ខេត្តបាត់ដំបង៖ យុវជនទំនើងម្នាក់បានប្រើល្បិចដ៏គម្រក់ ល្បួងប្អូនស្រីជីដូនមួយទើបនឹងមានអាយុ១២ឆ្នាំ នាំទៅរំលោភអស់រយៈពេលជាង១០ថ្ងៃ ហើយត្រូវអាណាព្យាបាលស៊ើបដឹង ក៏រាយការណ៍ទៅសមត្ថកិច្ចឲ្យចាប់ខ្លួន កាលពីរសៀល ថ្ងៃទី១០ ខែឧសភា នៅក្នុងផ្ទះរបស់ជនសង័្សយ ស្ថិតក្នុងភូមិកែវមុនី ឃុំបាសាក់ ស្រុករុក្ខគិរី។
បើតាមសម្ដីអាណាព្យាបាលរបស់ក្មេងស្រីរងគ្រោះ បានឲ្យដឹងថា គាត់បានបាត់កូនស្រីរបស់គាត់ តាំងពីយប់ ថ្ងៃទី២៩ ខែមេសា ឆ្នាំ២០១៨ ដោយគ្មានទទទួលបានដំណឹងអ្វីបន្តិចសោះ។ នៅពេលនោះ គាត់មានការព្រួយបារម្ភយ៉ាងខ្លាំងពីសុវត្ថិភាពរបស់នាង ហើយគាត់បានទាក់ទងទៅសមត្ថកិច្ចសុំឲ្យជួយអន្តរាគមន៍ ព្រមទាំងស្វែងរកកូនស្រីរបស់គាត់ អស់រយៈពេលជាងមួយសប្ដាហ៍ ទើបមានតម្រុយថា ក្មួយប្រុសរបស់គាត់បាននាំកូនស្រីរបស់គាត់ទៅលាក់ទុក ដើម្បីចាប់រំលោភសេពសន្ថវៈ។
ប្រភពព័ត៌មានដដែល បានបន្តថា ក្រោយពេលទទួលបាននូវព័ត៌មានបែបនេះ ទើបនៅព្រឹក ថ្ងៃទី១០ ខែឧសភា ឆ្នាំ២០១៨នេះ គាត់បានស្នើឲ្យសមត្ថកិច្ចស្រុកសង្កែ និងសមត្ថកិច្ចស្រុករុក្ខគិរី ចុះឃាត់ខ្លួនក្មួយប្រុសកំហូចរូបនោះតែម្ដង។
មន្ត្រីនគរបាលស្រុករុក្ខគិរី បានឲ្យដឹងថា ជនសង័្សយជាប់ពាក់ព័ន្ធនឹងករណីចាប់រំលោភអនីតិជន ហើយត្រូវសមត្ថកិច្ចឃាត់ខ្លួននោះ ឈ្មោះ ង៉ាម កុកងឺ ហៅ ពេជ្រ សោភា អាយុ២០ឆ្នាំ រស់នៅភូមិកែវមុនី ឃុំបាសាក់ ស្រុករុក្ខគិរី។ រីឯក្មេងស្រីរងគ្រោះ ឈ្មោះ ក ល អាយុ១២ឆ្នាំ ហើយពួកគេទាំង២នាក់ ត្រូវជាបងប្អូនជីដូនមួួយនឹងគ្នា។
មន្ត្រីនគរបាលស្រុករុុក្ខគិរី បានឲ្យដឹងថា បន្ទាប់ពីមានពាក្យបណ្ដឹងពីអាណាព្យាបាលរបស់ជនរងគ្រោះ និងមានការប្រាប់តម្រុយពីទីតាំងលាក់ខ្លួនរបស់ជនសង័្សយរួចមក សមត្ថកិច្ចបានចុះទៅឃាត់ខ្លួនជនសង័្សយនាំមកសាកសួរតាមនីតិវិធី។ នៅពេលនោះ ជនសង័្សយបានសារភាពថា រូបគេពិតជាបានពង្រត់ប្អូនស្រីជីដូនមួយ នាំមកលាក់ទុក នៅក្នុងផ្ទះខ្លួនមែន ហើយរូបគេបានរួមភេទជាមួយនាង ជាច្រើនលើកច្រើនសាទៀតផង។
ក្រោយទទួលបានពាក្យបណ្ដឹងពីអាណាព្យាបាលរបស់ជនរងគ្រោះ និងយោងតាមចម្លើយសារភាពរបស់នជនសង័្សយផង សមត្ថកិច្ចបានកសាងសំណុំរឿង បញ្ជូនខ្លួនទៅកាន់តុលាការ ដើម្បីផ្ដន្តាទោសតាមច្បាប់៕