ខេត្តព្រះសីហនុ៖ នៅក្នុងអំឡុងចូលឆ្នាំថ្មីប្រពៃណីជនជាតិចិន៤ថ្ងៃ គឺចាប់ពីថ្ងៃទី១៤-១៨ ខែកុម្ភៈ ឆ្នាំ២០១៨នេះ ភ្ញៀវទេសចរជាតិ និងអន្តរជាតិបានសម្រុកទៅដើរលេងកម្សាន្ដ នៅតាមតំបន់រមណីយដ្ឋាននានា ក្នុងខេត្តព្រះសីហនុ មានចំនួន៩ម៉ឺននាក់។
លោកតាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានឲ្យដឹងថា នៅក្នុងប្រទេសកម្ពុជាយើងសម្បូរទៅដោយតំបន់ទេសចរណ៍ប្រវត្តិសាស្រ្ដ និងធម្មជាតិ ដែលជាជាអាទិភាពដ៏សំខាន់បំផុត ក្នុងការទាក់ទាញភ្ញៀវទេសចរអន្តរជាតិឲ្យចូលមកទស្សនាកម្សាន្ដ។ ដោយឡែកនៅក្នុងខេត្តព្រះសីហនុ ក៏មានតំបន់ទេសចរណ៍ធម្មជាតិជាច្រើនដែលអាចទាក់ទាញភ្ញៀវទេសចរជាតិ និងអន្តរជាតិឲ្យចូលមកទស្សនា ហើយតំបន់ដែលជាអាទិភាពក្នុងទាក់ទាញរបស់ខេត្តនេះ គឺបន់ឆ្នេរសមុទ្រ តំបន់កោះ និងរមណីយដ្ឋានធម្មជាតិជាច្រើនទៀត។
លោកប្រធានមន្ទីរទេសចរណ៍ខេត្តព្រះសីហនុ បានបន្តថា នៅក្នុងអំឡុងបុណ្យចូលឆ្នាំប្រពៃណីជនជាតិចិន វៀតណាម និងកូរ៉េ រយៈពេល៤ថ្ងៃ គឺចាប់ពីថ្ងៃទី១៤-១៨ ខែកុម្ភៈនេះ ភ្ញៀវទេសចរជាតិ និងអន្តរជាតិបានសម្រុកមកទស្សនាតំបន់ទេសចរណ៍នានា ជាពិសេសតំបន់កោះ ក្នុងមួយថ្ងៃៗមានទេសចរចន្លោះពី៤ពាន់ទៅជិត៥ពាន់នាក់។ ចំណែកសុវត្ថិភាព សន្តិសុខទូទៅសម្រាប់អ្នកទេសចរ គឺល្អប្រសើរបំផុត ដោយមានកិច្ចគាំពារ ថែរក្សាការពារពីសមត្ថកិច្ចគ្រប់ផ្នែក រួមមានទាំងនៅលើគោក និងនៅក្នុងទឹក៕
