ភ្នំពេញ៖ បន្ទាប់ពីសាលាដំបូងរាជធានីភ្នំពេញ បានសម្រេចចោទប្រកាន់ជាផ្លូវការដល់អតីតគណៈកម្មការបុណ្យសពលោក កែម ឡី ចំនួនបីរូប ពីបទរំលោភលើទំនុកចិត្តពាក់ព័ន្ធនឹងបច្ច័យបុណ្យ តាមពាក្យបណ្តឹងរបស់លោក ពេជ្រ ស្រស់ ប្រធានគណបក្សនយោបាយមួយនោះមក នៅថ្ងៃទី៣០ ខែមករា ឆ្នាំ២០១៨នេះ ក្រុមអង្គការក្រៅរដ្ឋាភិបាលចំនួន៣៥ បានចេញសេចក្តីថ្លែងការណ៍រួមមួយ ស្នើសុំឲ្យតុលាការទម្លាក់ការចោទប្រកាន់លើព្រះភិក្ខុ ប៊ុត ប៊ុនតិញ លោក ប៉ា ងួនទៀង និងលោក មឿន តុលា អតីតគណៈកម្មការរៀបចំបុណ្យជូនសពលោក កែម ឡី។
នៅក្នុងសេចក្តីថ្លែងការណ៍នោះ ក្រុមអង្គការក្រៅរដ្ឋាភិបាលចំនួន៣៥ បានលើកឡើងយ៉ាងដូច្នេះថា៖ «ការចោទប្រកាន់ ដែលគ្មានមូលដ្ឋាននេះ បានបង្ហាញយ៉ាងច្បាស់ពីការគំរាមកំហែង និងការយាយី ដើម្បីបំបិទសំឡេងសង្គមស៊ីវិល និងអ្នកការពារសិទ្ធិមនុស្ស នៅកម្ពុជា»។ ក្រុមអង្គការក្រៅរដ្ឋាភិបាលទាំងនោះ បានអះអាងក្នុងសេចក្តីថ្លែងការណ៍របស់ខ្លួនទៀតថា ក្រុមគ្រួសាររបស់លោក កែម ឡី បានច្រានចោលនូវបណ្តឹង ដែលប្តឹងអតីតគណៈកម្មការទាំងបី។ បើតាមសេចក្តីថ្លែងការណ៍នោះ ក៏បានបញ្ជាក់ថា ក្រុមគ្រួសាររបស់សពលោក កែម ឡី ក៏មិនបានគាំទ្របណ្ដឹងនោះទេ ហើយថែមទាំងហៅបណ្តឹងនេះថា ធ្វើឡើងដោយគ្មានមូលដ្ឋានទៀតផង។
ក្រៅពីស្នើឲ្យទម្លាក់ការចោទប្រកាន់លើអ្នកទាំងបីខាងលើ ក្រុមអង្គការក្រៅរដ្ឋាភិបាលទាំង៣៥ ក៏បានអំពាវនាវឲ្យអាជ្ញាធរកម្ពុជា បញ្ឈប់ជាបន្ទាន់នូវការធ្វើទុក្ខបុកម្នេញលើអង្គការក្រៅរដ្ឋាភិបាល។ ជាមួយគ្នានេះ ក្រុមអង្គការក្រៅរដ្ឋាភិបាលទាំងនេះ បានស្នើឲ្យរដ្ឋាភិបាល បើកផ្លូវឲ្យសង្គមស៊ីវិល ដំណើរទៅមុខ ដោយគ្មានការរឹតត្បិត និងការយាយី។
ភិក្ខុ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ លោក ប៉ា ងួនទៀង នាយកប្រតិបត្តិ នៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ និងលោកមឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ត្រូវគេសង្ស័យថា បានលួចកិបកេងថវិកា ដែលសប្បុរជនបានបរិច្ចាគ ក្នុងពិធីរៀបចំបុណ្យជូនសពលោក កែម ឡី អ្នកវិភាគនយោបាយដ៏ល្បីល្បាញមួយរូប ដែលត្រូវបានឃាតករបាញ់សម្លាប់ កាលពីថ្ងៃទី១០ ខែកក្កដា ឆ្នាំ២០១៦។ លោក ពេជ្រ ស្រស់ ប្រធានគណបក្សយុវជនកម្ពុជា បានធ្វើជាដើមបណ្តឹង ក្នុងការប្តឹងអ្នកទាំងបី ហើយលោក ពេជ្រ ស្រស់ ក៏ជាអ្នកស្នើទៅក្រសួងមហាផ្ទៃ ដើម្បីសុំរំលាយគណបក្សសង្គ្រោះជាតិផងដែរ។
បន្ទាប់ពីទទួលបានបណ្តឹងពីលោក ពេជ្រ ស្រស់ ប្រធានគណបក្សយុវជនកម្ពុជា នោះមក ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ បានដាក់ព្រះអង្គ ប៊ុត ប៊ុនតិញ លោក ប៉ា ងួនទៀង និងលោកមឿន តុលា ឲ្យស្ថិតក្រោមការឃុំខ្លួនជាបណ្តោះអាសន្ន ដោយចោទពីបទ «រំលោភលើទំនុកចិត្ត» ពាក់ព័ន្ធនឹងការគ្រប់គ្រងថវិកា សម្រាប់រៀបចំបុណ្យជូនសពលោក កែម ឡី។ ប៉ុន្តែបច្ចុប្បន្ន ព្រះអង្គ ប៊ុត ប៊ុនតិញ លោក ប៉ា ងួនទៀង កំពុងស្ថិតនៅឯក្រៅប្រទេសឯណោះ។ ដោយឡែក លោក មឿន តុលា ក៏ទំនងជាមិននៅក្នុងប្រទេសកម្ពុជាដែរ។ សំណុំរឿងរបស់អ្នកទាំងបី ត្រូវបានបញ្ជូនទៅកាន់ចៅក្រមស៊ើបសួរ ដើម្បីចាត់ការបន្ត។
ក្នុងដីកាសន្និដ្ឋានបញ្ជូនរឿងឲ្យស៊ើបសួរ ចេញដោយលោក គុជ គីមឡុង ព្រះរាជអាជ្ញារងអមសាលាដំបូងរាជធានីភ្នំពេញ បានចោទប្រកាន់ជាផ្លូវការទៅលើអតីតគណៈកម្មការបុណ្យសពលោកបណ្ឌិត កែម ឡី ចំនួនបីរូបពីបទ «រំលោភលើទំនុកចិត្ត» និងសម្រេចបញ្ជូនសំណុំរឿងនេះទៅចៅក្រមដើម្បីស៊ើបសួរបន្ត។ ព្រះរាជអាជ្ញារង គុជ គីមឡុង បញ្ជាក់ក្នុងដីកានោះថា ការសម្រេចចោទប្រកាន់នេះ ធ្វើឡើង ក្រោយការពិនិត្យលើសំណុំរឿង និងពាក្យបណ្តឹងរបស់លោក ពេជ ស្រស់ ប្រធានគណបក្សយុវជនកម្ពុជា។ នៅក្នុងដីកានោះ ក៏បានដាក់ឲ្យគណៈកម្មការបុណ្យទាំងបីរូប ស្ថិតក្រោមការឃុំខ្លួនបណ្តោះអាសន្ន ដោយសំអាងហេតុផលថា ដើម្បីបង្ការ និងទប់ស្កាត់កុំឲ្យមានបទល្មើសកើតឡើងជាថ្មី និងធានារក្សាជនត្រូវចោទ ទុកជូនតុលាការចាត់ការតាមនីតិវិធី៕