ប្រទេសថៃ ៖ កាលពីថ្ងៃទី១៧ ខែធ្នូ ឆ្នាំ២០២៣ សារព័ត៌មានថៃរាយការណ៍ថា សមត្ថកិច្ចថៃបានចាប់ខ្លួនពលករមីយ៉ាន់ម៉ាលួចចូលមកប្រទេសថៃដោយខុសច្បាប់ បើទោះជាពួកគេលាក់ខ្លួនក្នុងឡាំងផ្លែឈើក្តី ក៏គេចមិនផុតពីការត្រួតពិនិត្យរបស់សមត្ថកិច្ចដែរ ។

សារព័ត៌មានថៃរាយការណ៍បន្តថា ក្រុមទាហានឈុតខ្មៅថៃ ព្រមទាំងភ្នាក់ងារពាក់ព័ន្ធបានដាក់ប៉ុស្តិ៍ត្រួតពិនិត្យនៅចំណុចព្រំដែនផាឡាក់ ដែលស្ថិតក្នុងភូមិទី៣ ឃុំខាក់ណេជឺ ស្រុកម៉ែរ៉ាណាត ខេត្តតាក ដើម្បីត្រួតពិនិត្យមើលការដឹកជញ្ជូនទំនិញខុសច្បាប់គ្រប់ប្រភេទ ។ ក្នុងអំឡុងពេលនោះ ស្រាប់តែប្រទះឃើញមានរថយន្តដឹកទំនិញ១គ្រឿងបើកឆ្លងកាត់ប៉ុស្តិ៍ត្រួតពិនិត្យនៅចំណុចព្រំដែនផាឡាក់ ។

ពេលនោះ ក្រុមទាហានឈុតខ្មៅថៃបានបញ្ជាឱ្យរថយន្តនេះឈប់ដើម្បីត្រួតពិនិត្យ ។ សមត្ថកិច្ចប្រទះឃើញថា អ្នកបើកបររថយន្តនេះជាស្ត្រី អាយុ២៧ឆ្នាំ ហើយនាងបាននិយាយមកកាន់សមត្ថកិច្ចដោយស្នាមញញឹម និងពាក្យសម្តីផ្អែមល្ហែមផ្សេងៗ ដើម្បីកុំឱ្យសមត្ថកិច្ចចាប់អារម្មណ៍លើទំនិញក្នុងរថយន្ត ។ ប៉ុន្តែសមត្ថកិច្ចមិនបានជឿតាមពាក្យសម្តីរបស់នាងទេ ហើយក៏បានត្រួតពិនិត្យទំនិញក្នុងរថយន្តយ៉ាងលម្អិត ។

ក្នុងអំឡុងពេលសមត្ថកិច្ចកំពុងតែរើអីវ៉ាន់ក្នុងរថយន្តនោះ ស្រាប់តែប្រទះឃើញភាពមិនប្រក្រតី គឺឡាំងដាក់ផ្លែឈើអាចកម្រើកដោយខ្លួនឯងបាន ។ ភ្លាមនោះ សមត្ថកិច្ចក៏ប្រញាប់ពិនិត្យក្នុងឡាំងផ្លែឈើ ហើយបានឃើញពលករមីយ៉ាន់ម៉ាខុសច្បាប់ ក្នុងនោះមានបុរស៣នាក់ និងស្ត្រី៤នាក់ ។ ពួកគេទាំងអស់បានសម្ងំលាក់ខ្លួននៅក្នុងឡាំងផ្លែឈើទាំងនេះ និងគិតថា សមត្ថកិច្ចមិនចាប់អារម្មណ៍ ។

បន្ទាប់មក សមត្ថកិច្ចក៏បានឃាត់ខ្លួនជនសង្ស័យ និងពលករខុសច្បាប់ទាំងអស់បញ្ជូនទៅកាន់ស្ថានីយប៉ូលិសប្រចាំស្រុកម៉ែរ៉ាណាត ខេត្តតាក ដើម្បីចាត់វិធានការតាមផ្លូវច្បាប់បន្តទៀត ៕ ប្រភព ៖ Mono News

នាយករដ្ឋមន្ត្រីរបស់ប្រទេសកម្ពុជា ឡាវ និងវៀតណាម បានព្រមព្រៀងគ្នាបង្កើនកិច្ចសហប្រតិបត្តិការលើវិស័យសន្តិសុខ និងការពារជាតិ ព្រមទាំងតភ្ជាប់ហេដ្ឋារចនាសម្ព័ន្ធរឹង និងទន់ ដើម្បីជំរុញពាណិជ្ជកម្ម។

នៅថ្ងៃទី១៧ ខែធ្នូ ឆ្នាំ២០២៣ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃប្រទេសកម្ពុជា បានជួបសន្ទនាជាមួយនាយករដ្ឋមន្ត្រីវៀតណាម Pham Minh Chinh និងនាយករដ្ឋមន្ត្រីរបស់ប្រទេសឡាវលោក Sonexay Siphandone អំឡុងពេលទទួលទានអាហារពេលព្រឹកនៅទីក្រុងតូក្យូ មុនពេលចូលរួមកិច្ចប្រជុំកំពូលអាស៊ាន-ជប៉ុន លើកទី៥០ ដោយវាយតម្លៃលើការបន្តទំនាក់ទំនងមិត្តភាព និងកិច្ចសហប្រតិបត្តិការរវាងប្រទេសទាំងបីបានបង្រួបបង្រួម និងអភិវឌ្ឍន៍លើវិស័យជាច្រើន។

ទាក់ទងនឹងពាណិជ្ជកម្ម នាយករដ្ឋមន្ត្រីទាំងបីបានឯកភាពថា កម្ពុជា ឡាវ វៀតណាម នឹងបង្កើនការតភ្ជាប់សេដ្ឋកិច្ច រួមទាំងហេដ្ឋារចនាសម្ព័ន្ធរឹង និងទន់ រួមគ្នាកសាងសេដ្ឋកិច្ចឯករាជ្យ ពឹងផ្អែកលើខ្លួនឯង ធ្វើសមាហរណកម្មយ៉ាងស៊ីជម្រៅលើឆាកអន្តរជាតិ និងប្រកបដោយប្រសិទ្ធភាព។ ដូច្នេះ ប្រទេសនានានឹងដាក់ចេញនូវគោលនយោបាយអំណោយផលបន្ថែមទៀត ដើម្បីអភិវឌ្ឍពាណិជ្ជកម្មតាមព្រំដែន និងប្រព័ន្ធច្រកទ្វារព្រំដែនគោក។

ប្រទេសទាំងបីក៏នឹងពង្រឹងកិច្ចសហប្រតិបត្តិការសន្តិសុខ និងការពារជាតិ សម្របសម្រួលយ៉ាងជិតស្និទ្ធដើម្បីការពារសន្តិសុខតាមព្រំដែន ទប់ស្កាត់ឧក្រិដ្ឋកម្មឆ្លងដែន ដូចជាការជួញដូរគ្រឿងញៀន ការលាងលុយកខ្វក់ ការជួញដូរមនុស្ស និងរួមគ្នាកសាងព្រំដែនសន្តិភាព ស្ថិរភាព និងការអភិវឌ្ឍន៍។ លើសពីនេះ នាយករដ្ឋមន្ត្រីទាំងបីក៏បានឯកភាពគ្នាក្នុងការសម្របសម្រួលដើម្បីរក្សាសាមគ្គីភាព ជំហរ និងតួនាទីកណ្តាលរបស់អាស៊ានក្នុងបញ្ហាតំបន់ផងដែរ។

គួរបញ្ជាក់ដែរថា នៅឆ្នាំ ២០២៤ ប្រទេសឡាវនឹងកាន់តំណែងជាប្រធានអាស៊ាន ដោយនាយករដ្ឋមន្ត្រីឡាវបាននិយាយថា ការផ្តោតសំខាន់នៃអាស៊ានឆ្នាំ ២០២៤ គឺដើម្បីពង្រឹងការតភ្ជាប់និងភាពធន់របស់អាស៊ាន។ ក្នុងនោះនាយករដ្ឋមន្ត្រី Pham Minh Chinh ក៏បានអះអាងដែរថា វៀតណាមនឹងផ្តល់ការគាំទ្រជាអតិបរមា ដើម្បីជួយឡាវឱ្យទទួលបានជោគជ័យក្នុងការធ្វើជាប្រធានអាស៊ាននៅឆ្នាំក្រោយ៕

ម៉ាឡេស៊ី៖ ស្ត្រីខ្មែរម្នាក់អាយុ ៤៧ឆ្នាំ និងកូនប្រុសរបស់នាងអាយុ ២២ឆ្នាំ បានបើកអាជីវកម្មនៅក្នុងប្រទេសម៉ាឡេស៊ី ត្រូវបានអាជ្ញាធរចាប់ខ្លួនពីបទបង្ហោះវីដេអូរិះគន់ប្រជាជនម៉ាឡេស៊ីថា “ខ្ជិល” តាមរយៈ Tiktok។

យោងតាមគេហទំព័រអន្តរជាតិ Free Malaysia Today ដែលបានចុះផ្សាយនៅខែធ្នូថ្មីៗនេះថា ស្ត្រីពាណិជ្ជករខ្មែរម្នាក់ និងកូនប្រុសរបស់នាង ត្រូវបានអាជ្ញាធរម៉ាឡេស៊ីចោទប្រកាន់ពីបទប្រើប្រាស់ពាក្យសម្តីមិនសមរម្យប្រមាទប្រជាជនម៉ាឡេស៊ី ដែលបទល្មើសនេះស្ថិតក្រោមមាត្រា ៥០៥ (គ) នៃក្រមព្រហ្មទណ្ឌ។ បន្ទាប់ពីពួកគេបានបង្ហោះវីដេអូមួយនៅលើ TikTok និយាយថា “ប្រជាជនកម្ពុជាឆ្លាតជាង និងឧស្សាហ៍ព្យាយាមជាងជនជាតិម៉ាឡេស៊ី”។

នៅក្នុងវីដេអូនេះផងដែរ បានធ្វើឱ្យប្រជាជនម៉ាឡេស៊ីជាច្រើនមានការមិនពេញចិត្តយ៉ាងខ្លាំង ក្រោយមកនាងនិងកូនប្រុសរបស់នាងក៏ត្រូវបានចាប់ខ្លួន។ ស្ត្រីជនជាតិខ្មែរ Mariya Yaakob និងកូនប្រុសរបស់នាង Ezuan Hafsham Mohd Hisyam ត្រូវបានតុលាការផ្តន្ទាទោសដាក់ពន្ធនាគាររយៈពេល ២ឆ្នាំ និងពិន័យជាប្រាក់អតិបរមាចំនួន ៥០,០០០ រីងហ្គីតម៉ាឡេស៊ី (ប្រមាណជាង ១ ម៉ឺនដុល្លារអាមេរិក) ហើយនឹងត្រូវផ្តន្ទាទោសពិន័យជាប្រាក់បន្ថែមទៀតចំនួន ១,០០០ រីងហ្គីតម៉ាឡេស៊ី (ប្រមាណ ២១៣ ដុល្លារ) ជារៀងរាល់ថ្ងៃក្នុងអំឡុងពេលដែលបទល្មើសនេះត្រូវបានប្រព្រឹត្ត។

ទោះជាយ៉ាងណាក៏ដោយ មេធាវីរបស់ម្តាយកូនរូបនេះ បានធ្វើការស្នើសុំឱ្យតុលាការបន្ថយការនៅក្រៅឃុំ ដោយសារម៉ារីយ៉ា ជាម្តាយទោលនិងជាអ្នកជំនួញដែលត្រូវរកប្រាក់ ឬធ្វើដំណើរទៅធ្វើការនៅបរទេស រីឯកូនប្រុសរបស់នាង Esuan កំពុងសិក្សានៅសាកលវិទ្យាល័យ ហើយអ្វីៗគឺនាងជាអ្នករ៉ាប់រងទាំងអស់។

ហេតុនេះហើយ តុលាការក៏សម្រេចចិត្តឱ្យពួកគេនៅក្រៅឃុំដោយត្រូវដាក់ប្រាក់ធានាប្រមាណ ៣,២០០ ដុល្លារសម្រាប់ Mariyah និង ២,១០០ ដុល្លារសម្រាប់ Ezuan។ ប៉ុន្តែពួកគេត្រូវបានតុលាការដកហូតលិខិតឆ្លងដែន ក៏ដូចជាឱ្យពួកគេទាំងពីរបដិសេធមិនធ្វើសេចក្តីថ្លែងការណ៍ណាមួយដែលអាចប៉ះពាល់ដល់ដំណើរការរបស់តុលាការឡើយ៕

ប្រទេសប៉ាគីស្ថាន ៖ កាលពីថ្ងៃទី១៧ ខែធ្នូ ឆ្នាំ២០២៣ សារព័ត៌មានបរទេសរាយការណ៍ថា អាជ្ញាធរប្រចាំទីក្រុង Lahore ដែលជាទីក្រុងធំលំដាប់ទី២ និងស្ថិតនៅភាគខាងកើតប្រទេសប៉ាគីស្ថាន បានចេញសេចក្តីថ្លែងការណ៍មួយថា យន្តហោះចំនួន២គ្រឿងរបស់ភ្នាក់ងារមកពីសហព័ន្ធអារ៉ាប់រួម (United Arab Emirates-UAE) បានបង្កើតភ្លៀងសិប្បនិម្មិតក្នុងតំបន់ចំនួន១០ នៅទីក្រុង Lahore ដោយជោគជ័យ និងមានភ្លៀងធ្លាក់មកកាលពីថ្ងៃ១៦ ខែធ្នូ កន្លងមក ។

នេះជាលើកដំបូងហើយដែលមានការបង្កើតភ្លៀងសិប្បនិម្មិតនៅប៉ាគីស្ថាន ដែលជាប្រទេសមួយបានប្រឈមនឹងការបំពុលបរិយាកាសខ្ពស់បំផុតនៅលើពិភពលោក ។ កាលពីប៉ុន្មានឆ្នាំកន្លងមកនេះ ប្រទេសប៉ាគីស្ថានបានប្រឈមនឹងការបំពុលបរិយាកាសធ្ងន់ធ្ងរ ដោយសារការប្រើប្រាស់ថាមពលហ្វូស៊ីលក្នុងកម្រិតខ្ពស់ ក៏ដូចជាការដុតចម្ការជាច្រើននៅជិតដល់ពេលរដូវដាំដុះ ស្របពេលប្រទេសនេះមានកាន់តែត្រជាក់ខ្លាំងក្នុងរដូវរងាផងដែរ ។ចំណែកលទ្ធផលការវាស់វែងកម្រិតខ្យល់ PM 2.5 ជាពិសេស នៅទីក្រុង Lahore កាលពីថ្ងៃទី១៦ ខែធ្នូ ឆ្នាំ២០២៣ បង្ហាញថា វាមានកម្រិតខ្ពស់ជាងកម្រិតគ្រោះថ្នាក់ដែលកំណត់ដោយអង្គការសុខភាពពិភពលោក (WHO) រហូតដល់៦៦ដងឯណោះ ។ ហេតុនេះ កម្រិតខ្យល់ពុលនៅលើបរិយាកាសបានធ្វើឱ្យប៉ះពាល់ដល់សុខភាពពលរដ្ឋប៉ាគីស្ថាន និងការរស់នៅរបស់ពលរដ្ឋក្នុងទីក្រុងយ៉ាងខ្លាំង ៕ ប្រភព ៖ daily news

យោងតាមគេហទំព័រ Lonely Planet បានឱ្យដឹងថា ភ្ញៀវទេសចរដែលចង់ធ្វើដំណើរទៅប្រទេសជប៉ុនចាំបាច់ត្រូវយល់ដឹងពីតិចនិចទាំងនេះ ដើម្បីងាយស្រួលធ្វើដំណើរ ក៏ដូចជាទទួលបានបទពិសោធន៍ល្អៗ ព្រោះដោយសារប្រទេសជប៉ុនជាធម្មតាមានពិធីសាសនាជាច្រើន ដែលជួនកាលអាចបង្កភាពមិនស្រួលដល់ភ្ញៀវទេសចរ។ ដូច្នេះខាងក្រោមនេះគឺ ១០ ចំណុចដែលអ្នកត្រូវចងចាំមុនពេលធ្វើដំណើរទៅប្រទេសជប៉ុន៖

១.ធ្វើការកក់ទុកមុន និងមកដល់ឱ្យទាន់ពេល៖ អ្នកទេសចរគួរតែកក់កន្លែងស្នាក់នៅឱ្យបានឆាប់ ជាពិសេសក្នុងឱកាសកំពូលដូចជាសប្តាហ៍ដំបូងនៃខែមករា ពិធីបុណ្យផ្ការីក ចុងខែមីនាដល់ខែមេសាជាដើម នឹងត្រូវមកដល់ឱ្យទាន់ពេល ពីព្រោះបុគ្គលិកទាំងអស់សុទ្ធតែកំណត់ពេលវេលាច្បាស់លាស់ក្នុងការពិនិត្យ ដូច្នេះនៅពេលអ្នកមកយឺត ឬហួសម៉ោងបុគ្គលិកអាចនឹងអវត្តមាន ។

២.រៀបចំអីវ៉ាន់របស់អ្នក៖ បន្ទប់នៅក្នុងប្រទេសជប៉ុនជាទូទៅមានទំហំតូច ដូច្នេះមិនមានកន្លែងច្រើនសម្រាប់ដាក់វ៉ាលីសំពីងសំពោងទេ។ លើសពីនេះ ការយកវ៉ាលីធំៗក៏បង្កភាពរអាក់រអួលសម្រាប់ភ្ញៀវទេសចរពេលប្រើមធ្យោបាយធ្វើដំណើរសាធារណៈផងដែរ។ ហេតុនេះហើយ អ្នកទេសចរគួរតែខ្ចប់អីវ៉ាន់ស្រាលៗពេលធ្វើដំណើរទៅប្រទេសជប៉ុន។

៣.ទិញស៊ីមដែលមានសមត្ថភាពទិន្នន័យខ្ពស់៖ អាស័យដ្ឋាននៅប្រទេសជប៉ុនមានការពិបាកក្នុងការរុករកខ្លាំងណាស់ សូម្បីតែអ្នកស្រុកក៏ដោយ។ ដូច្នេះ អ្នកទេសចរគួរតែទិញស៊ីមកាតដែលមានសមត្ថភាពទិន្នន័យខ្ពស់ ដើម្បីប្រើប្រាស់សម្រាប់កំណត់ទីតាំងក្នុងពេលធ្វើដំណើរ។

៤.ពាក់ស្បែកជើងដែលងាយស្រួលដោះចេញ៖ ក្រៅពីកត្តាផាសុកភាព អ្នកទស្សនាគួរតែជ្រើសរើសស្បែកជើងដែលងាយស្រួលដោះចេញ។ ព្រោះពេលមកដល់ប្រទេសជប៉ុន អ្នកទេសចរតែងតែទៅលេងកន្លែងកម្សាន្តបែបសាសនា ផ្ទះសំណាក់បែបប្រពៃណី និងញ៉ាំអាហារនៅភោជនីយដ្ឋានជាដើម ដោយកន្លែងទាំងនេះជារឿយៗតម្រូវឱ្យដោះស្បែកជើងចេញ។

៥.រៀនពីរបៀបប្រើបង្គន់៖ នៅប្រទេសជប៉ុន បង្គន់អេឡិចត្រូនិចមានប្រជាប្រិយភាពខ្លាំងជាមួយនឹងមុខងារសម្អាតនៅពេលចុចប៊ូតុង។ លើសពីនេះបង្គន់ជារឿយៗខ្វះកន្សែង និងមិនមានម៉ាស៊ីនសម្ងួតដៃ ដូច្នេះភ្ញៀវត្រូវរៀបចំយ៉ាងសកម្មផងដែរ។

៦.នាំយកសាច់ប្រាក់៖ ប្រសិនបើការធ្វើដំណើរទៅកាន់តំបន់ជនបទ ប័ណ្ណឥណទាន ឬការទូទាត់តាមអេឡិចត្រូនិកប្រហែលជាមិនត្រូវបានទទួលយកទេ។ ដូច្នេះភ្ញៀវត្រូវរៀបចំសាច់ប្រាក់ ក៏ដូចជាត្រូវដាក់លុយ និងកាតនៅក្នុងថាសក្បែរកន្លែងដាក់ប្រាក់ ជំនួសឱ្យការបង់ប្រាក់ដោយផ្ទាល់ទៅអ្នកគិតលុយ។

៧.ត្រូវដឹងពីរបៀបឈរ៖ នៅពេលប្រើជណ្តើរយន្ត អ្នកទស្សនាត្រូវតែឈរនៅម្ខាងជានិច្ច អាស្រ័យលើទីតាំង។ ជាឧទាហរណ៍ នៅតំបន់ Kanto និងភាគខាងកើត អ្នកត្រូវឈរនៅខាងឆ្វេង ប៉ុន្តែនៅ Kansai និងតំបន់ភាគខាងលិចវិញ អ្នកត្រូវឈរនៅខាងស្តាំ។

៨.ត្រូវដឹងពីរបៀបជិះរថភ្លើង៖ រថភ្លើងក្រោមដីនៅក្នុងទីក្រុងដំណើរការរហូតដល់ម៉ោង ១ កណ្តាលអាធ្រាតនៅពេលចុងក្រោយបំផុត។ ប្រសិនបើអ្នកខកខានការធ្វើដំណើរនេះ ជម្រើសតែមួយគត់របស់អ្នកគឺហៅតាក់ស៊ី ហើយវានឹងមានតម្លៃថ្លៃខ្លាំងណាស់។

៩.ពេលព្រឹកនៅទីក្រុងតូក្យូ៖ សម្រាប់អ្នកក្រុងតូក្យូ ការទៅធ្វើការពេលព្រឹកចាប់ពីម៉ោង ៧:៣០ ព្រឹកដល់ម៉ោង ៩:០០ ព្រឹក មនុស្សរាប់លាននាក់បានប្រមូលផ្តុំគ្នានៅលើរថភ្លើងនៅក្នុងទីក្រុង។ ដូច្នេះអ្នកដំណើរត្រូវមកឱ្យទាន់ពេលព្រោះអាចមិនមានកន្លែងអង្គុយគ្រប់គ្រាន់។

១០.រៀនពាក្យជាមូលដ្ឋានមួយចំនួន៖ ភាសាអង់គ្លេសគឺមានការពេញនិយមយ៉ាងខ្លាំងនៅតាមទីក្រុង និងតំបន់ទេសចរណ៍។ ទោះយ៉ាងណាក៏ដោយ នៅតំបន់ជនបទ ភាសានេះប្រហែលជាមិនមានប្រយោជន៍ទេ។ ជំនួសមកវិញ អ្នកទស្សនាគួរតែរៀនឃ្លាមូលដ្ឋានមួយចំនួនសម្រាប់ការទំនាក់ទំនងដូចជា អារីហ្គាតូ (សូមអរគុណ), តូរី (បន្ទប់ទឹក), ម៉ូឈីការី (យកទៅឆ្ងាយ), តេនណៃ ដឺ (ញ៉ាំនៅនឹងកន្លែង) ជាដើម៕

ប្រទេសចិន ៖ សារមន្ទីរនានានៅទូទាំងប្រទេសចិនបានស្វែងរកវិធីថ្មីៗជាបន្តបន្ទាប់ដើម្បីធ្វើយ៉ាងណា ឱ្យការដាក់តាំងវត្ថុបុរាណនានាមានភាពរស់រវើក និងជួយឱ្យអ្នកចូលទស្សនាងាយយល់ពីវត្ថុបុរាណទាំងនេះផងដែរ ។ គេសង្កេតឃើញថា សារមន្ទីរទាំងនេះបានបំពាក់នូវបច្ចេកវិទ្យាទំនើប និងមានឧបករណ៍ជំនួយ ដើម្បីឱ្យអ្នកទស្សនាទទួលបានបទពិសោធន៍ជាច្រើន តាមរយៈការទស្សនា, ការស្តាប់ និងការប៉ះពាល់ដោយផ្ទាល់ ។

សារមន្ទីរ Sanxingdui គឺជាសារមន្ទីរថ្មីមួយក្នុងខេត្តស៊ីឈួន ប្រទេសចិន ដែលបានរៀបចំឡើងតាមបែបបច្ចេកវិទ្យាទំនើប និងមានការបង្ហាញវត្ថុបុរាណផ្នែកវប្បធម៌ជាច្រើន ។ សារមន្ទីរនេះមានបន្ទប់ដាក់វត្ថុបុរាណ ដែលគេបានបំពាក់ដោយបច្ចេកវិទ្យា 3D ដើម្បីឱ្យអ្នកចូលទស្សនាទទួលបានបទពិសោធន៍ផ្នែកបុរាណវិទ្យាដោយខ្លួនឯង ហើយពួកគេក៏អាចទស្សនាវត្ថុបុរាណផ្នែកវប្បធម៌យ៉ាងជិតស្និទ្ធ ។

រីឯសារមន្ទីរមួយកន្លែងទៀតឈ្មោះ Liang Zhu ស្ថិតនៅស្រុក Yuhang ទីក្រុង Hangzhou ខេត្ត Zhejiang ក៏បានប្រើប្រាស់បច្ចេកវិទ្យាទំនើបផងដែរ ។ សារមន្ទីរនេះ អនុញ្ញាតឱ្យអ្នកទស្សនាអាចពាក់វ៉ែនតានាំផ្លូវដ៏ឆ្លាតវៃ គឺនៅពេលពួកគេបានពាក់វ៉ែនតានេះហើយ ពួកគេនឹងអាចមើលឃើញវត្ថុបុរាណវប្បធម៌ឌីជីថលបាន ។

ជាមួយគ្នានេះ ការពាក់វ៉ែនតានាំផ្លូវឆ្លាតវៃធ្វើឱ្យពួកគេអាចឮសូរសំឡេងពន្យល់អំពីប្រវត្តិរបស់វត្ថុបុរាណនីមួយៗ ។ ដូច្នេះ វាធ្វើឱ្យវត្ថុបុរាណដែលដាក់បង្ហាញនៅសារមន្ទីរ Liang Zhu មានភាពរស់រវើក និងធ្វើឱ្យអ្នកចូលទស្សនាសារមន្ទីរកាន់តែងាយយល់ជាងមុន ៕ ប្រភព ៖ China face