ភ្នំពេញ៖ ផ្ទះលក់សំបកបាវធ្វើអំពីឈើប្រក់សង្ក័សីមួយខ្នង ខណៈម្ចាស់កំពុងតែសម្រាន្តលង់លក់ ស្រាប់តែឆ្លងចរន្តអគិសនីឆាបឆេះស្ទើរតែទាំងស្រុង បង្កឱ្យមានការភ្ញាក់ផ្អើល កាលពីវេលាម៉ោង១រំលងអាធ្រាត្រ ឈានចូលថ្ងៃទី៧ ខែឧសភា ឆ្នាំ២០១៨ នៅចំនុចផ្ទះលេខ ៤៦២C ផ្លូវព្រះមុនីវង្សកែងនិងផ្លូវលេ៧០ ភូមិ១២ សង្កាត់ទន្លេបាសាក់ ខណ្ឌចំការមន ។
ម្ចាស់ផ្ទះមានឈ្មោះ ចាប រ៉េត ភេទប្រុស អាយុ ៤៨ឆ្នាំ មុខរបបលក់សំបកបាវ ស្នាក់នៅផ្ទះកើតហេតុខាងលើ ត្រូវបានភ្លើងឆាបឆេះអស់ស្ទើរទាំងស្រុងនោះ មានទំហំ ៦គុណនឹង១១ម៉ែត្រ ធ្វើអំពីឈើ ប្រក់សង្ក័សី ថ្មក្រោម ។
តាមសម្តីម្ចាស់ផ្ទះបានឱ្យដឹងថា មុនពេលកើតហេតុ ពួកគេបាននាំគ្នា សម្រាន្តលង់លក់ លុះមកដល់ម៉ោងកើតហេតុ ពួកគាត់ដឹងខ្លួន ស្រាប់តែឃើញមានភ្លើងឆាបឆេះចេញពី បន្ទប់ជាន់ក្រោមដែលមានផ្ទុកសំបកបាវជាច្រើនសំរាប់លក់ ហើយនៅពេលដែលដឹងថា មានភ្លើងឆេះហើយ ពួកគាត់បាននាំគ្នារត់ចេញមកក្រៅ ស្រែកឱ្យគេជួយ និងបានប្រមូលបានសំបកបាវខ្លះចេញមកក្រៅ ហើយពេលនោះ ភ្លើងកាន់តែឆាបឆេះខ្លាំងទៅៗ ទំរាំតែដំណឹងនេះ បានឮដល់សមត្ថកិច្ច និងរថយន្តពន្លត់អគ្គិភ័យ គឺភ្លើងបានឆេះរាលដាលពេញទំហឹងតែម្តង ។
ក្នុងហេតុការណ៍នេះដែរ ឃើញមានរថយន្តពន្លត់អគ្គិភ័យ បានចេញមកជួយអន្តរាគមន៍ជាច្រើនគ្រឿង និងបាញ់ទឹកអស់ចំនួន ៤គ្រឿង ក្នុងនោះមានរថយន្តពន្លត់អគ្គិភ័យរបស់ស្រាបៀរកម្ពុជា មកបាញ់ទឹកអស់ចំនួន ១គ្រឿង និងរថយន្តពន្លត់អគ្គិភ័យ របស់ក្រសួងមហាផ្ទៃ បាញ់អស់ចំនួន ៣គ្រឿង ទើបភ្លើងរលត់អស់ទៅវិញ នៅវេលាម៉ោង២រំលងអាធ្រាត្រថ្ងៃដដែល ។
ចំនែករថយន្តពន្លត់អគ្គិភ័យរបស់ស្នងការរាជធានីភ្នំពេញ បានចេញទៅជួយបាញ់ពន្លត់អស់ជាច្រើនគ្រឿងដែរ តែនៅពេលដែលអ្នកយកព័ត៌មានសួរនាំ បែរជាអ្នកកត់បញ្ជី ហាក់បីដូចជាមានការលាក់បាំង មិនហ៊ាននិយាយប្រាប់ដោយថាចាំឆ្លងយោបល់ពីមេសិន ។
ក្នុងហេតុការណ៍នេះដែរ សមត្ថកិច្ចមូលដ្ឋានបានបញ្ជាក់ប្រាប់ថាមកពីឆ្លងចរន្តអគ្គិសនី ទើបបណ្ដាលឱ្យមានភ្លើងឆាបឆេះបែបនេះ ហើយក៏មិនបណ្តាលឱ្យមានអ្នករងរបួសនោះដែរ គឺគ្រាន់តែឆេះសម្ភារៈនៅក្នុងផ្ទះស្ទើរទាំងស្រុង ៕
