យោងតាមការស្រាវជ្រាវថ្មីមួយបញ្ជាក់ថា ការស្តាប់ចម្រៀង ឬការលេងតន្ត្រីពេញមួយជីវិតមានទំនាក់ទំនងល្អជាមួយសុខភាពខួរក្បាល ជាពិសេស នៅពេលមានវ័យកាន់តែចាស់ ។ អ្នកស្រាវជ្រាវមកពីសាកលវិទ្យាល័យ Exeter ក្នុងទីក្រុង Exeter ប្រទេសអង់គ្លេស បានស្រាវជ្រាវតាមអនឡាញលើក្រុមមនុស្សអាយុចាប់ពី៤០ឆ្នាំឡើងទៅ គឺឱ្យពួកគេឆ្លើយសំណួរពីការលេងតន្ត្រី ឬការច្រៀងចម្រៀង ដើម្បីរកចម្លើយថា តើសកម្មភាពពាក់ព័ន្ធនឹងសំឡេងភ្លេងបានប៉ះពាល់ដល់សុខភាពខួរក្បាលយ៉ាងណាខ្លះ?

ការស្រាវជ្រាវនេះមានឈ្មោះថា «Protect» ដែលមានអ្នកចូលរួមស្មើជាង២៥.០០០នាក់ ។ អ្នកស្រាវជ្រាវបានចំណាយពេលរហូតដល់ជាង១០ឆ្នាំ ដើម្បីស្រាវជ្រាវអំពីការលេងតន្ត្រីពេញមួយជីវិត ព្រមទាំងធ្វើតេស្តខួរក្បាលអ្នកចូលរួមផងដែរ ។

រីឯលទ្ធផលការស្រាវជ្រាវបង្ហាញថា ការលេងតន្ត្រី ជាពិសេស ព្យ៉ាណូ គឺធ្វើឱ្យប្រព័ន្ធចងចាំល្អប្រសើរ ហើយវាពាក់ព័ន្ធនឹងសមត្ថភាពដោះស្រាយបញ្ហាលំបាកៗផងដែរ ដែលជាជំនាញសំខាន់សម្រាប់ភាពជោគជ័យក្នុងការសិក្សា, ការធ្វើការ, ការធ្វើការជាក្រុម, ភាពច្នៃប្រឌិត និងការដោះស្រាយបញ្ហាទាំងអស់ពេញមួយជីវិត ។ ក្រៅពីនេះ ការច្រៀងចម្រៀងក៏អាចជួយឱ្យសុខភាពខួរក្បាលល្អផងដែរ ។

Anne Corbett ជាសាស្ត្រាចារ្យផ្នែកស្រាវជ្រាវខួរក្បាលនៅសាកលវិទ្យាល័យ Exeter និយាយថា ការស្រាវជ្រាវមួយចំនួនបានស្រាវជ្រាវពីផលប្រយោជន៍របស់តន្ត្រីចំពោះសុខភាពខួរក្បាល ប៉ុន្តែការស្រាវជ្រាវ «Protect» បានបើកឱកាសឱ្យអ្នកស្រាវជ្រាវសិក្សាពីទំនាក់ទំនងរវាងប្រសិទ្ធភាពខួរក្បាល និងតន្ត្រីក្នុងក្រុមមនុស្សចាស់ ។ យើងគិតថា ការលេងតន្ត្រី ឬការច្រៀងចម្រៀង គឺជាវិធីមួយជួយដល់ដំណើរការខួរក្បាល, ជួយបង្កើនភាពបត់បែនរបស់ខួរក្បាល និងជួយពន្យារពេលខូចខួរក្បាល ។

សាស្ត្រាចារ្យ Anne Corbett និយាយថា ៖ «បើទោះជាត្រូវស្រាវជ្រាវបន្ថែមទៀតក្តី ប៉ុន្តែលទ្ធផលការស្រាវជ្រាវរបស់យើងបង្ហាញថា ការជំរុញឱ្យសិក្សាផ្នែកតន្ត្រីនឹងក្លាយជាផ្នែកដ៏សំខាន់ ដើម្បីធ្វើឱ្យសុខភាពខួរក្បាលដំណើរការល្អ ។ យើងគួរតែលើកទឹកចិត្តឱ្យមនុស្សចាស់លេងតន្ត្រីឡើងវិញ ពីព្រោះតន្ត្រីមានប្រយោជន៍សម្រាប់អ្នកជំងឺខួរក្បាល» ។

លោក Stewart Douglas ជាអ្នកលេងតន្ត្រីមានវ័យ៧៨ឆ្នាំ និយាយថា លោកបានរៀនលេងតន្ត្រីតាំងពីនៅក្មេងមកម៉្លេះ ។ លោកបានហ្វឹកហាត់លេងតន្ត្រីរហូតមក ហើយបើទោះជាមានការងារធ្វើក្តី ក៏លោកពុំបោះបង់តន្ត្រីដែរ ។ លោកនិយាយថា ៖ «ពេលមកចូលរួមជាមួយក្រុមតន្ត្រី និងទៅលេងតន្ត្រីនៅតាមទីកន្លែងផ្សេងៗ វាធ្វើឱ្យខ្ញុំមើលឃើញថា តន្ត្រីមានថាមពលខ្លាំងសម្រាប់អ្នកបាត់បង់ការចងចាំ ។ តន្ត្រីករអាយុច្រើនដូចខ្ញុំ គឺខ្ញុំយល់ថា ការលេងតន្ត្រីពិតជាមានចំណែកសំខាន់ជួយឱ្យខួរក្បាលរឹងមាំ» ៕

បរទេស៖ ហ្គេម Netflix ជាង ៩០ ដែលធ្លាប់បង្ហាញខ្លួននៅលើ App Store ក្នុងប្រទេសវៀតណាម ឥឡូវនេះត្រូវបានក្រុមហ៊ុនលុបហ្គេមទាំងអស់ចេញពីប្រទេសនេះ។
យោងតាម Vnexpress ហ្គេមទាំងនេះត្រូវបានចេញផ្សាយដោយក្រុមហ៊ុន Netflix នៅលើកម្មវិធីរបស់ខ្លួន និងតាមរយៈ Apple App Store និង Google Play Store ដើម្បីឱ្យអ្នកប្រើប្រាស់អាចទាញយកវាដោយសេរីពីហាងកម្មវិធីផ្សេងៗ ឬពីក្នុងកម្មវិធី Netflix ផ្ទាល់ក៏បាន។

ទោះជាយ៉ាងណាថ្មីៗនេះអ្នកប្រើប្រាស់ Netflix ក្នុងប្រទេសវៀតណាមមានការភ្ញាក់ផ្អើលនៅពេលចូលប្រើកម្មវិធីទូរស័ព្ទ ពួកគេស្រាប់តែលែងឃើញផ្នែកហ្គេមចំនួន ៩០ របស់ Netflix នៅក្នុងទូរស័ព្ទដូចពីមុនទៀតហើយ។ យោងតាមនាយកដ្ឋានផ្សព្វផ្សាយ ទូរទស្សន៍ និងព័ត៌មានអេឡិចត្រូនិក បានឱ្យដឹងថា មូលហេតុដែលក្រុមហ៊ុនលុបហ្គេមទាំងអស់ចេញពីប្រទេសវៀតណាម គឺដោយសារនាយកដ្ឋានបានរកឃើញថាក្រុមហ៊ុននេះកំពុងផ្សាយពាណិជ្ជកម្មហ្គេមអេឡិចត្រូនិចដែលគ្មានអាជ្ញាប័ណ្ណនៅលើកម្មវិធី Netflix សម្រាប់អ្នកប្រើប្រាស់វៀតណាម និងផ្តល់ហ្គេមអេឡិចត្រូនិចជាច្រើននៅលើ Vietnam App Store និង Google Play Store ដោយមិនទទួលបានការអនុញ្ញាតចាំបាច់នៅក្នុងប្រទេសវៀតណាម។

នេះបំពានលើមាត្រា 31 នៃក្រឹត្យលេខ 72/2013/ND-CP របស់រដ្ឋាភិបាលស្តីពីការគ្រប់គ្រង ការផ្តល់ និងការប្រើប្រាស់សេវាអ៊ីនធឺណិត និងព័ត៌មានអនឡាញ។ ដូច្នេះនាយកដ្ឋានផ្សព្វផ្សាយ ទូរទស្សន៍ និងព័ត៌មានអេឡិចត្រូនិក បានចេញលិខិតផ្លូវការមួយទៅកាន់ក្រុមហ៊ុន Netflix ដោយស្នើសុំឱ្យបញ្ឈប់ការផ្សាយពាណិជ្ជកម្ម និងការបញ្ចេញហ្គេមអេឡិចត្រូនិកនៅលើកម្មវិធី Netflix និងហាងកម្មវិធីត្រឹមថ្ងៃទី ២៥ ខែមេសា ឆ្នាំ ២០២៤។ ប្រសិនបើក្រុមហ៊ុនមិនអនុវត្តតាមក្រសួងព័ត៌មានទេ និងទំនាក់ទំនងសម្របសម្រួលជាមួយរដ្ឋពាក់ព័ន្ធទេ នោះស្ថាប័នគ្រប់គ្រងនឹងដោះស្រាយស្ថានការណ៍នេះតាមច្បាប់វៀតណាម។

យោងតាមប្រភពពី VietNamNet នៅពេលទទួលបានលិខិតផ្លូវការ Netflix បានទាក់ទងភ្នាក់ងារត្រួតពិនិត្យភ្លាមៗ ដើម្បីស្វែងយល់ពីលក្ខខណ្ឌច្បាប់សម្រាប់ការចេញផ្សាយហ្គេមអេឡិចត្រូនិកនៅក្នុងប្រទេសវៀតណាម។ ជាលទ្ធផលក្រុមហ៊ុន Netflix បានសម្រេចចិត្តបញ្ឈប់ការផ្សាយពាណិជ្ជកម្ម និងលុបហ្គេមអេឡិចត្រូនិចទាំងអស់ចេញពីកម្មវិធីរបស់ខ្លួន រួមទាំង Apple App Store និង Google Play Store ផងដែរ។ ក្រុមហ៊ុនក៏បានបង្ហាញពីបំណងរបស់ខ្លួនក្នុងការបន្តទទួលបានការណែនាំ និងការគាំទ្រពីភ្នាក់ងារនិយតកម្មក្នុងអំឡុងពេលប្រតិបត្តិការរបស់ខ្លួននៅក្នុងប្រទេសវៀតណាម។ យោងតាមការសង្កេត អ្នកប្រើប្រាស់ Netflix ជាច្រើននៅក្នុងប្រទេសវៀតណាមនឹងមិនអាចលេងហ្គេមនៅលើវេទិកានេះបានទៀតទេ៕

ប្រទេសថៃ ៖ យន្តហោះដឹកអ្នកដំណើរ១គ្រឿងប្រភេទ Boeing 777-300ER របស់ក្រុមហ៊ុនអាកាសចរណ៍ Singapore Airlines ជើងហោះហើរ SQ321 ដែលចាកចេញពីទីក្រុងឡុងដ៍ (ប្រទេសអង់គ្លេស) ទៅកាន់ប្រទេសសិង្ហបុរី បានប្រកាសអាសន្ន និងសុំចុះចតជាបន្ទាន់នៅអាកាសយានដ្ឋានសុវណ្ណភូមិ ទីក្រុងបាងកក ប្រទេសថៃ ដោយសារតែអាកាសធាតុប្រែប្រួលបណ្តាលឱ្យសម្ពាធខ្យល់បុកខ្លាំង ។

កាលពីថ្ងៃទី២១ ខែឧសភា ឆ្នាំ២០២៤ សារព័ត៌មានបរទេសរាយការណ៍ថា យន្តហោះដឹកអ្នកដំណើរប្រភេទ Boeing 777-300ER របស់ក្រុមហ៊ុនអាកាសចរណ៍ Singapore Airlines បានចុះចតនៅអាកាសយានដ្ឋានសុវណ្ណភូមិ ប្រទេសថៃ ដោយសុវត្ថិភាព ។ យន្តហោះនេះបានដឹកអ្នកដំណើរចំនួន២១១នាក់ ព្រមទាំងបុគ្គលិកបម្រើការក្នុងយន្តហោះ ចំនួន១៨នាក់ ។ ហេតុការណ៍នេះបណ្តាលឱ្យអ្នកដំណើរស្លា.ប់ ម្នាក់ និងរងរបួសជាង៣០នាក់ទៀត ត្រូវបានអាជ្ញាធរថៃបញ្ជូនទៅមន្ទីរពេទ្យ ។

លោក Keerati Kitmanawat អគ្គនាយកក្រុមហ៊ុនអាកាសយានដ្ឋានថៃនិយាយថា ខាងអាកាសយានដ្ឋានសុវណ្ណភូមិបានបញ្ជូនអ្នករងរបួសទាំងអស់របស់ក្រុមហ៊ុនអាកាសចរណ៍ Singapore Airlines ទៅកាន់មន្ទីរពេទ្យនៅក្បែរអាកាសយានដ្ឋានរួចរាល់ហើយ ក្រោយពីយន្តហោះនេះសុំចុះចតបន្ទាន់នៅអាកាសយានដ្ឋានសុវណ្ណភូមិ កាលពីវេលាម៉ោង៣និង៣៤នាទីល្ងាច ។

លោកនិយាយថា ៖ «យើងបានចាត់ការគ្រប់យ៉ាងរួចអស់ហើយ រីឯមូលហេតុដំបូង គេសន្និដ្ឋានថា ដោយសារសម្ពាធបុកខ្យល់ខ្លាំងពេក ទើបបណ្តាលឱ្យយន្តហោះធ្លាក់ពីលើអាកាស ។ បើតាមច្បាប់របស់យន្តហោះ គឺយន្តហោះត្រូវតែជូនដំណឹងទៅអ្នកដំណើរទាំងអស់ក្នុងករណីមានហេតុការណ៍គ្រោះថ្នាក់» ។

បើតាមវីដេអូដែលផ្សព្វផ្សាយក្នុងបណ្តាញសង្គមបង្ហាញថា សម្ភារៈជាច្រើនក្នុងយន្តហោះបានធ្លាក់ខ្ចាត់ខ្ចាយពេញទាំងអស់ ហើយសម្ភារៈខ្លះទៀតបានធ្លាក់ពីផ្នែកខាងលើចុះមកក្រោម ។ ក្រៅពីនេះ នៅលើដំបូលមានស្នាមប្រឡាក់ពណ៌ក្រហមជាច្រើនចំណុចស្រដៀងនឹងឈាម ។ បើតាមសេចក្តីរាយការណ៍ចុងក្រោយបញ្ជាក់ថា អ្នកស្លាប់ក្នុងហេតុការណ៍នេះ គឺជាបុរសជនជាតិអង់គ្លេសឈ្មោះ Geoffrey Ralph Kitchen អាយុ៧៣ឆ្នាំ ។

ចុងក្រោយ ទំព័រហ្វេសប៊ុករបស់ក្រុមហ៊ុនអាកាសចរណ៍ Singapore Airlines បានចេញសេចក្តីថ្លែងការណ៍មួយបញ្ជាក់ថា យន្តហោះដឹកដំណើរ ជើងហោះហើរ SQ321 ដែលធ្វើដំណើរពីទីក្រុងឡុងដ៍ ទៅប្រទេសសិង្ហបុរី មានបញ្ហាសម្ពាធខ្យល់បុកខ្លាំងក្នុងអំឡុងពេលហោះហើរ ទើបបណ្តាលឱ្យយន្តហោះបង្ខំចិត្តចុះចតបន្ទាន់នៅទីក្រុងបាងកក កាលពីថ្ងៃទី២១ ខែឧសភា ឆ្នាំ២០២៤ ។ ក្រុមហ៊ុនសោកស្តាយយ៉ាងខ្លាំងចំពោះហេតុការណ៍នេះ និងសូមចូលរួមរំលែកទុក្ខជាមួយគ្រួសារអ្នកស្លាប់ផងដែរ ។

ជំហានដំបូង ក្រុមហ៊ុនអាកាសចរណ៍នឹងជួយដល់អ្នកដំណើរទាំងអស់ ព្រមទាំងបុគ្គលិកបម្រើការក្នុងយន្តហោះទៅតាមលទ្ធភាព ។ ក្រុមហ៊ុនបានសហការជាមួយមន្ត្រីអាកាសចរណ៍របស់ប្រទេសថៃ ដើម្បីផ្តល់ជំនួយចាំបាច់ផ្នែកពេទ្យសម្រាប់អ្នកដំណើររងរបួស និងបញ្ជូនក្រុមការងារទៅទីក្រុងបាងកក ៕

អ្នកលក់រាយផ្លែឈើលំដាប់ថ្នាក់ខ្ពស់ដែលមានមូលដ្ឋាននៅរដ្ឋកាលីហ្វ័រញ៉ាមានឈ្មោះថា Melissa កំពុងផ្តល់ជូនម្នាស់ Rubyglow ចំនួន៥០ផ្លែក្នុងតម្លៃជិត៤០០ដុល្លារ( ៣៩៥.៩៩ដុល្លារ) ក្នុងមួយផ្លែដែលមានទម្ងន់ ៨០០ ក្រាម(៨ខាំ) ដែលផ្គត់ផ្គង់ដោយអ្នកផលិតផ្លែឈើប្រណីត Del Monte ។
លោក Del Monte បាននិយាយថា ម្នាស់ Rubyglow គឺជាលទ្ធផលនៃការស្រាវជ្រាវរយៈពេល ១៥ឆ្នាំ ដោយរួមបញ្ចូលគ្នានូវម្នាស់បុរាណជាមួយនឹងពូជ Morada ដ៏កម្រ។ ក្រុមហ៊ុននេះរីកចម្រើនតែក្នុងបរិមាណកំណត់នៅក្នុងប្រទេសចិនប៉ុណ្ណោះ មុនពេលដាំដុះបន្ថែមទៀតនៅអាម៉េរិក។ ផ្លែម្នាស់ដែលត្រូវបានលក់នៅលើផលិតផលរបស់ Melissa ត្រូវបានប្រមូលផលនៅក្នុងប្រទេសកូស្តារីកា។

ក្នុងតម្លៃជិត ៤០០ ដុល្លារ អតិថិជននឹងទទួលបានម្នាស់មួយផ្លែជាមួយនឹងផ្នែកខាងក្រៅពណ៌ក្រហមដ៏ទាក់ទាញ ហើយម្នាស់ប្រភេទនេះមានជាតិអាស៊ីតតិចតួច នេះបើយោងតាមក្រុមហ៊ុនផលិត។ ផ្លែឈើនីមួយៗត្រូវបាន «បង្ហាញយ៉ាងល្អឥតខ្ចោះនៅក្នុងការវេចខ្ចប់ប្រកបដោយសិល្បៈ»។

នាយកផ្នែកទំនាក់ទំនងសាធារណៈ Melissa បាននិយាយថាពាក់កណ្តាលនៃម្នាស់ត្រូវបានលក់ក្នុងខែមុន ដោយមានអ្នកទិញរួមទាំងភោជនីយដ្ឋាននៅ Las Vegas និង Southern California ។ ម្នាស់នេះនៅមានទីផ្សារទោះបីជាមានចំនួនតិចបំផុតក៏ដោយប៉ុន្តែមិនមែនសម្រាប់មនុស្សគ្រប់គ្នានោះទេ។ ដើម្បីបង្កើតភាពភ្ញាក់ផ្អើលបន្ថែមទៀត Melissa បានទាក់ទងអ្នកមានឥទ្ធិពលធ្វើម្ហូបជាច្រើននាក់ រួមទាំងមេចុងភៅ Bo Corley ដើម្បីចែករំលែក នៅលើប្រព័ន្ធផ្សព្វផ្សាយសង្គម។ មេចុងភៅរូបនេះ គិតថាម្នាស់នេះគឺ គួរឱ្យចាប់ប៉ុន្តែក៏ទទួលស្គាល់ថា មានអតិថិជនដែលចំណាយលុយទិញម្នាស់ Rubyglow មិនមែនដើម្បីរសជាតិទេ ប៉ុន្តែសម្រាប់រូបរាងដ៏រស់រវើកតែមួយគត់ ដើម្បីបង្ហាញថាពួកគេមានវាប៉ុណ្ណោះ។

យោងតាមសារព័ត៌មាន CNN បានចុះផ្សាយថាជនជាតិអាម៉េរិកបានចាប់អារម្មណ៍ជាពិសេសចំពោះផ្លែឈើថ្មីៗក្នុងប៉ុន្មានឆ្នាំថ្មីៗនេះហើយនៅតែមានអតិថិជនដែលមានប្រាក់ចំណូលល្អដែលសុខចិត្តចំណាយលើការទិញផ្លែឈើដែលមានតម្លៃថ្លៃៗ៕

ប្រទេសថៃ ៖ សារព័ត៌មានបរទេសជាច្រើនបានផ្សព្វផ្សាយពីស្ថានភាពបរិស្ថានបច្ចុប្បន្នរបស់ប្រទេសថៃថា ថៃបានក្លាយជាគោលដៅទទួលយកកាកសំណល់ពុល, សំរាមអេឡិចត្រូនិក និងសំរាមផ្លាស្ទិកមកពីប្រទេសជឿនលឿនជាច្រើននៅលើពិភពលោក ។ សារព័ត៌មានបរទេសបញ្ជាក់ថា កាកសំណល់គីមី និងសំរាមអេឡិចត្រូនិកដែលបញ្ជូនមកពីប្រទេសជឿនលឿនបានធ្វើឱ្យប៉ះពាល់ដល់ការរស់នៅ និងសុខភាពរបស់ពលរដ្ឋថៃយ៉ាងខ្លាំង ។

តាំងពីរដ្ឋាភិបាលចិនបានប្រកាសអនុវត្តច្បាប់ថ្មីកំណត់ការនាំចូលសំរាមផ្លាស្ទិក និងសំរាមអេឡិចត្រូនិកយ៉ាងតឹងរ៉ឹង បានធ្វើឱ្យប្រទេសជឿនលឿនជាច្រើន ដូចជា ៖ អាមេរិក, អង់គ្លេស, ចិន, កូរ៉េខាងត្បូង, ជប៉ុន, សិង្ហបុរី និងអូស្ត្រាលី នាំគ្នាផ្តោតមកលើគោលដៅថ្មីដើម្បីបញ្ជូនកាកសំណល់គ្រោះថ្នាក់ដល់បរិស្ថាន និងពិបាកកែច្នៃឡើងវិញ ។ រីឯគោលដៅថ្មីនេះ គឺបណ្តាប្រទេសក្នុងតំបន់អាស៊ី ដែលគ្មានច្បាប់តឹងរ៉ឹងសម្រាប់គ្រប់គ្រងបរិស្ថាន ។

តាមការផ្សព្វផ្សាយរបស់សារព័ត៌មាន ABC News និងសារព័ត៌មាន The Guardian បានបញ្ជាក់ថា ថៃស្ថិតក្នុងចំណោមប្រទេសគោលដៅថ្មីសម្រាប់បោះបង់កាកសំណល់ពុល ដោយសារមានអាជីវកម្មបែងចែក និងកៃច្នៃសំរាមដុះដូចផ្សិតនៅតាមបណ្តាខេត្តរបស់ថៃ ។ អាជីវកម្មភាគច្រើនជាកម្មសិទ្ធិរបស់ក្រុមហ៊ុនខុសច្បាប់ គ្មានលិខិតអនុញ្ញាតត្រឹមត្រូវ ហើយក្រុមហ៊ុនខ្លះមានម្ចាស់ជាជនជាតិថៃ និងខ្លះទៀតមានម្ចាស់ជាជនជាតិចិន ។

សារព័ត៌មាន ABC News បញ្ជាក់ថា ការកែច្នៃកាកសំណល់នៅប្រទេសថៃ គឺជាអាជីវកម្មស្វែងរកប្រាក់ចំណេញរបស់ក្រុមហ៊ុន ដោយសារពួកគេអាចបំបែកសារធាតុរ៉ែ និងលោហៈដ៏មានតម្លៃចេញពីសំរាមអេឡិចត្រូនិកយកទៅលក់បន្តទៀត ដូចជា ៖ មាសធម្មតា, មាសក្រហម និងប្រាក់ ។ ប៉ុន្តែសំរាមអេឡិចត្រូនិកមានតម្លៃទាំងនេះ គឺលាយឡំទៅដោយសារធាតុគីមីពុលផងដែរ ដូចជា ៖ កាដ្យូម, សំណរ និងបារ៉ត ។ បើពួកគេធ្វើពុំបានល្អក្នុងអំឡុងពេលបំបែកសារធាតុរ៉ែមានតម្លៃចេញពីសំរាមទេនោះ នឹងធ្វើឱ្យជាតិពុលបង្កគ្រោះថ្នាក់ដល់បរិស្ថាន ។

ចំណែកសារព័ត៌មាន Channel News Asia របស់ប្រទេសសិង្ហបុរីធ្លាប់បានបញ្ជូនបុគ្គលិករបស់ខ្លួន ដើម្បីសរសេរព័ត៌មានអំពីកាកសំណល់ពុលនៅខេត្តសមុទ្រប្រាកាន ប្រទេសថៃផងដែរ ។ សារព័ត៌មាននេះរាយការណ៍ដូចគ្នាថា ថៃបានក្លាយជាគោលដៅមួយដែលបណ្តាប្រទេសជឿនលឿនបានបញ្ជូនកាកសំណល់ពុលមកបោះចោល ។

សារព័ត៌មាន Channel News Asia បានសម្ភាសន៍ពលរដ្ឋម្នាក់រស់នៅភូមិណងផាវ៉ា ខេត្តរ៉ាក់យ៉ង ព្រមទាំងក្រុមអភិរក្សបរិស្ថាន ហើយសន្និដ្ឋានថា កាកសំណល់គីមី និងសំរាមអេឡិចត្រូនិកដែលបញ្ជូនមកពីប្រទេសជឿនលឿនបានធ្វើឱ្យប៉ះពាល់ដល់ការរស់នៅ និងសុខភាពរបស់ពលរដ្ឋយ៉ាងខ្លាំង ។ ពលរដ្ឋនិយាយថា គ្មានស្ថាប័នរដ្ឋាភិបាលណាមួយចាត់វិធានការក្រុមហ៊ុនកែច្នៃសំរាមទាំងនេះទេ ។

រោងចក្រកែច្នៃសំរាមដែលដំណើរការដោយខុសច្បាប់នៅប្រទេសថៃ គឺបានបំផ្លាញបរិស្ថាន និងសុខភាពពលរដ្ឋ ។ បើរោងចក្រទាំងនេះត្រូវបានបញ្ជាឱ្យបិទដំណើរការ ក៏ពួកគេនៅតែអាចដំណើរការជាថ្មីឡើងវិញ និងបង្កបញ្ហាដល់បរិស្ថានបន្តទៀត ៕

ចំនេះជំនាញគឺជាអ្វីដែលមនុស្សគ្រប់រូបត្រូវតែមាន នៅពេលសិស្សានុសិស្សបញ្ចប់ថ្នាក់វិទ្យាល័យពួកគេនឹងចូលសាកលវិទ្យាល័យដើម្បីជ្រើសរើសជំនាញណាមួយដែលពួកគេចូលចិត្ត ដូច្នេះការរៀនអំពីមុខជំនាញ គឺជាជំហានដ៏សំខាន់មួយសម្រាប់សិស្សក្នុងការអភិវឌ្ឍន៍ខ្លួនឱ្យប្រសើឡើងនាពេលអនាគត។ ទោះជាយ៉ាងណាការអភិវឌ្ឍន៍នៃបច្ចេកវិទ្យាកំពុងធ្វើឱ្យវិជ្ជាជីវៈជាច្រើនប្រឈមនឹងហានិភ័យនៃការបាត់ខ្លួន ដោយសារតែបច្ចេកវិទ្យាអាចនឹងដណ្តើមការងាររបស់មនុស្សនាពេលអនាគត។ ដូច្នេះខាងក្រោមនេះគឺជាមុខវិជ្ជាចំនួន ៤ ដែលអ្នកជំនាញជាច្រើនបានព្យាករថាអាចនឹងបាត់ខ្លួននៅពេលអនាគត៖

១.អ្នកសរសេរកម្មវិធី៖ កំណើតនៃកម្មវិធីជជែក AI កំពុងធ្វើឱ្យអ្នកសរសេរកម្មវិធីប្រឈមមុខនឹងហានិភ័យខ្ពស់នៃភាពអត់ការងារធ្វើ។ ជាពិសេសចាប់តាំងពី Chat GPT ដែលជា chatbot បង្កើតឡើងដោយ OpenAI ត្រូវបានចេញផ្សាយជាសកល។ បច្ចុប្បន្ននេះ ប្រហែល ៤០% នៃបន្ទាត់ពាក្យបញ្ជាកម្មវិធីកុំព្យូទ័រកំពុងត្រូវបានកែសម្រួលដោយបញ្ញាសិប្បនិមិត្ត ដោយមិនចាំបាច់ប្រើមនុស្ស ជួយកាត់បន្ថយពេលវេលាដើម្បីបញ្ចប់ការងារ និងសម្រេចបាននូវប្រសិទ្ធភាពល្អបំផុត។

២.មេធាវី៖ យោងតាមអត្ថបទមួយនៅលើកាសែត VnExpress មេធាវីគឺជាវិជ្ជាជីវៈមួយដែលអាចនឹងរលាយបាត់នាពេលអនាគត នៅពេលដែលបញ្ញាសិប្បនិម្មិត (AI) អាចត្រូវបានប្រើដើម្បីជំនួសអ្នកជំនាញក្នុងវិស័យច្បាប់។ សូម្បីតែជាមួយនឹងស្ថានភាពបច្ចេកវិទ្យាបច្ចុប្បន្ន ដោយផ្អែកលើខ្លឹមសារច្បាប់បច្ចុប្បន្ន និងសំណួរបញ្ចូលរបស់អតិថិជន ប្រព័ន្ធ AI អាចផ្តល់នូវការឆ្លើយតបត្រឹមត្រូវ និងមានប្រយោជន៍បំផុត។

៣.រចនាក្រាហ្វិក៖ បច្ចុប្បន្ននេះនៅលើពិភពលោកមានកម្មវិធីបញ្ញាសិប្បនិមិត្តជាច្រើនដែលមានសមត្ថភាពរចនាផលិតផលដោយប្រើពេលតែប៉ុន្មាននាទីប៉ុណ្ណោះ។ ជាឧទាហរណ៍ Dall.E និង MidJourney បានធ្វើឱ្យមនុស្សជាច្រើននៅក្នុងឧស្សាហកម្មរចនាក្រាហ្វិចឈប់ធ្វើការ ពីព្រោះអាជីវកម្មគ្រាន់តែត្រូវការការបញ្ចូលទៅក្នុងឧបករណ៍ AI ទាំងនេះ ហើយពួកគេអាចបង្កើតផលិតផលក្រាហ្វិក និងឡូហ្គោជាមូលដ្ឋានបាន។ ទោះជាយ៉ាងណាក៏ដោយ AI អាចជំនួសបានតែផ្នែកមួយនៃការងាររបស់សិល្បករប៉ុណ្ណោះ ព្រោះស្នាដៃដែលបានបង្កើតត្រូវតែមានលក្ខណៈដើម និងផ្អែកលើបំណងប្រាថ្នា និងការបំផុសគំនិតពិសេសរបស់វិចិត្រករ។

៤.ការបកប្រែ៖ ការលេចឡើងនៃកម្មវិធីសំឡេង និងអត្ថបទជួយឱ្យមនុស្សបកប្រែកាន់តែងាយស្រួល ជំនួសឱ្យការរកមើល និងបកប្រែអត្ថបទតាមតម្រូវការ កម្មវិធីទាំងនេះឥឡូវនេះនឹងជួយអ្នកបង្កើតការបកប្រែដែលមានលក្ខណៈអក្សរ និងលឿនជាងមុន។ ការបង្ហាញតាមអ៊ីនធឺណិតជាច្រើនបង្ហាញថា ChatGPT ធ្វើការងារបកប្រែប្រសើរជាង Google Translate ទៅទៀត។ ដូច្នេះនៅពេលដែលក្រុមហ៊ុនប្រកួតប្រជែងដើម្បីកែលម្អគំរូភាសារបស់ពួកគេ និងបណ្តុះបណ្តាលប្រព័ន្ធរបស់ពួកគេជាភាសាបរទេស តម្រូវការសម្រាប់អ្នកបកប្រែកម្រិតចូលនឹងថយចុះ៕

ប្រទេសអូស្ត្រាលី ៖ មុនសម្រេចចិត្តចិញ្ចឹមឆ្មា អ្នកចិញ្ចឹមឆ្មាភាគច្រើនពុំបានគិតដល់ចំណុចនេះទេ! អាជ្ញាធរអូស្ត្រាលីកំណត់ឱ្យពលរដ្ឋចិញ្ចឹមឆ្មាក្នុងផ្ទះ ដោយសារមូលហេតុមួយដែលគួរឱ្យភ្ញាក់ផ្អើល ។ ពលរដ្ឋអូស្ត្រាលីបានចិញ្ចឹមឆ្មាកាន់តែច្រើននាពេលបច្ចុប្បន្ន បើតាមការកត់ត្រាបង្ហាញថា មានឆ្មាសរុបស្មើរហូតដល់ជាង៥លានក្បាល ហើយម្ចាស់ឆ្មាភាគច្រើនបានព្យាយាមចិញ្ចឹមឆ្មានៅតែក្នុងផ្ទះ ឬឱ្យឆ្មារត់ទៅ-មកនៅបរិវេណទទួលខុសត្រូវ ។

បច្ចុប្បន្ន អាជ្ញាធរក្នុងតំបន់មួយចំនួនបានកំណត់ឱ្យពលរដ្ឋចិញ្ចឹមឆ្មាក្នុងផ្ទះប៉ុណ្ណោះ ប៉ុន្តែមានឆ្មាផ្សេងទៀតរត់លេងនៅបរិវេណក្រៅផ្ទះ, ដើរតាមផ្លូវ ឬដើរតាមសួនច្បារក្រោយផ្ទះអ្នកជិតខាង ។ អាជ្ញាធរក្នុងតំបន់១ក្នុងចំណោម៣ នៅប្រទេសអូស្ត្រាលីបានកំណត់ឱ្យពលរដ្ឋទាំងអស់ត្រូវទុកឆ្មាក្នុងផ្ទះនៅពេលយប់ ឬទុកឆ្មាក្នុងផ្ទះរយៈពេល២៤ម៉ោង ។ ការកំណត់បែបនេះភាគច្រើនស្ថិតនៅទីក្រុងក្នុងរដ្ឋ Australian Capital Territory និង Victoria ។ ចំណែកមូលហេតុដែលអាជ្ញាធរប្រាប់ឱ្យពលរដ្ឋទុកឆ្មានៅក្នុងផ្ទះរបស់ខ្លួន ដោយសារឆ្មាជាទីស្រឡាញ់ទាំងនេះអាចរំខានអ្នកជិតខាង ។

បើតាមរបាយការណ៍បង្ហាញថា ឆ្មាអាចសម្លាប់សត្វស្លាបជាច្រើនក្បាលក្នុង១ថ្ងៃ ហើយសត្វស្លាបស្មើជាង៩៩% បានរស់នៅតាមតំបន់ធម្មជាតិ និងជាសត្វសាបជិតផុតពូជស្មើជាង៧១ប្រភេទ ។ ជាទូទៅ ឆ្មាគ្មានម្ចាស់បានសម្លាប់សត្វស្លាបជាមធ្យមចំនួន៣១៦លានក្បាលក្នុង១ឆ្នាំ ខណៈឆ្មាមានម្ចាស់បានសម្លាប់សត្វស្លាបអស់៦១លានក្បាលក្នុង១ឆ្នាំ ។

សមាគមអភិរក្សសត្វរបស់អង់គ្លេសលើកឡើងថា ក្នុង១ឆ្នាំៗ ឆ្មាបានសម្លាប់សត្វស្លាបស្មើជាង២៧លានក្បាល ទើបអង្គការ International Union for Conservation of Nature (IUCN) បានចាត់ចំណាត់ថ្នាក់ឱ្យឆ្មាស្ថិតក្នុងបញ្ជីប្រភេទសត្វឈ្លានពាន និងគួរឱ្យខ្លាចបំផុតលើពិភពលោក ។ ការចិញ្ចឹមឆ្មានៅក្នុងផ្ទះ គឺជាការកាត់បន្ថយការសម្លាប់សត្វស្លាប និងសត្វតូចៗ ហើយនឹងធ្វើឱ្យវាមានសុខភាពល្អផងដែរ ។ វានឹងពុំឆ្លងជំងឺពីខាងក្រៅ ហើយអាចចម្លងជំងឺនេះមកមនុស្ស ។

ទោះយ៉ាងណា គោលនយោបាយកំណត់ឱ្យឆ្មាគ្រប់ក្បាលនៅតែក្នុងផ្ទះ ឬស្ថិតនៅផ្ទះពេលយប់នឹងទទួលបានលទ្ធផល បើមានអ្នកអនុវត្តតាម ។ ហេតុនេះ សាកលវិទ្យាល័យ Monash បានស្ទង់មតិមនុស្សជាង៣.៤០០នាក់ ដើម្បីចង់ដឹងថា តើពួកគេនឹងគាំទ្រគោលនយោបាយកំណត់ឱ្យម្ចាស់ឆ្មាទុកឆ្មាក្នុងផ្ទះដែរឬទេ?

តាមលទ្ធផលការស្ទង់មតិបង្ហាញថា អ្នកឆ្លើយតបភាគច្រើនស្មើនឹង៦៦% បានគាំទ្រឱ្យទុកឆ្មានៅក្នុងផ្ទះ ខណៈអ្នកឆ្លើយតប៨% ជំទាស់ ។ រីឯអ្នកឆ្លើយតប២៦%ទៀត មិនច្បាស់លាស់ ។ ក្រៅពីនេះ ឆ្មាស្មើ២លាន២សែនក្បាល (ឬស្មើ៤២%) ត្រូវបានម្ចាស់របស់វាចិញ្ចឹមនៅក្នុងផ្ទះស្រាប់ហើយ ។

ការចិញ្ចឹមឆ្មានៅក្នុងផ្ទះ គឺងាយស្រួលគ្រប់គ្រងពួកវា ប៉ុន្តែបញ្ហាលំបាកបំផុត គឺពិបាកគ្រប់គ្រងឆ្មាគ្មានម្ចាស់ ។ ការប្រមូលឆ្មាគ្មានម្ចាស់បញ្ជូនទៅកន្លែងចិញ្ចឹមឆ្មា និងចាប់ក្រៀវ អាចជាវិធីដោះស្រាយបញ្ហាឆ្មាអនាថាដើរតាមផ្លូវ ដែលតែងតែសម្លាប់សត្វស្លា និងសត្វតូចៗជាប្រចាំ ៕