ខេត្តព្រះសីហនុ៖ បន្ទាប់ពីរាជរដ្ឋាភិបាលបានប្រគល់សិទ្ធិឲ្យក្រុមហ៊ុនវិនិយោគក្នុងស្រុកចំនួន២ អភិវឌ្ឍលើកោះទន្សាយដែលមានផ្ទៃដីជាង៥០ហិកតារនោះមក សម្ដេចនាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ នៅក្នុងពិធីសម្ពោធសណ្ឋាគារលំដាប់ផ្កាយ៥ «ដឹរ៉ូយ៉ាល់ សេន កោះរ៉ុង» របស់លោកឧកញ៉ា គិត ម៉េង ស្ថិតភូមិសុខសាន្ដ សង្កាត់កោះរ៉ុង ខេត្តព្រះសីហនុ នាព្រឹកថ្ងៃទី២៣ ខែមេសា ឆ្នាំ២០១៨នេះថា រាជរដ្ឋាភិបាលបានសម្រេចដកហូតកោះនោះមកអភិវឌ្ឍដោយខ្លួនឯងវិញ និងព្រមានដកយកកោះចំនួន៣០ពីក្រុមហ៊ុនឯកជនត្រឡប់មកវិញ ដោយសារក្រុមហ៊ុនមិនមានការអភិវឌ្ឍ។
សម្ដេចតេជោ ហ៊ុន សែន បានបន្តថា ដីនៅលើកោះរ៉ុង មិនមែនជាដីរបស់អ្នកឧកញ៉ា គិត ម៉េង នោះទេ គឺជាដីរបស់រដ្ឋ ហើយរដ្ឋបានប្រគល់សិទ្ធិឱ្យក្រុមហ៊ុនឯកជនអភិវឌ្ឍន៍។ កោះរ៉ុងជាសម្បត្តិរបស់រដ្ឋ គ្រាន់តែរដ្ឋផ្តល់សិទ្ធិឱ្យក្រុមហ៊ុនឯកជនវិនិយោគ ដើម្បីទាក់ទាញភ្ញៀវទេសចរ និងផ្តល់ការងារដល់ពលរដ្ឋតែប៉ុណ្ណោះ។ ដីនៅលើកោះរ៉ុងនេះ ជាដីរបស់រដ្ឋ ហើយកោះដទៃក៏ដូចគ្នាដែរ។
ជាមួយគ្នានេះ សម្ដេចតេជោ ហ៊ុន សែន បានព្រមានដល់មន្ត្រីមានអំណាចមួយចំនួនដែលនៅពីក្រោយខ្នងប្រជាពលរដ្ឋ លើបញ្ហាទំនាស់ដីធ្លី នៅលើកោះរ៉ុង ដោយសម្ដេចបានជំរុញឱ្យរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដោះស្រាយនូវបញ្ហាជម្លោះដីធ្លីប្រជាពលរដ្ឋចំនួន៥៨៤ក្បាលដី នៅកោះរ៉ុង ដែលអ្នកខ្លះទើបតែទៅរស់នៅ។
សម្ដេចនាយករដ្ឋមន្ត្រី បានបន្តថា មន្ត្រីទាំងអស់ត្រូវតែអនុវត្តតាមច្បាប់ មិនត្រូវអនុវត្តតាមបទបញ្ជានោះទេ ហើយថាបើអ្វីៗទាំងអស់ ចាំបាច់តែនាយករដ្ឋមន្ត្រីដោះស្រាយនោះ មិនបាច់ចាំមានរដ្ឋមន្ត្រីតាមក្រសួងនោះទេ។ នៅអាណត្តិក្រោយ សម្ដេចនឹងមិនដាក់រដ្ឋមន្ត្រីណាដែលអសកម្ម មិនធ្វើការ ហើយបែរជាទុកការងារឲ្យនាយករដ្ឋមន្ត្រីធ្វើ និងដោះស្រាយ។
សណ្ឋាគារដ៏ទំនើបនេះ គឺបានចំណាយទឹកប្រាក់សាងសង់អស់ប្រមាណជា៤០លានដុល្លារក្នុងដំណាក់កាលទី១ដែលមានលក្ខណៈជាវីឡាចំនួន៦៧ខ្នង(១៤៨បន្ទប់) ដែលបានបង្ហាញពីសក្ដានុពលទេសចរណ៍របស់ប្រទេសកម្ពុជា និងការរីកចម្រើន នៃសេវាកម្មទេសចរណ៍លំដាប់អន្តរជាតិនៅលើទឹកដីប៉ែកនិរតី នៃតំបន់សមុទ្រនេះ ។
សម្តេចតេជោ ហ៊ុន សែន មានសេចក្តីរីករាយ ដែលបានអញ្ជើញមកកាន់កោះរ៉ុងជាលើកទី១នេះ និងមោទនភាពចំពោះការវិនិយោគសណ្ឋាគារលំដាប់ផ្កាយ៥ដើម្បីបំពេញសេចក្តីត្រូវការ និងទាក់ទាញភ្ញៀវទេសចរណ៍ជាតិ និងអន្តរជាតិ។ សម្តេចតេជោនាយករដ្ឋមន្ត្រី បានផ្តល់នូវអនុសាសន៍ដល់ក្រសួងជំនាញពាក់ព័ន្ឋទាំងអស់ គឺមិនអោយក្រុមហ៊ុនវិនិយោគសាងសង់ខ្ពស់ជាង៣ជាន់ឡើយនៅតាមឆ្នេរកោះបែបនេះ។ សម្តេចតេជោ សង្ឃឹមថានឹងមានកោះជាច្រើនទៀតដែលមានការវិនិយោគកើតឡើងជាបន្តបន្ទាប់ដូចកោះរ៉ុងនេះ។
នៅថ្ងៃនេះដែរ សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ជាចុងក្រោយថា កោះរ៉ុង និងកោះដទៃទៀត នៅក្នុងប្រទេសកម្ពុជា គឺជាកោះរបស់រដ្ឋ មិនមែនជារបស់ឯកជននោះទេរួមទាំងកោះរ៉ុងនេះក៏មិនមែនជារបស់ ឧកញ៉ា គិត ម៉េង ដែរ។ ប៉ុន្តែរាជរដ្ឋាភិបាលបានប្រគល់សិទ្ធិជូនក្រុមហ៊ុន Royal Group ដើម្បីអភិវឌ្ឍន៍ក្នុងរយះពេលសមស្របមួយដែលបានកំណត់ដោយអាជ្ញាប័ណ្ណវិនិយោគ។
កន្លងមកគឺមានក្រុមហ៊ុនមួយចំនួនបានទទួលអាជ្ញាប័ណ្ណនិងសិទ្ឋិវិនិយោគលើកោះ ប៉ុន្តែពួកគេមិនបានធ្វើអ្វីទាំងអស់ គឺសម្តេចតេជោបានបញ្ជាទៅឲ្យក្រុមប្រឹក្សាអភិវឌ្ឍន៍កម្ពុជាសើរើពិនិត្យ នឹងដកហូតយកមកវិញទាំងអស់។ ទន្ទឹមនឹងនោះ គឺមានក្រុមហ៊ុនមួយចំនួនក៏បានយកទៅលក់អោយក្រុមហ៊ុនដទៃដែលខុសនឹងច្បាប់រដ្ឋ។ ដូច្នេះត្រូវដកយកមកវិញទាំងអស់។ សម្តេចតេជោបានបញ្ជាក់ថា កោះទន្សាយ គឺត្រូវដកយកមកមុនគេ។
នៅថ្ងៃនេះផងដែរ សម្តេចតេជោនាយករដ្ឋមន្ត្រី បានមានប្រសាសន៍បញ្ជាក់សង្កត់ធ្ងន់ៗទៅកាន់អ្នកមានអំណាច និងអ្នកមានទ្រព្យមួយចំនួនដែលកន្លងមកតែងតែមកកាងកាន់កាប់ និងទន្ទ្រានយកដីរដ្ឋមួយចំនួននៅតំបន់កោះរ៉ុងនេះ គឺត្រូវតែដកខ្លួនចេញជាបន្ទាន់។ ពួកអ្នកមកទន្រ្ទាន គឺភាគច្រើនមិនមែនរស់នៅកោះរ៉ុងនោះទេ គឺមួយចំនួនរស់នៅក្រុងភ្នំពេញ ឬកន្លែងផ្សេងៗ។ ទន្ទឹមនឹងនេះ សម្តេចតេជោ បានបញ្ជាក់ប្រាប់ឲ្យលោកអភិបាលខេត្តព្រះសីហនុ ពិនិត្យនិងបញ្ឈប់សកម្មភាពកាប់ឈើទន្ទ្រានយកដី ឬយកឈើលក់ខុសច្បាប់ គឺត្រូវតែឈប់ជាបន្ទាន់។
ជាមួយគ្នានេះដែរ សម្តេចតេជោ ហ៊ុន សែន បានបញ្ជាក់ និងបញ្ជាអោយក្រសួងរៀបចំដែនដីពិនិត្យដោះស្រាយក្បាលដីចំនួន៥៨៤ក្បាលដី ជូនប្រជាពលរដ្ឋអោយបានត្រឹមត្រូវ។ សម្តេចតេជោនាយករដ្ឋមន្ត្រី ក៏សំនូមពរអោយប្រជាពលរដ្ឋទាំងអស់ដែលរស់នៅកោះរ៉ុងនេះត្រូវចូលរួមសហការជាមួយអាជ្ញាធរ ក៏ដូចជាក្រុមហ៊ុនអភិវឌ្ឍន៍នានា ដើម្បីថែរក្សា និងអភិវឌ្ឍន៍កោះរ៉ុងនេះអោយកាន់តែមានភាពស្រស់បំព្រងបន្ថែមទៀត។ ផ្ទៃដីដែលប្រគល់ជូនគឺពលរដ្ឋអាចអាស្រ័យផល និងរស់នៅបាន ប៉ុន្តែពុំមានសិទ្ឋិចាត់ចែងឡើយ។
នៅក្នុងដំណើរ សម្តេចតេជោនាយករដ្ឋមន្រ្តី ដែលបានអញ្ជើញមកកាន់ទឹកដីកោះរ៉ុងថ្ងៃនេះគឺបានបិទបញ្ចប់ជម្លោះដីធ្លីនៅទីនេះទាំងស្រុង និងបានបញ្ចប់សកម្មភាពកាប់ឈើល្មើសច្បាប់ទាំងស្រុង ព្រមទាំងសម្រេចដកយកកោះដែលជាសម្បត្តិរបស់រដ្ឋទាំងអស់ត្រឡប់មកវិញពីក្រុមហ៊ុននានាដែលបានទទួលអាជ្ញាប័ណ្ណវិនិយោគហើយប៉ុន្តែពួកគេមិនបានធ្វើអ្វីទាល់តែសោះ។ សម្តេចតេជោនាយករដ្ឋមន្ត្រី បានបញ្ជាក់ច្បាស់ថា នឹងគ្មានការទូទាត់សងនូវប្រាក់កក់វិញ និងសំណងនៃការខូចខាតអ្វីឡើយ។
សម្តេចតេជោ ហ៊ុន សែន បានថ្លែងអំណរគុណចំពោះ ក្រុមហ៊ុន អ្នកឧកញ៉ា គិត ម៉េង ដែលបានសហការជាមួយដៃគូបរទេសចូលរួមអភិវឌ្ឍន៍កោះរ៉ុងអោយមានសោភ័ណភាព និងទាក់ទាញទេសចរកាន់តែច្រើនឡើង។ សម្តេចតេជោ ក៏បានជូនពរបងប្អូនប្រជាពលរដ្ឋនៅទីនេះ សូមជួបប្រទះតែសេចក្តីសុខចម្រើនគ្រប់ៗគ្នា។ បន្ទាប់មកសម្តេចតេជោនាយកដ្ឋន្ត្រីបានអញ្ជើញកាត់ខ្សែបូរសម្ពោធសណ្ឋាគារ The Royal Sands Koh Rong » នៅខេត្តព្រះសីហនុ អោយដំណើរការជាផ្លូវការចាប់ពីពេលនេះតទៅ។
សូមជម្រាបថា កោះទន្សាយមានទីតាំងស្ថិតនៅប៉ែកអាគ្នេយ៍ នៃទីក្រុងកែប មានចម្ងាយ៤,៥គីឡូម៉ែត្រពីទីក្រុងកែប។ កោះទន្សាយ គឺជារមណីយដ្ឋានធម្មជាតិដ័ស្រស់ត្រកាលរបស់ទីក្រុងជាប់នឹងឆ្នេរសមុទ្រមួយនេះ ហើយកោះនេះមានឆ្នេរខ្សាច់ចំនួន២កន្លែង ដែលមានវាលខ្សាច់សពីធម្មជាតិ ដែលអាចទាក់ទាញភ្ញៀវទេសចរជាតិ និងអន្តរជាតិចូលទៅកម្សាន្ដនៅទីនោះ។ ឆ្នេរសមុទ្រដ៏វែងនៅទីនេះមានទឹករាក់ព័ទ្ធជុំវិញកោះ ធ្វើឲ្យអ្នកទេសចរចូលចិត្តហែលទឹកលេងកម្សាន្ត។ នៅក្រោមទឹកសមុទ្រ មានផ្កាថ្ម សត្វសមុទ្រ រុក្ខជាតិសមុទ្រ ជាអំណោយផលដ៏ល្អដល់ការស្រាវជ្រាវពីប្រព័ន្ធបរិស្ថានចម្រុះ។
កោះទន្សាយមានផ្ទៃដីប្រមាណ២គីឡូម៉ែត្រការ៉េ។ ពីដើមជាកន្លែងកែប្រែអ្នកទោសឱ្យកសាងជីវភាពថ្មី និងនៅការពារទឹកដីកោះនោះផង។ ហេដ្ឋារចនាសម្ព័នទេសចរណ៍ នៅលើកោះទន្សាយត្រូវបានកសាងឡើងនាសម័យរាជរដ្ឋាភិបាល នៃសង្គមរាស្ត្រនិយម មានដូចជាផ្លូវរទេះសេះជុំវិញដីកោះ ម៉ូតែលសង់អំពីឈើប្រក់ស្បូវ ភោជនីយដ្ឋានសង់អំពីឈើប្រក់ស័ង្កសី ប្រព័ន្ធទឹកស្អាត និងសំណង់រដ្ឋផ្សេងៗទៀត…។ ប៉ុន្តែក្រោយពេលមានសង្គ្រាមជាង២ទសវត្សកន្លងមកនេះ ហេដ្ឋារចនាសម្ព័នទាំងនេះត្រូវបានបំផ្លិចបំផ្លាញស្ទើរតែទាំងអស់។ សព្វថ្ងៃនៅលើកោះនោះមានប្រជាជនចំនួន៧គ្រួសារបានបោះទីតាំងរស់នៅ ដោយប្រកបរបរនេសាទ ជាលក្ខណៈគ្រួសារ និងថែរក្សាចម្ការដូង។ ការធ្វើដំណើរមួយទៅកាន់កោះនេះ ទាំងទៅ និងត្រឡប់វិញ ភ្ញៀវទេសចរអាចចំណាយប្រហែល២០ដុល្លារ ទៅលើការជិះទូក៕