ភ្នំពេញ៖ មន្ទីរប្រឆាំងជួញដូរមនុស្ស និងការពារអនីតិជននៃក្រសួងមហារផ្ទៃ ព្រមទាំងមានការចូលរួមពីអង្គការ មេត្រីអន្តរជាតិ បានចុះបង្ក្រាបទីតាំងម៉ាស្សាកោសជប់ យីហោ ១៦៨ហេង ហេង បង្កប់សេវាផ្លូវភេទ ឃាត់ខ្លួនបានមនុស្សប្រុសស្រីចំនួន ១០នាក់ ប្រុស ២នាក់ នឹងស្រី ៨នាក់ ក្នុងនោះមាន នារីរងគ្រោះ ៥នាក់ និងវត្ថុតាំងមួយចំនួន ។
ក្នុងរង្វង់ប្រតិបត្តការនេះដែរ សមត្ថកិច្ច បានធ្វើឡើងនៅវេលាម៉ោង ៨យប់ ថ្ងៃទី២២ ខែឧសភា ឆ្នាំ២០១៨ ចំនុចផ្ទះលេខ ៦៦៦A យីហោ ១៦៨ ម៉ាស្សាកោសជប់ ហេង ហេង ផ្លូវ៧៣១ ភូមិម័ល សង្កាត់ដង្កោ ខណ្ឌដង្កោ ។
នារីរងគ្រោះដែលត្រូវសមត្ថកិច្ចឃាត់ខ្លួនបានមាន ១.ឈ្មោះ ភី ស្រីណែត អាយុ ១៨ឆ្នាំ ២.ឈ្មោះ អ៊ុល ចាន់នាង អាយុ ២០ឆ្នាំ ៣.ឈ្មោះ ឡៃ លូន អាយុ ២២ឆ្នាំ ៤.ឈ្មោះ ម៉ៅ ស្រីណែត អាយុ ២៦ឆ្នាំ ៥.ឈ្មោះ ជឹម តូន អាយុ ២៦ឆ្នាំ ។ ចំនែកជនសង្ស័យមានឈ្មោះ ១.ឈ្មោះ សួង វាសនា ភេទប្រុស អាយុ ២៦ឆ្នាំ ម្ចាស់ទីតាំង ២.ឈ្មោះ វ៉ា ភារី ភេទស្រី អាយុ ៣០ឆ្នាំ ម្ចាស់ទីតាំង ៣.ឈ្មោះ វ៉ា ផល្លា ភេទស្រី អាយុ២២ឆ្នាំ អ្នករាប់លុយខ្ចី ៤.ឈ្មោះ ស្វាយ ធីតា ភេទស្រី អាយុ ២៤ឆ្នាំ និងទី ៥.ឈ្មោះ នី មករា ភេទប្រុស អាយុ១៦ឆ្នាំ មុខរបរ រាប់លុយខ្ចី ។
តាមប្រភពព័ត៌មាន ពីសមត្ថកិច្ចបានឱ្យដឹងថា មុនឈានទៅដល់ការចុះបង្ក្រាប និងឃាត់ខ្លួនបុរសប្រុសស្រី នៅទីតាំងខាងលើនេះ គឺកម្លាំងសមត្ថកិច្ច មន្ទីរប្រឆាំងការជួញដូរមនុស្ស និងការពារអនីតិជននៃក្រសួងមហារផ្ទៃ បានទទួលដំណឹងពីបងប្អូនប្រជាពលរដ្ឋថា ទីតាំងខាងលើនេះ គឺមានលួចលាក់ បំរើសេវាផ្លូវភេទ ដោយជ្រកក្រោមស្លាកសញ្ញា កោសជប់ និងម៉ាស្សា ។
ដោយបានទទួលដំណឹងបែបនេះ កម្លាំងសមត្ថកិច្ចបានយកចិត្តទុកដាក់ និងតាមដានទីតាំងខាងលើច្បាស់លាស់ រហូតឈានទៅដល់ការសុំគោលការណ៍ ពីលោក កុល ប៊ុន ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ព្រមទាំងមានការចូលរួមលោក យិន គា ក្រឡាបញ្ជី និងដឹកនាំកម្លាំង ដោយលោកវរសេនីយទោ តាន់ វណ្ណារឹទ្ធ អនុប្រធានប្រឆាំងការជួញដូរមនុស្សនិងការពារអនីតិជន នៃក្រសួងមហារផ្ទៃ ព្រមទាំងមានការចូលរួមពីអង្គការមេត្រីអន្តរជាតិ បានចុះឡោមពន្ធ័ និងឆែកឆេរ ផ្ទះខាងលើ ចំនួន ៤បន្ទប់ ឃាត់ខ្លួនបានមនុស្សចំនួន ១០នាក់ ក្នុងនោះមានប្រុស២នាក់ និងស្រី ៨នាក់ និងមាននារីរងគ្រោះចំនួន ៥នាក់ ព្រមទាំងដកហូតម៉ូតូចំនួន ៥គ្រឿង ស្រោមអនាម័យប្រើប្រាស់រួចមួយចំនួន និងមិនទាន់ប្រើប្រាស់មួយចំនួន រួមជាមួយឧបករណ៍សំរាប់ប្រើប្រាស់គ្រឿងញៀនផងដែរ ។
ក្រោយពេលកើតហេតុ នារីរងគ្រោះ ព្រមទាំង ជនសង្ស័យ រួមនិងវត្ថុតាំង ត្រូវបានសមត្ថកិច្ចនាំខ្លួនយកទៅធ្វើការសាកសួរនៅមន្ទីប្រឆាំងការជួញដូរមនុស្សនិងការពារអនីតិជន នៃក្រសួងមហារផ្ទៃ ចំនែកផ្ទះខាងលើត្រូវសមត្ថកិច្ច បិទទ្វារជាបណ្តោះអាសន្នសិនរង់ចាំបទបញ្ជាជាថ្មី ៕
