ភ្នំពេញ៖ ស្ត្រីវ័យក្មេងស្រស់ស្អាតម្នាក់ ចូលច្រៀងខារ៉ាអូខេជាមួយប្តី ឈ្លោះប្រកែកជាមួយប្តីចេញមកនិយាយទូរស័ព្ទរួច មេការសន្តិសុខប្រចាំខារ៉ាអូខេឃាត់រារាំងមិនឱ្យ ចូលទៅខាងក្នុងវិញ បានរត់ទៅប្តឹងសមត្ថកិច្ចថា មេការទះកំផ្លៀងរូបគាត់បង្កឱ្យមានការភ្ញាក់ផ្អើលនៅមុខខារ៉ាអូខេ យីហោ AMANI KTV (អាម៉ានី) ផ្លូវ១១៣ កែងនិងផ្លូវ៣០០ សង្កាត់បឹងកេងកង២ ខណ្ឌចំការមន កាលពីវេលាម៉ោង២ រំលងអាធ្រាត្រឈានចូលថ្ងៃ ទី២៣ ខែឧសភា ឆ្នាំ២០១៨ ។
ស្ត្រីដែលចូលច្រៀងខារ៉ាអូខេជាមួយប្តីមានឈ្មោះថា ស្រី ណុច អាយុ២២ឆ្នាំ មុខរបរលក់ខោអាវ ស្នាក់នៅសង្កាត់ទំនប់ទឹក ខណ្ឌចំការមន ។ ចំនែកបុរសដែលត្រូវជាមេការសន្តិសុខ ប្រចាំការនៅ ខារ៉ាអូខេ យីហោ AMANI KTV មិនបានឱ្យដឹងឈ្មោះនោះទេ ។
តាមសម្តីស្ត្រីដែលចូលច្រៀងខារ៉ាអូខេជាមួយប្តី បានឱ្យដឹងថា មុនពេលកើតហេតុ រូបគាត់មានគ្នាបីនាក់ ប្រុស ២នាក់ និងស្រីម្នាក់ ក្នុងចំណោមប្រុស ២នាក់នោះ មានម្នាក់ត្រូវជាប្តីរបស់គាត់ បានចូលទៅច្រៀងលេងនៅក្នុងបន្ទប់ខារ៉ាអូខេខាងលើ តែច្រៀងមិនទាន់បានប៉ុន្មានផង រូបនាងក៏មានទំនាស់ជាមួយនិងប្តីរបស់នាង នៅក្នុងបន្ទប់ខារ៉ាអូខេបន្តិចបន្តួច ហើយរូបនាងបានយកទូរសព័្ទគប់ប្តីរបស់គាត់ បន្ទាប់មករូបនាងបានចេញមកក្រៅ ដើម្បីនិយាយទូរសព័្ទ តែពេលនិយាយរួចហើយ ចង់ចូលទៅក្នុងបន្ទប់វិញ ត្រូវបុរសដែលជាមេការសន្តិសុខបានរារាំង មិនបានឱ្យចូល ព្រមទាំងបានទះកំផ្លៀងមួយដៃ បណ្តាលឱ្យធ្លាក់ទូរសព័្ទ ហើយអូសនាងចេញមកក្រៅធ្វើឱ្យ ងរបួសមេជើងបន្តិចផងដែរ ។
ភ្លាមៗនោះដែរ រូបគាត់មិនដឹងធ្វើយ៉ាងម៉េច ណាមួយប្តីរបស់នាងនៅបន្ទប់ខារ៉ាអូខេខាងលើមិនទាន់ចុះមក ហើយទូរស័ព្ទដាក់ក្នុងកាបូបខលអត់ឮ រូបគាត់ក៏ត្រូវសន្តិសុខវាយធ្វើបាប ផងនោះ រូបនាងក៏បានទៅដាក់ពាក្យបណ្តឹងនៅប៉ុស្តិ៍នគរបាលបឹងកេងកង២ ដើម្បីឱ្យសមត្ថកិច្ចជួយអន្តរាគមន៍ ។
ខណៈពេលទៅដល់ប៉ុស្តិ៍នគរបាលបឹងកេងកង២ សមត្ថកិច្ចក៏បានទទួលដំណឹងនេះ ហើយបានឌុបស្ត្រីរូបនោះទៅកន្លែងកើតហេតុ និងបានឱ្យភាគីខាងមេការសន្តិសុខ មកជជែកតតាំងដាក់គ្នា ដោយនារីរូបនោះនៅតែនិយាយទាំងហូរទឹកភ្នែកថា បុរសដែល ជាមេសន្តិសុខ បានទះកំផ្លៀងទៅលើរូបគាត់ ។
ចំណែកខាងមេការសន្តិសុខវិញ បានប្រកែក និងលើកហេតុផលថា រូបគាត់មិនបាន វាយទៅលើស្ត្រីរូបនោះទេ ហើយគាត់មាន សាក្សី ដែលជាបុគ្គលិកនៅទីនោះផងដែរ ។ មេការសន្តិសុខ បានបន្ថែមទៀតថា នៅមុនពេលកើតហេតុ បុរសដែលនាងអះអាងថាជាប្តីនិងមិត្តភក្ដិប្រុសម្នាក់ទៀតបានមកចូលច្រៀងមុន ។
លុះបន្តិចក្រោយមកទើបឃើញស្ត្រីម្នាក់នោះចូលតាមក្រោយ តែមិនដឹងជាយ៉ាងម៉េចនោះទេ ក៏ស្រាប់តែស្ត្រីម្នាក់នោះ បានរករឿងអុកឡុក កូរនៅក្នុងខារ៉ាអូខេ ហើយមិនតែប៉ុណ្ណោះបានយកទូរសព័្ទគប់បណ្តាលឱ្យត្រូវនារីបំរើការម្នាក់នៅក្នុងបន្ទប់ ទើបពេលនោះដែរ បុរសដែលនាងអះអាងថាជាប្តីបាន ឱ្យសន្តិសុខដេញចេញមកក្រៅ កុំឱ្យអុកឡុកគេទៀត តែគាត់មិនបានវាយទៅលើស្ត្រី រូបនោះទេ ។
បន្ទាប់ពីស្រែកចោទដាក់គ្នាទៅវិញទៅមកហើយ ស្រាប់តែបុរសដែលនាងអះអាងថាជាប្តី ត្រូវបុគ្គលិកគ្រាចុះពីខារ៉ាអូខេចេញមកក្រៅ ដើម្បីឱ្យជួយនិយាយលួងលោម ជាមួយស្ត្រីជាប្រពន្ធ តែបុរសដែលនាងអះអាងថា រូបនាងមិនមែនជាប្រពន្ធរបស់គាត់ទេ ទើបធ្វើឱ្យស្ត្រីរូបនោះកាន់តែស្រែកយំ ដេញឱបថើបបុរសដែលនាងអះអាងថាជាប្តីពេញផ្លូវ ។ បន្តិចក្រោយមក ទើបស្ត្រីរូបនោះ ហាក់បីដូចជាស្ងប់អារម្មណ៍ទាំងពីរនាក់ ក៏ហៅម៉ូតូកង់បីជិះឱបគ្នាចេញទៅបាត់ ដោយលែងខ្វល់ពីរឿង ប្តឹងមេការសន្តិសុខ ទះកំភ្លៀងទៅលើរូបនាងទៀតទេ ៕
