បរិភោគផ្លែឈើ៥ប្រភេទនេះជួយបំបាត់ការទល់លាម.ក និងសម្អាតពោះវៀន

ការពិបាកបន្ទោរបង់ ឬរយៈពេលចាប់ពី៣ថ្ងៃ ទៅ៤ថ្ងៃ ទើបបន្ទោរបង់ម្តង គឺជាបញ្ហាសុខភាពមួយមិនគួរមើលរំលង អ្នកជំនាញសុខភាពបានណែនាំឱ្យបរិភោគផ្លែឈើចំនួន៥ប្រភេទនេះដើម្បីឱ្យងាយស្រួលបន្ទោរបង់ ថែមទាំងជួយសម្អាតពោះវៀនផងដែរ ហើយក្នុងចំណោមផ្លែឈើទាំងនេះ គឺផ្លែឈើខ្លះគួរតែបរិភោគទាំងសំបក ។

ការទល់លាមក មិនត្រឹមតែបណ្តាលឱ្យមិនស្រួលខ្លួនប៉ុណ្ណោះទេ ពេលខ្លះ វាក៏បណ្តាលឱ្យចុកពោះយ៉ាងធ្ងន់ធ្ងរ ប្រសិនបើមិនបានបន្ទោរបង់រយៈពេល៣ថ្ងៃ គឺត្រូវបានចាត់ទុកជាការទល់លាមក ដែលមូលហេតុចម្បងដោយសារការផឹកទឹកតិច និងខ្វះខាតអាហារសរសៃ ។ ខាងក្រោមនេះ គឺជាផ្លែឈើទាំង៥ប្រភេទជួយឱ្យប្រព័ន្ធរំលាយអាហារដំណើរការល្អឡើងវិញ ៖

១-ផ្លែសារី ៖ សារី១ផ្លែ មានអាហារសរសៃជាង៥ក្រាម គួរបរិភោគទាំងសំបក ពីព្រោះអាហារសរសៃក្នុងសំបករបស់វាជួយកម្ចាត់កាកសំណល់ក្នុងពោះវៀនបានល្អ ខណៈអាហារសរសៃក្នុងសាច់ជំរុញការបញ្ចេញលាមក ។ ក្រៅពីនេះ ផ្លែសារីមានសារធាតុ Sorbitol ជួយស្រូបទឹកឱ្យចូលក្នុងពោះវៀនធំជំរុញដល់ការបញ្ចេញលាមក ។

២-ស្រកានាគ ៖ ការបរិភោគស្រកានាគសាច់ក្រម ឬសាច់ស សុទ្ធតែអាចដោះស្រាយបញ្ហាទល់លាមកបានទាំងអស់ ពីព្រោះស្រកានាគ១ផ្លែ មានអាហារសរសៃជិត៥ក្រាម ស្មើនឹង១៨% នៃបរិមាណអាហារសរសៃដែលរាងកាយត្រូវការក្នុង១ថ្ងៃ និងផ្តល់អត្ថប្រយោជន៍សម្រួលដល់ការបន្ទោរបង់ ។

៣-ប៉ោម ៖ អ្នកជំនាញណែនាំឱ្យបរិភោគផ្លែប៉ោមទាំងសំបកផងដែរ ដោយសារផ្លែប៉ោម១ផ្លែមានអាហារសរសៃ ស្មើនឹង៤ក្រាម ដែលផ្ទុកក្នុងសំបក និងសាច់របស់វា ។ ការបរិភោគផ្លែប៉ោម គឺជាការជួយពោះវៀន និងជួយឱ្យប្រព័ន្ធរំលាយអាហារដំណើរការបានល្ង ។

៤-ក្រូច ៖ ផ្លែក្រូចគ្រប់ប្រភេទមានអាហារសរសៃ ប្រមាណ៣ក្រាម និងសារធាតុ Pectin ជួយឱ្យលាមកទន់ ។ ក្រៅពីនេះ ការស្រាវជ្រាវបង្ហាញថា សារធាតុ Naringenin ក្នុងផ្លែក្រូចគ្រប់ប្រភេទ គឺជាថ្នាំធម្មជាតិសម្រួលដល់ការបន្ទោរបង់ ។

៥-ផ្លែគីវី ៖ គីវី១ផ្លែ ផ្តល់នូវអាហារសរសៃជាង២ក្រាម ប្រសិនបើលាងឱ្យស្អាត និងបរិភោគទាំងសំបក វានឹងផ្តល់នូវអាហារសរសៃកាន់តែច្រើន ។ ការបរិភោគផ្លែគីវីពណ៌មាស ចំនួន២ផ្លែក្នុង១ថ្ងៃ អាចជួយកាត់បន្ថយភាពតានតឹងពេលបន្ទោរបង់ រីឯផ្លែគីវីពណ៌បៃតង ជួយឱ្យការបន្ទោរបង់បានស្រួល ។

ក្រៅពីការបរិភោគផ្លែឈើ៥ប្រភេទ ចំណុចសំខាន់ដែលមិនអាចខ្វះបាន គឺត្រូវផឹកទឹកឱ្យគ្រប់គ្រាន់ និងហាត់ប្រាណទៀងទាត់ ដើម្បីជួយឱ្យពោះវៀនដំណើរការបានល្អ ។ លោកអ្នកគ្រាន់តែអនុវត្តតាមវិធីទាំងនេះធានាថា នឹងអស់បញ្ហាទល់លាមក ដោយពុំចាំបាច់លេបថ្នាំពេទ្យ ៕