ខេត្តកំពង់ស្ពឺ៖ ក្មេងពាលមួយក្រុមបានចូលទៅរាំធុងបាស់ ហើយជាន់ជើងគ្នា ស្រាប់តែផ្ទុះកំហឹងយ៉ាងក្រេវក្រោធ លបកាប់ប្រហារមកលើគូទំនាស់ បណ្ដាលឲ្យរងរបួសធ្ងន់ម្នាក់ ហើយត្រូវសមត្ថកិច្ចក្របួចកជាប់ភ្លាមៗ កាលពីវេលាម៉ោង១២ និង៣០នាទីរំលងអធ្រាត្រ ឈានចូលថ្ងៃទី៨ ខែមីនា ឆ្នាំ២០១៨ នៅក្នុងមិថ្មីទម្លាប់ ឃុំចាន់សែន ស្រុកឧដុង្គ។
មន្ត្រីនគរបាលស្រុកឧដុង្គ បានឲ្យដឹងថា ជនដៃដល់ដែលសមត្ថកិច្ចឃាត់ខ្លួន ជាប់ពាក់ព័័ន្ធនឹងអំពើហិង្សានោះ ឈ្មោះ ហ៊ីម រស់ ភេទប្រុស អាយុ១៩ឆ្នាំ រស់នៅភូមិក្រាំងត្រប់ ឃុំត្រាចទង ស្រុកឧដុង្គ។ រីឯជនរងគ្រោះ ឈ្មោះ ឌុន ត្មោល ភេទប្រុស អាយុ២០ឆ្នាំ រស់ភូមិ-ឃុំកើតហេតុ។
មន្រ្ដីនគរបាលស្រុកឧដុង្គ បានឱ្យដឹងថា មុនពេលកើតមាននូវអំពើហិង្សានោះ នៅក្នុងភូមិកើតហេតុខាងលើ មានរៀបចំពិធីបុណ្យមួយ ហើយម្ចាស់បុណ្យក៏បានដាក់ធុងបាស់ ចាក់ឲ្យភ្ញៀវជិតឆ្ងាយចូលរាំលេងកម្សាន្ដ។ ស្របពេលនេះ ជនរងគ្រោះ និងក្មេងពាលមួយក្រុមនោះក៏បានចូលរាំលេងកម្សាន្ដដែរ ប៉ុន្តែនៅពេលពួកគេរាំញាក់ចុះឡើង ក៏ជាន់ជើងគ្នា ធ្វើឲ្យក្រុមក្មេងពាលទាំងនោះ កើតនឹងការខឹងសម្បា។ លុះពេលរាំចប់ ជនរងគ្រោះបានដើរត្រឡប់ទៅផ្ទះវិញ ស្រាប់តែជនដៃដល់ ព្រមទាំងបក្ខពួក បានស្ទាក់កាប់ប្រហារមកជនរងគ្រោះ បណ្តាលឱ្យរងរបួស បង្កឲ្យភ្ញាក់ផ្អើកដល់សមត្ថកិច្ចចេញទៅធ្វើអន្តរាគមន៍ និងឃាត់ខ្លួនជនដៃដល់តែម្តង។
មន្រ្ដីនគរបាលដដែល បានបន្តថា បន្ទាប់ពីឃាត់ខ្លួនបានភ្លាម សមត្ថកិច្ចបាននាំជនសង័្សយមកសាកសួរ ទើបគេឆ្លើយសារភាពថា មូលហេតុដែលបណ្តាលឱ្យរូបគេ និងបក្ខពួក ស្ទាក់ផ្លូវកាប់ប្រហារទៅលើជនរងគ្រោះនោះ គឺដោយសារពេលរាំ ជនរងគ្រោះរាំជាន់ជើងគេ។ តាមចម្លើយសារភាពនេះ សមត្ថកិច្ចនគរបាលស្រុកឧដុង្គ បានកសាងសំណុំរឿង បញ្ជូនជនសង្ស័យទៅកាន់ការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី៕