ខេត្តកំពង់ស្ពឺ៖ លោកស្នងការនគរបាលខេត្តកំពង់ស្ពឺ កាលពីព្រឹក ថ្ងៃទី២៤ ខែមករា ឆ្នាំ២០១៨ បានអញ្ជើញគ្រូគុនតេក្វាន់ដូ មកបង្ហាត់បង្រៀនដល់កងកម្លាំងនគរបាលក្នុងខេត្តរបស់ខ្លួន ដើម្បីបង្កើននូវសមត្ថកិច្ច ក្នុងការការពារខ្លួន និងបង្ក្រាបនូវបទល្មើសនានា។
មន្ត្រីនគរបាលខេត្តកំពង់ស្ពឺ បានឲ្យដឹងថា នៅក្នុងការបើកវគ្គហ្វឹកហ្វឺនក្បាច់គុនតេក្វាន់ដូ កាលពីព្រឹកមិញនេះ ធ្វើឡើង ក្រោមវត្តមានរបស់លោកឧត្តមសេនីយ៍ត្រី សម សាមួន ស្នងការនគរបាលខេត្ត និងមានការអញ្ជើញចូលរួមពីលោក លោកស្រី ស្នងការរង លោកអធិការក្រុង-ស្រុកទាំង៨។ រីឯគ្រូបង្គោល គឺមកពីតេក្វាន់ដូពន្លឺថ្មីខេត្ដ អង្គភាពអន្ដរាគមន៍ នៃអគ្គស្នងការដ្ឋាននគរបាលជាតិ គ្រូបង្វឹកប្រចាំស្នងការដ្ឋាននគរបាលខេត្ដ សរុបចំនួន១៥នាក់ ហើយសិក្ខាកាមដែលបានមកចូលរួមរៀនក្បាច់គុននេះ មានចំនួន៣៥នាក់ (ស្រី៧ នាក់) ដោយមន្ត្រីខ្លះ មកពីការិយាល័យជំនាញមួយចំនួន រួមមាន ការិយាល័យព្រហ្មទណ្ឌ ការិយាល័យនគរបាលចរាចរណ៍ ការិយាល័យ ប្រឆាំងបទល្មើស និងប្រឆាំងការជួញដូរមនុស្ស។
លោកឧត្តមសេនីយ៍ត្រី សម សាមួន ស្នងការនគរបាលខេត្តកំពង់ស្ពឺ បានឲ្យដឹងថា ការបើកវគ្គបង្ហាត់ក្បាច់គុននេះ គឺដើម្បីបង្កើននូវសមត្ថភាពផ្នែកកម្លាំងកាយសម្បទារឹងមាំ ប្រាជ្ញាស្មារតី លំហាត់ប្រាណដល់កងកម្លាំងនគរបាល ពិសេសរួមចំណែក ថែរក្សាសុខភាពទៀតផង។
ជាមួយគ្នានេះ លោកស្នងការនគរបាលដដែល បានណែនាំក្រើនរំឭកដល់សិក្ខាកាមទាំងអស់ ត្រូវតែខិតខំយកចិត្តទុកដាក់ ហ្វឹកហាត់ឲ្យចេះចាំស្ទាត់លើមេរៀនជំនាញដែលលោកគ្រូ បានបង្ហាត់បង្រៀន។ ក្នុងពិធីនោះ លោកស្នងការក៏បានឧបត្ថម្ភនូវសម្ភារមួយចំនួន ជូនដល់លោកគ្រូ រួមមាន ឧបករណ៍ហ្វឹកហាត់ ទឹកបរិសុទ្ធ ទឹកក្រូច ភេសជ្ជៈខារាបាវ និងថវិកាមួយចំនួនទៀត៕