ភ្នំពេញ៖ ក្រោយពីចេញសេចក្តីប្រកាសស្ដីពីគ្រប់គ្រងការផ្សព្វផ្សាយ តាមប្រព័ន្ធអ៊ីនធឺរណិតរួចមក នៅពេលនេះ ក្រសួងព័ត៌មានព្រមានថានឹងចាត់វិធានការតាមផ្លូវច្បាប់ ចំពោះអ្នកចែកចាយព័ត៌មានមិនពិត តាមបណ្តាញទំនាក់ទំនងសង្គម ហើយការព្រមាននេះនាំឲ្យមានការរិះគន់ពីអង្គការសង្គមស៊ីវិល។
លោក ផុស សុវណ្ណ អគ្គនាយក នៃអគ្គនាយកដ្ឋានព័ត៌មាន និងសោតទស្សន៍ នៃក្រសួងព័ត៌មាន បានថ្លែង នៅក្នុងឱកាសផ្សព្វផ្សាយសេចក្តីប្រកាសរបស់អន្តរក្រសួងថា ចាប់ពីថ្ងៃទី៥ ខែកក្កដា នេះតទៅ ក្រសួងព័ត៌មាននឹងមានវិធានការខ្លះៗហើយ តាមរយៈការអនុវត្តប្រកាសរបស់អន្តរក្រសួង ទៅលើអ្នកចែកចាយព័ត៌មានមិនពិត និងប៉ះពាល់ដល់សន្តិសុខជាតិ។
លោក ផុស សុវណ្ណ បញ្ជាក់ជាថ្មីថា សេចក្តីប្រកាសរបស់អន្តរក្រសួង មិនមានចេតនាណាមួយរឹតបន្តឹងចំពោះអ្នកដែលមាននិន្នាការផ្ទុយពីរដ្ឋាភិបាលនោះទេ ព្រោះច្បាប់នៅក្នុងប្រទេសកម្ពុជា បានធានាលើសេរីភាពក្នុងការបញ្ចេញមតិ។
សូមបញ្ជាក់ថា ប្រកាសរួមគ្នា នៃក្រសួង៣ កាលពីចុងខែឧសភា មានគោលដៅ ប្រឆាំង ទប់ស្កាត់ រាល់ការផ្សព្វផ្សាយរាល់ខ្លឹមសារព័ត៌មាន ឬសារជាអក្សរ សំឡេង វីដេអូ និងទម្រង់ផ្សេងៗទៀត នៅតាមគេហទំព័រ និងបណ្ដាញសង្គម នៅក្នុងប្រទេសកម្ពុជា ដែលមានចេតនាបង្កជាចលាចល។ ព្រោះចលាចល បណ្ដាលឲ្យអន្តរាយដល់វិស័យការពារជាតិ សន្តិសុខជាតិ ទំនាក់ទំនងជាមួយប្រទេសដទៃ សេដ្ឋកិច្ចជាតិ សណ្ដាប់ធ្នាប់សារធារណៈ ការរើសអើងនឹងវប្បធម៌ និងប្រពៃណីជាតិ។
បើតាមប្រកាសអន្ដរក្រសួងកម្រាស់៤ទំព័រដដែល ស្ថាប័ន និងអង្គភាពជំនាញនីមួយៗ ត្រូវបំពេញកាតព្វកិច្ចតាមភារកិច្ចរៀងៗខ្លួន និងត្រូវសហការគ្នា ដើម្បីសម្រេចឲ្យបាននូវគោលដៅខាងដើម។ ក្នុងនោះ ក្រសួងព័ត៌មានត្រូវគ្រប់គ្រងព័ត៌មានដែលផ្សព្វផ្សាយតាមប្រព័ន្ធអេឡិចត្រូនិក ចាត់វិធានការចំពោះប្រព័ន្ធផ្សព្វផ្សាយតាមអេឡិចត្រូនិកណា ដែលមានច្បាប់អនុញ្ញាត តែផ្សព្វផ្សាយលើ្មសច្បាប់ ព្រមទាំងផ្ដល់ព័ត៌មានដល់ក្រសួងប្រៃសណីយ៍ ឲ្យចាត់វិធានការបិទប្រព័ន្ធផ្សព្វផ្សាយតាមអេឡិចត្រូនិកដែលបើកអាជីវកម្មដោយខុសច្បាប់ ឬផ្សាយព័ត៌មាន ដោយចេតនា ដើម្បីបង្កចលាចលនៅក្នុងសង្គម។ រីឯក្រសួងមហាផ្ទៃវិញ មានភារកិច្ចសិក្សា ស្រាវជ្រាវ ស្វែងរក និងឈានទៅបង្ក្រាបគេហទំព័រ និងបណ្ដាញសង្គមណា ដែលផ្សព្វផ្សាយល្មើសច្បាប់។
សេចក្តីប្រកាសរបស់អន្តរក្រសួងនោះ ត្រូវបានអង្គការសង្គមស៊ីវិលនៅក្នុងប្រទេសកម្ពុជារិះគន់ថា រដ្ឋាភិបាលធ្វើជ្រុល ហើយស្នើឲ្យរដ្ឋាភិបាលចាត់វិធានការអប់រំប្រជាពលរដ្ឋពីការប្រើប្រាស់អ៊ីនធឺរណិតឲ្យបានត្រឹមត្រូវវិញ ទើបប្រសើរ៕
