ខេត្តពោធិ៍សាត់៖ បុរសល្មោមកាមម្នាក់បានជាប់ពន្ធនាគារពីបទចាប់រំលោភសេពសន្ថវៈ ហើយទើបនឹងចេញពីគុក ប៉ុន្តែគេមិនព្រមកែខ្លួនឲ្យក្លាយជាមនុស្សល្អ ដោយបណ្ដែតបណ្ដោយទុកឲ្យកាមតណ្ហាពុះកញ្ជ្រោលឡើង រហូតអត់ទ្រាំមិនបាន ក៏ដើរទៅឃើញស្ត្រីរងគ្រោះនៅក្នុងផ្ទះ ក៏ចាប់នាងផ្លួលទៅគ្រែ រំលោភបានសម្រេចចំនួន២ដង ក្នុងមួយរំពេច តែប៉ចំថ្ងៃស៊យ ត្រូវប្អូនថ្លៃរបស់ជនរងគ្រោះមកទាន់ទាំងខ្លួនននលគក កាលពីវេលាម៉ោង១០ និង៣០នាទីព្រឹក ថ្ងៃទី១៩ ខែកុម្ភៈ ឆ្នាំ២០១៨ នៅក្នុងផ្ទះជនរងគ្រោះ ស្ថិតក្នុងភូមិស្នាអន្សា ឃុំស្នាអន្សា ស្រុកក្រគរ។
មន្ត្រីនគរបាលស្រុកក្រគរ បានឲ្យដឹងថា ជនសង្ស័យជាប់ពាក់ព័ន្ធនឹងការចោទប្រកាន់ពីបទរំលោភសេពសន្ថវៈ ហើយរត់គេចខ្លួននោះ ឈ្មោះ ស៊ឹម ខន អាយុ៣៤ឆ្នាំ រស់នៅក្នុងភូមិស្វាយស ឃុំស្នាអន្សា ស្រុកក្រគរ ខេត្តពោធិ៍សាត់។ ជននេះមានប្រវត្តិមិនសូវល្អ គឺធ្លាប់ជាប់ពន្ធនាគារ ពីបទចាប់រំលោភសេពសន្ថវៈ ដែលបានប្រព្រឹត្ត កាលពីថ្ងៃទី៣០ ខែធ្នូ ឆ្នា២០១២ ហើយគេទើបនឹងចេញពីពន្ធនាគារ កាលពីពេលថ្មីៗនេះ។ រីឯស្ត្រីរងគ្រោះ ឈ្មោះ ក ស អាយុ២៨ឆ្នាំ ជាមនុស្សមានសតិមិនប្រក្រតី។
បើតាមសម្ដីរបស់ស្ត្រីរងគ្រោះ បានរៀបរាប់ប្រាប់សមត្ថកិច្ចថា មុនពេលកើតមាននូវករណីចាប់រំលោភសេពសន្ថវៈនោះ នាងបាននៅក្នុងផ្ទះតែម្នាក់ឯង។ លុះមកដល់វេលាខាងលើ នាងបានឃើញជនសង្ស័យ ឈ្មោះ ស៊ឺម ខន ដើរចូលមកក្នុងផ្ទះរបស់នាង ហើយគេប្រើល្បិចធ្វើជាសុំទឹកផឹក ទើបនាងដើរទៅដងទឹកយកមកឱ្យគេផឹក។ ដោយអាងតែជាមនុស្ស រស់នៅក្នុងស្រុកភូមិនឹងគ្នា នាងក៏បានដើរទៅដងទឹកមកឲ្យជនសង្ស័យផឹក ស្រាប់តែគេដើរតាមនាងពីក្រោយនាងរហូតដល់ក្នុងផ្ទះ។ នៅពេលឃើញឱកាសល្អ ជនសង្ស័យបានចាប់ឱបនាងថើបសព្វសព៌ាងកាយ រួចហើយបោកផ្តួលនាងទៅលើគ្រែរំលោភសេពសន្ថវៈ រហូតបានសម្រេច។
ស្ដ្រីរងគ្រោះ បានបន្តថា បន្ទាប់ពីជនសង្ស័យរំលោភនាងបានសម្រេចម្ដងរួចហើយ គេក៏មិនទាន់គេចខ្លួនទៅណាឡើយ គឺនៅឱបនាងជាប់នៅក្នុងដៃគេរហូត ធ្វើឲ្យនាងមិនអាចរើបម្រះចេញរួចពីក្រញ៉ាំបិសាចតណ្ហារបស់គេបានទេ។ លុះមួយសន្ទុះក្រោយមក ជនសង្ស័យបានចាប់រំលោភនាងជាលើកទី ២ម្ដងទៀត ទើបប្អូនថ្លៃរបស់នាងមកទាន់ ធ្វើឲ្យជនសង្ស័យភ័យលើកខោ បម្រុងរត់គេចខ្លួន តែត្រូវបងប្អូនរបស់នាងចាប់ជាប់។
បើតាមការបំភ្លឺរបស់ប្អូនថ្លៃជនរងគ្រោះ បានឱ្យដឹងថា នៅមុនពេលកើតមានករណីចាប់រំលោភសេពសន្ថវៈនេះបន្តិច គាត់បានឃើញជនសង្ស័យ ឈ្មោះ ស៊ឺម ខន ដើរទៅកាន់ផ្ទះម្តាយក្មេករបស់គាត់ដែលមានចម្ងាយពីផ្ទះរបស់គាត់ប្រហែល ៤០ម៉ែត្រ។ នៅពេលនោះ គាត់មានការសង័្សយខ្លាចកើតមានករណីអាក្រក់ណាមួយកើតឡើង ទើបគាត់ដើរទៅកាន់ផ្ទះនោះ ពីព្រោះម្ដាយក្មេករបស់គាត់មិននៅផ្ទះ ហើយនៅតែបងថ្លៃស្រីម្នាក់ឯងដែលមានសតិមិនប្រក្រតី។ លុះពេលគាត់ដើរទៅដល់ផ្ទះម្ដាយក្មេក ស្រាប់តែប្រទះឃើញជនសង្ស័យកំពុងរំលោភជនរងគ្រោះ។
ប្អូនថ្លៃរបស់ជនរងគ្រោះ បានបន្តថា បន្ទាប់ពីឃើញជនសង្ស័យ ទាំងខ្លួនអាក្រាតកាយកំពុងដេកពីលើជនរងគ្រោះបែបនេះ គាត់បានស្ទុះទៅចាប់ជនសង្ស័យជាប់មិនឱ្យគេទៅណា ហើយគាត់បាននិយាយថា បើមានរឿងអាស្រូវបែបនេះហើយ មានតែទៅដោះស្រាយគ្នា នៅក្នងប៉ុស្តិ៍នគរបាលរដ្ឋបាល ដើម្បីស្វែងរកយុត្តិធម៌ជូនបងថ្លៃស្រីរបស់គាត់។ ប៉ុន្តែនៅពេលនោះ ជនសង្ស័យបានឆ្លើយប្រាប់គាត់ និងបងប្អូនថា ខ្ញុំដឹងអំពីរឿងនេះ…ខ្ញុំស្រឡាញ់នាងខ្លាំងពេក ទើបខ្ញុំដាច់ចិត្តប្រព្រឹត្តបែបនេះ។ ដូច្នេះទុកឱកាសឲ្យខ្ញុំទៅជួបម្តាយរបស់ខ្ញុំ ដើម្បីមកស្តីដណ្តឹងនាងតាមផ្លូវច្បាប់។
ប្អូនថ្លៃរបស់ជនរងគ្រោះ បានប្តថា បន្ទាប់មក គាត់បានស្លៀកពាក់ខោអាវឲ្យជនរងគ្រោះ រួចហើយគាត់បានប្រាប់ទៅបងប្អូនថា ឃាត់ជនសង្ស័យនៅទីនេះសិន…ចាំខ្ញុំទៅប្រាប់បងប្អូនឲ្យមកនិយាយគ្នាសិន។ ភ្លាមៗនោះ គាត់បានដើរទៅផ្ទះ ដើម្បីទៅហៅបងប្អូនបន្ថែមទៀត។ លុះពេលគាត់ត្រឡប់មកដល់ផ្ទះម្តាយក្មេកវិញ ស្រាប់តែបាត់ជនសង្ស័យ ទើបគាត់សួរទៅបងថ្លៃថា តើអាខន (ជនសង្ស័យ)ទៅណាហើយ? បងៗរបស់គាត់បានឆ្លើយថា វាសុំបងទៅយកម៉ូតូបន្តិច។ បន្ទាប់ពីស្តាប់ការរៀបរាប់របស់បងៗរួចហើយ ពួកគាត់នាំគ្នានៅរង់ចាំជនសង្ស័យ អស់រយៈពេលយ៉ាងយូរ ប៉ុន្តែមិនឃើញគេត្រឡប់មកដោះស្រាយជាមួយគ្នា ទើបពួកគាត់ទៅប្ដឹងសមត្ថកិច្ចឲ្យជួយអន្តរាគមន៍ ដើម្បីស្វែងយកយុត្តិធម៌ជូនបងថ្លៃស្រីរបស់គាត់។
លោកវរសេនីយ៍ទោ ឯម រុន អធិការស្រុកក្រគរ បានឲ្យដឹងថា ជនសង្ស័យខាងលើ មានប្រវត្តិមិនល្អ ពីព្រោះគេធ្លាប់ជាប់ពន្ធនាគារ ពីបទចាប់រំលោភសេពសន្ថវៈ កាលពីថ្ងៃទី៣០ ខែធ្នូ ឆ្នាំ២០១២ ដោយមានទោសរហូតដល់ទៅ១៥ឆ្នាំ ហើយគេទើបតែចេញពីពន្ធនាគារកាលពីពេលថ្មីៗនេះ។ ប៉ុន្តែឥឡូវជនសង្ស័យ បានចាប់រំលោភសេពសន្ថវៈទៅលើស្រី្ដមានសតិប្រក្រតីបន្តទៀត។
លោកវរសេនីយ៍ទោ ឯម រុន អធិការស្រុកក្រគរ បានបន្តថា ក្រោយពេលទទួលបានពាក្យបណ្តឹងពីក្រុមគ្រួសាររបស់ជនរងគ្រោះរួចមក សមត្ថកិច្ចជំនាញបានស្រាវជ្រាវស្វែងរកចាប់ខ្លួនជនសង្ស័យ ដើម្បីនាំមកផ្តន្ទាទោសតាមច្បាប់៕
