ខេត្តបន្ទាយមានជ័យៈ ជនសង័្សយ២នាក់បានចរាចរថ្នាំញៀនជាង២រយដប តែអស់លក្ខណ៍ ត្រូវកម្លាំងកងរាជអាវុធហត្ថ បង្រ្កាបបានកាលពីវេលាម៉ោង៣ និង៣០នាទីរសៀល ថ្ងៃទី២០ ខែមិថុនា ឆ្នាំ២០១៨ នៅតាមផ្លូវជាតិលេខ៥ ត្រង់ចំណុចស្ពានតាផាន់ ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ។
មន្ត្រីអាវុធហត្ថខេត្តបន្ទាយមានជ័យ បានឲ្យដឹងថា ជនសង័្សយជាប់ពាក់ព័ន្ធនឹងករណីថ្នាំញៀន ហើយត្រូវសមត្ថកិច្ចឃាត់ខ្លួននោះ រួមមានទី១-ឈ្មោះ ឡាយ ទិត្យសីហា ភេទប្រុស អាយុ២៨ឆ្នាំ ជាម្ចាស់ថ្នាំ រស់នៅភូមិជ្រៃកោង ឃុំស្លាកែត ក្រុងបាត់ដំបង ខេត្តបាត់ដំបង និងទី២-ឈ្មោះ ឌឿម មីនា ភេទប្រុស អាយុ២២ឆ្នាំ ជាម្ចាស់រថយន្ត រស់នៅភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។ ក្រៅពីឃាត់ខ្លួនជនសង័្សយទាំង២នាក់ខាងលើនេះ សមត្ថកិច្ចក៏ដកហូតបាននូវវត្ថុតាងមួយចំនួន រួមមាន រថយន្ត១គ្រឿង ម៉ាកកាមរីបាឡែន ពណ៌ស្ករ ពាក់ស្លាកលេខ បន្ទាយមានជ័យ 2A-4432 ថ្នាំដបកេតាមីនចំនួន២៥០ដប ថ្នាំញៀនប្រភេទមេតំហ្វេតាមីន ហៅខេទឹកកកចំនួន២កូនថង់តូច ទូរស័ព្ទដៃចំនួន៤គ្រឿង អត្តសញ្ញាណប័ណ្ណ១សន្លឹក ប័ណ្ណបើកបរ១សន្លឹក កាតគ្រីរថយន្ត១សន្លឹក និងប័ណ្ណធនាគារ១សន្លឹក។
លោកវរសេនីយ៍ឯក ស ប៊ុនសឿង មេបញ្ជាការរងកងរាជអាវុធហត្ថខេត្តបន្ទាយមានជ័យ បានឱ្យដឹងថា កាលពីវេលាខាងលើនេះ កម្លាំងអាវុធហត្ថខេត្ត និងក្រុងសិរីសោភ័ណ ក្រោមការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញាសាលាដំបូងខេត្តបន្ទាយមានជ័យបានស្រាវជ្រាវ និងដេញស្ទាក់រថយន្តមួយគ្រឿង ដែលកំពុងបើកបរយ៉ាងលឿនតាមបណ្តោយផ្លូវជាតិលេខ៥ តាំងពីភូមិអូរស្ងួត ឃុំអូរប្រាសាទ ស្រុកមង្គលបុរី រហូតចាប់បាននៅចំណុចស្ពានតាផាន់ ស្ថិតភូមិក្បាលស្ពាន សង្កាត់ព្រះពន្លាក្រុងសិរីសោភ័ណ ទើបឃាត់បានទាំងរថយន្ត និងមនុស្ស។ ក្រោយពេលឃាត់ខ្លួនជនសង្ស័យទាំង២នាក់ កម្លាំងអាវុធហត្ថបាននាំយកមកសាកសួរ នៅក្នុងបញ្ជាការដ្ឋានកងរាជអាវុធហត្ថខេត្តបន្ទាយមានជ័យ។
លោកមេបញ្ជាការរងកងរាជអាវុធហត្ថខេត្ត បានបន្តថា នៅពេលនោះ សមត្ថកិច្ចបានឆែកឆេររថយន្ត និងសាកសួរចម្លើយជាជំហានដំបូង ហើហជនសង្ស័យ ឈ្មោះ ឡាយ ទិត្យសីហា បានសារភាពថា ថ្នាំទាំងនេះ គឺរូបគេបានទទួលពីស្ត្រីម្នាក់ រស់នៅខេត្តបាត់ដំបង ដើម្បីយកទៅក្រុងប៉ោយប៉ែត។ ដោយឡែកជនសង័្សយ ឈ្មោះ ឌឿម មីនា បានសារភាពថា ខ្លួនជាអ្នករត់តាក់ស៊ី ហើយឈ្មោះ ឡាយ ទិត្យសីហាបានម៉ៅរថយន្តរបស់គេជិះតែម្នាក់ឯងពីខេត្តបាត់ដំបងទៅកាន់ក្រុងប៉ោយប៉ែត ក្នុងតម្លៃ១២ម៉ឺនរៀល។
ក្រោយពេលឃាត់ខ្លួនសង្ស័យទាំង២នាក់ និងផ្អែកតាមចម្លើយសារភាព រួមទាំងមានវត្ថុតាងជាក់ស្តែង មន្ត្រីជំនាញរបស់កងរាជអាវុធហត្ថខេត្ត បានកសាងសំណុំរឿង បញ្ជូនជនសង័្សយទៅកាន់សាលាដំបូងខេត្ត ដើម្បីចាត់ការតាមច្បាប់៕