អ្នកនាំពាក្យក្រសួងការបរទេសកាតា បានព្រមានពីគ្រោះមហ.ន្តរាយក្នុងតំបន់ ប្រសិនបើមានសង្គ្រា.មកើតឡើងរវាងកងទ័ពអាមេរិក និងអ៊ីរ៉ង់ បន្ទាប់ពីប្រធានាធិបតីអាមេរិក លោក Donald Trump គំរា.មវាយប្រ.ហារអ៊ីរ៉ង់ ដើម្បីប្រឆាំងនឹងការបង្ក្រា.បក្រុមបាតុកររបស់មេដឹកនាំអ៊ីរ៉ង់ លោក Ayatollah Ali Khamenei ដែលបណ្តាលឱ្យបាតុករស្លា.ប់កើនឡើងរហូតដល់ជាង២,០០០នាក់ ត្រឹមតែរយៈពេលជាង២សប្តាហ៍ ។ នេះបើតាមការចុះផ្សាយរបស់សារព័ត៌មានបរទេសនៅថ្ងៃទី១៤ ខែមករា ឆ្នាំ២០២៦ ។

ក្នុងសេចក្តីប្រកាសព័ត៌មាន លោក Majid Al Ansari អ្នកនាំពាក្យក្រសួងការបរទេសកាតា និយាយថា ៖ «ការធ្វើសង្គ្រាមនឹងមានផលវិបាកធ្ងន់ធ្ងរក្នុងតំបន់នេះ និងតំបន់ផ្សេងៗ ទើបយើងព្យាយាមបំផុតដើម្បីចៀសវាងកុំឱ្យសង្គ្រាមកើតឡើង ។ ពេលនេះ ស្ថានការណ៍អាចដោះស្រាយបានតាមរយៈការចរចាការទូត យើងបានចរចាជាមួយគ្រប់ភាគី ជាពិសេស ប្រទេសជិតខាង និងប្រទេសជាមិត្តក្នុងតំបន់ ដើម្បីរកវិធីដោះស្រាយបញ្ហានេះ» ។

អស់រយៈពេលជាង២សប្តាហ៍ហើយដែលពលរដ្ឋអ៊ីរ៉ង់បានធ្វើបាតុកម្មទ្រង់ទ្រាយធំនៅទូទាំងប្រទេស ដែលជាឧបសគ្គយ៉ាងខ្លាំងសម្រាប់មេដឹកនាំអ៊ីរ៉ង់ លោក Khamenei បើគិតតាំងពីការធ្វើបដិវត្តអ៊ីស្លាមដើម្បីផ្តួលរំលំរបបព្រះចៅ Mohammad Reza Pahlavi កាលពីឆ្នាំ១៩៧៩ ។

មន្ត្រីសេតវិមានអាមេរិកបាននិយាយកាលពីថ្ងៃទី១២ ខែមករា ថា លោកប្រធានាធិបតី Trump កំពុងពិចារណាវាយប្រហារអ៊ីរ៉ង់តាមផ្លូវអាកាសដើម្បីកុំឱ្យមេដឹកនាំអ៊ីរ៉ង់បង្ក្រាបក្រុមបាតុករ ខណៈប្រធានរដ្ឋសភាអ៊ីរ៉ង់ លោក Mohammad-Bagher Ghalibaf ឆ្លើយតបទៅអាមេរិកវិញថា អ៊ីរ៉ង់បានត្រៀមខ្លួនធ្វើសង្គ្រាមជាមួយអាមេរិករួចហើយ ព្រមទាំងថា កងទ័ព និងនាវាអាមេរិក គឺជាគោលដៅដែលអ៊ីរ៉ង់ត្រូវវាយប្រហារដោយស្របច្បាប់ ។

ទោះយ៉ាងណា អាមេរិកនៅតែបើកចំហការចរចាការទូត ប៉ុន្តែអ៊ីរ៉ង់បែរជាបដិសេធការចរចាជាមួយលោក Steve Witkoff មន្ត្រីទូតពិសេសរបស់លោកប្រធានាធិបតី Trump ។ តាមទិន្នន័យរបស់អង្គការសិទ្ធិមនុស្សអាមេរិក (HRANA) ក្រុមបាតុករអ៊ីរ៉ង់បានស្លាប់រហូតដល់២,០០៣នាក់ និងពលរដ្ឋចំនួន១៦,៧៨៤នាក់ទៀតត្រូវចាប់ខ្លួន ដោយសារការធ្វើបាតុកម្មប្រឆាំងរដ្ឋាភិបាល ដែលចំនួននេះកើនឡើងយ៉ាងឆាប់រហ័ស បើធៀបនឹងចំនួនមនុស្សស្លាប់កាលពីថ្ងៃទី១២ ខែមករា ។

គួរបញ្ជាក់ថា កាតាស្ថិតនៅមជ្ឈិមបូព៌ាជាប់ប្រទេសអារ៉ាប៊ីសាអូឌីត ហើយកាតាត្រូវបានចាត់ទុកជាប្រទេសអ្នកមានបំផុតមួយលើពិភពលោក ដោយសារធនធានប្រេងដ៏សម្បើម គួបផ្សំនឹងអណ្តូងឧស្ម័នធម្មជាតិលើសលប់ ។ ធនធានប្រេងដ៏សម្បូរបែបនេះហើយ ទើបធ្វើឱ្យពលរដ្ឋកាតាមានជីវភាពធូរធា ៕

ប្រទេសថៃ ៖ បន្ទាប់ពីមហាជនជជែកវែកញែកក្នុងបណ្តាញសង្គមពីបេក្ខជននាយករដ្ឋមន្ត្រីមកពីគណបក្សជម្រើសថ្មី លោក Mongkolkit Suksintharanon ដាក់ចេញនូវគោលនយោបាយប្លែកៗអនុញ្ញាតឱ្យស្ត្រីថៃអាចមានស្វាមីស្របច្បាប់រហូតដល់៤នាក់ដើម្បីរក្សាសមភាពយេនឌ័រក្នុងប្រទេស លោកក៏បានសន្យាជាមួយពលរដ្ឋថា ប្រសិនបើគណបក្សជម្រើសថ្មីជាប់ឆ្នោតនឹងទាក់ទងមហាសេដ្ឋីអាមេរិក លោក Elon Musk មកធ្វើជាទីប្រឹក្សានាយករដ្ឋមន្ត្រី ។

តាមការចុះផ្សាយរបស់សារព័ត៌មាន Thairath នៅថ្ងៃទី១៤ ខែមករា ឆ្នាំ២០២៦ បេក្ខជននាយករដ្ឋមន្ត្រីមកពីគណបក្សជម្រើសថ្មី លោក Mongkolkit និយាយថា ពលរដ្ឋជ្រាបហើយ លោក Anutin Charnvirakul ប្រធានគណបក្សភូមិចៃថៃ និងលោក Natthaphong Ruengpanyawuth ប្រធានគណបក្សប្រជាជន ធ្វើជានាយករដ្ឋមន្ត្រី ប្រទេសថៃមានសភាពដូចម្តេច ។ ដូចគ្នានេះ បើគណបក្សភឿថៃជាប់ឆ្នោតនឹងដឹកនាំប្រទេសដូចមុន ប៉ុន្តែបើគណបក្សជម្រើសថ្មីជាប់ឆ្នោតដឹកនាំរដ្ឋាភិបាល គឺប្រទេសថៃនឹងមិនដូចមុនទេ ។

បេក្ខជននាយករដ្ឋមន្ត្រីមកពីគណបក្សជម្រើសថ្មីរូបនេះបញ្ជាក់ថា ប្រទេសថៃនឹងមិនដូចមុនដាច់ខាត គឺគណបក្សរបស់លោកនឹងរៀបចំផែនការរយៈពេល១៥ឆ្នាំ ដើម្បីផលិតយានអវកាសសម្រាប់ឱ្យពលរដ្ឋជិះទៅលេងតាមភពផ្សេងៗ ដូចជា ៖ ឋានព្រះច័ន្ទ ភពអង្គារ និងភពពុធ ប៉ុន្តែការទៅលេងលើអវកាសក្បែរផែនដី គឺពលរដ្ឋនឹងបានទៅលេងនាពេលឆាប់ៗមិនខាន ។

បន្ទាប់មក គណបក្សជម្រើសថ្មីនឹងទាក់ទងមហាសេដ្ឋីអាមេរិក លោក Elon Musk ដែលជាប្រធានក្រុមហ៊ុន SpaceX មកធ្វើជាទីប្រឹក្សានាយករដ្ឋមន្ត្រីឈ្មោះ Mongkolkit Suksintharanon ក្រោយបញ្ចប់ការបោះឆ្នោតនៅថ្ងៃទី៨ ខែកុម្ភៈ ឆ្នាំ២០២៦ ។ លោកនឹងទូរស័ព្ទទៅលោក Elon Musk ភ្លាមៗពេលរាប់សន្លឹកឆ្នោតរួចរាល់ បើមានឱកាសកាន់តំណែងជានាយករដ្ឋមន្ត្រី ។

ក្រៅពីនេះ នឹងកំណត់គោលនយោបាយកងទ័ពអវកាសដោយត្រៀមការហ្វឹកហាត់ ព្រមទាំងប្រកាសជ្រើសរើសពលរដ្ឋចំនួន៣,០០០នាក់ មកបំពេញមុខតំណែងជាច្រើនលើអវកាស ដូចជា ៖ អវកាសយានិក ជាងបច្ចេកទេស គ្រូពេទ្យ វិស្វករ និងភ្នាក់ងារសន្តិសុខអវកាស ក៏ដូចជាជ្រើសរើសសមត្ថកិច្ចអវកាសផងដែរ ដើម្បីចាប់ខ្លួនជនល្មើសដែលប្រព្រឹត្តខុសលើអវកាស ។

គោលនយោបាយគណបក្សបានទាក់ទាញចំណាប់អារម្មណ៍យ៉ាងខ្លាំងក្នុងបណ្តាញសង្គម ដោយមហាជនជជែកវែកញែកថា គួរឱ្យអស់សំណើចណាស់ ដែលគណបក្សដាក់ចេញនូវគោលនយោបាយបែបនេះ បើជាប់ឆ្នោតមែន រដ្ឋាភិបាលនឹងគ្មានធ្វើអ្វី ក្រៅពីនាំពលរដ្ឋទៅលេងអវកាស ។ តើគណបក្សបានថវិកាពីណា គណបក្សនេះមិនផ្តោតលើការបោះឆ្នោតទេ គ្រាន់តែឱ្យគេចាប់អារម្មណ៍ ពីព្រោះប្រកាសជ្រើសរើសសន្តិសុខអវកាសទៅយាមចំណតយានអវកាស ។

គួរបញ្ជាក់ថា ក្រៅពីមហាជនចាប់អារម្មណ៍គណបក្សនេះជាប់ឆ្នោតនឹងទាក់ទងមហាសេដ្ឋីអាមេរិក លោក Elon Musk មកធ្វើទីប្រឹក្សានាយករដ្ឋមន្ត្រី មហាជនក៏អស់សំណើចផងដែរពីគណបក្សដាក់ចេញនូវគោលនយោបាយប្លែកៗអនុញ្ញាតឱ្យស្ត្រីថៃអាចមានស្វាមីស្របច្បាប់រហូតដល់៤នាក់ដើម្បីរក្សាសមភាពយេនឌ័រក្នុងប្រទេស ដែលផ្ទុយនឹងវប្បធម៌ប្រពៃណីថៃ ៕

ប្រទេសកូរ៉េខាងជើង ៖ ប្អូនស្រីរបស់លោក Kim Jong Un មេដឹកនាំកូរ៉េខាងជើង អ្នកស្រី Kim Yo Jong បាននិយាយកាលពីថ្ងៃទី១៣ ខែមករា ឆ្នាំ២០២៦ ថា ក្តីសង្ឃឹមរបស់កូរ៉េខាងត្បូងចង់ភ្ជាប់ទំនាក់ទំនងល្អឡើងវិញជាមួយកូរ៉េខាងជើង គឺគ្រាន់តែជាការបំភ័ន្តភ្នែកប៉ុណ្ណោះ វាមិនអាចក្លាយជាការពិតឡើយ ។ នេះបើតាមការចុះផ្សាយរបស់សារព័ត៌មាន KCNA ។

កាលពីថ្ងៃទី១៣ ខែមករា អ្នកស្រី Kim Yo Jong ប្អូនស្រីរបស់មេដឹកនាំដ៏មានឥទ្ធិពលកូរ៉េខាងជើង ដែលបច្ចុប្បន្ន កាន់តំណែងជាអនុប្រធានគណៈកម្មការកណ្តាលនៃគណបក្សការងារ បានរិះគន់ការលើកឡើងរបស់មន្ត្រីរដ្ឋាភិបាលកូរ៉េខាងត្បូង ថារដ្ឋាភិបាលក្រុងសេអ៊ូលសម្លឹងឃើញឱកាសចរចាជាមួយរដ្ឋាភិបាលក្រុងព្យុងយ៉ាងម្តងទៀត បន្ទាប់ពីអ្នកស្រីប្រតិកម្មជាមួយកូរ៉េខាងត្បូងបង្ហោះដ្រូនល្មើសដែនអាកាសកូរ៉េខាងជើង ។ អ្នកស្រីថា ៖ «ក្តីសង្ឃឹមរបស់កូរ៉េខាងត្បូងចង់ភ្ជាប់ទំនាក់ទំនងល្អជាមួយកូរ៉េខាងជើងនោះ មិនអាចក្លាយជាការពិតឡើយ» ។

មន្ត្រីក្រសួងបង្រួបបង្រួមជាតិរបស់កូរ៉េខាងត្បូងដែលបំពេញការងារពាក់ព័ន្ធនឹងទំនាក់ទំនងជាមួយកូរ៉េខាងជើង បាននិយាយមកកាន់អ្នកសារព័ត៌មានថា អ្នកស្រី Kim Yo Jong បានអំពាវនាវឱ្យរដ្ឋាភិបាលក្រុងសេអ៊ូលស៊ើបអង្កេតការបង្ហោះដ្រូនរំលោ.ភដែនអាកាសកូរ៉េខាងជើង ហើយកាលពីថ្ងៃទី១៣ ខែមករា អ្នកស្រីថា កូរ៉េខាងត្បូងធ្វើសកម្មភាពញុះញង់យ៉ាងខ្លាំង និងបំពានអធិបតេយ្យកូរ៉េខាងជើង ។

អ្នកស្រីបានបញ្ជាក់ជាថ្មីពីគោលជំហរមិនភ្ជាប់ទំនាក់ទំនងល្អជាមួយកូរ៉េខាងត្បូងដែលជាសត្រូវនោះឡើយ ព្រមទាំងអំពាវនាវឱ្យរដ្ឋាភិបាលកូរ៉េខាងត្បូងសូមទោស និងសន្យាឈប់បង្ហោះដ្រូនរំលោ.ភដែនអាកាសកូរ៉េខាងជើងម្តងទៀត ។

គួរបញ្ជាក់ថា រដ្ឋាភិបាលកូរ៉េខាងត្បូងរបស់លោកប្រធានាធិបតី Lee Jae Myung ព្យាយាមកែលម្អទំនាក់ទំនងជាមួយរដ្ឋាភិបាលក្រុងព្យុងយ៉ាងឡើងវិញ ប៉ុន្តែរហូតមកដល់ឆ្នាំ២០២៦នេះ ការព្យាយាមរបស់កូរ៉េខាងត្បូងត្រូវបានកូរ៉េខាងជើងបដិសេធ ។

កូរ៉េខាងជើងបានចាត់ទុកកូរ៉េខាងត្បូងជាសត្រូវសួពូជដោយសារបង្ហោះដ្រូនស៊ើបការណ៍ចូលដែនអាកាសរបស់ខ្លួនកាលពីថ្ងៃទី៤ ខែមករា ។ កូរ៉េខាងជើងចាត់ទុកសកម្មភាពនេះជាការបង្កភាពតានតឹង និងបង្កើតស្ថានការណ៍ ដោយទាមទារឱ្យមានការបកស្រាយលម្អិតពីកូរ៉ខាងត្បូង ។

បើតាមអ្នកនាំពាក្យយោធាកូរ៉េខាងជើង ដ្រូននេះទំនងហោះពីកោះមួយនៅទីក្រុងអ៊ីនឈុន ប្រទេសកូរ៉េខាងត្បូង បន្ទាប់ពីហោះបានចម្ងាយ៨គីឡូម៉ែត្រ ក៏ត្រូវយោធាកូរ៉េខាងជើងបាញ់ទម្លាក់ក្នុងដែនអាកាសកូរ៉េខាងជើង ។ ដ្រូននេះបំពាក់ដោយកាមេរ៉ាឃ្លាំមើលដើម្បីថតទីតាំងសំខាន់ៗរបស់កូរ៉េខាងជើង វាធ្វើឱ្យកូរ៉េខាងជើងខកចិត្តពីការញុះញង់របស់កូរ៉េខាងត្បូង ទោះជាផ្លាស់ប្តូរមេដឹកនាំក៏ដោយ ។

ទោះយ៉ាងណា យោធាកូរ៉េខាងត្បូងបដិសេធមិនបានបង្ហោះដ្រូនទៅក្បែរព្រំដែនកូរ៉េខាងជើងដូចការចោទប្រកាន់ទេ ហើយកូរ៉េខាងត្បូងនឹងស៊ើបអង្កេតយ៉ាងលម្អិតលើបញ្ហាដ្រូនដែលបង្កឱ្យមានការភ័ន្តច្រឡំ ។ កូរ៉េខាងត្បូងគ្មានបំណងញុះញង់កូរ៉េខាងជើងទេ ដោយបន្តចាត់វិធានការជាក់ស្តែងដើម្បីកាត់បន្ថយស្ថានការណ៍តានតឹង និងកសាងទំនុកចិត្តរវាងប្រទេសទាំងពីរជាថ្មី ៕