ខេត្តកំពង់ចាម៖ ភ្លើងឆេេះភ្នក់ភ្លើងក្នុងវត្ត រាលឆាបដាលដល់វាលស្បូវ នៅតាមមាត់ទន្លេ ឆេះចេញអណ្ដាតភ្លើងយ៉ាងសន្ធោសន្ធៅ ផ្អើលសមត្ថកិច្ច និងអាជ្ញាធរចេញទៅពន្លត់ កាលពីព្រលប់ ថ្ងៃទី១៣ ខែកុម្ភៈ ឆ្នាំ២០១៨ នៅក្នុងសង្កាត់បឹងកុក ក្រុងកំពង់ចាម។
លោក ខ្ចង អូន ចៅសង្កាត់បឹងកុក បានឲ្យដឹងថា កាលពីវេលាម៉ោង២ និង៣០នាទីរសៀល ថ្ងៃដដែល ភ្លើងបានឆេះភ្នក់ភ្លើងតូចមួយ នៅក្បែរចេតិយ ក្នុងបរិវេណវត្តបឹងកុក។ ប៉ុន្តែដោយសារមិនមានអ្នកណាម្នាក់ចាប់អារម្មណ៍ ទើបធ្វើឲ្យភ្លើងនោះ បានឆេះរាលដាលបន្តិចម្តងៗមកដល់ស្មៅ នៅមាត់បឹងកុក ហើយឆេះរាលទៅដល់ស្បូវ ដែលដុះនៅក្នុងបឹងយ៉ាងសន្ធោសន្ធៅតែម្ដង។
លោកចៅសង្កាត់បឹងកុក បានបន្តថា ក្រោយពីទទួលបាននូវព័ត៌មានបែបនេះ សមត្ថកិច្ចប៉ុស្តិ៍នគរបាលរដ្ឋបាលសង្កាត់បឹងកុក រូបលោក និងលោក ចាន់ ផល្លី អភិបាលក្រុងកំពង់ចាម បានដឹកនាំកម្លាំង ចុះមកដល់មាត់បឹងជាបន្ទាន់ ដើម្បីពិនិត្យមើលស្ថានភាពដែលបានកើតឡើង។ ភ្លាមៗនោះដែរ លោកស្នងការនគរបាលខេត្តកំពង់ចាមក៏បានបញ្ជាឲ្យមន្រ្ដីបង្ការ និងពន្លត់អគ្គិភ័យ បើករថយន្តពន្លត់អគ្គិភ័យចំនួន១០គ្រឿង ចេញមកជួយអន្តរាគមន៍បាញ់ទឹកពន្លត់ ដើម្បីការពារកុំឲ្យឆេះរាលដល់ផ្ទះប្រជាពលរដ្ឋ។
លោក ចាន់ ផល្លី អភិបាលក្រុងកំពង់ចាម បានឲ្យដឹងថា ក្នុងពេលកើតមានគ្រោះអគ្គិភ័យនោះ លោកបានបានដឹកនាំកម្លាំងសមត្ថកិច្ចជាច្រើននាក់ រួមមាន នគរបាល និងអាវុធហត្ថ ចុះទៅដល់កន្លែងកើតហេតុ ដោយប្រើប្រាស់រថយន្តពន្លត់អគ្គិភ័យចំនួន១០គ្រឿង បាញ់ទឹកអស់ចំនួន៣០រថយន្ត ទើបភ្លើងរលត់ទៅវិញ និងគ្រប់គ្រង់ស្ថានការបានទាំងស្រុង។
បើតាមសម្ដីរបស់ប្រជាពលរដ្ឋ បានឲ្យដឹងថា នៅមុខវិទ្យាល័យ ហ៊ុន សែន បឹងកុក មានស្ថានីយប្រេងឥន្ធនៈមួយកន្លែង ដែលភ្លើងស្ទើរតែភ្លើងឆេះដល់ តែត្រូវបានកម្លាំងសមត្ថកិច្ចជួយអន្តរាគមន៍ទាន់ពេល ទើបមិនមានបង្កឲ្យរងនូវការខូចខាត និងរងគ្រោះដល់មនុស្ស៕
