ភ្នំពេញ៖ បន្ទាប់ពីបើកសវនាការពេញមួយព្រឹកនោះមក ទើបនៅវេលាម៉ោង១១ និង២៥នាទីព្រឹក ថ្ងៃទី១ ខែកុម្ភៈ ឆ្នាំ២០១៨នេះ សាលាឧទ្ធរណ៍បានសម្រេច នៅតែបន្តឃុំខ្លួនលោក កឹម សុខា ដាក់ក្នុងពន្ធនាគារដដែល។
នៅក្នុងសវនាការលើសំណុំរឿងសុំនៅក្រៅឃុំជាបណ្ដោះអាសន្នរបស់ជនត្រូវចោទ កឹម សុខា អតីតប្រធានគណបក្សសង្គ្រោះជាតិ បានធ្វើឡើងជាអសាធារណៈ នៅវេលាម៉ោង៨ព្រឹក ថ្ងៃទី១ ខែកុម្ភៈនេះ នៅបន្ទប់លេខ៣ នៃសាលាឧទ្ធរណ៍ ប្រឆាំងនឹងការសម្រេចរបស់ចៅក្រមស៊ើបសួរសាលាដំបូងរាជធានីភ្នំពេញ។ ជនត្រូវចោទ កឹម សុខា ត្រូវបានសមត្ថកិច្ចនាំខ្លួននៅកាន់ពន្ធនាគារត្រពាំងផ្លុង ខេត្តត្បូងឃ្មុំវិញ ក្រោមការយាមកាមយ៉ាងខ្លាំងពីកម្លាំងសមត្ថកិច្ច។
លោកមេធាវី ជូង ជូងី ថ្លែងប្រាប់អ្នកសារព័ត៌មានថា សភាស៊ើបសួរ នៃសាលាឧទ្ធរណ៍ មិនព្រមដោះលែងលោក កឹម សុខា ទេ ពោលគឺសាលាឧទ្ធរណ៍ នៅបន្តឃុំខ្លួនកូនក្ដីរបស់លោក ដាក់នៅក្នុងពន្ធនាគារដដែល ដើម្បីរង់ចាំតុលាការបន្តនីតិវិធី។
លោក អេង ឆៃអ៊ាង អតីតអនុប្រធានគណបក្សសង្រ្គោះជាតិ បានសរសេរនៅលើគណនីហ្វេសប៊ុកផ្ទាល់ខ្លួនថា លោកប្រធាន (លោក កឹម សុខា) មិនបានធ្វើអ្វីខុសច្បាប់ទេ ឬធ្វើអ្វីឲ្យកំហុសចំពោះជាតិ និងប្រជាពលរដ្ឋខ្មែរនោះទេ ដូច្នេះសូមឲ្យតុលាការដោះលែងលោកឲ្យមានសេរីភាពឡើងវិញ។
ក្នុងឱកាសបើកសវនាលើសំណុំរឿងសុំនៅក្រៅឃុំជាបណ្ដោះអាសន្នរបស់ជនត្រូវចោទ កឹម សុខា នៅក្នុងសាលាឧទ្ធរណ៍នោះ គឺឃើញមានវត្តមានលោក កឹម សុខា ជាលើកដំបូងនេះ ចាប់តាំងពីលោកត្រូវបានចាប់ខ្លួន ក្រោមការចោទប្រកាន់ពីបទ ក្បត់ជាតិ ។ នៅពេលនោះដែរ គេក៏សង្កេតឃើញមានអ្នកគាំទ្រលោក និងម្តាយ ព្រមទាំងភរិយារបស់លោក កឹម សុខា បានមកឈរ នៅមុខសាលាឧទ្ធរណ៍ ដើម្បីរង់ចាំលទ្ធផល នៃសវនការនោះ។ ដោយឡែកតាមបណ្តោយ ផ្លូវជុំវិញសាលាឧទ្ធរណ៍ ត្រូវសមត្ថកិច្ចបិទបារ៉ាស់ជាច្រើនកន្លែង ហើយមានដាក់កងកម្លាំងការពារសន្តិសុខយ៉ាងប្រយ័ត្នបំផុត។ លុះមកដល់វេលាម៉ោងជាង១០ព្រឹក ថ្ងៃទី០១ ខែកុម្ភៈ ឆ្នាំ២០១៨នេះ ទើបសមត្ថកិច្ចអនុញ្ញាតឲ្យប្រពន្ធ និងម្តាយបង្កើតរបស់លោក កឹម សុខា ចូលទៅក្នុងបរិវេណសាលាឧទ្ធរណ៍ ដើម្បីទៅជួប និងយកបាយទៅឲ្យលោក កឹម សុខា ហូប។
សូមរំឭកថា លោក កឹម សុខា ត្រូវបានសមត្ថកិច្ចចាប់ខ្លួន កាលពីរំលងអធ្រាត្រ ឈានចូលថ្ងៃទី៣ ខែកញ្ញា ឆ្នាំ២០១៧ បន្ទាប់ពីមានការបែកធ្លាយវីដេអូមួយ បង្ហាញថា លោកបានអនុវត្តតាមការបង្គាប់បញ្ជារបស់សហរដ្ឋអាមេរិក ក្នុងគោលបំណងផ្តួលរំលំរាជរដ្ឋាភិបាលកម្ពុជា អស់រយៈពេលជាយូរណាស់មកហើយ។ លុះមកដល់ថ្ងៃទី៦ ខែកញ្ញា ឆ្នាំ២០១៧ លោក កឹម សុខា ត្រូវបានតុលាការឃុំខ្លួនដាក់ក្នុងពន្ធនាគារត្រពាំងផ្លុង ខេត្តត្បូងឃ្មុះ ជាបណ្តោះអាសន្នដោយការចោទប្រកាន់ពីបទ «ក្បត់ជាតិ»។ បទ «សន្និដ្ឋិភាពជាមួយបរទេស» នេះ បើតាមមាត្រា៤៤៣ នៃក្រមព្រហ្មទណ្ឌរបស់ព្រះរាជាណាចក្រកម្ពុជា លោក កឹម សុខា អាចប្រឈមមុខនឹងការជាប់ពន្ធនាគារពី១៥ឆ្នាំទៅ៣០ឆ្នាំ៕
