១ ខែមករា ឆ្នាំ២០២៤ សារព័ត៌មានបរទេសបានរាយការណ៍ពីហេតុការណ៍គ្រោះរញ្ជួយដី ចាប់ពីកម្រិត៧.៤វិកទ័រ ទៅ៧.៦វិកទ័រ មានជម្រៅ១០គីឡូម៉ែត្រ ក្នុងតំបន់ Notojo ខេត្ត Ishikawa ស្ថិតនៅភាគកណ្តាលប្រទេសជប៉ុន ។ អាជ្ញាធរប្រចាំក្រុង Suzu នៃខេត្ត Ishikawa ឱ្យដឹងថា គ្រោះរញ្ជួយដីនេះបណ្តាលឱ្យអគារ, ផ្ទះសម្បែង និងបង្គោលភ្លើងជាច្រើនកន្លែងដួលរលំ ។

សារព័ត៌មានរាយការណ៍ថា មានរលកយក្សស៊ូណាមិ កម្ពស់ជាង១ម៉ែត្រនៅទីក្រុងវ៉ាជីម៉ាក់ ខេត្ត Ishikawa ។ ការត្រួតពិនិត្យអាកាសធាតុនៅតាមតំបន់ឆ្នេរសមុទ្រ និងកាមេរ៉ាសុវត្ថិភាពប្រចាំទីក្រុងស៊ូសុ អាចថតរូបភាពគ្រោះរញ្ជួយដីនៅបរិវេណឆ្នេរសមុទ្រ ព្រមទាំងរូបភាពការខូចខាតអគារ, ផ្ទះសម្បែង និងផ្លូវនៅបរិវេណក្បែរនោះផងដែរ ។

ចំណែកហាងលក់ទំនិញនៅទីក្រុងណាកាណុ ស្ថិតនៅភាគកណ្តាលប្រទេសជប៉ុន គេបានឃើញទំនិញផ្សេងៗក្នុងហាងធ្លាក់ចេញពីធ្នេរ ។ ដូចគ្នានេះ ហាងលក់ទំនិញនៅទីក្រុងខាណាសូវ៉ាក់ ខេត្តអ៊ីស៊ីកាវ៉ាក់ មានទំនិញជាច្រើនធ្នាក់រាយប៉ាយនៅលើឥដ្ឋ និងមានទឹកធ្លាក់ពីលើដំបូលទៀតផង ។

សារព័ត៌មាន NSK រាយការណ៍ថា រលកយក្សស៊ូណាមិនៅឆ្នេរសមុទ្រជប៉ុននឹងកើតឡើងជាញឹកញាប់ ហើយមានកម្ពស់ខ្ពស់ជាងមុន ។ ចំណែកពលរដ្ឋក្នុងតំបន់បាននាំគ្នាជម្លៀសចេញភ្លាមៗ ជាពិសេស អ្នករស់នៅខេត្តមីអ៊ីង៉ាតាក់ និងខេត្តថូយ៉ាម៉ាក់ ដែលរលកយក្សស៊ូណាមិអាចមានកម្ពស់រហូតដល់៣ម៉ែត្រ ។ អាជ្ញាធរបានសំណូមពរឱ្យពលរដ្ឋជម្លៀសទៅកាន់ទីកន្លែងខ្ពស់ និងទៅឱ្យឆ្ងាយពីឆ្នេរសមុទ្រ ។

ក្រុមហ៊ុនអគ្គិសនីជប៉ុនឱ្យដឹងថា ពួកគេបានត្រួតពិនិត្យភាពខុសប្រក្រតីនៅរោងចក្រថាមពលនុយក្លេអ៊ែរជាច្រើនកន្លែង ។ ដូចគ្នានេះ នាយករោងចក្រនុយក្លេអ៊ែរដ៏ធំបំផុតរបស់ជប៉ុនបញ្ជាក់ថា ពុំទាន់មានភាពខុសប្លែកក្នុងរោងចក្រនេះទេ ។

នាយករដ្ឋមន្ត្រីជប៉ុន លោក Fumio Kishida ថ្លែងថា រដ្ឋាភិបាលជប៉ុនបានបង្កើតមជ្ឈមណ្ឌលសង្គ្រោះពិសេសមួយ ដើម្បីប្រមូលផ្តុំព័ត៌មានពាក់ព័ន្ធនឹងគ្រោះរញ្ជួយដី និងរលកយក្សស៊ូណាមិ ។ មជ្ឈមណ្ឌលសង្គ្រោះពិសេសនេះអាចផ្តល់ដំណឹងទៅកាន់ពលរដ្ឋយ៉ាងឆាប់រហ័ស និងប្រាប់ឱ្យពលរដ្ឋរស់នៅក្នុងតំបន់រងគ្រោះជម្លៀសទៅកាន់កន្លែងមានសុវត្ថិភាព ។

រីឯអ្នកនាំពាក្យរដ្ឋាភិបាល លោក Yoshimasa Hayashi និយាយថា លោកពុំទាន់ទទួលបានរបាយការណ៍ពីបញ្ហាមិនប្រក្រតីណាមួយទេនៅរោងចក្រនុយក្លេអ៊ែរក្នុងតំបន់ ។ ប៉ុន្តែលោកបានស្នើទៅកាន់ស្ថាប័នពាក់ព័ន្ធឱ្យប្រុងប្រយ័ត្ន និងតាមដានស្ថានការណ៍នេះឱ្យដិតដល់ ។

ប្រព័ន្ធផ្សព្វផ្សាយអនឡាញបានបង្ហោះរូបភាព និងវីដេអូគ្រោះថ្នាក់ដោយសារគ្រោះរញ្ជួយដី ដូចជា អគារ, ផ្ទះសម្បែង និងផ្លូវជាច្រើនកន្លែងបានខូចខាតយ៉ាងធ្ងន់ធ្ងរ រួមទាំងដំបូលហាងលក់ទំនិញមួយចំនួនបានធ្លាក់ខ្ចាត់ខ្ចាយ ៕