ខេត្តត្បូងឃ្មុំ៖ អគ្គីបានលេបត្របាក់លំនៅឋានរបស់បងប្អូនខ្មែរអ៊ិស្លាមចំនួន០៦ខ្នង កាលពីវេលាម៉ោង១១ព្រឹក ថ្ងៃទី១៨ ខែមេសា ឆ្នាំ២០១៨ ភូមិថ្មី ឃុំគរ ស្រុកត្បូងឃ្មុំ។
លោកឧត្តមសេនីយ៏ត្រី ស៊ុយ ប៊ុនហ៊ាន ស្នងការរងនគរបាលខេត្តទទួលផែនអាវុធជាតិផ្ទុះ និងបង្ការពន្លត់អគ្គិភ័យ បានឲ្យដឹងថា កាលពីវេលាខាងលើនេះ ប្រជាពលដ្ឋបានរាយការណ៏មកសមត្ថកិច្ច ពីករណីគ្រោះអគ្គិភ័យនេះ។ ភ្លាមៗនោះ សមត្ថកិច្ចបានបើករថយន្តរបស់អធិការដ្ឋាននគរបាលស្រុកត្បូងឃ្មុំ ក្រុងសួងអូររាំងឪ ក្រូចឆ្មារ តំបែរ និងស្នងការនគរបាលខេត្តចំនួន៦គ្រឿងបានជួយអន្តរាគមន៏បាញ់ទឹកពន្លត់។ ប៉ុន្តែភ្លើងបានឆាបឆេះលឿនពេក ទើបបង្កឲ្យឆាបឆេះផ្ទះជិតៗគ្នាចំនួន៦ ហើយទម្រាំតែសមត្ថកិច្ចបើករថយន្តទៅដល់ គឺភ្លើងបានឆេះផ្ទះអស់ស្ទើរទាំងស្រុងទៅហើយ។
លោកឧត្តមសេនីយ៏ត្រី ស៊ុយ ប៊ុនហ៊ាន ស្នងការរងនគរបាលខេត្តទទួលផែនអាវុធជាតិផ្ទុះ និងបង្ការពន្លត់អគ្គិភ័យ បានបន្តថា តាមការស្រាវជ្រាវ ដំបូងឡើយភ្លើងបានឆាបឆេះចេញពីផ្ទះរបស់ឈ្មោះ សា យ៉េប ភេទប្រុស ហើយរាលដាលមកផ្ទះផ្សេងៗទៀតតែម្តង ។ គេបានឃើញភ្លើងឆេះចេញពីផ្ទះទី៤ ហើយរាលមកផ្ទះបន្តបន្ទាប់ទៀត ទើបក្លាយទៅគ្រោះមហន្តរាយបែបនេះ។
ទោះជាយ៉ាងណា នៅក្នុងហេតុការណ៍គ្រោះអគ្គិភ័យនេះ មិនបានបង្កឲ្យមានគ្រោះថ្នាក់ដល់ប្រជាពលរដ្ឋណាម្នាក់នោះទេ ហើយមូលហេតុនៃការឆេះ គឺដោយសារតែទុស្សេខ្សែភ្លើង៕
