ភ្នំពេញ៖ ក្រោយពីលោក គី ឫទ្ធី ចៅក្រមស៊ើបសួរ នៃសាលាដំបូងរាជធានីភ្នំពេញ សម្រេចមិនអនុញ្ញាតឱ្យលោក កឹម សុខា អតីតប្រធានអតីតគណបក្សសង្គ្រោះជាតិ នៅក្រៅឃុំជាបណ្តោះអាសន្ននោះ មេធាវីការពារក្ដីជនត្រូវចោទនឹងបន្ដប្តឹងទៅសភាស៊ើបសួរ នៃសាលាឧទ្ធរណ៍ ដើម្បីចារណាដោះលែងលោក កឹម សុខា ឱ្យបាននៅក្រៅឃុំជាបណ្តោះអាសន្ន។
លោក ហែម សុជាតិ មេធាវីការពារក្ដីរបស់លោក កឹម សុខា បានឲ្យដឹងថា នៅថ្ងៃនេះ លោកនឹងប្តឹងបន្តទៅសភាស៊ើបសួរ នៃសាលាឧទ្ធរណ៍ ដើម្បីឱ្យសាលាឧទ្ធរណ៍ ពិចារណាដោះលែងលោក កឹម សុខា ឱ្យបាននៅក្រៅឃុំបណ្តោះអាសន្ន។
គួររម្លឹកថា លោក កឹម សុខា ប្រធានអតីតគណបក្សសង្គ្រោះជាតិ ត្រូវបានសមត្ថកិច្ចចាប់ខ្លួន កាលពីយប់រំលងអធ្រាត្រ ឈានចូល ថ្ងៃទី៣ ខែកញ្ញា ឆ្នាំ២០១៧ ក្រោមបទចោទប្រកាន់ពីបទក្បត់ជាតិ ហើយលោក កឹម សុខា ត្រូវបានតុលាការឃុំខ្លួន ដាក់ពន្ធនាគារជាបណ្តោះអាសន្ន កាលពីថ្ងៃទី០៦ ខែកញ្ញា ឆ្នាំ២០១៧។ យោងតាមបទចោទប្រកាន់«ក្បត់ជាតិ» ដែលអាចប្រឈមមុខនឹងការជាប់ពន្ធនាគារ ចន្លោះពី១៥ឆ្នាំ ទៅ៣០ឆ្នាំ។
ដោយឡែក អយ្យការអមសាលាដំបូងរាជធានីភ្នំពេញ បានឲ្យដឹងថា លោក កឹម សុខា ជាប់ចោទប្រកាន់ពីបទ «សន្និដ្ឋិភាពជាមួយបរទេស» យោងតាមមាត្រា៤៤៣ នៃក្រមព្រហ្មទណ្ឌ។ ទោះបីជាមានបណ្តឹងជំទាស់ និងបណ្តឹងសុំនៅក្រៅឃុំជាបន្តបន្ទាប់ក្តី ប៉ុន្តែកាលពីពេលថ្មីៗនេះ ទាំងសាលាឧទ្ធរណ៍ និងតុលាការកំពូល បានសម្រេចទាត់ចោលបណ្តឹងរបស់ក្រុមមេធាវីការពារក្ដីរបស់ឲ្យលោក កឹម សុខា ដែលប្តឹងប្រឆាំងនឹងដីកាសម្រេចឃុំខ្លួនលោក កឹម សុខា ដោយស្ថាប័នតុលាការអះអាងថា ការសម្រេចឃុំខ្លួន លោក កឹម សុខា ជារឿងត្រឹមត្រូវ ស្របតាមផ្លូវច្បាប់៕
