បរទេស៖ ក្រុមហ៊ុន Apple បានទាក់ទងទៅក្រុមហ៊ុន Samsung Display ដើម្បីឱ្យជួយផលិតអេក្រង់ដែលអាចបត់បានសម្រាប់ iPhone,iPad និង MacBook របស់ខ្លួន។

យោងតាមប្រភពព័ត៌មាន iDrop News ដែលបានរាយការណ៍នៅថ្ងៃទី១២ ខែធ្នូថា Samsung Display បានកំពុងពង្រឹងមុខងាររអាជីវកម្មរបស់ខ្លួន ដោយផ្តោតលើសមត្ថភាពក្នុងការបំពេញតម្រូវការអេក្រង់ដែលអាចបត់បែនបានសម្រាប់ Apple ។ ក្រុមហ៊ុននេះក៏កំពុងត្រូវបានផ្តល់អាទិភាពក្នុងការជួយឧបករណ៍ដែលអាចបត់បានក្លាយជាការពេញនិយមនាពេលអនាគត។ ប្រាក់ចំណូល និងប្រាក់ចំណេញរបស់ក្រុមហ៊ុន Samsung Display នៅក្នុងវិស័យស្មាតហ្វូនភាគច្រើនស្ថិតនៅក្នុងផ្នែកអេក្រង់ OLED។ ក្រៅពីផលិតផលកំពូល Galaxy ទូរស័ព្ទ iPhone ក៏ជាប្រភពចំណូលដ៏សំខាន់របស់ក្រុមហ៊ុននេះផងដែរ។

បច្ចុប្បន្ន Samsung Display កំពុងឈានមុខគេនៅលើទីផ្សារអេក្រង់ដែលអាចបត់បានដោយការផ្តល់ជូនផ្តាច់មុខនូវបន្ទះ Galaxy Z Fold និង Z Flip ចាប់តាំងពីឆ្នាំ ២០១៩។ ការរៀបចំរចនាសម្ព័ន្ធនេះគឺមានគោលបំណង ដើម្បីការពារដៃគូប្រកួតប្រជែងពីការកាន់កាប់ទីផ្សារ។ សម្រាប់ LG Display វិញក៏ត្រូវបានគេនិយាយថានឹងចូលរួមក្នុងគម្រោងដែលទាក់ទងនឹងអេក្រង់បត់របស់ Apple រួមទាំងបន្ទះទំហំ 20.25 អ៊ីងផងដែរ។

យោងតាម Apple Insider បានឱ្យដឹងទៀតថា បច្ចុប្បន្ន Apple កំពុងអភិវឌ្ឍយ៉ាងស្ងៀមស្ងាត់ជាមួយ “iPhone Fold” ដែលមានអេក្រង់អាចបត់បានពាក់កណ្តាល ដោយដៃគូ Apple មួយចំនួននៅក្នុងប្រទេសកូរ៉េ អាចនឹងទទួលការកុម្ម៉ង់ក្នុងពេលឆាប់ៗនេះ ដើម្បីផលិតគ្រឿងបន្លាស់ដែលពាក់ព័ន្ធ។

ទោះបីជា iPhone ដែលអាចបត់បានទទួលបានការចាប់អារម្មណ៍ច្រើនពីសាធារណជនក៏ដោយ ក៏ក្រុមហ៊ុន Apple គ្រោងនឹងនាំយកអេក្រង់ដែលអាចបត់បានទៅកាន់ iPad និង MacBook Pro ជាមុនសិន ដែលរំពឹងថានឹងបង្ហាញខ្លួននៅក្នុងឆ្នាំ ២០២៤ ឬ ២០២៥។

យោងតាមអ្នកជំនាញបាននិយាយទៀតថា បន្ទាប់ពីបញ្ចេញ Galaxy Fold ជំនាន់ទី ៥ Samsung Display មានបទពិសោធន៍ច្រើនក្នុងការផលិតឧបករណ៍ដែលអាចបត់បាន។ កំណែទម្រង់នេះបង្ហាញថាក្រុមហ៊ុនកំពុងផ្តល់អាទិភាពដល់ការអភិវឌ្ឍន៍បច្ចេកវិទ្យាថ្មី ដោយធានាថាវាអាចបម្រើតម្រូវការអតិថិជន និងរក្សាបាននូវតំណែងឈានមុខគេនៅក្នុងទីផ្សាររបស់ពិភពលោក៕

ប្រទេសថៃ ៖ បើតាមវីដេអូថតដោយកាមេរ៉ាសុវត្ថិភាព កាលពីថ្ងៃទី១១ ខែធ្នូ ឆ្នាំ២០២៣ នៅក្បែរតារាងបាល់ទាត់ «យ៉ាតធៀម» ក្នុងស្រុកឡាំលូកា ខេត្តប៉ាធុមថានី ប្រទេសថៃ បង្ហាញថា ពីដំបូង គេបានឮសូរសំឡេងអ្នកគាំទ្របាល់ទាត់ស្រែកគាំទ្រយ៉ាងសប្បាយរីករាយ ប៉ុន្តែមួយសន្ទុះក្រោយមក ស្រាប់តែឮសំឡេងកាំភ្លើ.ងចំនួន៥គ្រាប់ ។ ហេតុការណ៍នេះបានធ្វើឱ្យមនុស្សម្នានៅទីនោះភ័យខ្លាច និងជ្រួលច្របល់យ៉ាងខ្លាំង ។

បើតាមអ្នកទៅមើលការប្រកួតបាត់ទាត់ប្រាប់ថា មុនដំបូង ពួកគេមានជម្លោះពាក្យសម្តីជាមួយគ្នា បន្ទាប់មក ជនល្មើសបានយកកាំភ្លើ.ងមកបាញ់គំរាមគូជម្លោះតែម្តង ។ សំណាងល្អ ហេតុការណ៍នេះគ្មានអ្នកម្នាក់រងរបួស ឬមានគ្រោះថ្នាក់ដល់ជីវិតទេ ។

ជនល្មើសបង្កហេតុក្នុងតារាងបាល់ទាត់ ឈ្មោះ ឌួង ភេទប្រុស អាយុ២១ឆ្នាំ ជនជាតិខ្មែរ ត្រូវបានសមត្ថកិច្ចថៃចាប់ខ្លួននៅចំណុចព្រំដែនបានឡែម ខេត្តចាន់ថៈបុរី ខណៈរូបគេបម្រុងរត់គេចខ្លួនទៅប្រទេសកម្ពុជា ។ ជនល្មើសសារភាពថា ខ្លួនបានបោះចោលកាំភ្លើ.ងបង្កហេតុនៅស្ពាន «ឌែងប៉ាកខ្លងរាំងស៊ីត» បន្ទាប់មក ខ្លួនបានជិះរថយន្តសំដៅទៅព្រំដែនបានឡែម ខេត្តចាន់ថៈបុរី បម្រុងរត់គេចខ្លួនទៅប្រទេសកម្ពុជា ។

ជនល្មើសសារភាពទៀតថា ខ្លួនជាមនុស្សតែម្នាក់គត់ ដែលបានបង្កហេតុក្នុងតារាងបាល់ទាត់នេះ ដោយសារខ្លួនមានជម្លោះជាមួយភាគីម្ខាងទៀត ហើយជម្លោះនេះមិនពាក់ព័ន្ធនឹងការប្រកួតបាល់ទាត់ទេ ។ រីឯកាំភ្លើ.ងបង្កហេតុ គឺខ្លួនបានទិញតាមអនឡាញ ក្នុងតម្លៃ៤ពាន់បាត ។

ក្រោយមក ក្រុមការងារសារព័ត៌មាន Thairath បានធ្វើដំណើរទៅកាន់ទៅផ្សារ «ស៊ីមុំមឿង ប៉ាធុមថានី» ជាកន្លែងធ្វើការរបស់ជនល្មើស ហើយខាងសារព័ត៌មាន Thairath ក៏បានជជែកជាមួយអតីតអ្នកគ្រងគ្រងជនល្មើសឱ្យដឹងថា ជនល្មើសមានក្រុមប្រមាណ១០០នាក់ ឈ្មោះថា «ក្រុម BK គុនខ្មែរ» ហើយសមាជិកក្រុមនេះបានសាក់សញ្ញាសម្គាល់នៅត្រង់ដៃ និងក ព្រមទាំងមានសម្លៀកបំពាក់ប្រចាំក្រុមទៀតផង ។ លើសពីនេះ ជនល្មើសចូលចិត្តធ្វើខ្លួនជាក្មេងស្ទាវ និងរករឿងអ្នកដទៃដោយគ្មានហេតុផល ។=

អតីតអ្នកគ្រងគ្រងជនល្មើស ក៏បាននាំក្រុមការងារសារព័ត៌មាន Thairath ទៅមើលបន្ទប់ជួលរបស់ជនល្មើស ហើយបានសាកសួរអ្នករស់នៅក្បែរនោះប្រាប់ថា ជននេះមានទំនាស់ជាមួយគេឯងគ្រប់គ្នា និងវាយតប់ទៀតផង ។ ក្រោយពីជនល្មើសបានបា.ញ់នៅតារាងបាល់ទាត់ គេបានឃើញជនល្មើសមកប្រមូលសម្ភារៈនៅបន្ទប់ជួល និងរត់គេចខ្លួន ។

ចំណែកគូជម្លោះជាមួយជនល្មើស ប្រាប់សមត្ថកិច្ចថា ខ្លួនសប្បាយចិត្តណាស់ ដែលសមត្ថកិច្ចចាប់ខ្លួនជនល្មើសបាន ។ ជនល្មើសបានបង្ករឿងរ៉ាវច្រើនណាស់ ហើយជននេះធ្លាប់ដេញកាប់ក្បាលមិត្តភក្តិរបស់ខ្លួនទៀតផងកាលពីពេលកន្លងមក ។ នៅថ្ងៃកើតហេតុ ជនល្មើសបានមកតារាងបាល់ទាត់ជាមួយបក្ខពួក៦នាក់ទៀត ហើយពេលចូលបន្ទប់ទឹក ជនល្មើសសួរថា «មើលអី?» ខ្លួនក៏ឆ្លើយថា «មើលមិនបានទេឬ?» ហើយភាគីទាំងពីរក៏ចាប់ផ្តើមមានជម្លោះពាក្យសម្តីគ្នា ។ ចុងក្រោយ ជនល្មើសក៏បានបា.ញ់កាំភ្លើ.ងឡើងលើជាច្រើនគ្រាប់ ។ គូជម្លោះបន្តថា ខ្លួនមិនបានណាត់គ្នាជាមួយជនល្មើសនៅតារាងបាល់ទាត់ទេ ប៉ុន្តែវាជាការជួបគ្នាដោយចៃដន្យ ។

រីឯអ្នកគ្រប់គ្រងនៅតារាងបាល់ទាត់បានទៅដាក់ពាក្យបណ្តឹងជនល្មើសនៅស្ថានីយប៉ូលិស ហើយជំហានដំបូង សមត្ថកិច្ចបានសាកសួរពីទ្រព្យសម្បត្តិមួយចំនួនដែលខូចខាត ។ ចំណែកតារាងបាល់ទាត់ត្រូវបិទទ្វារហាមចូលលេងបាល់ទាត់ ចំនួន១ថ្ងៃ ។ សមត្ថកិច្ចឱ្យដឹងថា ជនល្មើសឈ្មោះ ឌួង មិនត្រឹមតែជាប់ពន្ធនាគារទេ តែត្រូវសងប្រាក់ថ្លៃខូចខាតទៅតារាងបាល់ទាត់ផងដែរ ។

សមត្ថកិច្ចចោទប្រកាន់ថា ជនល្មើសបានបាញ់កាភ្លើ.ងនៅទីសាធារណៈ ហើយសមត្ថកិច្ចនឹងតាមចាប់បក្ខពួកផ្សេងទៀតដើម្បីចាត់ការតាមផ្លូវច្បាប់ បើទោះជាជនល្មើសសារភាពថា ខ្លួនបានបង្កហេតុតែម្នាក់ឯងក្តី ។ តាមរយៈការត្រួតពិនិត្យបង្ហាញថា ជនល្មើសបានស្នាក់នៅប្រទេសថៃ លើសថ្ងៃដែលថៃអនុញ្ញាត (Over Stay) តាំងពីខែកុម្ភៈ ឆ្នាំ២០២៣ មកម្ល៉េះ ៕ ប្រភព ៖ Thairath

ប្រទេសថៃ ៖ គណៈរដ្ឋមន្ត្រីថៃមានគម្រោងលើកលែងទិដ្ឋាការដល់វិនិយោគិនជប៉ុន ដោយពួកគេអាចស្នាក់នៅប្រទេសថៃបានរយៈពេល៣០ថ្ងៃ ហើយប្រទេសថៃនឹងចាប់ផ្តើមអនុវត្តគម្រោងនេះ ចាប់ពីថ្ងៃទី១ ខែមករា ឆ្នាំ២០២៤ រហូតដល់ថ្ងៃទី៣១ ខែធ្នូ ឆ្នាំ២០២៦ ។ ការលើកលែងទិដ្ឋាការដល់វិនិយោគិនជប៉ុន ក្នុងគោលបំណងផ្តល់ភាពងាយស្រួលក្នុងការចរចាអាជីវកម្ម និងការធ្វើកិច្ចសន្យាវិនិយោគនៅប្រទេសថៃ ខណៈជប៉ុនជាវិនិយោគិនលំដាប់ទី១ របស់ថៃអស់រយៈពេលយូរឆ្នាំមកហើយ ។

លោក Karom Phonphonklang អ្នកនាំពាក្យរងប្រចាំការិយាល័យនាយករដ្ឋមន្ត្រីថៃ បានលើកឡើងថា ក្នុងកិច្ចប្រជុំគណៈរដ្ឋមន្ត្រី នៅថ្ងៃទី១២ ខែធ្នូ ឆ្នាំ២០២៣ បានអនុម័តគម្រោងលើកលែងទិដ្ឋាការសម្រាប់វិនិយោគិនជប៉ុន តាមការស្នើសុំរបស់ក្រសួងការបរទេស ។

គម្រោងលើកលែងទិដ្ឋាការសម្រាប់វិនិយោគិនជប៉ុន ដើម្បីឱ្យពួកគេអាចស្នាក់នៅប្រទេសថៃរយៈពេល៣០ថ្ងៃ ដោយពុំចាំបាច់ស្នើសុំទិដ្ឋាការធ្វើដំណើរចូលមកប្រទេសថៃទេ ខណៈកន្លងមក ប្រទេសថៃបានលើកលែងទិដ្ឋាការដល់ភ្ញៀវទេសចរជប៉ុនតែប៉ុណ្ណោះ ។ គម្រោងលើកលែងទិដ្ឋាការនេះ នឹងអនុវត្តចាប់ពីថ្ងៃទី១ ខែមករា ឆ្នាំ២០២៤ រហូតដល់ថ្ងៃទី៣១ ខែធ្នូ ឆ្នាំ២០២៦ ។

លោក Karom Phonphonklang អ្នកនាំពាក្យរងប្រចាំការិយាល័យនាយករដ្ឋមន្ត្រីថៃ បន្តថា គម្រោងនេះនឹងជួយផ្តល់ភាពងាយស្រួលដល់បណ្តាវិនិយោគិនជប៉ុន ដែលជាវិនិយោគិនលំដាប់ទី១ នៅប្រទេសថៃអស់រយៈពេលយូរឆ្នាំមកហើយ ។ លើសពីនេះ ប្រទេសជប៉ុន គឺជាដៃគូពាណិជ្ជកម្មលំដាប់ទី៣ របស់ថៃផងដែរ ដែលថៃចាត់ទុកថា ជប៉ុនជាអ្នកជំនួញដ៏សំខាន់បំផុតសម្រាប់សេដ្ឋកិច្ចថៃ ។

រីឯលោក Chai Watcharong អ្នកនាំពាក្យប្រចាំការិយាល័យនាយករដ្ឋមន្ត្រីថៃឱ្យដឹងដែរថា ជាធម្មតា វិនិយោគិនជប៉ុនបានធ្វើដំណើរមកប្រទេសថៃ ដើម្បីចរចាពីការវិនិយោគទុន និងការធ្វើកិច្ចសន្យាជាច្រើន ។ ការលើកលែងទិដ្ឋាការនេះ នឹងជួយឱ្យពួកគេអាចធ្វើដំណើរមកកាន់ប្រទេសថៃកាន់តែងាយស្រួល ។ ចំណែកវិនិយោគិន និងភ្ញៀវទេសចរថៃ ក៏អាចធ្វើដំណើរទៅកាន់ប្រទេសជប៉ុន តាមវិធានការស្រដៀងគ្នានេះដែរ ៕ ប្រភព ៖ Bangkok biznews

បរទេស៖ ទីភ្នាក់ងារអង្គការសហប្រជាជាតិ (UNODC ) បាននិយាយថា បច្ចុប្បន្នមីយ៉ាន់ម៉ាក្លាយជាប្រទេសដែលផលិតអាភៀនដ៏ធំបំផុតរបស់ពិភពលោក បន្ទាប់ពីផលិតកម្មនៅក្នុងប្រទេសអាហ្វហ្គានីស្ថានបានធ្លាក់ចុះដោយសារតែការហាមឃាត់របស់ពួកតាលីបង់។

យោងតាមប្រភពព័ត៌មាន ABC News ដែលបានចុះផ្សាយនៅថ្ងៃទី១២ ខែធ្នូថ្មីៗនេះថា ប្រទេសមីយ៉ាន់ម៉ាផលិតអាភៀនបាន ១០៨០ តោនក្នុងឆ្នាំ ២០២២-២០២៣ ពោលគឺច្រើនជាងប្រទេសអាហ្វហ្គានីស្ថានបីដងក្នុងរយៈពេលដូចគ្នានេះ។

បើតាមការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម (UNODC) ក៏បានឱ្យដឹងទៀតថា ការដាំដុះអាភៀននៅអាហ្វហ្គានីស្ថានបច្ចុប្បន្នបានថយចុះ ៩៥% បន្ទាប់ពីរដ្ឋាភិបាលតាលីបង់ដាក់បម្រាមគ្រឿងញៀន។ ដូច្នេះ ការផ្គត់ផ្គង់អាភៀនសកលបានផ្លាស់ប្តូរទៅកាន់ប្រទេសមីយ៉ាន់ម៉ា ដែលជាប្រទេសប្រឈមនឹងភាពមិនច្បាស់លាស់ជាច្រើនបន្ទាប់ពីរដ្ឋប្រហារឆ្នាំ ២០២១។

សព្វថ្ងៃនេះ ប្រាក់ចំណូលរបស់អ្នកដាំអាភៀនមីយ៉ាន់ម៉ាបានកើនឡើង ៧៥% នៅពេលដែលតម្លៃទំនិញនេះកើនឡើងដល់ ៣៥៥ ដុល្លារ/គីឡូក្រាម។ UNODC បាននិយាយថា តំបន់ដែលស្ថិតនៅក្រោមការដាំដុះអាភៀនបានកើនឡើង ១៨% ធៀបនឹងរយៈពេលដូចគ្នាកាលពីឆ្នាំមុន ពី ៤០,១០០ ទៅ ៤៧,០០០ ហិកតា ដែលជំរុញឱ្យផលិតភាពដល់កម្រិតខ្ពស់បំផុតចាប់តាំងពីឆ្នាំ ២០០១។

លោក Jeremy Douglas អ្នកតំណាងប្រចាំតំបន់របស់ UNODC បាននិយាយថា អស្ថិរភាពបន្ទាប់ពីរដ្ឋប្រហារយោធានៅក្នុងប្រទេសមីយ៉ាន់ម៉ា បានជំរុញឱ្យកសិករនៅតំបន់ដាច់ស្រយាលដាំអាភៀនដើម្បីចិញ្ចឹមជីវិត។ នេះបើយោងតាមរបាយការណ៍របស់អង្គការសហប្រជាជាតិបាននិយាយទៀតថា តំបន់ដែលកំពុងដាំអាភៀនបានកើនឡើងច្រើនជាងគេនៅតំបន់ព្រំដែនភាគខាងជើងនៃប្រទេសមីយ៉ាន់ម៉ា រួមមានរដ្ឋ Shan រដ្ឋ Chin និង Kachin ហើយផលិតភាពក៏កើនឡើងផងដែរ។

លោក Douglas ក៏បានព្រមានដែរថា ការបង្កើនការប្រយុទ្ធគ្នារវាងយោធាមីយ៉ាន់ម៉ា និងក្រុមឧទ្ទាមអាចជំរុញឱ្យមានការដាំដុះអាភៀនកាន់តែច្រើនឡើង។ ហេតុនេះហើយ ការពង្រីកការដាំដុះអាភៀនអាចជំរុញការផលិត និងការជួញដូរគ្រឿងញៀន ការលាងលុយកខ្វក់ និងការក្លែងបន្លំតាមអ៊ីនធឺណិតជាដើម។ ទោះជាយ៉ាងណាក៏ដោយ រដ្ឋាភិបាលមីយ៉ាន់ម៉ាមិនបានធ្វើអត្ថាធិប្បាយលើរបាយការណ៍របស់អង្គការសហប្រជាជាតិនោះទេ៕

ប្រទេសអូស្ត្រាលី ៖ កាលពីថ្ងៃទី១១ ខែធ្នូ ឆ្នាំ២០២៣ មានការបង្ហោះវីដេអូមួយក្នុងប្រព័ន្ធផ្សព្វផ្សាយអូស្ត្រាលី ដោយក្នុងវីដេអូនេះបានបង្ហាញពីត្រីបាឡែនដ៏ធំ១ក្បាលត្រូវបានគេប្រទះឃើញនៅបរិវេណឆ្នេរសមុទ្រ «Port Beach» ស្ថិតក្នុងទីក្រុង Perth ប្រទេសអូស្ត្រាលី ។ ភ្ញៀវទេសចរដែលបានឃើញត្រីបាឡែន ក៏នាំគ្នាហែលទឹកទៅប៉ះវា ខណៈមនុស្សផ្សេងទៀតបង្ហាញក្តីបារម្ភ ។

វីដេអូដែលថតបង្ហោះនេះមិនបានកើតឡើងជាញឹកញាប់ទេ នៅពេលមានត្រីបាឡែនយ៉ាងធំ១ក្បាលបានហែលមកកាន់តំបន់ទឹករាក់ ។ ភ្ញៀវទេសចរប្រមាណជាង១០នាក់ដែលបានទៅកម្សាន្តនៅឆ្នេរសមុទ្រ Port Beach បានហែលទឹកទៅរកត្រីបាឡែនដើម្បីប៉ះខ្លួនវា ។ គេបានថតវីដេអូនេះ កាលពីថ្ងៃទី៩ ខែធ្នូ ឆ្នាំ២០២៣ ។

សារព័ត៌មានអូស្ត្រាលីរាយការណ៍ថា ត្រីបាឡែន១ក្បាលនេះបានហែលទឹកទៅរកតំបន់ទឹកជ្រៅ ក្រោយពីវាបានហែលមកកាន់ទឹករាក់ប្រមាណជា១ម៉ោង ។ ចំណែកអ្នកស្រុកមួយចំនួនដែលបានឃើញហេតុការណ៍នេះបានបង្ហាញក្តីបារម្ភអំពីសុខភាព និងសុវត្ថិភាពត្រីបាឡែន ដោយសារតែវាហែលមកកៀកឆ្នេរសមុទ្រខុសធម្មតា ។

រីឯអ្នកវិទ្យាសាស្ត្រផ្នែកសមុទ្របាននិយាយមកកាន់សារព័ត៌មាន BBC ថា សត្វចិញ្ចឹមកូនដោយទឹកដោះនេះ អាចភ្ញាក់ផ្អើលនឹងវត្តមានរបស់មនុស្សម្នា ហើយទង្វើនេះចាត់ទុកថា គឺជាទង្វើខុសប្រក្រតី និងមានគ្រោះថ្នាក់ដល់សត្វ ។ អ្នកវិទ្យាសាស្ត្ររូបនេះបន្តថា អ្នកហែលទឹកទៅក្បែរត្រីបាឡែន នឹងធ្វើឱ្យវាភ្ញាក់ផ្អើល ហើយរឿងល្អបំផុតដែលពួកគេគួរធ្វើនៅក្នុងស្ថានភាពបែបនេះ គឺបណ្តោយឱ្យវាហែលទឹកតាមចិត្តរបស់វា ។

ចុងក្រោយ សារព័ត៌មានអូស្ត្រាលីរាយការណ៍ថា ត្រីបាឡែនដែលមានប្រវែង១៥ម៉ែត្រនេះបានងា.ប់ហើយ នៅថ្ងៃទី១២ ខែធ្នូ ឆ្នាំ២០២៣ ។ គេគិតថា មូលហេតុដែលវាហែលមកក្បែរឆ្នេរសមុទ្រ ដោយសារវាត្រូវបាននាវាបុក ហើយអាជ្ញាធរក៏បានបិទឆ្នេរសមុទ្រនេះ ដើម្បីបម្លាស់ទីខ្មោចត្រីបាឡែនចេញពីឆ្នេរសមុទ្រ ។ អាជ្ញាធរបញ្ជាក់ថា នឹងរកមូលហេតុនៃការងា.ប់របស់វាឱ្យឃើញ ៕ ប្រភព ៖ TNN World

ក្នុងឱកាសប្រារព្ធខួបលើកទី ២៥ នៃវត្តមានរបស់ Google ដែលជាគេហទំព័រធំបំផុតរបស់ពិភពលោក Google បានបង្ហោះវីដេអូមួយដែលបង្ហាញពីនិន្នាការសកលលោកដែលគួរឱ្យកត់សម្គាល់បំផុតគ្រប់ពេលវេលា ដោយផ្តល់នូវទស្សនវិស័យពិសេសលើចំណាប់អារម្មណ៍ និងកង្វល់របស់មនុស្សក្នុងរយៈពេលជាច្រើនឆ្នាំមកនេះ។

ក្នុងវីដេអូនោះដែរក្រុម BLACKPINK តំណាងកូរ៉េខាងត្បូង និង K-pop បានក្លាយជាក្រុមចម្រៀងនារីដែលមានការស្វែងរកច្រើនបំផុតក្នុងប្រវត្តិសាស្ត្រនៃវេទិកានេះ។ សមិទ្ធិផលដ៏សំខាន់នេះគឺបង្ហាញពីភាពអស្ចារ្យណាស់របស់ក្រុមចម្រៀង BLACKPINK ដែលបង្កើតឡើងនៅខែសីហា ឆ្នាំ២០១៦ ហើយក្នុងរយៈពេល២-៣ឆ្នាំក្រោយមក ពួកគេបានគ្រប់គ្រងលើវិស័យ K-pop ដែលមានមនុស្សជាច្រើនស្គាល់ដល់សព្វថ្ងៃនេះ។

BLACKPINK បានបន្តជាចំណងជើងគ្រប់គ្រងលើប្រព័ន្ធផ្សព្វផ្សាយនានព្រមទាំងបង្កើតសមិទ្ធិជាច្រើននៅក្នុងវិស័យតន្រី្តផ្នែកផ្សេងៗដូចជាការលក់អាល់ប៊ុម ការប្រគំតន្រ្តីដំណើរទេសចរណ៍ជុំវិញពិភពលោក ខណៈបានក្លាយជាក្រុមចម្រៀងនារីដែលមានការស្វែងរកច្រើនជាងគេទៀតនៅលើ Google ក្នុងរយៈពេលច្រើនឆ្នាំមកនេះ។

ជាមួយជោគជ័យនេះ ក្រុម BLACKPINK ទើបតែជាប់ក្នុងបញ្ជីកំពូលអ្នកបង្ហាញម៉ូតឆ្នើមប្រចាំឆ្នាំ២០២៣ ខណៈបានក្លាយជាតារាK-Popដំបូងក្នុងប្រវត្តិសាស្រ្តដែលទទួលបានមេដាយកិត្តិយសពីស្តេចអង់គ្លេស។

មិនត្រឹមតែសាងភាពល្បីល្បាញជុំវិញពិភពលោកប៉ុណ្ណោះទេ តែសមាជិកទាំង៤ រួមមាន Jisoo, Jennie Rosé និង Lisa សុទ្ធតែបង្កើតឥទ្ធិពលរៀងៗខ្លួនជាអ្នកតំណាងផលិតផលធំៗលំដាប់ពិភពលោក ហើយក្រុមទាំងមូលបានសាងភាពអស្ចារ្យបំបែកប្រវត្តិសាស្រ្តក្នុងវិស័យតន្រ្តីជាច្រើនរាប់មិនអស់៕