សម្ដេចតេជោ ចេញសារដើម្បីបញ្ចប់ភាពចម្រូងចម្រាស់រវាងបងប្អូនខ្មែរ និងខ្មែរឥស្លាម

ទីបំផុតរកឃើញចំណុចកណ្ដាលនៃបញ្ហាហើយ! សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានបង្ហោះសារណែនាំដល់ទាំងបងប្អូនខ្មែរដែលជាអ្នកសិល្បៈ ឬអ្នកសម្ដែងកែតម្រូវទាំងពាក្យសំដីទាំងកាយវិការដែលអាចប៉ះពាល់ដល់សេចក្ដីថ្លៃថ្នូរបស់បងប្អូនខ្មែរឥស្លាម និងសម្ដេចបានសំណូមពរទៅកាន់បងប្អូនខ្មែរឥស្លាម ឲ្យបើកចិត្តស្វែងយល់ពីទំនៀមទម្លាប់ប្រណីខ្មែរដូចគ្នា ជៀសវាងបែ.កបា.ក់សាមគ្គីភាពក្នុងនាមជាខ្មែរតែមួយ។

តាមរយៈសំណេរដែលបានបង្ហោះនៅលើទំព័រផេកហ្វេសប៊ុក នាព្រឹកថ្ងៃអង្គារ ទី២៤ ខែកុម្ភៈ សម្ដេចតេជោ ហ៊ុន សែន បានលើកឡើងយ៉ាងដូច្នេះថា៖ ខ្ញុំសូមបងប្អូនខ្មែរឥស្លាមស្វែងយល់ឱ្យបានច្បាស់នូវចំណុចនេះព្រោះជាបញ្ហាប្រពៃណីទំនៀមទម្លាប់យូរលង់មកហើយ។ ឯក្នុងឈុតឆាកទៀតសោតពុំមានចំណុចណាជាការប្រមាថឬមើលងាយមើលថោកនោះទេតែផ្ទុយទៅវិញមានខ្លឹមសារស៊ីជម្រៅខ្លាំងណាស់លើបញ្ហាសាមគ្គីភាពជាតិសាសន៍និងសាសនា។ បងប្អូនឥស្លាមបានជួយដល់បងប្អូនខ្មែរដែលទៅរកល័ក្ដនៅពេលឆ្លងទឹក។

សម្រាប់សម្ដេច ចាប់តាំងពីធំដឹងក្តីមកលោកតែងទៅចូលរួមបុកល័ក្តសម្រាប់អ្នកស្គាល់គ្នា និងបន្តមកទៀតលោកក៏បានរៀបការកូនចំនួន៥នាក់ផងដែរ ដែលការរៀបមង្គលការរបស់កូនៗទាំង៥របស់លោក គឺសុទ្ធតែធ្វើពិធីបុកល័ក្ដ និងមានអ្នកដើរតួជាជនជាតិឥស្លាមដូចគ្នា។

ទន្ទឹមគ្នានេះដែរ សម្ដេចក៏បានបង្ហាញនូវការយល់ចិត្តទៅកាន់បងប្អូនខ្មែរឥស្លាម ដោយសម្ដេចគូសបញ្ជាក់ថា «បងប្អូនមិនបានជំទាស់និងការសំដែងដែលមានតួរសំដែងជាខ្មែរឥស្លាមនោះទេ តែអ្វីដែលបងប្អូនមិនសប្បាយចិត្តគឺពាក្យពេចន៍និងឥរិយាបទសំដែងខ្លះខ្វះការគោរពចំពោះព្រះរបស់ឥស្លាមទើបធ្វើឲ្យមានប្រតិកម្ម។

តាមន័យនេះ សូមឲ្យបងប្អូនគ្រប់ក្រុមសំដែងកែតម្រូវជាបន្ទាន់ទាំងពាក្យសំដីទាំងកាយវិការសម្រាប់ការសំដែង ជៀសវាងឲ្យខាងតែបាននូវពាក្យពេជចន៍ឬកាយវិការខ្វះការគោរពចំពោះបងប្អូនឥស្លាម ព្រោះបងប្អូនឥស្លាមទូទាំងពិភពលោក គោរពខ្លាំងណាស់នូវព្រះអាលឡោះឬព្រះអាលឡាដូចនេះមិនអាចសំដែងប៉ះពាល់បានទេ។

ជាចុងក្រោយ សម្ដេចសូមឲ្យស្មារតីសាមគ្គីភាពរវាងជាតិសាសន៍និងសាសនានៅកម្ពុជាបន្តរីកចម្រើនតទៅមុខទៀត ដ្បិតអ្វីដែលលោកឲ្យតម្លៃខ្ពស់គឺសាមគ្គីភាព ជាតិសាសន៍ និងសាសនា ដែលប្រទេសយើងគ្មានជម្លោះជាតិសាសន៍ និងសាសនានោះទេ៕