ខេត្តកំពត៖ បុរសម្នាក់ បានឃើញប្រពន្ធរបស់ខ្លួន កំពុងលេងល្បែងលើគ្រែ ជាមួយនឹងសហាយ ក៏ហៅឪពុកក្មេកមកមើល ហើយបើកទ្វារចូល ក៏ត្រូវសហារបស់ប្រពន្ធចាក់ បណ្ដាលឲ្យរងរបួសធ្ងន់ កាលពីវេលាម៉ោង២ និង៣០នាទីរំលងអធ្រាត្រ ឈានចូលថ្ងៃទី២៤ ខែឧសភា ឆ្នាំ២០១៨ នៅក្នុងភូមិឈ្លីតលេី ឃុំឃ្ជាយខាងត្បូង ស្រុកដងទង់។
មន្រ្ដីនគរបាលស្រុកដងទង់ បានឲ្យដឹងថា ជនសង័្សយជាប់ពាក់ព័ន្ធ នឹងករណីលួចប្រពន្ធរបស់គេនោះ ឈ្មោះ ហាស់ រទ្ធី ភេទប្រុស អាយុ ២៦ឆ្នាំ រស់នៅនៅភូមិឃុំជាមួយគ្នា។ រីឯស្ដ្រីដែលមានតម្រេកតណ្ហា មិនចេះស្កប់ស្កល់ ហើយនាំសហាយមកដេក ដល់ផ្ទះនោះ ឈ្មោះ សួន ឌីណា អាយុ២១ឆ្នាំ មានប្ដីឈ្មោះ ហេង គឹមសេង អាយុ៣១ឆ្នាំ រស់នៅភូមិឈ្លីតលេី ឃុំ ឃ្ជាយខាងត្បូង ស្រុកដងទង់ ខេត្តកំពត។
ប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកើតហេតុ ប្រពន្ធរបស់ជនរងគ្រោះ បានលួចទាក់ទងស្នេហា ផិតក្បត់ប្ដី ទើបបង្កឲ្យប្តីប្រពន្ធទាំង២ខាងលើ បានឈ្លោះគ្នាបែកផ្សែង រហូតឈានដល់ការ បែកផ្ទះគ្នានៅមួយរយៈសិន។ លុះមកដល់ថ្ងៃកើតហេតុ បុរសជាប្តីបានត្រឡប់មកផ្ទះវិញ ក៏តាមដានដឹងឃេីញប្រពន្ធរបស់ខ្លួន កំពុងតែដេកជាមួយសហាយ ទើបរត់ទៅប្រាប់ឪពុកក្មេក។ ឃើញបែបនេះ ឪពុកក្មេក និងកូនប្រសា បានចូលទៅមើល តែត្រូវសហាយរបស់ប្រពន្ធចាក់ បណ្តាលឲ្យរបួសទាំង២នាក់ឪពុកក្មេក និងកូនប្រសាប្រុស ដោយកូនប្រសារបួសធ្ងន់ ត្រង់ដោះខាងស្តាំ ដៃស្តាំ និងភ្លៅ និងឪពុកក្មេករងរបួសស្រាលត្រូវថ្ងាស និងដៃស្តាំបន្តិច។ ភ្លាមៗនោះ សហាយរបស់ប្រពន្ធជនរងគ្រោះ បានរត់គេចខ្លួនបាត់ស្រមោល។
ក្រោយពេលកើតហេតុ សាច់ញាតិបានបញ្ជូន ជនរងគ្រោះជាប្ដី ទៅសម្រាកព្យាបាល នៅក្នុងមន្ទីរពេទ្យស្រុកកំពង់ត្រាច។ បច្ចុប្បន្ន សមត្ថកិច្ចកំពុងតែស្រាវជ្រាវ តាមចាប់ខ្លួនបុរសលួចប្រពន្ធគេ ហើយបង្កហិង្សាទៅលើប្ដី នាំមកផ្ដន្ទាទោសតាមច្បាប់៕