វៀតណាម៖ តម្លៃកាហ្វេនៅក្នុងប្រទេសវៀតណាមបានបង្កើតកំណត់ត្រាខ្ពស់បំផុតមិនធ្លាប់មានក្នុងរយៈពេល ៣០ ឆ្នាំ ដែលឈានដល់ជិត ១ ពាន់លានដុល្លារអាមេរិកត្រឹមរយៈពេល ៤៥ ថ្ងៃប៉ុណ្ណោះនៃការនាំចេញកាហ្វេ ដែលនេះនឹងជួយដល់ឧស្សាហកម្មកាហ្វេរីកចម្រើនខ្លាំងនាពេលអនាគត។
យោងតាមអគ្គនាយកដ្ឋានគយ គិតត្រឹមឆមាសទីមួយនៃខែកុម្ភៈ ឆ្នាំ២០២៤ ប្រទេសនេះបាននាំចេញកាហ្វេជិត ៥៧.០០០តោន ជាមួយនឹងចំណូលសរុប ១៨៤.៤ លានដុល្លារអាមេរិក។ សរុបមក ចាប់ពីដើមឆ្នាំរហូតដល់ថ្ងៃទី១៥ ខែកុម្ភៈ បរិមាណនៃការនាំចេញកាហ្វេសម្រេចបានជិត ២៩៥.០០០តោន គិតជាទឹកប្រាក់ ៩១១ លានដុល្លារអាមេរិក។

បើប្រៀបធៀបទៅនឹងរយៈពេលដូចគ្នាកាលពីឆ្នាំមុន បរិមាណនៃការនាំចេញកាហ្វេកើនឡើងត្រឹមតែ ១៦.៧% ប៉ុណ្ណោះ ប៉ុន្តែចំណូលវិញគឺកើនឡើងរហូតដល់ ៦៦.៨%។ រីឯតម្លៃកាហ្វេនាំចេញជាមធ្យមឈានដល់ជិត ៣,១០០ ដុល្លារ/តោន កើនឡើងជិត ៤៣% បើធៀបនឹងរយៈពេលដូចគ្នាកាលពីឆ្នាំមុន។ ទីផ្សារនាំចេញកាហ្វេសំខាន់ៗរបស់វៀតណាមគឺអឺរ៉ុប អាមេរិក ចិន រុស្សី ឥណ្ឌូនេស៊ី… ក្នុងនោះអឺរ៉ុបគឺជាទីផ្សារនាំចូលកាហ្វេវៀតណាមធំជាងគេដែលមានចំនួន ៨៧,៧០០ តោន ចំណូលកើនឡើងដល់ជាង ២៦៣ លានដុល្លារអាមេរិក។

យោងតាមកំណត់ត្រា បន្ទាប់ពីបុណ្យចូលឆ្នាំថ្មី តម្លៃកាហ្វេបៃតងនៅសួនច្បារក្នុងខេត្តខ្ពង់រាបភាគកណ្តាលបានបន្តកើនឡើងយ៉ាងខ្លាំង ហើយនេះក៏ជាលើកដំបូងដែលបានឈានដល់កំណត់ត្រា ៨០,០០០ ដុង/គីឡូក្រាម។ បច្ចុប្បន្ន តម្លៃកាហ្វេក្នុងទីផ្សារក្នុងស្រុកបានឈានដល់កម្រិតកំពូលជាប្រវត្តិសាស្ត្រក្នុងរយៈពេល ៣០ ឆ្នាំចុងក្រោយនេះ ដែលលើសពីសញ្ញាណ ៨៣.០០០ ដុង/គីឡូក្រាម កើនឡើង ៧០% ធៀបនឹងរយៈពេលដូចគ្នាកាលពីឆ្នាំមុន។

គួរបញ្ជាក់ដែរថា សមាគមកាហ្វេ និងកាកាវវៀតណាម (VICOFA) បានព្យាករណ៍ថាជាមួយនឹងស្ថានភាពនេះនៅឆ្នាំ ២០២៤ ការនាំចេញកាហ្វេអាចឈានដល់ ៤.៥ – ៥ ពាន់លានដុល្លារអាមេរិក ដែលនេះនឹងក្លាយជាឆ្នាំកំណត់ត្រាថ្មីសម្រាប់ការនាំចេញកាហ្វេរបស់វៀតណាម។ ពីមុនក្នុងឆ្នាំ ២០២៣ ប្រទេសវៀតណាមបាននាំចេញកាហ្វេជាង ១.៦២ លានតោន ជាមួយនឹងចំណូលជាង ៤.២៤ ពាន់លានដុល្លារអាមេរិក បើទោះបីជាបរិមាណធ្លាក់ចុះ ៨.៧% ប៉ុន្តែកើនឡើង ៤.៦% នៅក្នុងចំណូលធៀបនឹងឆ្នាំ ២០២២៕

ប្រទេសឥណ្ឌា ៖ នាយករដ្ឋមន្ត្រីប្រទេសឥណ្ឌា លោក Narendra Modi បានជ្រមុជទឹកទៅធ្វើពិធីគោរពសាសនាក្នុងវត្ត និងទីក្រុងបុរាណនៅក្រោមទឹក ឈ្មោះ «ថាវ៉ារ៉ាកា» ដែលស្ថិតនៅបរិវេណខាងក្រៅឆ្នេរសមុទ្រអារ៉ាប់ រដ្ឋឃូឆារ៉ាត កាលពីថ្ងៃទី២៥ ខែកុម្ភៈ ឆ្នាំ២០២៤ ។ លោកបានអង្គុយសមាធិ និងសូត្រធម៌នៅក្រោមទឹក ហើយលោកបានយកកន្ទុយក្ងោកទៅថ្វាយវត្ថុស័ក្តសិទ្ធផងដែរ ។

ចំណែកអ្នកមានជំនាញជ្រមុជទឹកជាច្រើននាក់ទៀតបានជួយការពារលោកនាយករដ្ឋមន្ត្រី និងមិនទៅឆ្ងាយពីលោកទេ ។ មេដឹកនាំឥណ្ឌា អាយុ៧៣ឆ្នាំ រូបនេះ បានចុះទៅក្រោមទឹកនៅបរិវេណដែលគេជឿថា គឺជាទីក្រុងបុរាណ ដោយលោកស្លៀកពាក់ឈុតប្រពៃណីឥណ្ឌា និងពាក់តែមួកប្រភេទ Diving Helmet ប៉ុណ្ណោះ ។

នាយករដ្ឋមន្ត្រីឥណ្ឌា លោក Narendra Modi បានធ្វើពិធីសូត្រធម៌ ដែលមានកន្ទុយសត្វក្ងោកសម្រាប់គោរពបូជាក្នុងវត្តហិណ្ឌូស័ក្តសិទ្ធស្ថិតនៅក្រោមទឹក ។ ជនជាតិឥណ្ឌាដែលគោរពសាសនាហិណ្ឌូជឿថា វាគឺជាផ្នែកមួយរបស់ថាវ៉ារ៉ាកា ឬទីក្រុងបុរាណនៅក្រោមទឹក ដែលត្រូវបានគេដាក់ឈ្មោះថា «ទីក្រុងអាឡែនទីសរបស់ឥណ្ឌា» ។

លោកនាយករដ្ឋមន្ត្រីឥណ្ឌាបានបង្ហោះសារក្នុងបណ្តាញសង្គម X ឬ Twitter ថា ៖ «នៅពេលខ្ញុំបានជ្រមុជទឹកដើម្បីសូត្រធម៌ និងគោរពបូជានៅទីក្រុងបុរាណថូវ៉ារ៉ាកា គឺជាបទពិសោធន៍ដ៏ល្អមួយ និងមានភាពស័ក្តសិទ្ធយ៉ាងខ្លាំង ។ ខ្ញុំមានអារម្មណ៍ថា ខ្ញុំកំពុងទំនាក់ទំនងជាមួយវត្ថុស័ក្តសិទ្ធនៅសម័យបុរាណ ហើយខ្ញុំសូមឱ្យព្រះប្រទានពរដល់អ្នកគ្រប់គ្នាផងដែរ» ។

ថាវ៉ារ៉ាកា គឺជាទីក្រុងបុរាណស្ថិតនៅបរិវេណខាងក្រៅឆ្នេរសមុទ្រនៃរដ្ឋឃូឆារ៉ាត និងជាប់សមុទ្រអារ៉ាប់ ។ ទីក្រុងនេះ គឺជាទីក្រុងស័ក្តសិទ្ធមួយក្នុងចំណោមទីកន្លែងស័ក្តសិទ្ធចំនួន៧ សម្រាប់អ្នកធ្វើបុណ្យសាសនាហិណ្ឌូគោរពប្រតិបត្តិជារៀងរាល់ឆ្នាំ ។ ទីក្រុងថាវ៉ារ៉ាកា បានបង្ហាញពីមហាទេពក្នុងសាសនាហិណ្ឌូ ឬមហាភារៈតៈ ថា គឺជារាជធានីរបស់ព្រះគីសាណៈ និងបានសាងសង់ឡើងនៅទន្លេ កុមទិ ។ ប៉ុន្តែទីក្រុងនេះបានធ្លាក់ទៅក្នុងទឹក ក្រោយពីការសោយទីវង្គតរបស់ព្រះគីសាណៈ ។

អ្នកបុរាណវិទ្យាបានប្រទះឃើញភស្តុតាងផ្សេងៗនៅក្រោមទឹក ហើយចាប់តាំងពីពេលនោះមក គេជឿថា បរិវេណនេះជាទីតាំងរបស់ទីក្រុងបុរាណថាវ៉ារ៉ាកា ។ ហេតុនេះ គេបានដាក់ឈ្មោះទីក្រុងនេះថា ទីក្រុងអាឡែនទីស របស់ប្រទេសឥណ្ឌា ។ អាឡែនទីស គឺជារឿងរ៉ាវរបស់ឋានសួគ៌នៅសម័យបុរាណ ដែលបានបាត់បង់នៅក្រោមសមុទ្រ ៕

សហរដ្ឋអាមេរិក ៖ ទាហានអាមេរិកម្នាក់បានសម្រេចចិត្ត ..ដុ..ត.. ខ្លួនឯងនៅបរិវេណខាងក្រៅស្ថានទូតអ៊ីស្រាអែលក្នុងទីក្រុងវ៉ាស៊ីនតោន សហរដ្ឋអាមេរិក កាលពីរសៀលថ្ងៃទី២៥ ខែកុម្ភៈ ឆ្នាំ២០២៤ ។ ចំណែកអាជ្ញាធរក្នុងតំបន់និយាយថា ការ ..ដុ..ត.. ខ្លួននេះ មើលទៅដូចជាការតវ៉ាប្រឆាំងនឹងសង្គ្រាមនៅតំបន់កាហ្សា ។

ទាហានអាមេរិក ..ដុ..ត.. ខ្លួនឯងនេះ ត្រូវបានគេបញ្ជូនទៅកាន់មន្ទីរពេទ្យមួយកន្លែងនៅក្នុងតំបន់ ក្រោយពីភ្នាក់ងារស៊ើបការណ៍សម្ងាត់របស់អាមេរិកជួយគ្នាពន្លត់ភ្លើង ។ រីឯមន្ត្រីនាំពាក្យស្នងការជាតិបានលើកឡើងនាពេលបន្ទាប់ថា ទាហានរូបនេះស្ថិតក្នុងស្ថានភាពធ្ងន់ធ្ងរនៅឡើយ ខណៈមន្ត្រីនាំពាក្យរបស់កងទ័ពអាកាសបញ្ជាក់ថា ហេតុការណ៍នេះពាក់ព័ន្ធនឹងកងទ័ពអាកាសម្នាក់របស់ពួកគេ ។

បើតាមការចុះផ្សាយរបស់កាសែត New York Times ឱ្យដឹងថា ទាហានដុតខ្លួននេះនិយាយថា រូបគេមិនចង់មានជម្លោះក្នុងការសម្លាប់ជាតិសាសន៍នៅតំបន់កាហ្សាបន្តទៀតទេ ។ រីឯវីដេអូមួយដែលទាហានរូបនេះបាន Live ផ្ទាល់តាមអ៊ីនធើរណេត គេបានឃើញគាត់ស្លៀកពាក់ឯកសណ្ឋានទាហាន ។

ទាហាននេះបានប្រើប្រាស់វត្ថុរាវចាក់ស្រោចលើក្បាល និងដុតភ្លើងខ្លួនឯង ព្រមទាំងស្រែកថា «សូមដោះលែងប៉ាឡេស្ទីន» ។ បើតាមការចុះផ្សាយរបស់កាសែត New York Times ឱ្យដឹងថា បច្ចុប្បន្ន អាជ្ញាធរក្នុងតំបន់ និងភ្នាក់ងារស៊ើបការណ៍សម្ងាត់របស់អាមេរិក បានស៊ើបអង្កេតដើម្បីស្វែងរកមូលហេតុដែលបណ្តាលឱ្យកើតហេតុការណ៍នេះ ។

ស្ថានទូតអ៊ីស្រាអែលបានក្លាយជាគោលដៅក្នុងការតវ៉ាប្រឆាំងនឹងសង្គ្រាមនៅតំបន់កាហ្សាជាបន្តបន្ទាប់ ខណៈសង្គ្រាមនៅតំបន់កាហ្សាធ្វើឱ្យមានការតវ៉ាម្តងហើយម្តងទៀតនៅអាមេរិកពីភាគីគាំទ្រប៉ាឡេស្ទីន និងអ៊ីស្រាអែល ។

ការប្រឆាំងតវ៉ាបានចាប់ផ្តើមកើតឡើងមិនយូរប៉ុន្មាន ក្រោយហេតុការណ៍ក្រុមហាម៉ាស់ដែលការពារតំបន់កាហ្សាវាយប្រហារប្រឆាំងនឹងអ៊ីស្រាអែល ។ ក្រុមនេះបានសម្លាប់មនុស្សប្រមាណ១.២០០នាក់ និងចាប់ខ្លួនចំណាប់ខ្មាំងប្រមាណ២៥០នាក់ ។ តាំងពីពេលនោះមក ទាហានអ៊ីស្រាអែលក៏បានសងសឹកវិញ ដោយការបើកប្រតិបត្តិការយោធាវាយលុកក្នុងតំបន់កាហ្សា ។ ទាហានអ៊ីស្រាអែលបានបំផ្លាញតំបន់ជាច្រើន ហើយរហូតមកដល់ដើមឆ្នាំ២០២៤នេះ មានមនុស្សស្លាប់ជិត៣ម៉ឺននាក់ ៕

ប្រទេសវៀតណាម ៖ ក្រុមហ៊ុនផលិតរថយន្តអគ្គិសនីវៀតណាម Vinfast បានប្រកាសពីការខាតទុនរបស់ខ្លួន ស្មើនឹងទឹកប្រាក់ជិត២.៤០០លានដុល្លារអាមេរិក នៅឆ្នាំ២០២៣ បើទោះជាក្រុមហ៊ុននេះទទួលបានប្រាក់ចំណូលកើនឡើងលើសឆ្នាំ២០២២ រហូតដល់៩០% ក៏ដោយ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២៦ ខែកុម្ភៈ ឆ្នាំ២០២៤ ។

ក្រុមហ៊ុន Vinfast សង្ឃឹមថា នឹងអាចបង្កើនសក្តានុពលប្រកួតប្រជែងរបស់ខ្លួនជាមួយម៉ាករថយន្តអគ្គិសនីលំដាប់ពិភពលោក ដូចជា Tesla ប៉ុន្តែទីបំផុត ក្រុមហ៊ុននេះមិនអាចលក់រថយន្តតាមគោលដៅទេ បើទោះជាប្រាក់ចំណូលនៅឆ្នាំ២០២៣ ស្មើនឹង១.១៩០លានដុល្លារអាមេរិក ហើយប្រាក់ចំណូលបានកើនឡើងរហូតដល់៩១% បើធៀបនឹងឆ្នាំ២០២២ ក្តី ។ ប៉ុន្តែក្រុមហ៊ុននេះនៅតែខាតទុន ស្មើនឹងទឹកប្រាក់២.៣៩០លានដុល្លារអាមេរិក ហើយចំនួននេះច្រើនជាងឆ្នាំ២០២២ ប្រមាណ១៤,៧% ។

ក្រុមហ៊ុន Vinfast អាចលក់រថយន្តអគ្គិសនីបានត្រឹមតែចំនួន៣៤.៨៥៥គ្រឿងប៉ុណ្ណោះ កាលពីឆ្នាំ២០២៣ ហើយចំនួននេះស្ថិតនៅក្រោមគោលដៅដែលក្រុមហ៊ុនកំណត់ថា នឹងលក់រថយន្តអគ្គិសនីឱ្យបានចំនួន៥ម៉ឺនគ្រឿង ។ ទោះយ៉ាងណា ក្រុមហ៊ុនមានគម្រោងថា នឹងលក់រថយន្តអគ្គិសនីឱ្យបានដល់១សែនគ្រឿង នៅឆ្នាំ២០២៤ ហើយក្រុមហ៊ុននឹងវាយលុកចូលទីផ្សារផ្សេងៗ ក្រៅពីសហរដ្ឋអាមេរិក, កាណាដា និងអឺរ៉ុប ។

កាលពីសប្តាហ៍ទី៣ ខែកុម្ភៈ ឆ្នាំ២០២៤ ក្រុមហ៊ុន Vinfast បានប្រកាសពីគម្រោងសាងសង់រោងចក្រផលិតរថយន្តអគ្គិសនីនៅរដ្ឋ Tamil Nadu ប្រទេសឥណ្ឌា ដែលបានចាប់ផ្តើម នៅថ្ងៃទី២៥ ខែកុម្ភៈ កន្លងមក ហើយក្រុមហ៊ុនប្រកាសថា រោងចក្រនេះនឹងអាចផលិតរថយន្តបានប្រមាណ១៥ម៉ឺនគ្រឿងក្នុង១ឆ្នាំ ។

ក្រៅពីនេះ ក្រុមហ៊ុនក៏មានគម្រោងវិនិយោគទុនស្មើនឹងទឹកប្រាក់យ៉ាងហោចណាស់ ១.២០០លានដុល្លារអាមេរិកផ្សេងទៀត ដើម្បីសាងសង់រោងចក្រថ្មីផលិតរថយន្តអគ្គិសនីនៅប្រទេសឥណ្ឌូណេស៊ី ។ លើសពីនេះ ក្រុមហ៊ុនចាប់អារម្មណ៍ពង្រីកការវិនិយោគទុនផ្នែករថយន្តនៅប្រទេសហ្វីលីពីនទៀតផង ។

Anh Nguyen ជាប្រធានផ្នែកហិរញ្ញវត្ថុរបស់ក្រុមហ៊ុន Vinfast លើកឡើងថា ៖ «យើងបានឃើញពីលទ្ធផលប្រតិបត្តិការគួរឱ្យពេញចិត្តនៅត្រីមាសទី៤ ឆ្នាំ២០២៣ ដោយក្រុមហ៊ុនមានប្រាក់ចំណូលកើនឡើង ហើយប្រាក់ចំណេញសុទ្ធ ក៏បានកើនឡើងផងដែរ» ។

Vinfast គឺជាក្រុមហ៊ុនរថយន្តអគ្គិសនីស្ថិតនៅក្រោមក្រុមហ៊ុន Vingroup ដែលបានបង្កើតឡើងកាលពីឆ្នាំ២០១៧ ហើយមានទីតាំងផលិតរថយន្តដ៏ធំនៅទីក្រុង Hai Phong ដែលជាទីក្រុងធំលំដាប់ទី៣ របស់ប្រទេសវៀតណាម ។

ក្រុមហ៊ុននេះបានចាប់ផ្តើមលក់រថយន្តអគ្គិសនីឱ្យអតិថិជននៅរដ្ឋកាលីហ្វ័រញ៉ា សហរដ្ឋអាមេរិក ចាប់តាំងពីខែមីនា ឆ្នាំ២០២៣ មកម៉្លេះ ហើយរហូតមកដល់ត្រីមាសទី៣ ឆ្នាំ២០២៣ ក្រុមហ៊ុនអាចលក់រថយន្តបានប្រមាណ២១.២០០គ្រឿង ។ នាយកគ្រប់គ្រងក្រុមហ៊ុន Vinfast បានកំណត់គោលដៅថា ការលក់រថយន្តរបស់ក្រុមហ៊ុននឹងឈានដល់ចំណុចកំពូល នៅឆ្នាំ២០២៥ ។

នៅដើមឆ្នាំ២០២៤នេះ ក្រុមហ៊ុន Vinfast បានបង្ហាញនូវគំនិតផលិតរថយន្តភីកអាប់អគ្គិសនី និងដំណើរការរោងចក្រផលិតរថយន្តនៅរដ្ឋ North Carolina សហរដ្ឋអាមេរិក ដើម្បីលក់រថយន្តអគ្គិសនីនៅសហរដ្ឋអាមេរិក ៕

ប្រទេសសិង្ហបុរី៖ តំបន់ Oases របស់ប្រទេសសិង្ហបុរីគឺជាកន្លែងដែលទាក់ទាញអ្នកទេសចរក្នុងស្រុក និងបរទេសពេញមួយឆ្នាំ ដោយសារទេសភាពសន្តិភាព និងសកម្មភាពរុករកធម្មជាតិចម្រុះរបស់ពួកគេ។ តំបន់នេះមានរមណីយដ្ឋានបៃតង និងសួនកម្សាន្តល្បីៗជាច្រើន ត្រូវបានចាត់ទុកថាជាឋានសួគ៌ ដោយសារកោះនីមួយៗផ្តល់នូវបទពិសោធន៍ដ៏គួរឱ្យរំភើប ដែលខុសគ្នាទាំងស្រុងពីសកម្មភាពនៅលើដីគោក។

នៅក្នុងតំបន់ Oases មានកន្លែងទាក់ទាញបែបបុរាណរបស់ Pulau Ubin ភាពបរិសុទ្ធខាងវិញ្ញាណរបស់ Kusu ភាពអស្ចារ្យខាងអេកូឡូស៊ីនៃ Sister Island ឬឆ្នេរដ៏ស្ងប់ស្ងាត់នៃ St. John’s, Lazarus…ជាដើម។ ទាំងអស់នេះផ្តល់នូវបទពិសោធន៍ដ៏គួរឱ្យរំភើបដែលមិនអាចបំភ្លេចបាន ដោយគ្រាន់តែជិះសាឡាងខ្លីពីកណ្តាលប្រទេសសិង្ហបុរីគឺទៅដល់ហើយ។ ដូច្នេះអ្នកទេសចរអាចមកទស្សនាកន្លែងដ៏ពេញនិយមនីមួយៗក្នុងតំបន់ Oases ដូចខាងក្រោម៖

១.កន្លែងទាក់ទាញបែបបុរាណរបស់ Pulau Ubin៖ Pulau Ubin មានទីតាំងនៅឆ្នេរសមុទ្រភាគឦសាននៃប្រទេសសិង្ហបុរី ត្រូវបានអ្នកស្រុកចាត់ទុកថាជាកន្លែងលាក់ខ្លួន ដ៏ស្ងប់ស្ងាត់ និងបរិសុទ្ធ ផ្ទុយពីទេសភាពទំនើបនៅកណ្តាលទីក្រុង ឬគេហៅថា “ឋានសួគ៌សម្ងាត់”។ នៅកំពង់ផែនេះ មានផ្លូវដើរដ៏ស្ងប់ស្ងាត់នៅក្រោមដើមឈើបៃតងត្រជាក់ ឆ្លងកាត់ផ្លូវក្តារឈើ ដោយអ្នកទស្សនាអាចគយគន់សួនផ្លែឈើ បន្លែ និងចម្ការម្នាស់តូចៗរបស់ប្រជាជនក្នុងតំបន់។ នៅទីនោះក៏មានភោជនីយដ្ឋាន ហាងលក់ទំនិញតម្លៃសមរម្យ និងហាងលក់ភេសជ្ជៈខ្នាតតូចផងដែរ។

២.កោះ Kusu៖ កោះ Kusu ដែលគេស្គាល់ថាជាកោះអណ្តើក គឺជាកន្លែងដែលរួមបញ្ចូលគ្នានូវវប្បធម៌ប្រជាប្រិយ និងតម្លៃបេតិកភណ្ឌទាំងពីប្រទេសចិន និងម៉ាឡេស៊ី។ រឿងព្រេងរបស់កោះនេះគឺនិយាយអំពីអណ្តើកយក្សមួយក្បាលដែលបានប្រែក្លាយទៅជាកោះមួយ ដើម្បីជួយសង្រ្គោះអ្នកនេសាទពីរនាក់ដែលលិចកប៉ាល់នោះគឺជនជាតិម៉ាឡេ និងជនជាតិចិន។ នៅពេលទៅដល់កោះអ្នកទស្សនានឹងឃើញ Wishing Well ដែលជាទីតាំងសម្រាប់បួងសួងអាចធ្វើឱ្យបំណងប្រាថ្នាក្លាយជាការពិត។ ប្រជាជននៅទីនេះក៏មានពិធីបោះកាក់ចូលទៅក្នុងអណ្តូងដើម្បីបន្លឺកណ្ដឹងសុំសេក្តីសុខផងដែរ។

៣.កោះ Sister’s Island៖ កោះ Sister’s Island ស្ថិតនៅក្នុងប្រជុំកោះភាគខាងត្បូងនៃប្រទេសសិង្ហបុរី គឺជាចង្កោមនៃកោះតូចៗចំនួនពីរ រួមមានកោះ Big Sister’s Island និង Little Sister’s Island ដែលបម្រើសម្រាប់តែការអភិរក្ស និងស្រាវជ្រាវប៉ុណ្ណោះ។ ដោយសារតែភាពស្ងប់ស្ងាត់ និងភាពស្រស់ស្អាតនៃព្រៃធ្វើឱ្យកន្លែងនេះជាកន្លែងសម្រាកឆ្ងាយពីជីវិតទីក្រុងដ៏អ៊ូអរ ហើយត្រូវបានគេហៅថាជា “ឋានសួគ៌សមុទ្រ”។

៤.ផ្លូវ John’s និងកោះ Lazarus៖ កោះ Lazarus និងឆ្នេរនៅលើកោះ St. John’s គឺជាកន្លែងដ៏ល្អសម្រាប់អ្នកដែលចូលចិត្តហែលទឹក ងូតទឹកក្រោមពន្លឺព្រះអាទិត្យ ឬសម្រាកកាយដោយរលកសមុទ្រ។ វាក៏មានកន្លែងពិកនិកជាច្រើនទៀតនៅលើកោះដែលមានកៅអីអង្គុយ និងតុអាហារ។ លើសពីនេះអ្នកទេសចរអាចស្វែងយល់ពីប្រព័ន្ធអេកូឡូស៊ីសមុទ្រដ៏សម្បូរបែបនូវជុំវិញកោះនេះបានផងដែរ។ ទន្ទឹមនឹងនេះកោះ St. John’s ក៏មានផ្តល់ជូននូវសកម្មភាពកីឡាក្នុងទឹកជាច្រើន រួមមានៈ យូហ្គាអណ្តែតទឹក ជិះកង់លើសមុទ្រ ក្រោកឈរឡើងជិះក្តារ និងជិះទូកកាយ៉ាក។ ដូច្នេះអ្នកអាចហាត់ប្រាណ សម្រាក និងគយគន់ទេសភាពដ៏សម្បូរបែបនៃប្រជុំកោះដ៏ស្រស់ស្អាតបំផុតមួយនៅភាគខាងត្បូង៕