ភ្នំពេញ៖ បុរសម្នាក់ បានប្រើល្បិចចូលទិញបារីជក់ ហើយឃើញម្ចាស់ភ្លេចខ្លួន ក៏បន្លំលួចម៉ូតូជិះគេចខ្លួន ទើបម្ចាស់ស្រែកឆោឡោ ផ្អើលដល់ប្រជាពលរដ្ឋ និងសមត្ថកិច្ចនាំគ្នាស្ទាក់ចាប់ និងស្វាគមន៍ម្នាក់មួយដៃមួយជើង កាលពីម៉ោង៨ និង២០នាទីព្រឹក ថ្ងៃទី០៩ ខែមីនា ឆ្នាំ២០១៨ នៅតាមផ្លូវលំមួយខ្សែ ស្ថិតក្នុងភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ។
មន្រ្ដីនគរបលាខណ្ឌសែនសុខ បានឲ្យដឹងថា ជនសង័្សយដែលសមត្ថកិច្ច ឃាត់ខ្លួនជាប់ពាក់ព័ន្ធនឹងករណីលួចម៉ូតូនោះ ឈ្មោះ ច័ន្ទ ដារ៉ា អាយុ៣៨ឆ្នាំ មុខរបរមិនពិតប្រាកដ ស្នាក់នៅតាមផ្លូវរថភ្លើង ស្ថិតក្នុងភូមិ២ សង្កាត់ស្រះចក ខណ្ឌដូនពេញ មានស្រុកកំណើតនៅភូមិបួល ឃុំព្រៃរំដេង ស្រុកគិរីវង់ ខេត្តតាកែវ។ រីឯម្ចាស់ម៉ូតូ ឈ្មោះ ទុយ ហង្ស អាយុ៣០ឆ្នាំ មុខរបរជាជាងភ្លើង មានស្រុកកំណើតនៅភូមិក្រាំង ឃុំធាយ ស្រុកបាភ្នំ ខេត្តព្រៃវែង ហើយបច្ចុប្បន្នស្នាក់នៅក្នុងភូមិ-សង្កាត់កើតហេតុខាងលើ។
បើតាមសម្ដីរបស់ម្ចាស់ម៉ូតូ បានឲ្យដឹងថា មុនពេលកើតហេតុ គាត់បានយកម៉ូតូរបស់គាត់មួយគ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០១២ ពណ៌ខ្មៅ ពាក់ស្លាកលេខ ភ្នំពេញ 1BN-0077 មកទុកនៅមុខកន្លែងលក់ចាប់ហួយ។ លុះមកដល់វេលាកើតហេតុ គាត់បានឃើញបុរសខាងលើដើរចូលមកកន្លែងលក់ចាប់ហួយរបស់គាត់ ដោយរកទិញបារីជក់។ ស្របពេលគាត់ភ្លេចខ្លួន ស្រាប់តែគេបានលួចកាច់កម៉ូតូរបស់គាត់ជិះចេញទៅ។ ឃើញបែបនេះ គាត់បានស្រែកថា ចោរៗ.. រហូតភ្ញាក់ផ្អើលដល់ប្រជាពលរដ្ឋ ដែលកំពុងធ្វើដំណើរតាមផ្លូវ ព័ទ្ធចាប់បានភ្លាមៗ ហើយវាយទ្រោមខ្លួន មុនពេលសមត្ថកិច្ចចុះមកដល់។
ក្រោយពេលកើតហេតុ សមត្ថកិច្ចបាននាំខ្លួនសង័្សយទៅកាន់ប៉ុស្ដិ៍នគរបាលរដ្ឋបាលទឹកថ្លា ដើម្បីសាកសួរ និងកសាងសំណុំរឿង បញ្ជូនទៅកាន់អធិការដ្ឋាននគរបាលខណ្ឌ ចាត់ការបន្តតាមនីតិវិធី៕