ភ្នំពេញ៖ បន្ទាប់ពីលោក សឺន ស៊ូប៊ែរ្ដិ៍ ប្រធានគណបក្សសិទ្ធិមនុស្ស ដាក់ពាក្យជូនសម្ដេចក្រឡាហោម ស ខេង ឧបនាយករដ្ឋមន្រ្ដី និងជារដ្ឋមន្ត្រីក្រសួងមហាផ្ទៃ ស្ដីពីការប្រកាសរំលាយគណបក្សរបស់ខ្លួន កាលពីថ្ងៃទី២៨ ខែមករា ឆ្នាំ២០១៨នោះមក ទើបនៅថ្ងៃទី១ ខែកុម្ភៈនេះ សម្តេចក្រឡាហោម បានឆ្លើយតបមកវិញថា ការប្រកាសរំលាយខ្លួនរបស់គណបក្សសិទ្ធិមនុស្ស មិនទាន់ត្រឹមត្រូវតាមច្បាប់ ស្ដីពីគណបក្សនយោបាយ និងលក្ខន្តិកៈគណបក្សសិទ្ធិមនុស្ស ដែលតម្កល់ទុក នៅក្នុងក្រសួងមហាផ្ទៃ នៅឡើយ។
យោងតាមសេចក្ដីជូនដំណឹងរបស់ក្រសួងមហាផ្ទៃ ចុះថ្ងៃទី១ ខែមករា ឆ្នាំ២០១៨ ដែលចុះហត្ថលេខា ដោយសម្ដេចក្រឡាហោម បានផ្ញើជូន លោក សឺន ស៊ូប៊ែរ្តិ៍ ប្រធានគណបក្សសិទ្ធិមនុស្ស បានឲ្យដឹងថា ក្រសួងមហាផ្ទៃបានទទួលរួចហើយ នូវលិខិតជូនដំណឹង ស្ដីអំពីការរំលាយគណបក្សសិទ្ធិមនុស្ស ដូចមានចុះក្នុងយោងខាងលើ។ ផ្អែកតាមបទប្បញ្ញត្តិ មាត្រា៣៣ នៃច្បាប់ ស្តីពីគណបក្សនយោបាយ និងលក្ខន្តិកៈរបស់គណបក្សសិទ្ធិមនុស្ស ដែលបានតម្កល់ទុក នៅក្នុងក្រសួងមហាផ្ទៃ ក្រសួងមហាផ្ទៃសូមស្នើឲ្យគណបក្សសិទ្ធិមនុស្ស អនុវត្តនីតិវិធីពាក់ព័ន្ធ នឹងការរំលាយគណបក្សសិទ្ធិមនុស្ស ឲ្យបានត្រឹមត្រូវ តាមប្រការ៥០(ថ្មី) កថាខណ្ឌទី២ នៃលក្ខន្តិកៈគណបក្សសិទ្ធិមនុស្ស ដែលបានចែងថា (រួចដាក់ជូនសមាជដើម្បីសុំការអនុម័ត តាមសំឡងគាំទ្រភាគច្រើន ២/៣ នៃសមាជិកដែលមានសិទ្ធិ សម្រេចរបស់អង្គសមាជ ទាំងមូល)”។
យោងតាមលិខិតរបស់លោក សឺន ស៊ូបែរ្តិ៍ ត្រូវបានបង្ហោះតាមរយៈផេកផ្លូវការរបស់លោក កឹម សុខា នៅម៉ោង២ និង៣៨នាទីរសៀល ថ្ងៃទី២៩ ខែមករា ឆ្នាំ២០១៨ នេះ បានបញ្ជាក់ថា «តាមសម័យប្រជុំ នៃគណៈកម្មាធិការអចិន្ត្រៃយ៍ នៃគណបក្សសិទ្ធិមនុស្ស បានសម្រេចជាឯកច្ឆន្ទ រំលាយគណបក្សសិទ្ធិមនុស្ស ចាប់ពីថ្ងៃនេះតទៅ»។
ទោះយ៉ាងណា លិខិតដែលដាក់ជូនរដ្ឋមន្ត្រីក្រសួងមហាផ្ទៃនេះ មិនបានបញ្ជាក់អំពីមូលហេតុ នៃការសម្រេចរំលាយគណបក្សសិទ្ធិមនុស្សនោះឡើយ ប៉ុន្តែលោក សឺន ស៊ូប៊ែរ្តិ៍ បានប្រាប់អ្នកសារព័ត៌មានក្នុងស្រុកថា គណបក្សនេះមានគម្រោងរំលាយជាយូរមកហើយ ពោលគឺតាំងពីគណបក្ស សម រង្ស៊ី និងគណបក្សសិទ្ធិមនុស្ស បានច្របាច់បញ្ចូលគ្នាមកម្ល៉េះ។ លោកបន្តថា គ្មានហេតុផលនៅពីក្រោយ ទាក់ទងនឹងការរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧នោះទេ ប៉ុន្តែបើទោះជាចង់បន្ត ក៏«គ្មានប្រជាពលរដ្ឋគាំទ្រ» នោះដែរ។
ការប្រកាសរំលាយគណបក្សសិទ្ធិមនុស្ស នៅពេលនេះ គឺធ្វើឡើងស្របពេលដែល លោក កឹម សុខា អតីតប្រធានគណបក្សនេះ កំពុងជាប់ឃុំក្នុងពន្ធនាគារ ក្រោមការចោទប្រកាន់ពីបទ «ក្បត់ជាតិ» និងធ្វើឡើងស្របពេលដែលមានការប្រកាសពីបង្កើតចលនាសង្គ្រោះជាតិ ដែលកំពុងតែមានភាពចម្រូងចម្រាស នៅក្នុងអតីតគណបក្សសង្គ្រោះជាតិ រវាងភាគីមកពីគណបក្ស សម រង្ស៊ី និងគណបក្សសិទ្ធិមនុស្ស។
សូមបញ្ជាក់ថា គណបក្សសិទ្ធិមនុស្សបានបង្កើតឡើង នៅឆ្នាំ២០០៧ ដោយមានប្រជាពលរដ្ឋ ប្រមាណជា២០ម៉ឺននាក់ បានផ្តិតមេដៃ ដើម្បីឲ្យលោក កឹម សុខា ដែលជាអតីតប្រធានមជ្ឈមណ្ឌលសិទ្ធិមនុស្សកម្ពុជា ធ្វើជាប្រធានគណបក្ស។ ក្រោយពេលបង្កើតគណបក្សសិទ្ធិមនុស្ស បានរយៈពេល១ឆ្នាំ លោក កឹម សុខា ក៏បានឈរឈ្មោះជាបេក្ខភាពនាយករដ្ឋមន្រ្តី សម្រាប់ការបោះឆ្នោតសភា នាខែកក្កដា ២០០៨។ នៅឆ្នាំនោះ គណបក្សកាន់អំណាចបានឈ្នះសំឡេង៩០អាសនៈ គណបក្សសម រង្ស៊ី ទទួលបាន២៦អាសនៈ និងគណបក្សសិទ្ធិមនុស្ស ទទួលបាន៣អាសនៈ។
ក្រោយពីការបង្កើតគណបក្សសិទ្ធិមនុស្ស មិនបានប៉ុន្មានឆ្នាំផង គណបក្សនេះក៏បានចាប់ដៃគ្នាជាមួយនឹងគណបក្ស សម រង្ស៊ី បានប្រកាសរួបរួមគ្នា បង្កើតគណបក្សសង្រ្គោះជាតិ កាលពីអំឡុងឆ្នាំ២០១២ ហើយបានចូលរួមប្រកួតប្រជែងការបោះឆ្នោតថ្នាក់ជាតិ នៅឆ្នាំ២០១៣ ដោយទទួលបាន៥៥អាសនៈ និងគណបក្សប្រជាជនកម្ពុជា បានទទួល៦៨អាសនៈ។ លុះមកដល់ថ្ងៃទី១៦ ខែវិច្ឆិកា ឆ្នាំ២០១៧ គណបក្សសង្រ្គោះជាតិ ត្រូវបានតុលាការកំពូលរំលាយចោល ក្រោយពេលចាប់ខ្លួនលោក កឹម សុខា ក្រោមការចោទប្រកាន់ពីអំពើក្បត់ជាតិ៕
សូមអានសេចក្ដីជូនដំណឹងទាំងស្រុងដូចខាងក្រោម៖
