ខេត្តកំពង់ស្ពឺ៖ កូនអកតញ្ញូម្នាក់ខឹងឪពុកមិនឲ្យលុយដើរលេង រដូវចូលឆ្នាំទាញកាំបិតដេញកាប់ ផ្អើលពេញភូមិ កាលពីថៃ្ងទី១៦ ខែមេសា ឆ្នាំ២០១៨ នៅភូមិបឹងងោង ឃុំទឺកល្អក់ ស្រុកគងពិសី។
ប្រភពព័ត៌មាន បានឲ្យដឹងថា មុនពេលកើតហេតុ ជនសង័្សយបានទារលុយពីឪពុកម្តាយ យកទៅដើរលេង ប៉ុន្តែគាត់គ្មានលុយឲ្យ ហើយប្រាប់កូូនថាមិនឲ្យដើរលេងទីឆ្ងាយ ពីព្រោះខ្លាចមានបញ្ហា។ គ្រាន់តែឮឪពុកម្ដាយមិនឲ្យបែបនេះ ស្រាប់តែកូនអកតញ្ញូ ផ្ទុះកំហឹងឡើងទាញកាំបិតដេញកាប់ឪពុកម្តាយតែម្ដង។
មន្ត្រីនគរបាលស្រុកគងពិសី បានឲ្យដឹងថា ជនសង័្សយ ឈ្មោះ នី សោភាន់ ភេទប្រុស អាយុ៣៣ឆ្នាំ រស់នៅភូមិបឹងងោង ឃុំទឺកល្អក់ ស្រុកគងពិសី ខេត្តកំពង់ស្ពឺ។ សមត្ថកិច្ច បានបញ្ជាក់ថា ជនសង្ស័យជាមុខសញ្ញាធ្លាប់ជាប់ពន្ធនាគារម្តងហើយ លើករណីខាងលើនេះ។
ក្រោយពេលកើតហេតុ សមត្ថកិច្ចបានចុះទៅឃាត់ខ្លួនជនសង័្សយ នាំមកកាន់ប៉ុស្ដិ៍នគរបាលរដ្ឋបាល ដើម្បីសាកសួរ និងកសាងសំណុំរឿងបញ្ជូនទៅកាន់អធិការដ្ឋាននគរបាលស្រុក ចាត់ការតាមនីតិវិធី៕