ភ្នំពេញ៖ ប្រធានគណបក្សសិទ្ធិមនុស្ស បានផ្ញើលិខិតទៅសម្ដេច ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ អំពីការរំលាយចោល គណបក្សសិទ្ធិមនុស្ស។
បើយោងតាមលិខិតរបស់លោក សឺន ស៊ូបែរ្តិ៍ ត្រូវបានបង្ហោះតាមរយៈផេកផ្លូវការរបស់លោក កឹម សុខា នៅម៉ោង២ និង៣៨នាទីរសៀល ថ្ងៃទី២៩ ខែមករា ឆ្នាំ២០១៨ នេះ បានបញ្ជាក់ថា «តាមសម័យប្រជុំ នៃគណៈកម្មាធិការអចិន្ត្រៃយ៍គណបក្សសិទ្ធិមនុស្ស បានសម្រេចជាឯកច្ឆន្ទ រំលាយគណបក្សសិទ្ធិមនុស្ស ចាប់ពីថ្ងៃនេះតទៅ»។
ទោះយ៉ាងណាលិខិតដែលដាក់ជូនក្រសួងមហាផ្ទៃនេះ មិនបានបញ្ជាក់អំពីមូលហេតុ នៃការសម្រេចរំលាយគណបក្សមួយនេះទេ។ ប៉ុន្តែលោក សឺន ស៊ូប៊ែរ្តិ៍ បានប្រាប់អ្នកសារព័ត៌មានក្នុងស្រុកថា គណបក្សនេះមានគម្រោងរំលាយជាយូរមកហើយ ពោលគឺតាំងពីគណបក្ស សម រង្ស៊ី និងគណបក្សសិទ្ធិមនុស្ស បានច្របាច់បញ្ចូលគ្នាមកម្ល៉េះ។ លោកបន្តថា គ្មានហេតុផលនៅពីក្រោយ ទាក់ទងនឹងការរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧នោះទេ ប៉ុន្តែបើទោះជាចង់បន្ត ក៏ «គ្មានប្រជាពលរដ្ឋគាំទ្រ» នោះដែរ។
ការប្រកាសរំលាយគណបក្សសិទ្ធិមនុស្ស នៅពេលនេះ គឺធ្វើឡើងស្របពេលដែល លោក កឹម សុខា អតីតប្រធានគណបក្សនេះ កំពុងជាប់ឃុំក្នុងពន្ធនាគារ ក្រោមការចោទប្រកាន់ពីបទ «ក្បត់ជាតិ» និងធ្វើឡើងស្របពេលដែលមានការប្រកាសពីបង្កើតចលនាសង្គ្រោះជាតិ ដែលកំពុងតែមានភាពចម្រូងចម្រាស នៅក្នុងអតីតគណបក្សសង្គ្រោះជាតិ រវាងភាគីមកពីគណបក្ស សម រង្ស៊ី និងគណបក្សសិទ្ធិមនុស្ស។
សូមអានខ្លឺមសារទាំងស្រុងដូចខាងក្រោម៖
