ខេត្តកំពង់ឆ្នាំង៖ ព្រះចៅអធិការមួយអង្គ បានខិតខំប្រឹងកសាងសមិទ្ធផលនានាក្នុងវត្ត បែរជាមានជនអគតិមួយចំនួនចង់ដកហូតរបស់ព្រះអង្គឲ្យចេញពីតំណែងចៅអធិការវត្តអារញ្ញរង្សី ហៅវត្តព្រែករាំង ស្ថិតក្នុងភូមិព្រែករាំង ឃុំទឹកហូត ស្រុករលាប្អៀរ រហូតធ្វើឲ្យប្រជាពលរដ្ឋកើតទុក្ខមិនសុខចិត្តនាំគ្នាតវ៉ា និងសុំឲ្យអាជ្ញាធរ និងសមត្ថកិច្ចពាក់ព័ន្ធជួយដល់ព្រះអង្គ កាលពីវេលាម៉ោង៨ និង៣០នាទីព្រឹក ថ្ងៃទី១៨ ខែកុម្ភៈ ឆ្នាំ២០១៨។
បើតាមសម្ដីរបស់គណៈកម្មការវត្ត និងពុទ្ធបរិស័ទចំណុះជើងវត្តព្រែករាំង បានឲ្យដឹងថា បន្ទាប់ពីព្រះចៅអធិការវត្តមុនៗ បានលាចាកសិក្ខាបទ(សឹក) និងអង្គខ្លះបាននិមន្តទៅគង់នៅវត្តផ្សេងៗនោះមក ទើបនៅអំឡុងឆ្នាំ២០០៩ ពួកគាត់ជាគណៈកម្មការវត្ត អាចារ្យ និងពុទ្ធបរិស័័ទចំណុះជើងវត្ត បានស្រុះស្រួលគ្នានិមន្តព្រះតេជគុណព្រះនាម អ៊ុក ប៊ុនថន ឲ្យធ្វើជាព្រះចៅអធិការវត្ត ដើម្បីមើលការខុសត្រូវ គ្រប់គ្រងភិក្ខុសាមណេរ និងដឹកនាំការកសាងក្នុងវត្ត។ ចាប់តាំងពីព្រះអង្គបានទទួលតំណែងជាព្រះចៅអធិការនោះមក ព្រះអង្គបា់នកសាងសមិទ្ធផលជាច្រើន នៅក្នុងវត្ត រួមមាន កសាងព្រះវិហារ សាលាឆាន់ កុដិ និងសមិទ្ធផលនានាជាច្រើនទៀត។ លុះមួយរយៈពេលចុងក្រោយនេះ បែរជាមានជនអគតិមួយចំនួនតូចចង់ដកព្រះអង្គចេញពីតំណែង។
ប្រភពព័ត៌មានដដែល បានបន្តថា ការដែលពួកគេចង់ដកព្រះអង្គ អ៊ុក ប៊ុនថន ចេញពីតំណែងព្រះចៅអធិការនោះ គឺដោយសារតែរឿងធ្វើព្រះវិហារ ដែលធ្វើមិនបានតាមកិច្ចសន្យា ហើយគេបែរជាគិតតែពីទារប្រាក់ពីព្រះអង្គ។ ក្នុងនាមពួកគាត់ជាគណៈកម្មការ អាចារ្យនិងពុទ្ធបរិស័ទចំណុះជើងវត្តអារញ្ញរង្សី ហៅវត្តព្រែករាំង ចំនួន៦៥៧នាក់ បានមើលឃើញនូវទង្វើអយុត្តិធម៌បែបនេះ គឺកើតទុក្ខមិនសុខចិត្ត នាំគ្នាផ្ដិតមេដៃ សូមសំណូមពរដល់សម្តេចសង្ឃ សម្តេចតេជោ ហ៊ុន សែន និងលោកអភិបាលខេត្ត សូមមេត្តាជួយរកយុត្តិធម៌ប្រគេនដល់ព្រះចៅអធិការវត្ត ព្រះនាម អ៊ុក ប៊ុុនថន ផង ពីព្រោះព្រះអង្គគ្មានកំហុសអ្វីនោះទេ។
ព្រះតេជគុណព្រះនាម អ៊ុក ប៊ុនថន ចៅអធិការវត្តព្រែករាំង បានមានថេរដីកាថា រឿងដែលគេចង់ដកអាត្មាចេញពីតំណែងព្រះចៅអធិការនោះ គឺផ្ដើមចេញពីរឿងកសាងព្រះវិហារ។ ក្នុងការកសាងព្រះវិហារនោះ មានជាងចំនួន៤នាក់រួចមកហើយ ក្នុងនោះ ទី១-ជាងកសាងពីគ្រឹះ រហូតដល់ពិតាន អស់ប្រាក់ជាង៩ម៉ឺនដុល្លារ ទី២-ជាងម៉ៅការធ្វើផ្ទោង តែក្រោយមកគាត់សុំឈប់វិញ ទី៣-ជាងឈ្មោះ ប៊ុន សេង ជាអ្នកម៉ៅការធ្វើបន្ត ក្នុងតម្លៃ៨ម៉ឺនដុល្លារ ហើយបានបើកប្រាក់ឱ្យអស់ជាង២ម៉ឺនដុល្លារ សល់ជាង៥ម៉ឺនដុល្លារ និងទី៤-ជាងឈ្មោះ ប៊ុន សាន និងប្រពន្ធឈ្មោះ សឹម ឡេង បានមកម៉ៅការបន្ត ដោយធ្វើកិច្ចសន្យាឲ្យរួចរាល់នៅឆ្នាំ២០១៧។
ព្រះចៅអធិការដដែល មានថេរដីការបន្តថា បន្ទាប់ពីធ្វើវិហារមិនទាន់ចេញជារូបរាងអីផង ស្រាប់តែនៅចុងខែវិច្ឆិកា ជាងនោះបានមកបង្ខំទារលុយ ជាពិសេសនៅពេលបុណ្យកឋិន និងបុណ្យផ្សេងៗទៀត។ លុះពេលវត្តគ្មានលុយឲ្យ បែរជាជាងនោះបានទៅទៅប្តឹងដល់ព្រះអនុគណស្រុករលាប្អៀរថា អាត្មាមិនឱ្យលុយជាង។ ប៉ុន្តែបើតាមការពិត អាត្មាបានត្រៀមលុយចំនួន១៥លានរៀលរួចរាល់ហើយ ពោលគឺឲ្យតាមតម្លៃដែលជាងធ្វើបានសម្រេច។ លុះក្រោយមក មិនដឹងយ៉ាងម៉េច បានជាមន្ត្រីសង្ឃ និងសមត្ថកិច្ចមកចង់ដកអាត្មា ចេញពីព្រះចៅអធិការវត្តទៅវិញ។
ព្រះចៅអធិការដដែល បានបន្តថា អាត្មាដូចជាអត់យល់ដែររឿងហ្នឹង ពីព្រោះអាត្មាគ្មានបានប្រព្រឹត្តខុសនឹងអ្វីផង ទាំងភិក្ខុសាមណេរ និងពុទ្ធបរិស័ទចំណុះជើងវត្ត មិនមានអ្នកណាស្អប់អាត្មាទេ។ រីឯរឿងដកអាត្មាចេញពីតំណែងនោះ គឺផ្ដើមចេញពីជាងធ្វើព្រះវិហារនេះឯង។ ដូច្នេះអាត្មាសំណូមពរដល់សម្តេចសង្ឃទាំងពីរគណៈ សម្តេចតេជោ ហ៊ុន សែន និងអភិបាលខេត្ត សូមមេត្តាជួយរកយុត្តិធម៌ដល់អាត្មាផង។
ទោះជាយ៉ាងទាក់ទិននឹងការលើកឡើងខាងលើនេះ KBN មិនអាចទាក់សុំការបំភ្លឺពីមន្ត្រីសង្ឃស្រុក និងខេត្ត ក៏ដូចជាអ្្នកពាក់ព័ន្ធបានទេ នៅរសៀល ថ្ងៃទី១៩ ខែកុម្ភៈ ឆ្នាំ២០១៨នេះ៕
