ភ្នំពេញ៖ បន្ទាប់ពីលោកសឺន ស៊ូបែរិ៍្ត ប្រធានគណបក្សសិទ្ធិមនុស្ស ដែលបង្កើតឡើងដោយលោកកឹម សុខា បានផ្ញើលិខិតសុំរំលាយបក្សរបស់ខ្លួនទៅជូនសម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ កាលពីថ្ងៃទី២៨ ខែមករា ឆ្នាំ២០១៨នោះមក កញ្ញា កឹម មនោវិទ្យា កូនស្រីច្បងរបស់លោក កឹម សុខា បានបញ្ជាក់ថា ការរំលាយគណបក្សសិទ្ធិមនុស្ស គឺចង់បញ្ជាក់ពីជំហរដ៏រឹងមាំរបស់គណបក្សប្រឆាំង គឺជ្រកក្រោមស្លាកគណបក្សសង្រ្គោះជាតិតែមួយគត់ មិនបែកបាក់គរបស់អ្នកប្រជាធិបតេយ្យ និងអ្នកជាតិនិយម។
កញ្ញា កឹម មនោវិទ្យា កូនស្រីច្បងរបស់លោក កឹម សុខា អតីតប្រធានគណបក្សសង្រ្គោះជាតិដែលកំពុងជាប់ឃុំឃាំង នៅក្នុងមន្ទីរពន្ធនាគារត្រពាំងផ្លុង ខេត្តត្បូងឃ្មុំ បានសរសេរ នៅលើគណនី នៃបណ្ដាញសង្គមរបស់នាងថា ការរំលាយគណបក្សសិទ្ធិមនុស្ស ដោយឈរលើគោលការណ៍៣យ៉ាង រួមមាន ទី១-ដើម្បីបញ្ជាក់ពីជំហរ នៃការរួបរួមក្រោមស្លាកគណបក្សសង្រ្គោះជាតិតែមួយគត់ មិនមានការបែកបាក់របស់អ្នកប្រជាធិបតេយ្យ និងអ្នកជាតិនិយម ទី២-មិនធ្វើតាមអ្វីដែលគូប្រកួត គូរឱ្យយើងដើរ គឺក្រោយពីការរំលាយគណបក្សសង្រ្គោះជាតិ ពីព្រោះគេមានគោលបំណងឱ្យយើងបែកគ្នា ហើយដើរទៅរកគណបក្សចាស់រៀងៗខ្លួន និងទី៣-គោរពឆន្ទ:របស់ប្រជាពលរដ្ឋ និងម្ចាស់ឆ្នោតជាង៣លាននាក់ ដោយនៅជាមួយគណបក្សសង្រ្គោះជាតិ។
ទោះជាយ៉ាងណា បន្ទាប់ពីគណបក្សសិទ្ធិមនុស្ស បានប្រកាសរំលាយដោយខ្លួនឯងចេញពីឆាកនយោបាយ បានមួយថ្ងៃនោះមក លោក អ៊ូ ច័ន្ទរ័ត្ន ស្ថាបនិកនៃគណបក្សសិទ្ធិមនុស្ស នៅថ្ងៃនេះ បានចេញមុខជំទាស់នឹងការរំលាយនេះ ដោយលោកអះអាងថា គ្មានហេតុផលណាមួយ សមទំនងឈានដល់ការរំលាយនោះទេ។
លោក អ៊ូ ច័ន្ទរ័ត្ន បានអះអាងថា លោកគឺជាអ្នកចូលរួមបង្កើតគណបក្សសិទ្ធិមនុស្សជាមួយនឹងលោក កឹម សុខា ប្រធានគណបក្ស។ ដោយលោកបានបញ្ជាក់ពីជំហររបស់លោកថា លោកមិនចូលរួម ក្នុងការរំលាយគណបក្សសិទ្ធិមនុស្ស នេះឡើយ។ លោកក៏បានចោទជាសំណួរទៅកាន់សមាជិកដទៃទៀតថា តើការរំលាយគណបក្សសិទ្ធិមនុស្សនេះ ទទួលបានប្រយោជន៍អ្វីត្រឡប់មកវិញ?
បើតាមការឯកភាព នៅក្នុងសេចក្ដីសម្រេចរបស់គណបក្សសិទ្ធិមនុស្ស កាលពីថ្ងៃចន្ទ ទី២៩ ខែមករា ម្សិលមិញ ការរំលាយគណបក្សសិទ្ធិមនុស្ស នេះ យោងទៅលើគោលការណ៍៣ចំណុច រួមមាន ទី១-បញ្ជាក់ពីជំហរ នៃការរួបរួមក្រោមស្លាកគណបក្សសង្រ្គោះជាតិតែមួយគត់ មិនមានការបែកបាក់របស់អ្នកប្រជាធិបតេយ្យ និងអ្នកជាតិនិយម ទី២-មិនធ្វើតាមអ្វីដែលគូប្រកួត គូរឱ្យយើងដើរ គឺក្រោយពីការរំលាយគណបក្សសង្រ្គោះជាតិ គេមានបំណងឱ្យយើងបែកគ្នា ហើយរត់ទៅរកគណបក្សចាស់រៀងៗខ្លួន និងទី៣-គោរពឆន្ទៈរបស់ប្រជាពលរដ្ឋ និងម្ចាស់ឆ្នោតជាង៣លាននាក់ ដោយនៅជាមួយគណបក្សសង្រ្គោះជាតិ។
ទោះជាមានហេតុផលបែបនេះ ជាការកត់សម្គាល់ជុំវិញការរំលាយគណបក្សសិទ្ធិមនុស្ស នេះ ក៏មានមតិជាច្រើនបានសម្ដែងនូវការភ្ញាក់ផ្អើល មិនតិចដែរ ពីព្រោះពួកគេមិននឹកស្មានថា ស្ងាត់ៗគណបក្សមួយនេះ បែរជាចេញមុខមករំលាយដោយខ្លួនឯង ស្របពេលដែលចលនាសង្គ្រោះជាតិថ្មី ក្រោមការដឹកនាំរបស់លោក សម រង្ស៊ី បានប្រកាសលេចចេញរូបរាងជាផ្លូវការ កាលពីថ្ងៃចន្ទ ទី២៩ ខែមករា ឆ្នាំ២០១៨ម្សិលមិញ នៅទីក្រុងឡងបុិច (Long Beach) រដ្ឋកាលីហ្វ័រញ៉ា សហរដ្ឋអាមេរិក.
សូមជម្រាបថា គណបក្សសិទ្ធិមនុស្សនេះ បានបង្កើតឡើង កាលពីខែកក្កដា ឆ្នាំ២០០៧ ដឹកនាំដោយលោកកឹម សុខា គណបក្សសិទ្ធិមនុស្ស ហើយបក្សនេះបានចូលរួម ក្នុងការបោះឆ្នោតជ្រើសតាំងតំណាងរាស្ត្រ នៅឆ្នាំ២០០៨ ដើម្បីដណ្តើមនូវការគាំទ្រពីគណបក្សកាន់អំណាច និងគណបក្សប្រឆាំងដទៃទៀត ដោយឈរក្រោមស្លាក នៃលទ្ធិប្រជាធិបតេយ្យ។ នៅឆ្នាំនោះ គណបក្សប្រជាជនកម្ពុជា ដែលជាគណបក្សដឹកនាំប្រទេស ទទួលបានសំឡេងគាំទ្រ រហូតដល់ទៅ៩០អាសនៈ នៃរដ្ឋសភា គណបក្ស សម រង្ស៊ី ទទួលបាន២៦អាសនៈ និងគណបក្សសិទ្ធិមនុស្សទទួលបានតែ៣អាសនៈ។
បន្ទាប់ពីនោះ គណបក្សសិទ្ធិមនុស្ស និងគណបក្សសម រង្ស៊ី ក៏បានប្រកាសរួបរួមគ្នា ដោយបង្កើតបានគណបក្សថ្មីមួយទៀត គឺគណបក្សសង្រ្គោះជាតិ នាឆ្នាំ២០១២ នៅក្នុងប្រទេសហ្វីលីពីន។ គណបក្ស(គណបក្សសង្រ្គោះជាតិ)នេះ បានចូលរួមប្រកួតប្រជែង ក្នុងការបោះឆ្នោតថ្នាក់ជាតិ នៅឆ្នាំ២០១៣។ ការរួមគ្នា រវាងគណបក្សសិទ្ធិមនុស្ស និងគណបក្សសម រង្ស៊ី នេះ ធ្វើឲ្យបក្សប្រឆាំងទទួលបាន៥៥អាសនៈ ខណៈគណបក្សប្រជាជនកម្ពុជា បានទទួល៦៨អាសនៈ គឺធ្លាក់ចុះយ៉ាងគំហុក។ លុះមកដល់ដំណាក់កាលចុងក្រោយនេះ មន្ត្រីអតីតគណបក្សសង្គ្រោះជាតិ ត្រូវគេមើលឃើញថា កំពុងស្ថិតក្នុងស្ថានភាពរកាំរកូសនឹងគ្នា ខណៈលោកសម រង្ស៊ី ប្រកាសបង្កើតចលនាសង្គ្រោះជាតិជាផ្លូវការ ដើម្បីធ្វើសកម្មភាពជួយស្រោចស្រង់អតីតគណបក្សសង្គ្រោះជាតិ ដែលត្រូវបានតុលាការកំពូលរំលាយចោល កាលពីថ្ងៃទី១៦ ខែវិច្ឆិកា ឆ្នាំ២០១៧៕
