ខេត្តបន្ទាយមានជ័យ៖ ក្មេងទំនើង២ក្រុមចូលរាំធុងប៉ាស់ ឌឺដងដាក់គ្នាចុះឡើង ទាញដាវកាប់គូទំនាស់ បណ្ដាលឲ្យដាច់ដៃ និងស្លឹកត្រចៀក ហើយរត់គេចខ្លួនបាន២ថ្ងៃ ក៏អស់លក្ខណ៍ត្រូវសមត្ថកិច្ចឃាត់ខ្លួនបានម្នាក់ កាលពីថ្ងៃទី១៥ ខែមេសា ឆ្នាំ២០១៨ នៅក្នុងក្រុងប៉ោយប៉ែត។
ប្រភពព័ត៌មាន បានឲ្យដឹងថា មុនពេលកើតមាននូវអំពើកាប់ប្រហារគ្នាយ៉ាងសាហាវនោះ គឺនៅព្រលប់ ថ្ងៃទី១៣ ខែមេសានោះ នៅភូមិសូរិយា សង្កាត់និមិត្ត ក្រុងប៉ោយប៉ែត អ្នកភូមិបាននាំគ្នាចាក់ធុងបាស់រាំលេងកម្សាន្ដលេង។ ស្របពេលនោះ ទាំងជនរងគ្រោះ និងជនសង័្សយបាននាំគ្នាចូលរាំលេង ហើយឌឺដងដាក់គ្នាចុះឡើង ស្រាប់តែជនបង្កបានផ្ទុះកំហឹងយ៉ាងក្រេវក្រោធឡើង ទាញដាវកាប់ប្រហារទៅលើជនរងគ្រោះ បណ្ដាលឲ្យរបួសដាច់ស្លឹកត្រចៀក និងដៃ។ ដំបូងសមត្ថកិច្ចបានឃាត់ខ្លួនជនសង្ស័យបានម្នាក់ ខណៈម្នាក់ទៀតគេចខ្លួន ហើយទីបំផុត ដោយសារខ្លាចបញ្ហាកាន់តែធំ ទើបពុករបស់គេដឹកជនសង្ស័យនាំមកប្រគល់ឲ្យសមត្ថកិច្ច។
មន្ត្រីនគរបាលក្រុងប៉ោយប៉ែត បានឲ្យដឹងថា ជនសង័្សយជាប់ពាក់ព័ន្ធនឹងអំពើហិង្សាខាងលើ ទី១-ឈ្មោះ ជិន សាមឿន ភេទប្រុស អាយុ៣៦ឆ្នាំ និងទី២-ឈ្មោះ ជិន សាមិត្ត ភេទប្រុស អាយុ៣០ឆ្នាំ។ ពួកគេទាំង២នាក់បងប្អូនបង្កើត មានមុខរបរជាកម្មករសំណង់ រស់នៅភូមិសូរិយា សង្កាត់និមិត្ត ក្រុងប៉ោយប៉ែត។ រីឯជនរងគ្រោះ ទី១-ឈ្មោះ ឃុន ឈឿត ភេទប្រុស អាយុ៤៣ឆ្នាំ រងរបួសដាច់ស្លឹកត្រចៀកឆ្វេង (ឪពុកក្មេក) និងទី២-ឈ្មោះ យ៉ាង សុភាព ភេទប្រុស អាយុ២៦ឆ្នាំ របួសស្មា (កូនប្រសា) រស់នៅក្នុងភូមិកើតហេតុ។
សមត្ថកិច្ចដដែល បានបន្តថា ដំបូងគ្រួសាររងគ្រោះ និងគ្រួសារជនដៃដល់នាំគ្នាចាក់ធុងបាស់រាំលេង អបអរពិធីបុណ្យចូលឆ្នាំថ្មី លុះភាគីទាំង២ផឹកស៊ីចាក់បាស់រាំយូរៗទៅ ក៏ចាប់ផ្ដើមកាច់កុងគ្នា រហូតក្លាយជាជម្លោះ ពីរឿងបើកបាស់ឮខ្លាំងៗ។ ភ្លាមៗនោះ ជនសង្ស័យបានផ្ទុះកំហឹងឡើង ស្ទុះផ្លោះរបងទៅវាយ និងកាប់ជនរងគ្រោះដល់ផ្ទះតែម្តង។
សមត្ថកិច្ចបន្តថា បើតាមជនរងគ្រោះជាឪពុកក្មេក បានអះអាងថា ខណៈឃើញគេវាយ និងកាប់កូនប្រសា គាត់បានរត់ទៅជួយដោយយកបំពង់ទីបទៅរងដឹងអី មុខកាំបិតផ្លាតនឹងបំពង់ដែកទីប ក៏ត្រូវគាត់ដាច់ស្លឹកត្រចៀកតែម្តង។ ដោយឡែកជនសង្ស័យទាំង២វិញបានសារភាពថា ពួកគេបានវាយ និងកាប់លើជនរងគ្រោះពិតប្រាកដមែន។
ក្រោយពេលទទួលបានចម្លើយសារភាពពីជនសង័្សយ និងមានពាក្យបណ្ដឹងពីជនរងគ្រោះផង សមត្ថកិិច្ចបានកសាងសំណុំរឿងបញ្ជូនជនសង័្សយទៅកាន់ស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី៕
