ភ្នំពេញ៖ សាលាដំបូងរាជធានីភ្នំពេញ បាលកៅហៅលោក ជា មុន្នី អតីតប្រធានសហជីពសេរីកម្មករកម្ពុជា ឲ្យចូលទៅបំភ្លឺ នៅព្រឹកថ្ងៃទី២២ ខែមករា ឆ្នាំ២០១៨ ចំថ្ងៃខួបទី១៤ឆ្នាំនៃការបាញ់សម្លាប់លោក ជា វិជ្ជា ដែលជាបងប្រុសរបស់លោក ប៉ុន្តែរហូតមកដល់ពេលនេះ លោក ជា មុន្នី មិនទាន់បង្ហាញខ្លួន នៅសាលាដំបូងរាជធានីភ្នំពេញនៅឡើយ។
ការកំណត់ពេលវេលារបស់ព្រះរាជអាជ្ញា ឲ្យលោក ជា មុន្នី ចូលបំភ្លឺក្នុងនាមជាសាក្សី នៅព្រឹកនេះ គឺចំថ្ងៃដែលប្រារព្ធខួបទី១៤ឆ្នាំ នៃការបាញ់សម្លាប់លោក ជា វិជ្ជា ដែលជាបងប្រុសបង្កើតរបស់លោក។ នៅព្រឹកនេះដែរ គេឃើញប្រធានសហជីព និងកម្មករ-កម្មការិនីមួយចំនួន បាននាំគ្នាយកកម្រងផ្កាទៅដាក់ នៅមុខរូបសំណាករបស់លោក ជា វិជ្ជា ដែលស្ថិតនៅជិតវិមានឯករាជ្យ ដើម្បីគោរពវិញ្ញាណក្ខន្ធរបស់លោក ជា វិជ្ជា។
លោក ជា មុនី កាលពីពេលថ្មីៗនេះ ត្រូវបានសហភាព និងសហព័ន្ធសហជីព ដែលមាននិន្នាការខាងរដ្ឋាភិបាល ដាក់ពាក្យបណ្ដឹងប្តឹងចោទប្រកាន់ពីបទញុះញង់ បន្ទាប់ពីលោក ជា មុន្នី បានផ្តល់បទសម្ភាសជាមួយវិទ្យុអាស៊ីសេរី ដោយអំពាវនាវឲ្យសហភាពអឺរ៉ុប ដាក់ទណ្ឌកម្ម មកលើរដ្ឋាភិបាលកម្ពុជា ដែលធ្វើឲ្យសហភាពនិងសហព័ន្ធសហជីព មិនពេញចិត្ត ហើយចាត់ទុកថា ទង្វើនេះគឺជាការញុះញង់។
លោក ដារ៉ា សុបញ្ញា និងលោក កេតុ សុវណ្ណឌី មេធាវីតំណាងឲ្យសហភាពនិងសហព័ន្ធសហជីព បានសរសេរក្នុងពាក្យបណ្តឹង កាលអំឡុងខែធ្នូ ឆ្នាំ២០១៧ កន្លងទៅ មានខ្លឹមសារថា «លោក ជា មុន្នី មានចេតនាចង់ឲ្យអ្នកបញ្ជាទិញទាំងអស់ ឈប់បញ្ជាទិញផលិតផលវាយនភណ្ឌ និងផលិតផលផ្សេងៗទៀត ដែលនាំចេញពីប្រទេសកម្ពុជា ទៅលក់នៅបណ្តាប្រទេសក្នុងទី្វបអឺរ៉ុប»។
តាមរយៈមេធាវីរបស់ខ្លួន សហភាពនិងសហព័ន្ធសហជីព ទាមទារឲ្យព្រះរាជអាជ្ញា ចោទប្រកាន់លោក ជា មុន្នី ទៅតាមច្បាប់ និងទាមទារឲ្យបង់ប្រាក់រហូតដល់១លានដុល្លារ។ លោកមេធាវីទាំងពីរនេះ ត្រូវបានព្រះរាជអាជ្ញា កោះហៅឲ្យចូលបំភ្លឺមុនលោក ជា មុន្នី កាលពីថ្ងៃទី៩ ខែមករា ឆ្នាំ២០១៨កន្លងទៅថ្មីៗនេះ។
ជាការកត់សម្គាល់ ដីកាកោះហៅ លោក ជា មុនី អតីតប្រធានសហភាពសហជីពសេរីកម្មករ នៃព្រះរាជាណាចក្រកម្ពុជា ធ្វើឡើងចំថ្ងៃ នៃខួប១៤ឆ្នាំ នៃឃាតកម្មបាញ់សម្លាប់ លោក ជា វិជ្ជា អតីតមេដឹកនាំសហជីពកម្មករដ៏ល្បីល្បាញ នៅកណ្តាលទីក្រុងភ្នំពេញ។ នៅថ្ងៃខួប១៤ឆ្នាំ នៃការបាញ់សម្លាប់លោក ជា វិជ្ជា គេឃើញមានប្រធានសហជីពនិងកម្មករ-កម្មការិនីមួយចំនួន នាំគ្នាទៅគោរពវិញ្ញាណក្ខន្ធរបស់លោក ជា វិជ្ជា ដោយមានដាក់កម្រងផ្កានៅមុខរូបសំណាករបស់លោក នៅជិតវិមានឯករាជ្យ។
នៅក្នុងខួបគម្រប់១៤ឆ្នាំ នៃឃាតកម្ម លោក ជា វិជ្ជា នៅថ្ងៃទី ២២ ខែមករា ឆ្នាំ២០១៨ នេះដែរ អតីតគណបក្សសង្រ្គោះជាតិវិញ ក៏បានចេញសេចក្តីថ្លែងការណ៍មួយ ដោយថ្លែងថា គណបក្សសង្រ្គោះជាតិ មិនអាចបំភ្លេចបាននូវវីរភាពរបស់លោក ជា វិជ្ជា ដែលបានលះបង់គ្រប់បែបយ៉ាង និងធ្វើពលិកម្ម ដើម្បីជួយកម្មករ កម្មការិនីខ្មែរ ប្រឆាំងនឹងការជិះជាន់ ឲ្យទទួលបានសិទ្ធិ សេរីភាព ផលប្រយោជន៍ និងលក្ខខណ្ឌការងារ ដែលការពារដោយច្បាប់ជាតិ និងអន្តរជាតិ។
ជាមួយគ្នានេះ អតីតមន្ត្រីគណបក្សសង្រ្គោះជាតិ ក៏បានអំពាវនាវឲ្យអាជ្ញាធរមានសមត្ថកិច្ចស៊ើបអង្កេត ស្រាវជ្រាវឲ្យបានពិតប្រាកដ ក្នុងការវែកមុខរកឃាតករពិត និងអ្នកនៅពីក្រោយខ្នងឃាតករ ដើម្បីនាំយកមកផ្តន្ទាទោសតាមច្បាប់ជាធរមាន។
ទោះជាយ៉ាងណា ទាក់ទិននឹងករណីខាងលើនេះ KBN មិនអាចទាក់ទងសុំការបំភ្លឺពីលោក ជា មុន្នី បានឡើយ៕