ភ្នំពេញ៖ បន្ទាប់ពីលោក សម រង្ស៊ី អតីតប្រធានគណបក្សសង្រ្គោះជាតិ បានអំពាវនាវដល់ជនរួមជាតិកុំឲ្្យចេញទៅបោះឆ្នោតនោះមក អ្នកនាំពាក្យគណបក្សប្រជាជនកម្ពុជា បានលើកឡើងថា ចេតនាដ៏អាក្រក់នេះ នឹងគ្មានឥទ្ធិពលដល់ប្រជាពលរដ្ឋខ្មែរនោះឡើយ។
លោក សម រង្ស៊ី អតីតគណបក្សសង្រ្គោះជាតិ បានផ្ដល់បទសម្ភាសន៍ជាមួយនឹងវិទ្យុអាស៊ីសេរី កាលពីថ្ងៃទី៨ ខែមេសា ឆ្នាំ២០១៨ ម្សិលមិញនេះ ដោយបានអំពាវនាវដល់បងប្អូនជនរួមជាតិ និងក្មួយៗ ដែលស្រលាញ់លទ្ធិប្រជាធិបតេយ្យ កុំទៅបោះឆ្នោតឲ្យសោះ នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ បើមិនមានឈ្មោះគណបក្សសង្គ្រោះជាតិ នៅលើសន្លឹកឆ្នោតទេនោះ។
ជាមួយគ្នានេះ លោក សម រង្ស៊ី ក៏បានអំពាវនាវផងដែរ កុំឲ្យអ្នកសង្កេតការណ៍ជាតិ និងអន្តរជាតិ ទៅចូលរួមឃ្លាំមើលការបោះឆ្នោតបែបនេះឲ្យសោះ ពីព្រោះវាជាការបោះឆ្នោតក្លែងក្លាយ រៀបចំឡើង គ្រាន់តែដើម្បីឲ្យគណបក្សកាន់អំណាចសព្វថ្ងៃ ឈ្នះយ៉ាងងាយ ដោយបំបាត់គូប្រកួតពិតប្រាកដតែមួយគត់ គឺគណបក្សសង្គ្រោះជាតិ។
ដោយឡែក លោក សុខ ឥសនា អ្នកនាំពាក្យគណបក្សប្រជាជនកម្ពុជា ដែលជាបក្សកាន់អំណាច បានឆ្លើយតបនឹងការអំពាវនាវរបស់លោក សម រង្ស៊ី ថា ការអតីតប្រធានគណបក្សសង្រ្គោះជាតិ ញុះញង់មិនឲ្យពលរដ្ឋទៅចូលបោះឆ្នោត ពីក្រៅប្រទេសនោះ គឺគ្មានប្រសិទ្ធភាពទេ។ នៅពលនេះ លោកសម រង្ស៊ីកំពុងផ្សងព្រេងជាថ្មី ដើម្បីទទួលបានបរាជ័យម្ដងទៀត ក្នុងការញុះញង់ប្រជាពលរដ្ឋ មិនឲ្យទៅបោះឆ្នោត នាខែកក្កដាខាងមុខនេះ។ ការអំពាវនារបស់លោក សម រង្ស៊ី គឺមានចេតនាទុច្ចរិត បំផ្លាញការបោះឆ្នោត នៅកម្ពុជា។ ប៉ុន្តែលោកសម រង្ស៊ី ស្គាល់ប្រជាជនកម្ពុជាតិចពេកហើយ ពីព្រោះលោកបានទទួលបរាជ័យផ្ទួនៗគ្នា ហើយលោក សម រង្ស៊ី នៅតែបន្តព្យាយាមបំផ្លាញទៀត។
ជាមួយគ្នានេះ អ្នកនាំពាក្យគណៈកម្មាធិការជាតិរៀបចំកាបោះឆ្នោយ បាបប្រតិកម្មថា ការញុះញង់បែបនេះ គឺជាអំពើមួយផ្ទុយនឹងច្បាប់ស្តីពីការបោះឆ្នោតជ្រើសតាំងតំណាងរាស្ត្រ និងច្បាប់រដ្ឋធម្មនុញ្ញ ហើយអ្នកប្រព្រឹត្តនឹងទទួលទោសតាមច្បាប់ដែលមានចែងជាធរមាន។ គ.ជ.ប.បានចេញសេចក្តីប្រកាសព័ត៌មាន នៅថ្ងៃទី៩ ខែមេសា ឆ្នាំ២០១៨នេះថា ការបោះឆ្នោតជ្រើសតាំងតំណាងរាស្ត្ រកំពុងប្រព្រឹត្តទៅដោយស្របតាមច្បាប់បោះឆ្នោត។ គ.ជ.ប កំពុងដំណើរការយ៉ាងរលូន រៀបចំការបោះឆ្នោតជ្រើសតាំងតំណាងរាស្ត្រ នីតិកាលទី៦ ស្របតាមច្បាប់ និងធម្មនុញ្ញភាពរបស់ខ្លួន ដូចមានចែង ក្នុងមាត្រា១៥០ថ្មី នៃរដ្ឋធម្មនុញ្ញ របស់ព្រះរាជាណាចក្រកម្ពុជា។
មន្រ្ដីដដែល បានបន្តថា ការចេញសេចក្តីថ្លែងការណ៍ ធ្វើសកម្មភាពគាំទ្រ ឬការបង្ហាញនូវភាពលម្អៀង មានជាអាទិ៍ ការសរសេរជាលាយលក្ខណ៍អក្សរ ឬផ្តល់បទសម្ភាសន៍ដល់ប្រព័ន្ធផ្សព្វផ្សាយ ក្នុងន័យគាំទ្រគណបក្សនយោបាយណាមួយ ឬបេក្ខជនណាម្នាក់ ត្រូវទទួលទោស តាមមាត្រា១៤៨ ត្រូវផាកពិន័យជាប្រាក់ពី១០លានរៀល ទៅ២០លានរៀល។ យោងតាមខ្លឹមសារ និងបទដ្ឋានច្បាប់ទាំងនេះ គ.ជ.ប សូមអំពាវនាវដល់បុគ្គលទាំងនោះ ឲ្យបញ្ឈប់ជាបន្ទាន់នូវសកម្មភាពដែលខុសច្បាប់ ហើយសូមអំពាវនាដល់ពលរដ្ឋខ្មែរដែលមានឈ្មោះក្នុងបញ្ជីបោះឆ្នោត ឆ្នាំ២០១៧ អញ្ជើញចូលរួមបោះឆ្នោតដែលនឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ខាងមុខនេះ ឲ្យបានគ្រប់គ្នា ពីព្រោះជាឱកាសតែមួយគត់ នៅរៀងរាល់៥ឆ្នាំ ដើម្បីជ្រើសរើសថ្នាក់ដឹកនាំរបស់ខ្លួន និងជាប្រយោជន៍សម្រាប់អនាគតយើងផ្ទាល់។ គ.ជ.ប សូមអំពាវនាវដល់អ្នកសង្កេតការណ៍ជាតិអន្តរជាតិ បំពេញបែបបទឲ្យបានទាន់ពេលវេលា។
យោងតាមច្បាប់ស្តីពីការបោះឆ្នោតជ្រើសតាំងតំណាងរាស្ត្រ គណបក្សដែលបានចុះបញ្ជីត្រឹមត្រូវស្របតាមច្បាប់ ស្តីពីគណបក្សនយោបាយមានសិទ្ធិចុះបញ្ជីគណបក្សនយោបាយ និងបញ្ជីបេក្ខជនឈរឈ្មោះបោះឆ្នោតជ្រើសតាំងតំណាងរាស្ត្រ ហើយក៏គ្មានមាត្រាណាមួយ ក្នុងច្បាប់នេះ ចែងថា លុះត្រាមានគណបក្សប្រឆាំងចូលរួមក្នុងការបោះឆ្នោត ទើបចាត់ថា ការបោះឆ្នោតមានលក្ខណៈស្របច្បាប់នោះឡើយ៕