ខេត្តឧត្តរមានជ័យ៖ ប្រជាពលរដ្ឋខ្មែរមួយក្រុមបាននាំគ្នាឆ្លងដែន ចូលទៅរកបាញ់សត្វព្រៃ ក៏ត្រូវសមត្ថកិច្ចថៃឃាត់ខ្លួនចំនួន៣នាក់ កាលពីវេលាម៉ោង១១ព្រឹក ថ្ងៃទី៨ ខែមេសា ឆ្នាំ២០១៨ នៅក្បែរតម្រុយសីមាលេខ២៦B ស្ថិតក្នុងស្រុកនាំងរ៉ង ខេត្តបុរីរ៉ាំ ប្រទេសថៃ។
មន្ត្រីនគរបាលព្រំដែនប្រចាំច្រកជប់គគីរ បានឲ្យដឹងថា ពលរដ្ឋខ្មែរទាំង៣នាក់ ដែលសមត្ថកិច្ចថៃឃាត់ខ្លួននោះ រួមមាន ទី១-ឈ្មោះ វ៉េវ វុត ភេទប្រុស អាយុ៣៦ឆ្នាំ ទី២-ឈ្មោះ វ៉េវ ភេទប្រុស អាយុ២៥ឆ្នាំ និងទី៣-ឈ្មោះ ប៉េប ពាយ ភេទប្រុស អាយុ៤១ឆ្នាំ។ ពួកគេទាំងបីនាក់ មានលំនៅក្នុងភូមិយ៉ក ឃុំអំពិល ស្រុកបន្ទាយអំពិល ខេត្តឧត្តរមានជ័យ។
ប្រភពព័ត៌មាន បានឲ្យដឹងថា មុនពេលកើតហេតុ មានពលរដ្ឋខ្មែរមួយក្រុមបាននាំគ្នា ឆ្លងដែនចូលទៅក្នុងប្រទេសថៃ រកបាញ់សត្វព្រៃ។ លុះពេលពួកគាត់ដើរចូលទៅដល់ទឹកដី នៃស្រុកនាំងរ៉ង ខេត្តបុរីរ៉ាំ ប្រទេសថៃ ក៏ត្រូវសមត្ថកិច្ចថៃបានចាប់ខ្លួនចំនួន៣នាក់ ហើយបញ្ជូនទៅឃុំឃាំង នៅក្នុងស្រុកនាំងរ៉ង ខេត្តបុរីរ៉ាំ ប្រទេសថៃ៕
