បរទេស៖ រដ្ឋមន្ត្រីការពារជាតិប្រទេសអាមេរិក នៅសប្ដាហ៍នេះ នឹងទៅបំពេញទស្សនកិច្ចរបស់ខ្លួន នៅក្នុងប្រទេសចិន ដើម្បីពិភាក្សាពីបញ្ហាអាវុធមហាប្រល័យលោក (នុយក្លេអ៊ែរ) និងិជម្លោះដ៏ចម្រោងចម្រាស នៅក្នុងសមុទ្រចិនខាងត្បូង ដោយសារប្រទេសចិនបានស្ថាបនាកោះសិប្បនិម្មិត និងបំពាក់នូវគ្រឿងសព្វាវុធទំនើបៗ នៅទីនោះ។
បើយោងតាមភ្នាក់ងារសារព័ត៌មាន AFP បានចេញផ្សាយនៅពេលថ្មីៗនេះថា លោក ជេម ម៉ាធីស (James N. Mattis) រដ្ឋមន្ត្រីក្រសួងការពារប្រទេសអាមេរិក នឹងធ្វើដំណើរទៅបំពេញទស្សនកិច្ច នៅក្នុងប្រទេសចិន នាថ្ងៃទី២៦ ខែមិថុនា ឆ្នាំ២០១៨នេះ។ នៅក្នុងដំណើរចេញទៅកាន់ទ្វីបអាស៊ីនោះ លោករដ្ឋមន្ត្រីនឹងបន្តដំណើរទៅកាន់ប្រទេសកូរ៉េខាងត្បូង និងជប៉ុន។ គោលដៅ នៃដំណើរទស្សនកិច្ចរបស់លោករដ្ឋមន្ត្រីក្រសួងការពារប្រទេសអាមេរិក ទៅកាន់តំបន់អាស៊ីននាពេលនេះ គឺផ្ដោលទៅលើបញ្ហាជាច្រើន រួមមាន បញ្ហាអាវុធនុយក្លេអ៊ែររបស់ប្រទេសកូរ៉េខាងជើង និងបញ្ហាជម្លោះដ៏ចម្រូងចម្រាស នៅក្នុងដែនសមុទ្រចិនខាងត្បូង ដែលចេះតែបន្តកើនកម្តៅ។
នៅពេលទៅដល់ប្រទេសចិននោះ លោករដ្ឋមន្ត្រីក្រសួងការពារជាតិអាមេរិកគ្រោងនឹងជួបមន្ត្រីយោធាជាន់ខ្ពស់ចិន ដើម្បីស្នើឲ្យក្រុងប៉េកាំងបន្តដាក់សម្ពាធទៅលើមេដឹកនាំ នៃកូរ៉េខាងជើងឲ្យបោះបង់កម្មវិធីអាវុធនុយក្លេអ៊ែរ តាមអ្វីដែលខ្លួនបានសន្យា នៅក្នុងជំនួបកំពូល រវាងលោក Donald Trump ប្រធានាធិបតីអាមេរិក ជាមួយនឹងលោក គីម ជុងអ៊ុន មេដឹកនាំកូរ៉េខាងជើង កាលពីថ្ងៃទី១២ ខែមិថុនា ឆ្នាំ២០១៨ នៅក្នុងប្រទេសសិង្ហបុរី។
លោក ម៉ាធីស រដ្ឋមន្រ្ដីក្រសួងការពារជាតិអាមេរិក កាលពីថ្ងៃអាទិត្យ ទី២៤ ខែមិថុនា ម្សិលមិញនេះបានបញ្ជាក់ប្រាប់អ្នកសារព័ត៌មានថា អាមេរិក ជប៉ុន កូរ៉េខាងត្បូង និងចិន មានគោលដៅរួមគ្នា គឺធានាថា ការរំសាយសព្វាវុធនឹងមានយ៉ាងពេញលេញ មិនអាចត្រឡប់ក្រោយបាន និងអាចផ្ទៀងផ្ទាត់បានច្បាស់លាស់ផង។
លោករដ្ឋមន្ត្រីការពារជាតិអាមេរិក បានបន្តថា បន្ទាប់ចាកចេញពីប្រទេសចិន ថ្ងៃព្រហស្បតិ៍ ខាងមុខនេះ លោកនឹងបន្តដំណើរទៅកាន់ប្រទេសកូរ៉េខាងត្បូង និងជប៉ុន ហើយលោកនឹងជួបមួយសមភាគីកូរ៉េខាងត្បូង Song Young-Moo និងសមភាគីជប៉ុន Itsunori Onodera ទៀត។ នៅក្នុងជំនួបជាមួយប្រមុខការពារជាតិកូរ៉េខាងត្បូង និងជប៉ុននោះ លោកនឹងពន្យល់ដល់សម្ព័ន្ធមិត្តទាំងពីរពាក់ព័ន្ធនឹងជំហររបស់អាមេរិកក្នុងការជួយធានាសន្តិសុខ នៅក្នុងតំបន់។
លោករដ្ឋមន្ត្រីក្រសួងការពារជាតិអាមេរិក បានបន្តថា គោលជំហររបស់អាមេរិកនឹងមិនប្រែប្រួលឡើយ បើទោះជាលោក Donald Trump ប្រធានាធិបតីអាមេរិកបានប្រកាសផ្អាកពីការធ្វើសមយុទ្ធយោធាជាមួយកូរ៉េខាងត្បូងក៏ដោយ។ នេះគឺជាការធ្វើសម្បទានដ៏ធំមួយទៅឲ្យប្រទេសកូរ៉េខាងជើង។
លោករដ្ឋមន្ត្រីក្រសួងការពារជាតិអាមេរិក បានបន្តថា នៅពេលជួបជាមួយនឹងសមភាគីចិននោះ លោកនឹងឈ្លេចសួរចិន ពីមហិច្ឆតាពិតប្រាកដ ពាក់ព័ន្ធនឹងការដំឡើងសព្វាវុធ នៅក្នុងសមុទ្រចិនខាងត្បូងនោះផងដែរ។
ប្រមុខការពារជាតិអាមេរិក នៅតែបារម្ភខ្លាំងពីបញ្ហាសន្តិសុខអាស៊ីប៉ាស៊ីហ្វិក ក្រោយពេលរដ្ឋាភិបាលក្រុងប៉េកាំងដំឡើងសព្វាវុធ នៅលើកោះជម្លោះសមុទ្រចិនខាងត្បូងនោះ ដោយលោកថ្លែងថា ចិនកំពុងបង្កើនមហិច្ឆតាយុទ្ធសាស្ត្ររបស់ខ្លួន និងបង្កើនអំណាចយោធាកាន់តែខ្លាំង នៅក្នុងតំបន់ប៉ាស៊ីហ្វិក៕