ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅរសៀល ថ្ងៃទី២២ ខែមករា ឆ្នាំ២០១៨ ម្សិលមិញ បានថ្លែងថា រាជរដ្ឋាភិបាលគ្រោងនឹងធ្វើវិសោធនកម្មច្បាប់ ស្តីពីអន្តោប្រវេសន៍ និងច្បាប់ស្តីពីសញ្ជាតិ ឬឈានទៅធ្វើច្បាប់ថ្មី ដើម្បីដើរឲ្យទាន់នឹងសភាពការណ៍ នៃការប្រែប្រួលរបស់សង្គមកម្ពុជា នាពេលបច្ចុប្បន្ននេះ។ សម្ដេចបានថ្លែងបែបនេះ ក្នុងពិធីបិទសន្និបាតត្រួតពិនិត្យលទ្ធផលការងារអត្តសញ្ញាណកម្ម រយៈពេល៣ឆ្នាំ (២០១៤-២០១៧) និងលើកទិសដៅការងារបន្ដ របស់អគ្គនាយកដ្ឋានអត្តសញ្ញាណកម្ម នាទីស្តីការក្រសួងមហាផ្ទៃ។
សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានបញ្ជាក់ថា “ពាក់ព័ន្ធនឹងច្បាប់ទាំងពីរនេះ ក្រសួងមហាផ្ទៃ កាលពីពេលថ្មីៗនេះ បានទទួលនូវអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីពិនិត្យមើលចំពោះច្បាប់នេះផងដែរ ”។
យោងតាមរបាយការណ៍របស់អគ្គនាយកដ្ឋានអត្តសញ្ញាណកម្ម ដែលចែកជូនក្នុងអង្គសន្និបាត បានឲ្យដឹងថា ក្នុងពេលបច្ចុប្បន្ននេះ អគ្គនាយកដ្ឋានអត្តសញ្ញាណកម្ម បាន និងកំពុងរៀបចំសុំធ្វើវិសោធនកម្មច្បាប់សញ្ជាតិ និងបានសិក្សាបទពិសោធន៍ជាអន្តរជាតិមួយចំនួនសម្រាប់ត្រៀមដាក់ក្នុងសេចក្តីព្រាងច្បាប់វិសោធនកម្មច្បាប់សញ្ជាតិ បន្ទាប់ពីមានការបញ្ជាពីរដ្ឋមន្ត្រីក្រសួងមហាផ្ទៃ និងសម្តេចតេជោនាយករដ្ឋមន្ត្រីកម្ពុជា។ ជាមួយគ្នានេះដែរ អគ្គនាយកដ្ឋានអត្តសញ្ញាណកម្ម ក៏បានពន្យល់ថា ការផ្តល់សញ្ជាតិ គឺជាកិច្ចការអធិបតេយ្យភាពរបស់រាជរដ្ឋាភិបាល មានន័យថា ការសម្រេចផ្តល់សញ្ជាតិដល់អ្នកស្នើសុំជាឆន្ទានុសិទ្ធិរបស់រាជរដ្ឋាភិបាល ហើយអគ្គនាយកដ្ឋាន គ្រាន់តែធ្វើជាសេនាធិការលើការទទួលពិនិត្យសំណុំបែបបទ និងលើកយោបល់ ដោយផ្អែកតាមក្របខ័ណ្ឌច្បាប់ជាធរមានតែប៉ុណ្ណោះ។
តាមរបាយការណ៍ដដែលបានបញ្ជាក់ថា ចាប់ពីឆ្នាំ២០១៤ ដល់ឆ្នាំ២០១៧ ការងារសញ្ជាតិសម្រេចបានដូចជា ទទួលបានព្រះរាជក្រឹត្យផ្តល់សញ្ជាតិតូបនីយកម្ម ចំនួន១១០៨ច្បាប់ ក្នុងនោះតាមរយៈវិនិយោគទុន ចំនួន១០៥០ច្បាប់ ស្មើនឹង១០៦៨រូប ស្នាក់នៅ៧ឆ្នាំ ចំនួន៥៤ករណី ស្មើនឹង៦៤រូប ស្នាដៃពិសេស ចំនួន៤ករណី ស្មើនឹង៤រូប។ ទទួលបានព្រះរាជក្រឹត្យលើការទាមទារសញ្ជាតិ និងលះបង់សញ្ជាតិបានចំនួន១០០ច្បាប់ ស្មើ១០១នាក់ ក្នុងនោះ តាមរយៈអាពាហ៍ពិពាហ៍ ចំនួន៣១ច្បាប់ ស្មើនឹង៣១រូប លះបង់សញ្ជាតិចំនួន៦៩ច្បាប់ ស្មើនឹង ៧០រូប ។ បានជូនជនបរទេសដែលទទួលបានព្រះរាជក្រឹត្យចូលសញ្ជាតិខ្មែរទៅធ្វើការស្បថ នៅចំពោះមុខតុលាការកំពូល ចំនួន៧លើក ស្មើនឹង ៣៥១រូប៕