ប្រទេសម៉ាឡេស៊ី៖ ក្រុមសម្ព័ន្ធភាពប្រឆាំងដឹកនាំរបស់លោក មហាធៀរ មហាម៉ាដ វ័យ៩២ឆ្នាំ អតីតនាយករដ្ឋមន្ត្រីដ៏មានឥទ្ធិពល នៃប្រទេសម៉ាឡេស៊ី កាលពីថ្ងៃទី៩ ខែឧសភា ឆ្នាំ២០១៨នេះ បានឈ្នះនូវការបោះឆ្នោតជាតិ ហើយលោកនឹងឡើងមកដឹកនាំប្រទេសនេះសាជាថ្មី។
គណៈកម្មាធិការបោះឆ្នោតជាតិរបស់ប្រទេសម៉ាឡេស៊ី បានឲ្យដឹងថា គណបក្យសម្ព័ន្ធភាពប្រឆាំង គឺគណបក្ស PAKATAN HARAPAN និងគណបក្សសម្ព័ន្ធមិត្តតូចមួយ នៃរដ្ឋសាបាហ៍នៅ ប័រនេអូ ដណ្ដើមបានអាសនៈចំនួន១១៥កៅអី នៅក្នុងសភា គឺលើសពីសំឡេងភាគច្រើនធម្មតា ១១២កៅអី ដែលត្រូវការចាំបាច់ ដើម្បីបង្កើតរដ្ឋាភិបាលថ្មីរបស់ប្រទេសនេះ។ ការិយាល័យបោះឆ្នោតបានបិទ នាវេលាម៉ោង៥ល្ងាច ថ្ងៃទី៩ ខែឧសភា ហើយចំនួន នៃអ្នកចូលរួមបោះឆ្នោត ២ម៉ោងមុនការបិទ មានចំនួន៦៩%។
បើយោងតាមលទ្ធផល នៃការបោះឆ្នោតជាតិរបស់ប្រទេសម៉ាឡេស៊ីនេះ លោក មហាធៀរ មហាម៉ាដ (Mahathir Mohamad) នឹងក្លាយជានាយករដ្ឋមន្ត្រីដ៏មានវ័យចំណាស់ជាងគេបំផុត នៅលើពិភពលោក។ លោក មហាធៀរ ធ្លាប់ដឹកនាំប្រទេសម៉ាឡេស៊ី អស់រយៈពេល២២ឆ្នាំ ហើយនៅពេលនេះ លោកបានវិលត្រឡប់មកចូលប្រឡូក នៅក្នុងឆាកនយោបាយឡើងវិញ។
ក្រោយពេលដឹងច្បាស់ពីជ័យជម្នះរបស់គណបក្សប្រឆាំង ពួកអ្នកគាំទ្របស់រលោក មហាធៀរ បានទៅប្រមូលផ្ដុំគ្នា នៅតាមដងវិថីនានា ដើម្បីសម្ដែងពីការគាំទ្រ និងសប្បាយចិត្តរបស់ពួកគេ។ ដោយឡែក លោក ណាជីប រ៉ាហ្សាក់ អាយុ៦៩ឆ្នាំ នាយករដ្ឋមន្ត្រីម៉ាឡេស៊ីដែលចប់អាណត្តិ បានជួបនឹងរឿងអាស្រូវផ្នែកហិរញ្ញវត្ថុដ៏ធំមួយ។ ចំណែកគណបក្សចម្រុះរបស់លោក គឺគណបក្ស BARISAN NASINAL បានដឹកនាំម៉ាឡេស៊ី ចាប់តាំងពីប្រទេសនេះទទួលបានឯករាជ្យពីចក្រភពអង់គ្លេស នាឆ្នាំ១៩៥៧៕
